Read idoma 2 ÚKLƆ́ KÚ AƆ́CƐ́ 5 Bible Online

2 ÚKLƆ́ KÚ AƆ́CƐ́ 5 - idoma bible

2 ÚKLƆ́ KÚ AƆ́CƐ́ 5

¹Eko nɛ̄ Usólōmɔn le odúúdú úklɔ́ kú Agblīihɔ-nɛ̄hi ā yá kwɛyí ā, odúúdú ɛ̄gbā kú ugóolu (oje ɔdɔ), oje udɔ, oje nɛ̄hɛ́, mɛ́mla iyó ɔhá nɛ̄ ádā nū Udéfīdi kpó lɛ Óndú, Ɔwɔicō kú nū ā ú kpó tū ɛga ōkpó iyó kú ɛ̄gbā tū kú Agblīihɔ-nɛ̄hi ā.

²Anɔ́ɔ Usólōmɔn le odúúdú anyākwɔ́cɛ kú ipɔ́ɔma kú Ísrɛ̄lu ā kpó hīgwú wā í jīla Ujerúsālɛm, cɛ́ɛ́ kéē kwú ikpáti kú Ɛka kú Óndú ā ú ŋmá igelī nɛ̄hi kú Udéfīdi, nōo wɛ Usáyɔn ā ú ga ipú Agblīihɔ-nɛ̄hi ā.

³Anɔ́ɔ odúúdú uwá gaá le jīla eko kú ucɛ kú áklɔ̄kpɛ ā.

⁴Eko nɛ̄ odúúdú uwá le jīla kwɛyí ā, ayí kú Ulífāyi kwú ikpáti kú Ɛka kú Óndú ā ú ŋmá ajɛ.

⁵Anɔ́ɔ é kwú ɔ̄ ú bī ga ipú Agblīihɔ-nɛ̄hi ā. Ācogwɛ́ɛya ā mɛ́mla Ulífāyi ohile ā kwú áklɔ̄kpɛ nēé le ikpáti kú Ɛka kú Óndú ā háyi ipú nū gbɔbū ā mɛ́mla odúúdú iyó kú nū ú kpó ga ipú Agblīihɔ-nɛ̄hi ā dúú.

⁶Usólōmɔn, ɔcɛ́ mɛ́mla ójila kú ācɛ Ísrɛ̄lu gaá le jila iyɔ̄bū ikpáti kú okónu ōce kú Óndú ā, ipú Agblīihɔ-nɛ̄hi ā, anɔ́ɔ é bī álá mɛ́mla aɛ́na nɛ̄ ɛwa kú uwā í tōō gba áluka ŋ́, le gwɛ́ɛya lɛ Ɔwɔicō abɔ́ɔ ā.

⁷Anɔ́ɔ ācogwɛ́ɛya ā, kwú ikpáti kú Ɛka kú Óndú ā ú gaá háyi ɛga otīihɔ fíyɛ́ dúú ā, eyīpú kú Agblīihɔ-nɛ̄hi ā, ɛháajɛ kú aúcɛ́rōbim ɛpa ā.

⁸Acá kú aúcérōbim nōo nadaa ā klá ikpáti kú Ɛka kú Óndú ā mla ogbló nōo wu áklō kú nū, nēé gē bī le bī ɔ̄ ā.

⁹Aógbló nēé wu ɔ́ ā le likpō nɛ̄hi nɛ̄ ɔ̄cɛ dóódu nōo háyi iyɔ̄bū Ɛga nōo tīihɔ fíyɛ́ dúú ā lɔfú má ɛyí kú uwā glá, amáŋ ɔ̄cɛ dúúmā í má uwā ŋmá ɛcɛ glá ŋ́. Aógbló ā kē bá abɔ́ɔ jāā kwu eko nēé tɔ́kpá nyā ā.

¹⁰Ɔdā dúúmā ɔhá í klla yɔ̄ ipú ikpáti nyā gwū Usiléeti kú ɛcɔ̄ ɛpa kú íne nɛ̄ Umósīsi mīyɛ ŋmá ɛyí ɛfu kú Usáyínāyi, nɛ̄ Ɔwɔicō je lɛ uwá eko nēé yɔ̄ ī bɛ̄cɛ ŋmá Íjīpiti ā ŋ́.

¹¹ Eko nɛ̄ ācogwɛ́ɛya ā le pɛ́ wā ɛcɛ ŋmá Ɛga nōo tīihɔ fíyɛ́ dúú ā, odúúdú uwā nēe bá abɔ́ɔ ā le iyē kpó gwu, kwu aɛ́nɛ̄ e wɛ ígwu éyi amáŋ ka ɔhá.

¹²Odúúdú ayí kú Ulífāyi nēe gē gwíijē, Ásāfu, Uhɛ́mān, mɛ́mla Ujɛdútɔn, ayí uwā mɛ́mla aɔ́máapu uwā lɛ úwé nɛ̄hɛ́ kpó wiyē kpɛ́mm, anɔ́ɔ é bī aɔ́dā ō bī gwííjē kú uwá dóódu ā, anɔ́ɔ é háyi ɛnɔ̄ɔ̄cī kú ede ā mɛ́mla ācogwɛ́ɛya ofu ɛhīlī nēe bá yɔ̄ ī tá opo klla í tá ɛ́mula ā.

¹³Ó wɛ úklɔ́ kú ācɛ o tá opo, ācɛ o tá ɛ́mula mɛ́mla ācɛ o gwíijē mɛ́mla ɔdōgwíijē ā kéē bī ɔtū ékpó le gwííjē tɔ̄há cɛ́ɛ́ kéē cɛ̄tra Óndú ā lɛ ā, “Ohígbū ka Óndú ā lɔhi ihɔtū opiyóó ipú ɛcɛ nyā kú nū yɔ̄ piyóó.” Anɔ́ɔ ojuja kwu cē klá ipú Agblīihɔ-nɛ̄hi kú Óndú ā kpímmm.

¹⁴Anɔ́ɔ ojuja ā í cɛ̄ lɛ ācogwɛ́ɛya ā mɛ́ɛbɛ ɛ́ɛ́, nēé gē yúklɔ́ kú uwā gɛ ŋ́. Ohígbū ka ɛgahi kú Ɔwɔicō le mu Agblīihɔ-nɛ̄hi ā.