Read idoma 2 ÚKLƆ́ KÚ AƆ́CƐ́ 7 Bible Online

2 ÚKLƆ́ KÚ AƆ́CƐ́ 7 - idoma bible

2 ÚKLƆ́ KÚ AƆ́CƐ́ 7

¹Eko nɛ̄ Usólōmɔn le ɔkɔ gbā kwɛyí ā, ɔlá ŋmá ɔkpáncō gāajɛ gaá kwú iyó ɛya o yɔlá dúúdú ā mla ɛya nēé gwó lɛ Ɔwɔicō ú kpó yi ŋmá ajɛ dúúdú. Anɔ́ɔ ɔlá ō ceyī ŋmáŋmáŋmá kú ɛgahi kú Ɔwɔicō le mu Agblīihɔ-nɛ̄hi á.

²Ācogwɛ́ɛya ā í bēhé ga ipú Agblīihɔ-nɛ̄hi ā gaá gwɛ́ɛya glá ŋ́, ohígbū ka ɔlá ōfíyajɛ kú ɛgahi kú Óndú ā le mu ipú inu ā.

³Eko nɛ̄ ācɛ ā le ɔlá nōo ŋmá ɔkpáncō wā ajɛ ā má ā. É kwú okwúukwu ú kpó tāajɛ gblugudu leyī pīya klā ajɛ, yɔ̄ ī gbā Óndú ā ɛ̄gbā, ohígbū ɔdā olɔhi nɛ̄ ó yá lɛ uwá ā mɛ́mla ihɔtū kú nū nɛ̄ ó gē mɛ ŋ́ mā.

⁴Anɔ́ɔ Usólōmɔn mɛ́mla odúúdú ācɛ ā le ɛya gwó lɛ Óndú ā á.

⁵É bī aɛ́na úlā ofɛpa ce igwɛ́ɛhɔ̄ (20,000), mla aálá úlā ofu igwɛ́ɛhɔ̄ (120,000) nēé bī le gwɛ́ɛya kú olétɔ̄há. Anɔ́ɔ anú mɛ́mla ācɛ a kwú Agblīihɔ-nɛ̄hi ā ú tū Ɔwɔicō abɔ̄ á.

⁶Ācogwɛ́ɛya ā háyi, ɛga nēé je lɛ uwá ā, anɔ́ɔ ācɛ Ulífāyi, ācogwíijē ā háyi leyī pīya kwu uwá, anɔ́ɔ é bá ī gwííjē klla bá ī cɛ̄tra Óndú ā mla ɔdā ō bī gwííjē nɛ̄ Udéfīdi kpó lɛ uwá ā. É bá í gwííjē kahíníī, “Ihɔtū kú Óndú ā yɔ̄ piyóó ipú ɛcɛ nyā.” Ɛ́gɛ́nɛ̄ Udéfīdi nwū uwā eko dúú nɛ̄ ó gē cɛ̄tra Óndú ā mla ije ō gwó kú ahínyá ā. Ācogwɛ́ɛya ā bá ī tá opo abɔ̄ ācɛ Ísrɛ̄lu o hile kē háyi abɔ́ɔ ā.

⁷Anɔ́ɔ Usólōmɔn le odúdɔ̄lɛ́ kú Agblīihɔ-nɛ̄hi ā gwu, le inalegwu tá klá anú. Anɔ́ɔ ó le ɛya kú ɔdā ō je yɔlá dúúdú mɛ́mla ɛya kú ijē kú ɛbɛ́ mɛ́mla ɛya kú olétɔ̄há ɛbɔ́ gwó abɔ́ɔ á. Ohígbū ka ede kú oje udɔ nɛ̄ ó gwó ā í jɛ̄ odúúdú ɛbɛ́ kú ɛya o yɔlá dúúdú ā mɛ́mla ɛya kú ijē ɛbɛ́ mɛ́mla ɛya kú īkpɔ̄dā ā glá ŋ́.

⁸Usólōmɔn mɛ́mla ojila kú ācɛ Ísrɛ̄lu ā lé ucɛ kú áklɔ̄kpɛ ā abɔ́ɔ ɛ̄cī ahāapa. Ɛwa nɛ̄hi kú ācɛ Ísrɛ̄lu ā bá mla anú, ɛwa ā bá ŋmá ɔwɛ kú Uhamáti jāā ga okónu ɔkpá kú Íjīpiti ɛháajɛ.

⁹É lé ucɛ kú ede o je tū Óndú ā abɔ̄ ā ɛ̄cī ahāapa abɔ́ɔ. É klla kē lé ucɛ kú áklɔ̄kpɛ ā ɛ̄cī ahāapa dúú. Ɛ̄cī ɔ́mahātá ā, é le jīla, anɔ́ɔ é le ucɛ kú eko nēé yá ŋmá abɔ́ɔ ā lé.

¹⁰Anɔ́ɔ o ŋmɔ́ɔ̄cī nū nōo wɛ ɛ̄cī ofu ce ɛtá kú ɔyā ahāapa ā, Usólōmɔn lɛ ācɛ ā kpó yáwa ga ɔlɛ́ uwā. Ɔtū he uwá nɛ̄hi, ohígbū ɔhá dóódu nɛ̄ Ɔwɔicō hɛ́ ce ācɛ ɔlɛ́ nū, Ísrɛ̄lu, Udéfīdi mɛ́mla Usólōmɔn ā.

¹¹Eko nɛ̄ Usólōmɔn le Agblīihɔ-nɛ̄hi mɛ́mla agblɔ̄cɛ́ kú nū ā gwó kwɛyí klla lɛ odúúdú úklɔ́ kú nū ā yá ā,

¹²Óndú ā gā ɛgiyí nū otú, gaá da ɔ́ kahíníī, “N lɛ ɔkɔ nāa gbā ā pó ɛɛ́. N kē miyɛ Agblīihɔ-nɛ̄hi nāa gwó gā um ā, kóō wɛ ɛga nēé géē gwɛ́ɛya gā um.

¹³Eko dúúmā nɛ̄ ń cɛ̄ lɛ ɔwɔ yá ŋ́, ámāŋ ka eko nɛ̄ n lɛ efūma tū gaá kwú ɔdɛ̄hɔ̄ kú aá ú kpó lé, ámāŋ n lɛ ōcē obɔ̄bí tū klā ajɛ kú aá.

¹⁴Ɔ́dāŋ́ ka ācɛ ɔlɛ́ um nēe líyē kwu um ā, tíne ō má eyī kú um, lɛ īyī wā tū wāajɛ, lɛ ɔkɔ gbā ga um, anɔ́ɔ é le pīyabɔ̄ ŋmá íne nēé bīya mɛ́mla ɔ́bíipú kú uwá, eko ɔ́ɔmā, n géē pó ɔkɔ nēé gbā gā um ā ŋmá ɔkpáncō. N klla í je íne nēé bīya ā yá uwā ɛhi klla í yá kú ajɛ kú uwā kóō kwú lɔhi kpɔ́.

¹⁵Eyī kú um má kwu Agblīihɔ-nɛ̄hi nyā ɛɛ́. Ɔkɔ dóódu nēé géē gbā gā um amānyā ā, n géē pó klla í cīla ɔkɔ nēé gbā ɔ́ɔmā.

¹⁶Ohígbū ka n kwú amānyā ú klla lɛ ɔ́ gwu kóō géē wɛ ɛga nēé géē gbā um ɛ̄gbā piyóó. N géē leyīkwu amānyā klla í gbō ɔ̄ eko dóódu.

¹⁷Ɔ́dāŋ́ ka a gbā um kpaakpa ɛ́gɛ́nɛ̄ ádā uwɔ Udéfīdi gbā um, klla lɛyítáajɛ le íne kú um dóódu, klla í yá ɔdā dóódu nɛ́ ádā uwɔ ka awɔ yá ā,

¹⁸Okónu nɛ̄ n ce lɛ ádā uwɔ Udéfīdi ā, n géē lɛ ɔ́ tū. Okónu nɛ̄ n ce lɛ ɔ́ kahíníī, “Ayí nū géē bá ī lé ɔcɛ́ kú Ísrɛ̄lu piyóó.”

¹⁹Amáŋ ɔ́dāŋ́ ka awɔ mɛ́mla ācɛ ɔlɛ́ uwɔ gbɔɔ́ ō yá īkpɛ̄yí olɔfú tá um, nɛ̄ aá lɛyí táajɛ le íne kú um, nɛ̄ n je lɛ aá ā ŋ́, nɛ̄ aá gbɔɔ́ ō gbā aɔ́wɔ ɔhá ɛ̄gbā klla gbɔɔ́ ō pā ɛcí,

²⁰n géē je aá kpó ŋmá ipú ajɛ nɛ̄ n je lɛ aá ā. N klla í cīgbīhi kwu Agblīihɔ-nɛ̄hi nāa gwó gā um nyā ā. Ācɛ nēe bá ɛga dóódu géē bī Agblīihɔ-nɛ̄hi ā lɛ kwiita klla í leyī gwū ɔ̄ bónū

²¹“Agblīihɔ-nɛ̄hi nyā lɛ ojīlīmā nɛ̄hi, amáŋ ó géē yá ɛjɛ̄ɛ̄jī ācɛ nēe géē wā í yɛ pī ɔ̄ ā eyījii cɛ́ɛ́ é géē dɔɔ̄kā ka ɔdíyá nɛ̄ Óndú ā yá Agblīihɔ-nɛ̄hi mla ajɛ kú nū ɔdā ɛ́gɛ́nyā a?

²²Ācɛ géē tá uwá ohi ka, ‘Ohígbū kēé kwú igbīhi ú cē kwu Óndú, Ɔwɔicō kú uwā nōo kpó aádáádā uwā bɛ̄cɛ ŋmá Íjīpiti ā. É kwú ɔtū kú uwā ú lɛ aɔ́wɔ ɔhá, anɔ́ɔ é gbɔɔ́ ō gbā uwā ɛ̄gbā klla gbɔɔ́ ō cɛ̄ uwā ɛhɔ̄. Ɔ́ɔmā yá ɛ́ɛ́ nɛ̄ Óndú ā bī ífi nyā wā í kla uwá mla Agblīihɔ-nɛ̄hi nēé gwó lɛ anú nōo wɛ Óndú ā ā.’”