Read idoma 2 ÚKLƆ́ KÚ AƆ́CƐ́ 8 Bible Online

2 ÚKLƆ́ KÚ AƆ́CƐ́ 8 - idoma bible

2 ÚKLƆ́ KÚ AƆ́CƐ́ 8

¹Iháyí ofu nɛ̄ Usólōmɔn bī le gwó Agblīihɔ-nɛ̄hi mɛ́mla agblɔ̄cɛ́ kú nū mɛ á.

²Ó le aígelī nɛ̄hi nɛ̄ Uhíram, ɔcɛ́ kpó lɛ ɔ́ ā túgwó, anɔ́ɔ ó le ācɛ kú Ísrɛ̄lu kpó í lā ipú uwā á.

³Ó mīyɛ ajɛ kú Uhámati mɛ́mla Usóba.

⁴Ó klla le igá kú ɔdɔ hɛ́ tū aígelī nɛ̄hi kú Utádimɔ ipú ígbíli mɛ́mla odúúdú aígelī nɛ̄hi nɛ̄ ó gwó Uhamáti gē kpó aíyó kú nū tū ā.

⁵Usólōmɔn klla le aígelī nɛ̄hi nēe bá nyā tūgwó dúú, ɛhíícō mɛ́mla ɛháajɛ kú Ubɛti Uhórɔn, ó klla le igá kú ɔdɔ mɛ́mla ákú oje hɛ́ tū uwā mla aódūngwɔ̄ɔwɛ dúú.

⁶Ó le Ubáalāt, ɛga nɛ̄ ó gē kpó iyó kú nū tū ā, mɛ́mla odúúdú aígelī nɛ̄hi nōó gē kpó ɔnya mɛ́mla úgbɔ́nya mla ācɛ o ce ɔnya kú nū tū ā kpó tú gwó. Ó klla kē le odúúdú ɔlɛ́ nɛ̄ ó tíne ō gwó Ujerúsālɛm, Ulɛ́bānɔn mɛ́mla ābɔ̄ ɛga dóódu ajɛ ɔlɛ́ nū nɛ̄ ó gē gbō ā túgwó dúúdú.

⁷Odúúdú ācɛ nēé wɛ ācɛ Ísrɛ̄lu ŋ́ mā a, ācɛ Uhám, Ámɔn, Upɛ́risi, ācɛ Uhɛ́ti, mɛ́mla Ujébūsi,

⁸nēe hile ŋmá ipɔ́ɔma kú uwá, nɛ̄ Ísrɛ̄lu í kpó yíífi ŋ́ mā, Usólōmɔn le uwá kpó tū úklɔ́ abɔ̄fú kú nū. Úklɔ́ ɔ́ɔmā nēé gē yá jāā kwu eko nēé tɔ́kpá nyā á.

⁹Ācɛ kú Ísrɛ̄lu abɔ̄yī uwā ā í wɛ ipú úklɔ́ abɔ̄fú kú Usólōmɔn nyā ŋ́. Amáŋ é wɛ aícɔ́ɔja kú úgbɔ́nya, aícɔ́ɔja īkpó mɛ́mla ācɛ okpɛ́fú ɔnya.

¹⁰Aígabɔ̄ nēe gē leyīkwu úklɔ́ abɔ̄fú kú Usólōmɔn ā wɛ ofu igwóléyi ce igwó. É bá gē jīla úklɔ́ ɔlɛ́ kú nū eko dóódu mla ɛga dóódu.

¹¹Usólōmɔn kwu ɔnyā nū, ɔyínɔ̄nyā kú Uféro, nɛ̄ ó lɛ ā ú ŋmá igelī nɛ̄hi kú Udéfīdi ā gaá lā inu nɛ̄ ó gwó lɛ ɔ́ ōfōōfūnū ā. Anɔ́ɔ ó da ɔ́ kahíníī, “Á gáā lā ipú agblɔ̄cɛ́ gɛ ŋ́, ohígbū ka ɛga dúúmā nɛ̄ ikpáti kú ɛka kú Óndú ā yɔ̄ ɛɛ́, abɔ́ɔ ā wɛ ɛga otīihɔ.”

¹²Usólōmɔn klla gwɛ́ɛya ɛyí ede nōo gwó lɛ Óndú ā iyɔ̄bū Agblīihɔ-nɛ̄hi ā.

¹³Ɛ̄cī-ōtīihɔ dóódu, ó géē gwɛ́ɛya kú aɔ́dā ō yɔlá dúúdú lɛ Óndú ā, ɛ́gɛ́nɛ̄ íne kú Umósīsi ka lɛ ā. Ɛ̄cī Usábāti, ɔyā ɛ̄yīpɛ̄, ucɛ kú igbɛtá kú iháyí dóódu ā, ucɛ kú igbō nɛ̄ ó gē nū ŋ́ mā, ucɛ kú ɔdɛ̄hɔ̄ ō cē, ucɛ kú áklɔ̄kpɛ

¹⁴Abɔ̄ ó gē yɛce íne nɛ̄ Umósīsi mɛ́mla ádā nū Udéfīdi le táajɛ ā, ó le úklɔ́ kɔ̄ lɛ ācogwɛ́ɛya mɛ́mla ayí kú Ulífāyi nēe gē tá ācogwɛ́ɛya abɔ̄ ā. Ipú ijē ōgwó mla úklɔ́ ɔhá kú Agblīihɔ-nɛ̄hi ā. Ó klla lɛ ācogbɔ̄ɔwɛ kú Agblīihɔ-nɛ̄hi ā kɔ̄ ígwíígwu kú úklɔ́ kú uwā, ɛ́gɛ́nɛ̄ Udéfīdi, ɔ̄cɛ kú Ɔwɔicō ā da ɔ́ lɛ á.

¹⁵Ɔ́da nɛ̄ Udéfīdi je lɛ ācogwɛ́ɛya mɛ́mla ācɛ Ulífāyi ohígbū inu kú ɛga ókpíyó tū kú ipú Agblīihɔ-nɛ̄hi ā, Usólōmɔn má ka é lɛ odúúdú nū tū.

¹⁶Ŋméeko nɛ̄ Usólōmɔn le ikpó inu kú Agblīihɔ-nɛ̄hi mɛ́mla agblɔ̄cɛ́ kú nū tá ajɛ ā, odúúdú úklɔ́ ā yɛ lɔhi jāā ga ajɛ.

¹⁷Usólōmɔn le tá Ɛ́siyɔngɛ́ba mɛ́mla Ɛlɔ̄ti okónu ísu kú Ákwāba ā, ipú ajɛ kú Ɛ́dɔm.

¹⁸Uhíram, ɔcɛ́ kú abɔ́ɔ ā le úgbéenyi nɛ̄ ācɛ ɔlɛ́ nū gē pɛ́ abɔ̄yī uwā ā tɛ̄hɔ̄ fu Usólōmɔn. Uwá mla ācɛ kú ɔlɛ́ Usólōmɔn le tá ajɛ kú Ófiri gaá le ugóolu (oje ɔdɔ) bī gé lɛ Usólōmɔn. Ɔ́lá kú ɔdā ɔ́ɔmā fíyɛ́ ɛkpa ije ofu ɛhɔ̄ ce igwó.