Read idoma 2 ÚKLƆ́ KÚ AƆ́CƐ́ 9 Bible Online

2 ÚKLƆ́ KÚ AƆ́CƐ́ 9 - idoma bible

2 ÚKLƆ́ KÚ AƆ́CƐ́ 9

¹Ɔcányā kú Ussɛ́ba le ofu kú ijéeyī mɛ́mla ɔfú kú Usólōmɔn pó, anɔ́ɔ ó le yɛ jāā wā Ujerúsālɛm bī ɔ̄kā o lɔnɔ ō cīla nɛ̄hi gaá le já Usólōmɔn má á. Ācɛ alɛwa yɛ ce ɔ́ wā. Ó klla bī aɔ́nya mɛ́mla aínyankwūlūmī kú nū nɛ̄ ó gbō iyó kú aɔ́dā nēe bá ā ce uwá igbīhi: ugóolu (oje ɔdɔ), oje udɔ, oje nɛ̄hɛ́ mɛ́mla ɛdɔ kú aépū dóódu dúú. Eko nɛ̄ anú mɛ́mla Usólōmɔn gaá le jīla ā, odúúdú ɔ̄kā nōo yɔ̄ ipú ɔtú kú nū ā, ó le kpó da Usólōmɔn

²Usólōmɔn lɛ odúúdú ɔ̄kā kú nū ā kpó cīla kpɛ́mm. Ɔ̄kā kú nū dúúmā í lɔnɔ tū Usólōmɔn ō cīla ŋ́.

³Ó le íjééyī kú Usólōmɔn mɛ́mla agblɔ̄cɛ́ kú nū ā má.

⁴Ó má ɔdōlé kú ɔlɛ́ ɔcɛ́, ɛga ōcice kú aígabɔ̄ kú nū, īlī ōwu iyē yúklɔ́ kú uwā, īlī kú ācɛ nēe bá gē cɛ̄ ɔcɛ́ ɛhɔ̄ ōfōōfūnū ā, mɛ́mla ɛya nɛ̄ ó gē gwó ipú Agblīihɔ-nɛ̄hi ā. Okónu í kōō hɛ́ ɔ̄ ɛ́ɛ́ nɛ̄ ó gē má ɔdā dúúmā ka ŋ́. Ó le hídáagó lɛ abɔ̄ caagba cíí.

⁵Anɔ́ɔ ó da Usólōmɔn kahíníī, “Ɔdā nɛ̄ n pó ɔlɛ́ um ohígbū íjééyī mɛ́mla ohílīpú kú uwɔ ā wɛ ɔkwɛ̄yi nɛɛ ōō.

⁶Ɔ̄kā kú uwɔ dóódu nēé kā um ā, ń cɛ̄ odúúmā ŋ́ jāā gbéeko nɛ̄ ami abɔ̄yī um gaá lɛ ɔ́ má eyī. Ń klla pó āyā kú ɔdā nɛ̄ n gaá ma eyī abɔ̄yī um nyā ŋ́. A jéeyī fíyɛ́ ɛ́gɛ́nɛ̄ ācɛ ka lɛ ā.

⁷Ɛ́gɛ́nyā nɛ̄ ɛyí lɔhi lɛ ācɛ nēe gē yúklɔ́ gā awɔ ā lɛ ā, uwá nēe bá iyɔ̄bū uwɔ eko dóódu gē pó ɛlā kú íjééyī kú uwɔ nyā ā.

⁸N cɛ̄tra Óndú, Ɔwɔicō kú uwɔ. Ɛlā kú uwɔ he ɔ́ ɔtú nɛ̄hi, anú yá ɛ́ɛ́ nɛ̄ ó je uwɔ ce ɔcɛ́ á, cɛ́ɛ́ kú ā bī iyē kú nū le gbāajɛ. Ohígbū koó yíihɔtū tá ācɛ ɔlɛ́ nū, Ísrɛ̄lu klla tíne ōle uwá tū piyóó ipú ɛcɛ nyā, anɔ́ɔ ó lɛ uwɔ pīya ɔcɛ́ kú uwā cɛ́ɛ́ káā bī ɛpɔ̄ okpaakpa le gbō uwā á.”

⁹Anɔ́ɔ ó kwú ɛhi nɛ̄ ó bī wā ú kpó lɛ Usólōmɔn. Aɔ́dā kú ɛhi á kē bá á: oje udɔ, anɔ̄, oje nɛ̄hɛ́, ugóolu (oje ɔdɔ) mɛ́mla ɛdɔ iyó ɔhá dóódu. Ɛdɔ anɔ̄ okpócu nɛ̄ ɔcányā kú Ussɛ́ba je lɛ Usólōmɔn ā, ɛdɔ nū ɔhá í yɔ̄ gbóógbóō ɛɛ́ gɛ ŋ́.

¹⁰Ācɛ ɔlɛ́ Uhíram, ɔcɛ́ ā mɛ́mla ācɛ ɔlɛ́ Usólōmɔn nēe gaá bī ugóolu (oje ɔdɔ) ŋmá Ófiri gē lɛ ɔ́ ā kē bī ɔcí kú Ujúnīpa mɛ́mla ɛcɔ̄ ōgbɔɔlá ŋmá abɔ́ɔ, gé lɛ Usólōmɔn dúú.

¹¹Usólōmɔn bī ɔcí ɔ́ɔmā le agidigbé ō yɛ ga icō kú Agblīihɔ-nɛ̄hi ā gbā. Ó klla bī ɔcí ā le gbā agidigbé kú agblɔ̄cɛ́ kú nū, ó le ɔ́ yá ɛ̄ngwū, úmōlō, mɛ́mla aɔ́dā oōbī gwííjē ɔhá dóódu. Nɛ̄ ɛdɔ nū í yɔ̄ ipú ajɛ kú Ujúda jéjée ɛɛ́ ŋ́.

¹²Ɔdā dóódu nɛ̄ ɔcányā kú Ussɛ́ba ba ŋmá ɛgiyí Usólōmɔn ā, ó le kpó lɛ ɔ́. Anɔ́ɔ anú mɛ́mla ācɛ ɔlɛ́ nū kwúcē le pɛ́ ga ɔlɛ́ uwá á.

¹³Iháyí dóódu Usólōmɔn gē mīyɛ ígbó ugóolu (oje ɔdɔ) úlā ce ofu igwɛ́ɛtá ce ɛhīlī (666).

¹⁴Aɔ́dā kú élí nɛ̄ ācotɔ́hí gē tá lɛ ɔ́ ā wɛ ipú agbénú kú nū dúú. Aɔ́cɛ́ kú Árābu mɛ́mla aígbómína kú ɛyí ajɛ kú Ísrɛ̄lu dóódu ā gē bī oje ɔdɔ (ugóolu) mla oje nɛ̄hɛ́ gé lɛ ɔ́.

¹⁵Usólōmɔn lɛ ɔkplɛ́fú ofu igwó kú ugóolu (oje ɔdɔ) nēé ca báajɛ pátáká nōo gbɛnú lɛbɛ̄ɛka ákú īkpīje nēé hī usɛ́kɛlu úlā ce ofu igwɛ́ɛta ce ɛhīlī ā.

¹⁶É bī ugóolu (oje ɔdɔ) nēé ca báajɛ pátáká ā nōo gbɛnú bɛ̄ɛka ákú īkpīje nēé hi usɛ́kɛlu úlā ce ofu igwɛ́ɛta ce ɛhīlī ā, le yá éyééye kú aɔ́kplɛ́fú nɛ̄ŋcɛ́ ofu igwɛ́ɛhɔ̄ yá ā. Ó kwu odúúdú uwá ú kpó bá inu kú ūpū ɛga ōjīla kú Ulébānɔn ā.

¹⁷Ó cɛ̄ lɛ uwá le akpa nɛ̄hi kú ɔcɛ́ gbā lɛ ɔ́. Ɛga ōhī kú nū wɛ oje ɔdɔ (ugóolu), āyā ōhī kú nū wɛ oje nɛ̄hɛ́.

¹⁸Agidigbé kú úbɔ́ ɛhilī yɛ gicō akpa kú ɔcɛ́ ā. É bī ugóolu (oje ɔdɔ) le ɛga ō kpó ikpó ce yá tū ɔ̄ dúú. Ó lɛ ɛga o kpó abɔ̄ ce dúú. Ó klla lɛ īkpɛ̄yí kú ágábá yá kwu abɔ̄ kú nū ɛplɛ́ɛpa ā.

¹⁹Īkpɛ̄yí kú ágábá igwɛ́ɛpa nēé yá kwu ɛga ōyɛ gicō kú nū ā lɛ eyī pīya kwu íyī uwā. Ɛdɔ akpa kú ɔcɛ́ kú nū nyā í yɔ̄ ɛga dóódu kú ɛcɛ jéjée ɛ́ɛ́ ŋ́.

²⁰Ugóolu (oje ɔdɔ) nēé bī le yá odúúdú íkókwū kú nū á. Anú nēé klla bī le yá odúúdú iyó kú ɔdōlé kú agbla kú ójīla kú Ulébānɔn ā dúú á. Oje nɛ̄hɛ́ lɛbɛ̄ɛka ɔdā nɛ̄ ó wɛ ɔdā dúúmā ŋ́ mā eko kú Usólōmɔn ā.

²¹Ó lɛ a úgbéenyi alɛwa nēe gē ga iyāwu mɛ́mla aúgbéenyi kú ɔcɛ́, Uhíram ā. Iháyí ɛtá dóódu aúgbéenyi kú nū a gē pīyɛyí gē bī ugóolu (oje ɔdɔ), oje udɔ, mla oje nɛ̄hɛ́, aáfūlɔ, mɛ́mla aígbáanɔ lɛbɛ̄ɛka okokońkofí ā gé lɛ ɔ́.

²²Usólōmɔn lɛ ɔdu klla jéeyī fíyɛ́ odúúdú aɔ́cɛ́ kú odúúdú ɛcɛ ā.

²³Odúúdú aɔ́cɛ́ kú ɛcɛ ā gē wā ī da ɔ́ ɔ̄kā kéē má íjééyī mɛ́mla ohílīpú nɛ̄ Ɔwɔicō je lɛ ɔ́ ā.

²⁴Odúúmā kú uwá nōo gē wā ā, gē bī ɛhi kú ugóolu (oje ɔdɔ), oje udɔ, oje nɛ̄hɛ́, anɔ̄, aɔ́nya, otóŋgwō mɛ́mla iyɔ́fú, aɛ́na mɛ́mla aíjakī gé lɛ ɔ́. É gē wā lɛ ā iháyí dóódu.

²⁵Áklɔ̄kpɛ o kpó aúgbɔ́nya mɛ́mla aɔ́nya kú Usólōmɔn abɔ̄yī nū bá ā gē bī aúgbɔ́nya mɛ́mla aɔ́nya úlā igwó (4,000). Ó klla lɛ ācɛ o ce ɔnya úlā igwɛ́ɛpa ce ofu igwó, nɛ̄ ó kpó bá ipú aígelī nɛ̄ŋcɛ́ ɛga o kpó aúgbɔ́ɔya bá kú nū. Ó klla kē kpó ācɛ o ce ɔnya ōhī bá ipú Ujerúsālɛm dúú

²⁶Anú ōfōōfūnū gē gbāājɛ ŋmá ísu kú Uyúfarétīisi jāā ga Ufilístiya mɛ́mla ɛjī kú Íjīpiti ā.

²⁷Eko ɔcɛ́ kú Usólōmɔn ā, oje nɛ̄hɛ́ kpɔ Ujerúsālɛm bɛ̄ɛka ɛcɔ̄ ā. Ɔcí kú usɛ́da klla kpɔ ɛga dóódu bɛ̄ɛka ɔcí nēé hī ka usíkāmɔ ā.

²⁸Usólōmɔn gē lá ɔnya ŋmá Umúsiri mɛ́mla ajɛ éwɔhá dóódu ā.

²⁹Odúúdú ɔ̄kā kú ɔcɛ́ kú Usólōmɔn jāā ga oŋmɛ́yí ā, é le ɔ́ tá tū ipú ɔkpá kú ígwú ō gbo nɛ̄ ɔ̄comɛ́ɛbɛ Unátan tá tāajɛ ā mɛ́mla ipú ɔkpá kú ɛbɛ nɛ̄ Ahíja kú Ussílo má ā, mɛ́mla ipú ɔkpá kú ɔ̄comɛ́ɛbɛ Íddo ā. Ó klla le ɔ̄kā tá ohígbū Ujérobōwam, ɔcɛ́ kú Ísrɛ̄lu ā dúú.

³⁰Usólōmɔn wɛ ɔcɛ́ kú Ísrɛ̄lu iháyí ofɛpa.

³¹Usólōmɔn gekwú anɔ́ɔ é kwú ɔ̄ ú nyi igelī nɛ̄hi kú Udéfīdi ā. Anɔ́ɔ ɔyí nū Uréhobōwam lɛ ɔcɛ́ lé kwɛyí nū á.