Read idoma Ɛ́SRA 10 Bible Online

Ɛ́SRA 10 - idoma bible

Ɛ́SRA 10

¹Abɔ̄ Ɛ́sra le okwúukwu kwaajɛ iyɔ̄bú Agblīihɔ-nɛ̄hi kú Óndú ā yɔ̄ í gbɔ̄ɔkɔ klla yɔ̄ ī jikwū nɛ̄hi klla yɔ̄ í ka íne nēé bīya ā tɛ́ɛcɛ ā, ācɛnyīlɔ mɛ́mla ācɛnyā mɛ́mla ayípɛ̄ gāá le jīla tū ɔ̄ biílí klla bá í jikwū, bá í tɛ̄gíkwú mla anú dúú.

²Anɔ́ɔ Ussɛkaníya, ɔyí kú Ujéhīyɛlu nōo ŋmá ipɔ́ɔma kú Ɛ́lam ā da Ɛ́sra kahíníī, “Alɔ le íne bīya klla le okónu nɛ̄ alɔ ce mla Ɔwɔicō ā tányíla ɛɛ́, o ŋmá lɛ anyā kú éwɔhá nɛ̄ alɔ lɛ ā. Nááná alɔ leyīce ka ó géē lɔhi glá kpɔ́.

³Alɔ le okónu ce klla lɛ ɛka gbo lɛ Óndú, Ɔwɔicō kú alɔ ka alɔ géē kpó anyā éwɔhá nɛ̄ alɔ lɛ ā, mɛ́mla ayí wā nū ga ɔlɛ́ uwá. Ɔdā dúúmā nɛ̄ awɔ mɛ́mla ācɛ ɔhá nēe gē pó ɛlā kú Óndú ā, klla í lɛ ojīlīmā ce ɔ́ ā, da alɔ ka alɔ yá, alɔ géē yá ɔ́. Ɔdā dóódu nɛ̄ íne kú Ɔwɔicō ka ohígbū ɛ̄nyā ā, alɔ géē yá ɔ̄, klla í lɛyítáajɛ lɛ ɔ́.

⁴Ó wɛ úklɔ́ kú uwɔ ká ā da alɔ ɔdā nɛ̄ alɔ géē yá ā. Ɔdá dúúmā nāa géē yá ā, alɔ í tá uwɔ igbīhi géē yá ɔ nyɔ̄.”

⁵Anɔ́ɔ Ɛ́sra le yá kú ācogwɛ́ɛya, ācɛ Ulífāyi, aótrɛ̄yí mɛ́mla anyākwɔ́cɛ kú Ísrɛ̄lu mɛ́mla odúúdú ācɛ ohile kú Ísrɛ̄lu kéē lɛ ɛka gbo ka aá ɔ́ɔ géē yá ɔdā nɛ̄ Ussɛkaníya ɔ́ɔ je tɛ́ɛcɛ lɛ aá ā.

⁶Anɔ́ɔ é le pɛ́ ŋmá iyɔ̄bū Agblīihɔ-nɛ̄hi kú Óndú ā ga ipɔ́ɔnū kú Ujehóhānan, ɔyí kú Ɛlíyāssibu gaá le gbo abɔ́ɔ gbó ɔ̄cī. É bā í yɔ́tūnōbí kú íne nēé bīya mɛ́mla ɛyí nɛ̄ é le táajɛ lɛ Ɔwɔicō ŋ́ mā. Ɛ́sra í lé ɔdōlé ɛ́ɛ́ nōó gē gwá ɔdā dúúmā ŋ́.

⁷É lɛ ɛhɔ̄ tū ŋmá abɔ́ɔ fu odúúdú ācɛ Ujúda mɛ́mla ācɛ Ujerúsālɛm ka odúúdú ācɛ nēe pīyɛyí wā ɔlɛ́ ŋmá Ubábīlɔn ā kéē gaá le jīla Ujerúsālɛm.

⁸Ɛhɔ̄ nyā wɛ ɔ́da nɛ̄ anyākwɔ́cɛ kú ācɛ ā je á. Ɔ́dáŋ ka ipú ɛ̄cī ɛtá nyā nɛ̄ ɔ̄cɛ dúúmā í wā Ujerúsālɛm ɛga nɛ̄ ācɛ í jīla ā ŋ́, é géē mīyɛ odúúdú agbénú kú nū klla í je ɔ́ nū ŋmá ipú ācɛ kú Ísrɛ̄lu.

⁹Ipú ɛ̄cī ɛtá nēé je ɔ́ɔmā, ɛ̄cī igwɛ́ɛpa kú ɔyā ahāanɛ ā, odúúdú ācɛ kú Ujúda mla Ubénjamīn mɛ́mla ācɛ nēe bá Ujerúsālɛm ā, gaá le jīla Ujerúsālɛm iyɔ̄bū eyīyɛ̄cɛ kú Agblīihɔ-nɛ̄hi kú Óndú ā. Ɔwɔ yɔ̄ í yá eko ɔ́ɔmā nɛ̄hi, ohígbū ɛ́gɛ́nɛ̄ iyē hīlaŋdɔ́ lɛ ā mɛ́mla ogbɛnú kú ɛlā nōo kpó uwā wā í jīla ā, odúúdú uwā bā í fīyégbúlú kpákpákpá.

¹⁰Anɔ́ɔ Ɛ́sra, ɔ̄cogwɛ́ɛya ā cāŋjɛ le ɛlā ka lɛ uwá kahíníī, “Aá le íne kú Óndú ā bīya, o ŋmá lɛ anyā kú éwɔhá nɛ̄ aá lɛ ā, aá le ɛpɔ̄bí kú Ɔwɔicō bī wā í klá ācɛ Ísrɛ̄lu ɛyí ɛɛ́ n.

¹¹Abālɔbányā, aá lɛ íne nɛ̄ aá bīya ā ka tɛ́ɛcɛ lɛ Óndú, Ɔwɔicō kú aádáádā aá ā, cɛ́ɛ́ kú aá yá ɔdā nōo he Óndú ā ɔtū ā. Aá lɛ éwɔhá dóódu nōo lā ipú ajɛ kú aá ā, mɛ́mla odúúdú anyā éwɔhá nɛ̄ aá lɛ ā kpó nū ŋmá ipú aá.”

¹²Odúúdú uwá dɛ̄gba klla tá ɔ̄ ohi kahíníī, “ɔdā dúúmā nāa ka ā, alɔ géē yá ɔ̄.

¹³Amáŋ ɛwa ā nwuné nɛ̄hi, ɔwɔ klla yɔ̄ í yá nɛ̄hi. Alɔ í māhayi ipú ɔwɔ nyā amānyā yá ɛ̄nyā glá ŋ́. Ɛlā nōo yɔ̄ nyā í wɛ ɔdā kú ɛ̄cī ɛpa mɛ́mla ɛ̄cī ɛtá ŋ́. Ohígbū ka alɔ alɛwa bīya íne nyā á.

¹⁴Aótrɛ̄yí kú alɔ kéē má bá Ujerúsālɛm kéē leyīkwu ɛlā nyā. Aá lɛ ɛ̄cī tū kú ɔnyɔɔnyɛ nōo lɛ ɔnyā kú éwɔhá ā kóō wā ipú ɛ̄cī nɛ̄ aá tū ɔ̄ ā, mla anyākwɔ́cɛ kú ɔlɛ́ nū mɛ́mla ācōkɛpɔ̄ kú ɔlɛ́ nū. Ɔwɛ nyā Ɔwɔicō géē pīya ɔtū kú nū abɔ̄ lɛyíkwu ɔnū nɛ̄ ó cɛ̄ tū alɔ ohígbū ɛlā nyā ā.”

¹⁵Ɔ̄cɛ dúúmā ɔhá í táafú tū ɛlā nɛ̄ ó ka ā ŋ́, ayíka Ujonátan ɔyí kú Ásāhɛlu mɛ́mla Ujásēya ɔyí kú Utíkifa mɛ́mla Uméssūlam mɛ́mla Ussabetáyi ācɛ ɛpa kú Ulífāyi nēe yɛ ce uwá ā.

¹⁶Odúúdú uwā nēe pīyɛyí ŋmá Ubábīlɔn wā ɔlɛ́ ā, mīyɛ ɛlā ā, anɔ́ɔ Ɛ́sra ɔ̄cogwɛ́ɛya ā, le ācɛ fu ŋmá ipú aótrɛ̄yí kú ipɔ́ɔma kú uwá dóódu ā. Ó klla le iyē kú uwá kpó tá tāajɛ. Ɛ̄cī aflɛ́yí kú ɔyā igwó kú iháyí ɔ́mpa nēé pīyɛyí wā ɔlɛ́ ā, é gbɔɔ́ ō bɔkwu ɛlā kú ɔnyā kú éwɔhá nēé lɛ ā.

¹⁷Uwá yúklɔ́ nyā ɔyā ɛtá, anɔ́ɔ é lɛ odúúdú ācɛ nēe lɛ ɔnyā éwɔhá ā kpó jé á.

¹⁸Ɛnyā wɛ iyē kú odúúdú ācɛ nēe lɛ anyā éwɔhá ŋmá ipɔ́ɔma kú Ísrɛ̄lu dóódu ā á. Ipɔ́ɔma kú ācogwɛ́ɛya ā, ɔkwu kú Ujessúwa mɛ́mla ɔyínɛ́ nū Ujehósādaki ā, é wɛ Umaásēya, Ɛlíyēsa, Ujárību mɛ́mla Ugédalīya.

¹⁹É le okónu ce ka aá ɔ́ɔ géē tá anyā ā. Anɔ́ɔ é kwú omlede ú wā kú ɔdā ɛ̄gbā kú ɛya kú íne nēé bīya ā.

²⁰Ācɛ nēe ŋmá ipɔ́ɔma kú Úma ā wɛ Uhanáni mɛ́mla Usebadíya.

²¹Ācɛ nēe ŋmá ipɔ́ɔma kú Uhárim ā wɛ, Umaaséya, Ɛláyíja, Ussɛmáya, Ujéhīyelu, mɛ́mla Usíya.

²²Ācɛ nēe ŋmá ipɔ́ɔma kú Upássɔ ā wɛ, Ɛliyonáyi, Umáasīya, Íssimɛ̄lu, Unatánīyɛlu, Ujósābadi mɛ́mla Ɛlása.

²³Ācɛ nēe ŋmá ipɔ́ɔma kú ayí kú Ulífāyi ā wɛ, Ujosábādi, Ussímēyi, Ukeláya, nēé gē hī ka Ukélita dúú ā, Upétahīya, Ujúda mɛ́mla Ɛlíyēsa.

²⁴Ācɛ nēe ŋmá ipɔ́ɔma kú ācogwíijē, ayí kú Ulífāyi dúú ā wɛ, Ɛlíyāssibu. Ipú ācogbɔ̄ɔwɛ kú Agblīihɔ-nɛ̄hi ā, é wɛ, Ussálum, Utélem mɛ́mla Úri.

²⁵Ācɛ o hile kú uwá wɛ, Upárōssi Urámīya, Ísiya, Umálikīja, Umijámin, Ɛlísa, Umálikīja mɛ́mla Ubenáya ŋmá ipɔ́ɔma kú Upárōssi.

²⁶Ācɛ nēe ŋmá ipɔ́ɔma kú Ɛ́lam ā wɛ, Umɛtánīya, Usekaríya, Ujéhīyelu, Ábudi, Ujérēmɔti mɛ́mla Ɛláyíja.

²⁷Ācɛ nēe ŋmá ipɔ́ɔma kú Usátu ā wɛ, Ɛliyonáyi, Ɛlíyāssibu, Umɛtánīya, Ujérēmɔti, Usábādi mɛ́mla Asísa.

²⁸Ācɛ nēe ŋmá ipɔ́ɔma kú Ubébāyi ā wɛ, Ujehóhānan, Uhananíya, Usábāyi mɛ́mla Atīlayi.

²⁹Ācɛ nēe ŋmá ipɔ́ɔma kú Ubáni ā wɛ, Uméssūlam, Umállūci, Adáya, Ujássūbu, Usíili, mɛ́mla Ujérēmɔtu.

³⁰Ipɔ́ɔma kú Upahatimówābu ā, é wɛ, Ádīna, Ukélalu, Ubénaya, Umaaséya, Umɛtánīya, Ubɛsalélu, Ubinúwi mɛ́mla Umanásɛ.

³¹Ācɛ nēe ŋmá ipɔ́ɔma kú Uhárim ā wɛ, Ɛlíyēsa, Usssíja, Umálikīja, Ussɛmáya, Ussímēyɔn,

³²Ubénjamīn, Umállūci mɛ́mla Ussɛmárīya.

³³Ācɛ nēe ŋmá ipɔ́ɔma kú Uhássum ā wɛ, Umatɛnáyi, Umɛtáta, Usábādi, Ɛlífēlɛti, Ujeremáyi, Umanásɛ mɛ́mla Usímēyi.

³⁴Ācɛ nēe ŋmá ipɔ́ɔma kú Ubáni ā wɛ, Umáadi, Ámram,

³⁵Ubenáya, Ubedéya, Ucelúhi,

³⁶Ufaníya, Umérēmɔtu, Ɛlíyāssibu,

³⁷Umɛtánīya, Umatɛnáyi, mɛ́mla Ujáásu.

³⁸Ācɛ nēe ŋmá ipɔ́ɔma kú Ubinúwi ā wɛ, Ussímēyi, Ussɛlɛmíya,

³⁹Unátan, Adáya, Umakinadébāyi,

⁴⁰Umakinadébāyi, Ussássāyi, Ussaráyi,

⁴¹Asárɛlu, Ussɛlɛmíya, Ussɛmárīya,

⁴²Ussállum Amárīya mɛ́mla Ujósɛ̄fu.

⁴³Ācɛ nēe ŋmá ipɔ́ɔma kú Unébo ā wɛ, Ujéyēlu, Ujówɛ̄lu mɛ́mla Ubenáya.

⁴⁴Odúúdú ācɛ nēé cɔ̄ɔcí nēe bá ajɛ nyā lɛ anyā éwɔhá kpɛ́mm. Anɔ́ɔ é tá odúúdú anyā éwɔhá kú uwā ā mɛ́mla ayí nɛ̄ anyā éwɔhá ā ma lɛ uwā ā. É klla lɛ odúúdú anyā ā mɛ́mla ayí uwā kpó nū ŋmá ipú ajɛ kú ɔlɛ́ uwā.