Read idoma Ɛ́SRA 3 Bible Online

Ɛ́SRA 3 - idoma bible

Ɛ́SRA 3

¹Ɛplá ɔyá ahāapa ā, odúúdú ācɛ kú Ísrɛ̄lu ā má lā aígelī nɛ̄ŋcɛ́ kú uwā. Anɔ́ɔ odúúdú uwá gaá le jīla Ujerúsālɛm.

²Anɔ́ɔ Ujessúwa ɔyí kú Ujehósādaki mɛ́mla ācogwɛ́ɛya ɔ́mpa nū, Userúbābɛlu ɔyí kú Ussɛ́litīyɛlu mɛ́mla aɔ́máapú nū le ede kú Ɔwɔ́icō kú Ísrɛ̄lu ā túgwó. Cɛ́ɛ́ kéē géē gwɛ́ɛya ɛyí nū, ɛ́gɛ́nɛ̄ é tá ɔ̄ tāajɛ ipú ɔkpá kú íne kú Umósīsi, ɔ̄cɛ kú Ɔwɔicō ā lɛ ā.

³Nááná[1] nɛ̄ ācɛ nēe pīyɛyí wā ɔlɛ́ ā gē yúufi ācɛ nēe lā ajɛ ā, é le ede ā tú ma kwu ɛga nōó tɛtɛ kwu gbɔ̄bū ā. Anɔ́ɔ é gbɔɔ́ ō gwɛ́ɛya kú ɔdā o yɔlá dúúdú lɛ Óndú ā ɔcɔ̄ɔ̄cī mɛ́mla ɔ̄nɔ̄ɔ̄nɛ̄ á.

⁴É yá ucē kú áklɔ̄kpɛ ɛ́gɛ́nɛ̄ é tá ɔ̄ tāajɛ ipú ɔkpá kú íne lɛ ā. Ɛ̄cī éyééye, é gē gwɛ́ɛya nōo cɛgbá ɛ̄cī ɔ́ɔmā

⁵É klla gwɛ́ɛya ɔlamu nēé gē je ɔdā ɛ̄gbā yɔlá dúúdú ā mɛ́mla ɛya nēé gē gwó eko kú ucɛ kú ɔyā ɛ̄yīpɛ̄ mɛ́mla ɛya ɔhá nēé ī gwó eko nēé gē jīla ojigógó kéē gbā Óndú ā ɛ̄gbā dúú. É klla í je ɛdɔ ɛhi dóódu ŋmá ɔtū kú uwā eko nēé ī gbā Óndú ā ɛ̄gbā

⁶Abɔ̄ ācɛ kú Ujúda ā í gbɔɔ́ ō gwó Agblīihɔ-nɛ̄hi kú Óndú ā ɔhá ɛ́ɛ́ ŋ́ nááná ā, é gbɔɔ́ ō gwɛ́ɛya lɛ Óndú ā ɛ̄cī aflɛ́yí kú ɔyā ɔ́mahāapa ā.

⁷Ɛ́gɛ́nɛ̄ Usáyírɔ̄si, ɔcɛ́ kú Upɛ́sīya je ɔ́da lɛ uwá lɛ ā, é lɛ ije da kéē le gbā ulé lɛ ācogwínu mɛ́mla ācogbɔ̄cí. É le ɔdōlé mla ɔdōgwá, mɛ́mla anɔ̄ kú ɔcí nɛ̄ é hī ólífu ā, kpó fūla ɔcí kú Usɛ́da cédar ŋmá ɛgīyī ācɛ Usáyídɔn mɛ́mla Utáya, nēé gēe kpó gé lɛ uwá ŋmá Ulɛ́bānɔn bū eyī ísu ā.

⁸Ipú ɔyā ɔ́mpa kú iháyí ɔ́mpa nēé wā í jīla ipú Agblīihɔ-nɛ̄hi kú Óndú ā, é gbɔɔ́ ō gwó Agblīihɔ-nɛ̄hi ā. Userúbābɛlu mɛ́mla Ujessúwa mɛ́mla ācɛ kú Ujúda o hile mɛ́mla ācogwɛ́ɛya, mɛ́mla ayí kú Ulífāyi mɛ́mla odúúdú ācɛ ɔhá nēe pīyɛyí wā Ujerúsālɛm mla uwá ā, le abɔ̄ kpó tū úklɔ́ ō yá dúú. É le odúúdú ayí kú Ulífāyi nēe ŋmá iháyí ofu gɔbū ā fu kéē leyīkwu úklɔ́ kú Agblīihɔ-nɛ̄hi ō tú gwó ā.

⁹Ujésuwa, ɔ̄cɛ Ulífāyi ā mɛ́mla ayí nū, mɛ́mla ɔmáapú nū, mɛ́mla Ukádimīyelu mɛ́mla ayí nū, mɛ́mla ayí kú Ujúda klla gaá wɛ ipú ācɛ nēe leyīkwu o túgwó kú Agblīihɔ-nɛ̄hi kú Óndú ā.

¹⁰Abɔ̄ é gbɔɔ́ ō lɛ etikpa kú Agblīihɔ-nɛ̄hi ā tá ajɛ ā, ācogwɛ́ɛya nēe le awulú kpó wiyē ā, le túháyi, bī opo abɔ̄. Anɔ́ɔ ācɛ Ulífāyi nēe wɛ ayí kú Ásāfu ā, kē háyi abɔ́ɔ, bī anwa kú oje abɔ̄ kéē gwíijē ō cɛ̄tra Óndú ā ɛ́gɛ́nɛ̄ Udéfīdi, ɔcɛ́ kú Ísrɛ̄lu mafú lɛ uwá lɛ ā.

¹¹É gwíijē ō cɛ̄tra klla yɔ̄ ī tá Óndú ā ahínyá. É gwó, é klla cɛ̄ tū ɔ̄. “Óndú ā lɔhi, ó lɛ ihɔtū ogbóógbóō ipú ɛcɛ lɛ Ísrɛ̄lu.” Anɔ́ɔ odúúdú ācɛ o hile ā le ɔkɔ cɛyí dɛ̄gba gbōmgbōm mla odúúdú ɔfú kú uwá bā í cɛ̄tra Óndú ā, ohígbū etikpa kú Agblīihɔ-nɛ̄hi kú Óndú ā nēé je tá ajɛ ā.

¹²Anyākwɔ́cɛ kú ācogwɛ́ɛya, mla ayí Ulífāyi ā, mɛ́mla anyākwɔ́cɛ kú ipɔ́ɔma dóódu nēe má Agblīihɔ-nɛ̄hi kú aflɛ́yí nɛ̄ Usólōmɔn gwó ā. É gbɔɔ́ ō jikwū eko nēé yɔ̄ ī lɛ etikpa kú Agblīihɔ-nɛ̄hi kú Óndú ā táajɛ igbɔhá ā. Amáŋ ācɛ ɔhá nēe bá abɔ̄ ā, bá í gwéeyē.

¹³Ɛ́gɛ́nɛ̄ uya kú uwā nwuné lɛ ā, ɔ̄cɛ dúúmā í jé ācɛ nēe bá í gwéeyē ámāŋ ka ācɛ nēé bá gē jikwū ā ŋ́.