Read idoma Ɛ́SRA 4 Bible Online

Ɛ́SRA 4 - idoma bible

Ɛ́SRA 4

¹Aólɛlā kú ācɛ kú Ujúda mɛ́mla Ubénjamīn le pó ka, ācɛ kú Ujúda mɛ́mla Ubénjamīn nēe pīyɛyí ŋmá Ubábīlɔn ā, gbɔɔ́ ō gwó Agblīihɔ-nɛ̄hi kú Óndú, Ɔwɔicō kú Ísrɛ̄lu igbɔhá ɛɛ́.

²Anɔ́ɔ é le tá ɛgīyī Userúbābɛlu mɛ́mla aótrɛ̄yí kú ipɔ́ɔma ā, gaá da uwá kahíníī, “Alɔ wā gáā gwó Agblīihɔ-nɛ̄hi ā mla aá dúú. Alɔ mɛ́mla aá gē gbā Ɔwɔicō ékpónú ɛ̄gbā á. Alɔ kē húmáyī í gwɛ́ɛya lɛ Óndú ā dúú ŋmíífī nɛ̄ Esahádɔn, ɔcɛ́nɛ̄hi kú Asírīya kpó alɔ wā í lā amānyā ā.”

³Anɔ́ɔ Userúbābɛlu mɛ́mla Ujessúwa mɛ́mla aótrɛ̄yí mɛ́mla anyākwɔ́cɛ kú Ujúda mɛ́mla Ubénjamīn ā tá uwá ohi kahíníī, “Alɔ í cɛgbá ō tábɔ̄ kú aá, ɛ́ɛ́ kú alɔ gwó Agblīihɔ-nɛ̄hi kú Óndú, Ɔwɔicō kú alɔ ŋ́. Alɔ géē gwó Agblīihɔ-nɛ̄hi kú Óndú ā abɔ̄yī alɔ ɛ́gɛ́nɛ̄ Usáyírɔ̄si, ɔcɛ́nɛ̄hi kú Upɛ́sīya ā je ɛga klla da alɔ lɛ ā.”

⁴Anɔ́ɔ éwɔhá nēé kpó wā í lā ajɛ kú Ujúda eko nēe kpó ācɛ kú Ujúda ga Ubábīlɔn ā, gbɔɔ́ ō yá kú ɔtū kú ācɛ kú Ujúda nēe pīyɛyí ā, kóō gbenyi, é klla gbɔɔ́ ō tū uwá ufi, cɛ́ɛ́ kéē híī gwó Agblīihɔ-nɛ̄hi kú Óndú ā gɛ ŋ́.

⁵Aólɛlā kú ācɛ Ujúda ā, klla je omíci lɛ aígabɔ̄ kú igɛ́mɛ́nti kú Upɛ́sīya kéē lɛ úklɔ́ kú Agblīihɔ-nɛ̄hi ā ci. É bā í je unwalu nyā lɛ ācɛ kú Ujúda ŋmá eko nɛ̄ Usáyírɔ̄si wɛ Ɔcɛ́nɛ̄hi ā, jāā gbéeko nɛ̄ Udáyírɔsi je pīya ɔcɛ́nɛ̄hi kú Upɛ́sīya igbɔhá ā.

⁶Ɔkwɔɔkwu nɛ̄ Ahásɛ̄rɔ̄si, le ɔcɛ́nɛ̄hi lé ā, aólɛlā kú ācɛ kú Ujúda mɛ́mla Ujerúsālɛm nēe lā mla uwá abɔ́ɔ ā, lɛ ɔkpá tá ce uwá ga ɛgīyī ɔcɛ́.

⁷Eko nɛ̄ Átasásɛsi klla lɛ ɔcɛ́nɛ̄hi kú Upɛ́siya lé ā, Ubísilam, Umítirédati, Utábīyɛlu mɛ́mla aígwu kú uwā ā, le ɔkpá tá ce ācɛ kú Ujúda mɛ́mla Ujerúsālɛm ga ɛgīyī ɔcɛ́nɛ̄hi[2] É tá ɔkpá ā okónu kú Aramáyīki, ɛ́ɛ́ nēé gē cɛ̄ ɔwɔ kú nū eko nēé gēe jé ɔ á

⁸Uréhum, nōo wɛ igbómína ā, mɛ́mla Ussímssāyi, nōo wɛ ɔmálɛ o tɔ́kpá kú odúúdú ajɛ ā, lɛ ɔkpá ā tá ce Ujerúsālɛm gé lɛ Átasásɛsi.

⁹Ɔkpá nēé tá ā kahíníī, “Ami Uréhum, igbómína kú Ujúda ā, mɛ́mla Ussímssāyi, Ɔmálɛ o tɔ́kpá ā, mɛ́mla odúúdú aígabɔ̄ kú alɔ, mɛ́mla aɔ́cɛ́ ohɛ́pɔ̄ mɛ́mla aígabɔ̄ ɔhá nēe ŋmá Érēki, ācɛ Ubábīlɔn, mɛ́mla ācɛ Usúsa nēe ŋmá ajɛ kú Ɛlam ā,

¹⁰mɛ́mla odúúdú ācɛ ɔhá nɛ̄ Assɔbanípalu kpó ŋmá ɔlɛ́ uwā gaá lā aígelī nɛ̄hi kú Usamérīya ā, mɛ́mla ācɛ ɔhá dóódu nēe lā ajɛ ɔhá dóódu kú ɛnɔ̄ɔ̄nɛ̄ kú Uyúfarétīisi ā.”

¹¹Ɛ̄nyā wɛ ɔdā nēé tá tū ɔkpá ā á: “Ɔkpá nyā gé lɛ Átasásɛsi, Ɔcɛ́nɛ̄hi ā, ŋmá ɛgiyí ācocɛ̄hɔ̄ kú nū nēe wɛ ācɛ kú ɛnɔ̄ɔ̄nɛ̄ kú Uyúfarétīisi.

¹²“Ɔcɛ́, alɔ tíne ká ā le jé ka, ācɛ Ujíyu, nēe ŋmá ipú ajɛ kú uwɔ wā í lā Ujerúsālɛm amānyā a, klla gbɔɔ́ ō tū igelī nɛ̄ ācɛ nēe lā anú ā bɔ̄bíipú, klla ī yíikpɛ̄yí olɔfú ɔ́ɔmā gwó igbɔhá ɛɛ́. É gbɔɔ́ ō ma ɔdɔ ā ɛɛ́, é kē í je ɔ́ ma kwɛyí eko kpií nōo í wā ā.

¹³Ɔ́dáŋ ka Ágábáidu habɔ̄ uwā tá, nēé lɛ igelī kú Ujerúsālɛm ā gwó, klla lɛ ɔdɔ kú nū ā gwó, é klla gáā cɛ̄ tá élí gā uwɔ gɛ ŋ́. Ó lɛ ā, ije nāa í lɛ ŋmá ajɛ kú uwɔ ā kē í tū wāajɛ nɛ̄hi.

¹⁴Abɔ̄ alɔ ī lé ŋmá abɔ̄ uwɔ ā, alɔ bī ɔ ulé ō má ka ɔ̄cɛ dóódu í nyá uwɔ ojīlīmā kú uwɔ ŋ́, Ágábáidu. Ohígbū ɔ́ɔmā, Ágábáidu, alɔ gē da ɔcɛ́ ka,

¹⁵lɛ ācɛ fu kéē lɛ ɔkpá kú aɔ́dā nɛ̄ aádáádā uwɔ tá tāajɛ ā jila. A géē má ka ācɛ ā wɛ ācɛ obɔ̄bí mɛ́mla ācɛ o yíkpɛ̄yí olɔfú, nēe klla í je unwalu lɛ aɔ́cɛ́ dóódu ŋmíífī íkée ā. É wɛ ígwu kú ācɛ nēe tōō gbō ŋ́. Ɔdā nōo yá ɛ́ɛ́ nēé je igelī nɛ̄hi kú uwā yíífi ā yɔ̄ á.

¹⁶Ohígbū ɔ́ɔmā, alɔ má klla cɛ̄ ka, ɔ́dáŋ keé kwú igelī nɛ̄hi ā í gwó klla kwu ɔdɔ kú igá kú nū ā ú gwó mɛ, Ágábáidu, á klla gáā fu ācɛ kú ɛnɔ̄ɔ̄nɛ̄ kú Uyúfarétīsi ā iyē ɛ́ɛ́ nāa gē gbō uwā glá ɛ́ɛ́ gɛ ŋ́.”

¹⁷Ɔcɛ́nɛ̄hi ā le ohi kú ɔkpá kú uwā ā tá gē lɛ uwá kahíníī, “Uréhum igbómína kú Ujúda, Ussímssāyi, ɔmálɛ o tɔ́ɔ́kpá, mɛ́mla odúúdú ācɛ kú uwā mɛ́mla aígabɔ̄ dóódu nēe lā Ujerúsālɛm mɛ́mla Usamérīya mɛ́mla ɛnɔ̄ɔ̄nɛ̄ kú Uyúfarétīisi ā, n hɛ́ okónu tū odúúdú aá.

¹⁸Ɔkpá nɛ̄ aá tá fu um ā, é lɛ ɔwɔ kú nū cɛ̄ klla lɛ ɔ jé gā um.

¹⁹N kē lɛ ɔ́da je ɛ́gɛ́nɛ̄ aá ka lɛ ā, é kē lɛ ɔkwu kú ācɛ Ujerúsālɛm bū, n kē má ka, ŋmíífī íkée ā, é wɛ ācɛ obɔ̄bí, nēe tōō gbō ŋ́, é klla ī yíkpɛ̄yí olɔfú mɛ́mla unwalu eko dóódu ɔkwɛ̄yi.

²⁰Aɔ́cɛ́ o lɔfú nɛ̄hi gbāajɛ abɔ̄ dúú klla mīyɛ ije élí ŋmá ɛgiyí ācɛ kú ɛnɔ̄ɔ̄nɛ̄ kú Uyúfarétīisi ā dúú.

²¹Ohígbū ɔ́ɔmā ā, n lɛ ɔ́da je lɛ ācɛ nēe bā í gwó igelī nɛ̄hi kú Ujerúsālɛm ā, kéē mā úklɔ́ ā tá jāā gbéeko nēé klla lɛ ɔ́da ɔhá pó ŋmá ɛgiyí um.

²²Lɛ ɔ́da nyā je lɛ uwá gā um lɔhi, cɛ́ɛ́ kéē klla yā ɔdā ɔhá nōo gē bīya íkwu mɛ́mla iyē kú ɔcɛ́ gɛ ŋ́.”

²³Ɔkwɔɔkwu nɛ̄ Uréhum mɛ́mla Ussímssāyi mīyɛ ohi kú ɔkpá nēé tá ŋmá ɛgíyí ɔcɛ́ Átasásɛsi ā, é le yɛ bōōbū gaá lɛ ācɛ Ujíyu nēe bā í gwó igelī nɛ̄hi kú Ujerúsālɛm ā, úklɔ́ ā ci.

²⁴Úklɔ́ kú Agblīihɔ-nɛ̄hi kú Óndú ō gwó ā, gaá kwɛjī ɛga éyi, jāā gbéeko kú iháyí ɔ́mpa kú eko nɛ̄ Udáyīrɔ̄si lé ɔcɛ́ kú Upɛ́sīya.