Read idoma Ɛ́SRA 5 Bible Online

Ɛ́SRA 5 - idoma bible

Ɛ́SRA 5

¹ Eko ɔ́ɔmā, ācomɛ́ɛbɛ, Uhágāyi mɛ́mla Usekaríya, ɔyí kú Íddo gbɔɔ́ ō mɛ́ɛbɛ klla gbɔɔ́ ō bī iyē kú Ɔwɔicō le kɛlā lɛ ācɛ Ujíyu nēe lā Ujerúsālɛm mɛ́mla Ujúda ā.

²Eko nɛ̄ Userúbābɛlu, ɔyí kú Ussɛ́litīyɛlu mla Ujessúwa, ɔyí kú Ujehósādaki le ɛhɔ̄ mɛ́mla ɛlā kú ācomɛ́ɛbɛ ā pó ā, é gbɔɔ́ ō gwó Agblīihɔ-nɛ̄hi kú Óndú nōo yɔ̄ Ujerúsālɛm ā. Ācomɛ́ɛbɛ ɛpa ā bá pīyɛ̄ uwā gē tá uwá abɔ̄.

³Eko ɔ́ɔmā piíí ā nɛ̄, Utatɛ́nāyi igbómína kú uwā mɛ́mla Ussita Ubosɛnáyi ɔ́mpa nū ā, mɛ́mla aígabɔ̄ ā le pɛ́ wā Ujerúsālɛm gáā da uwá ɔ̄kā ka, ɔ̄nyɛ ɔ́ɔ je ɔ́da lɛ uwá ɛɛ́ nɛ̄ ɛ́ɛ bá gē gwó Agblīihɔ-nɛ̄hi kú Óndú klla ī kpó iyó kú nū tū ipú nū ā?

⁴É[3] klla da uwá ɔ̄kā iyē kú ācɛ nōo yɔ̄ ī gwó Agblīihɔ-nɛ̄hi ā.

⁵Amáŋ abɔ̄ Ɔwɔicō yɔ̄ í gbō ācɛ Ujíyu mɛ́mla anyākwɔ́cɛ mɛ́mla aótrɛ̄yí kú uwā ā, aígabɔ̄ kú Upɛ́sīya le ŋmótū ka aá í gáā yá ɔdā dóódu ŋ́, jāā gbéeko nɛ̄ aá lɛ ɔkpá tá fu Udárīyɔ̄si, ɔcɛ́nɛ̄hi ā klla mīyɛ ohi kú nū.

⁶Ɛ̄nyā wɛ ɔkpá nēé tá fu ɔcɛ́nɛ̄hi ā á.

⁷“Ágábáidu, óndú kú alɔ, ɛbɔ́ kóō yɔ̄ mla awɔ. Ɔwɔ kóō lɛ uwɔ ɛyí tū ápátɛ́cɔ̄.

⁸“Ágábáidu, alɔ tíne ká ā le jé ka, alɔ le yɛ tá ajɛ kú Ujúda, kéē má ké bá ī gwó Agblīihɔ-nɛ̄hi kú Óndú, Ɔwɔicō nɛ̄hi ā, mla ɛcɔ̄ nɛ̄hi, mla ígbɔ́ɔ́cí o kpó wu ipú ɔdɔ. É kē lɔtū tá úklɔ́ ā bá ī yá ɔ̄ diili gɔbū lɔɔlɔhi nɛ̄hi.

⁹Alɔ le ɔ̄kā da aótrɛ̄yí kú ācɛ ɔ́ɔmā ka, ɔnyɛ je ɔ́da lɛ uwá, ɛ́ɛ́ nēé bá í gwó Agblīihɔ-nɛ̄hi ā klla í kpó iyó kú nú tū ipú nū ā?

¹⁰Alɔ klla da uwá ɔ̄kā, iyē kú uwá dúú, cɛ́ɛ́ kú ālɔ̄ géē le ācɛ nēe wɛ otrɛ̄yí kú ācɛ nēe bá ī yúklɔ́ ā jé.

¹¹Anɔ́ɔ é tá alɔ ohi ka aá wɛ ācocɛ̄hɔ̄ kú ɔlɛ́ Ɔwɔicō kú ɔkpáncō mɛ́mla ɛcɛ. É klla ka aá kē bá ī tú Agblīihɔ-nɛ̄hi kú Óndú ā gwó, Agblīihɔ-nɛ̄hi nɛ̄ ɔcɛ́ nɛ̄hi kú Ísrɛ̄lu éyi tɛtɛ gwó lɛ Óndú ā, klla kpó iyó tū ɔ̄ lɛ Óndú ā iháyí alɛwa nēe gaá yɛ ā.

¹²Amáŋ abɔ̄ aádáádā aá le ɛlā íwɔ́tū yá Óndú, Ɔwɔicō kú ɔkpáncō ā, Ɔwɔicō cɛ̄ lɛ Unebúkádinēsa, ɔcɛ́ kú Ubábīlɔn lɛ uwá yálé klla lɛ uwá kpó kwú ga ajɛ kú ācɛ Ucaldíi. Ācɛ Ubábīlɔn ā kwú Agblīihɔ-nɛ̄hi ā ú wúla tāajɛ klla kwú ɔ̄ ú yíífi ŋmá ajɛ dúúdú. É klla kwú ācɛ kú Ujúda ú kpó ga Ubábīlɔn

¹³Anɔ́ɔ ipú iháyí aflɛ́yí nɛ̄ Usáyírɔ̄si lé ɔcɛ́ kú Ubábīlɔn ā, ó lɛ ɔ́da je ka aá kóō gaá lɛ Agblīihɔ-nɛ̄hi kú Óndú ā tú gwó Ujerúsālɛm

¹⁴É ka ɔ́ɔ kē le odúúdú aíyó kú ugóolu (oje ɔdɔ), oje udɔ mɛ́mla oje nɛ̄hɛ́ kú Agblīihɔ-nɛ̄hi kú Óndú ā nɛ̄ Unebúkádinēsa kpó ŋmá Agblīihɔ-nɛ̄hi kú Óndú nōo kwu Ujerúsālɛm ā, gaá bá inu ɛcí kú nū, Ubábīlɔn ā kpó kwúcē lɛ aá. É ka Usáyírɔ̄si ɔ́ɔ kwú odúúdú iyó kú Agblīihɔ-nɛ̄hi ā kpó lɛ Ussɛssibássa, igbómína kú Ujúda nɛ̄ ó fu ā.

¹⁵Anɔ́ɔ ɔcɛ́nɛ̄hi ā ɔ́ɔ da ɔ́ kɔ́ ɔ̄ kwú iyó kú Agblīihɔ-nɛ̄hi ā ú kpó ga Ujerúsālɛm, kɔ́ ɔ̄ gaá lɛ Agblīihɔ-nɛ̄hi kú Óndú ā túgwó ɛga nɛ̄ ɔ́ɔ tɛtɛ kwu ā.

¹⁶Anɔ́ɔ Ussɛssibássa wā gaá je ikpó kú Agblīihɔ-nɛ̄hi ā tá ajɛ á, anɔ́ɔ úklɔ́ ā kē húmáyī í yá ŋmíífī ɔ́ɔmā jāā kwiícɛ, amáŋ Agblīihɔ-nɛ̄hi kú Óndú ā í kē gwó kwɛyí ɛ́ɛ́ ŋ́.’

¹⁷“Ohígbū ɔ́ɔmā, Ágábáidu, kóō lɛ ɔkpá jila kéē lɛ ɔkwu ɛlā ā bū, cɛ́ɛ́ kéē le jé ɔkwɛ̄yi ɔ́dáŋ ka Usáyírɔ̄si je ɔdā ɔkwɛ̄yi kéē lɛ Agblīihɔ-nɛ̄hi kú Óndú ā túgwó Ujerúsālɛm á, cɛ́ɛ́ ka Ágábáidu kóō lɛ ohi kpó lɛ alɔ, ɔdā nōo wɛ ɔtū kú nū ipú ɛlā nyā.”