Read idoma Ɛ́SRA 6 Bible Online

Ɛ́SRA 6 - idoma bible

Ɛ́SRA 6

¹Anɔ́ɔ Udáyírɔ̄si lɛ ɔ́da je kéē gbɔɔ́ ō jila ɔkpá ɔ̄kā kú íkée kú ācɛ Ubábīlɔn nēé tá tāajɛ klla kpó tū ɛga éyi ā.

²Anɔ́ɔ é gāá lɛ ɔkpá-ōhātū éyi má ipú ɔlɛ́ ɔtāhɛ̄ kú Ekbatána ipú aɔ́lɛ́ ō kwúbɔ́há kú Umɛ́dīya ā. Eko nēé le ɔkpá ā nwūla ā, é má ka é tɔ́kpá ā ka,

³“Ipú iháyí aflɛ́yí nɛ̄ ɔcɛ́nɛ̄hi Usáyírɔ̄si lé ɔcɛ́nɛ̄hi kú Ubábīlɔn ā, ó le ɔ́da je lɛ ācɛ Ujíyu, kéē nyɔ̄ í lɛ Agblīihɔ-nɛ̄hi kú Óndú ā tūgwó Ujerúsālɛm, ɛga nēé géē gwɛ́ɛya o yɔlá dúúdú mɛ́mla ɛdɔ kú ɛya ɔhá lɛ Óndú ā. Olicō kú nū géē wɛ ikpó ofɛtá, ɔwá kú nū kē í wɛ ikpó ofɛtá lɛ ā dúú.

⁴É géē hɛ́ ɔdɔ kú nū mla ɔgba kú ɔcí éyi nōo í cɛyí ogba ɛtá kú ɛcɔ̄ dóódu. Ije nēé kē í bī le gwó Agblīihɔ-nɛ̄hi nyā gēe ŋmá Agblɔ̄cɛ́ kú Ubábīlɔn.

⁵Anɔ́ɔ odúúdú aíyó kú ugóolu (oje ɔdɔ), oje udɔ, oje nɛ̄hɛ́ kú Agblīihɔ-nɛ̄hi nɛ̄ Unebúkádinēsa kpó ŋmá ipú Agblīihɔ-nɛ̄hi kú Óndú ā Ujerúsālɛm wā ā, é géē je uwá kpó kwúcē ga ɛgiyī nū ipú Agblīihɔ-nɛ̄hi kú Óndú ā Ujerúsālɛm.”

⁶Anɔ́ɔ Udáyírɔ̄si lɛ ohi kú ɔkpá kú uwá tá gē lɛ uwá kahíníi, “Utatɛ́nāyi igbómína kú ɛnɔ̄ɔ̄nɛ̄ kú Uyúfarétīisi, Ussɛ́ta Ubósenāyi mɛ́mla odúúdú aígabɔ̄ kú uwɔ ā, Aá nyɛ̄ɛ̄ ŋmá ɛgiyī úklɔ́ kú Agblīihɔ-nɛ̄hi kú Óndú ā.

⁷Aá híī je unwalu dúúmā lɛ uwá ipú Agblīihɔ-nɛ̄hi kú Óndú ā néē bā í gwó ā gɛ ŋ́. Aá mā igbómína kú Ujúda, mla aótrɛ̄yí kú ācɛ Ujíyu tá, kéē lɛ Agblīihɔ-nɛ̄hi kú Ɔwɔicō ā gwó kwu ɛga nōo tɛtɛ kwu gbɔbú ā.

⁸N je ɔ́da amānyā ícɛ kú aá tá uwā abɔ̄ kéē lɛ ɔ́ túgwó. É géē gbā ije kú nū ŋmá ije élí kú ajɛ kú um dóódu nɛ̄ aá géē mīyɛ ŋmá ɛnɔ̄ɔ̄nɛ̄ kú Uyúfarétīisi ā, cɛ́ɛ́ ka úklɔ́ ā kóō híī māháyi eko dúúmā ŋ́.

⁹Aá géē yɔ̄ ī kpó ɔdā dóódu nēe ce ācogwɛ́ɛya kú Ujerúsālɛm ā ɛgbá ā lɛ uwá eko. Aá gáā nyí uwā ɔdā dúú ŋ́. Aá klla í kpó aɔ́bɛ́ɛna, aálá, ámāŋ ka ɔyí álá kú ɛya o yɔlá dúúdú ā lɛ Ɔwɔicō kú Ɔkpáncō, ámāŋ ka īkpɔ́dɛ̄hɔ̄, ɔmā, ejé ámāŋ anɔ̄ lɛ uwá.

¹⁰Aá gēe kpó aɔ́dā nēe bá ā lɛ uwá, cɛ́ɛ́ kéē bī uwā le gwɛ́ɛya lɛ Ɔwɔicō kú ɔkpáncō, cɛ́ɛ́ kóō géē hɔ́hā ce ami mɛ́mla ayípɛ̄nɔ̄nyīlɔ kú ɔlɛ́ um dúú.

¹¹Ɔ̄cɛ dúúmā nōo tá kóō lɛyítáajɛ lɛ ɔ́da kú um nyā, é géē je ɔcí éyi pla ŋmá inu ɔlɛ́ nū, lɛ ɔ́ piyɔkɔ́ pílópíló, cɛ́ɛ́ é kwú ɔcí ā ú bū tū ɔ̄cɛ ɔ́ɔmā púlú kwajɛ, cɛ́ɛ́ ɔlɛ́ nū kwú pīya ɛyétutulu.

¹²Ɔwɔicō nōo fu Ujerúsālɛm klla kwú Agblīihɔ-nɛ̄hi kú nū kwu abɔ́ɔ, ka abɔ́ɔ nēé géē gbā anúɔ ɛ̄gbā ā kóō lɛ ɔcɛ́ dóódu nōo tá kóō lɛyí táajɛ lɛ ɔ́da kú um nyā bī wāajɛ ŋmá akpa kú ɔcɛ́ kú nū. Ɔcɛ́ dúúmā nōo klla tíne ō je Agblīihɔ-nɛ̄hi nyā yíífi kpɔ́, Ɔwɔicō kóō lɛ ɔcɛ́ ɔ́ɔmā yíífi ŋmá ajɛ dúú. Ami Udáyírɔ̄si ā je ɔ́da nyā á. Aá kē í lɛyí táajɛ lɛ odúúdú ɔ́da kú um ā.”

¹³Anɔ́ɔ Utatɛ́nāyi, igbómína ā, mɛ́mla Ussɛtá Ubosɛnáyi mɛ́mla odúúdú aígabɔ̄ ā, lɛ odúúdú ɔ́da nɛ̄ ɔcɛ́ je lɛ uwá ā yá klla lɛyí táajɛ lɛ ɔ́da ā dúúdú.

¹⁴Abɔ̄ ācomɛ́ɛbɛ Uhágāyi mɛ́mla Usekaríya bā í lɛ ɔfú tū aótrɛ̄yí kú ācɛ Ujíyu, mɛ́mla ācɛ Ujíyu ā iyē, é bā í gwó Agblīihɔ-nɛ̄hi kú Óndú ā gɔbū lɔɔlɔhi. É kwú Agblīihɔ-nɛ̄hi kú Óndú ā ú gwó kwɛyí, ɛ́gɛ́nɛ̄ Ɔwɔicō kú Ísrɛ̄lu, mɛ́mla Usáyírɔ̄si, Udáyírɔ̄si mɛ́mla Átasásɛsi aɔ́cɛ́nɛ̄hi kú Upɛ́sīya je ɔ́da lɛ uwá lɛ ā.

¹⁵Ipú ɛ̄cī ɛtá kú ɔyā kú Áda ā, kú iháyí ɔ́mɛhīlī nɛ̄ Udáyírɔ̄si lé ɔcɛ́ ā, é kwú Agblīihɔ-nɛ̄hi kú Óndú ā ú gwó mɛ.

¹⁶Anɔ́ɔ ācogwɛ́ɛya, aúlífāyi mɛ́mla odúúdú ācɛ Ujíyu nēe pīyɛyí ŋmá Ubábīlɔn wā ɔlɛ́ ā, kwú Agblīihɔ-nɛ̄hi ā ú tū Óndú ā abɔ̄. É gwéeyī nɛ̄hi.

¹⁷Ɛ̄cī nēé je Agblīihɔ-nɛ̄hi ā tū Óndú ā abɔ̄ ā, é ŋmó aɔ́bɛ́ɛna ofɛhɔ̄, aálá ofigwó, mɛ́mla aómlede úlā, kpó gwɛ́ɛya kú ínoōbīya kwɛyí ɔkwu kú Ísrɛ̄lu igwɛ́ɛpa dóódu ā.

¹⁸É klla kwú ācogwɛ́ɛya, mɛ́mla aúlífāyi ú kpó tū úklɔ́ kú uwá ipú Agblīihɔ-nɛ̄hi ā, ɛ́gɛ́nɛ̄ é tá ɔ̄ tū ipú ɔkpá kú íne kú Umósīsi lɛ ā.

¹⁹Odúúdú ācɛ nēe pīyɛyí wā ɔlɛ́ ā, lɛ ucɛ kú onyatá ā lé ɛ̄cī ɔ́migwɛ́ɛnɛ kú ɔyā aflɛ́yí kú iháyí ɔ́mpa nēe pīyɛyí ŋmá Ubábīlɔn ā. Odúúdú ācɛ nēe pīyɛyí wā ɔlɛ́ á, le ucɛ kú onyatá ā lé.

²⁰Odúúdú ācogwɛ́ɛya mɛ́mla ācɛ Ulífāyi lɛ īyī uwā iyē gwu yēŋēē. Anɔ́ɔ ācɛ Ulífāyi lɛ odúúdú ɛbɛ́ kú ɛya kú ucɛ kú onyatá ā kpó ŋmó lɛ odúúdú ācɛ nōo pīyɛyí ā. É klla le ācogwɛ́ɛya mɛ́mla ákú īyī uwā kpó ŋmó dúú.

²¹Odúúdú ācɛ nēe pīyɛyí wā ɔlɛ́ ā, mɛ́mla odúúdú ācɛ kú ajɛ ā nēe kwúcē ŋmá ɛcí o pā wā í gbɔɔ́ ō gbā Óndú, Ɔwɔicō kú Ísrɛ̄lu ɛ̄gbā ā, lé ɔdōlé kú ɛya ā dúú.

²²É bī ɔtū le lé ucɛ kú igbō nóō gē nū ŋ́ mā ɛ̄cī ahāapa. Éeyē le mu uwá ipú, ohígbū ka Óndú ā yá kú ɔcɛ́nɛ̄hi kú Upɛ́sīya nōo gē gbāajɛ mɛ́mla ācɛ kú Asírīya dúú ā, kóō le eyīnyinyi uwā má. Ó klla tá uwā abɔ̄ ipú Agblīihɔ-nɛ̄hi kú Ɔwɔicō kú Ísrɛ̄lu nēé tūgwó igbɔhá ā.