Read idoma Ɛ́SRA 7 Bible Online

Ɛ́SRA 7 - idoma bible

Ɛ́SRA 7

¹Iháyí alɛwa le gla, eko nɛ̄ Átasásɛsi wɛ ɔcɛ́nɛ̄hi kú Upɛ́siya ā, ɔ̄cɛ éyi lé ka Ɛ́sra. Ó le ɛma kú nū ka jāā gaá kwu Árɔ̄ni otrɛ̄yí kú ācogwɛ́ɛya ā. Ɛma kú nū nōó ka ā yɛ lɛ ā, Ɛ́sra wɛ ɔyí kú Useráya, Useráya wɛ ɔyí kú Asárīya, Asárīya wɛ ɔyí kú Uhílikáya,

²Uhílkáya wɛ ɔyí kú Ussálum, Ussálum wɛ ɔyí kú Usádɔ̄ku, Usádɔ̄ku wɛ ɔyí kú Ahítūbu,

³Ahítūbu wɛ ɔyí kú Amárīya, Amárīya wɛ ɔyí kú Asárīya, Asárīya wɛ ɔyí kú Umérayɔtu,

⁴Umérayɔtu wɛ ɔyí kú Userahíya, Userahíya wɛ ɔyí kú Ússi, Ússi wɛ ɔyí kú Ubúki,

⁵Ubúki wɛ ɔyí kú Abíssuwa, Abíssuwa wɛ ɔyí kú Ufínēhasi, Ufínēhasi wɛ ɔyí kú Ɛlísaa, Ɛlísaa wɛ ɔyí kú Árɔ̄ni, otrɛ̄yí kú ācogwɛ́ɛya ā.

⁶Ɛ́sra jɔ́kpá nɛ̄hi klla jé íne kú Óndú, Ɔwɔicō kú Ísrɛ̄lu nōó je lɛ Umósīsi ā nɛ̄hi. Abɔ̄ Óndú, Ɔwɔicō kú Ɛ́sra lɛ ɔhá hɛ́ ce ɔ̄ ā, ɔdā dúúmā nōó ba ŋmá ɛgiyī ɔcɛ́ ā, ó le kpó lɛ ɔ́.

⁷Ipú iháyí ɔ́mahāapa kú ɔcɛ́ kú Átasásɛsi ā, Ɛ́sra gbɔɔ́ ŋmá Ubábīlɔn mla ígwu kú ācɛ Ísrɛ̄lu, nōo wɛ ācogwɛ́ɛya ā mɛ́mla aúlífāyi, mɛ́mla ācogwíijē mɛ́mla ācogbāajɛ kú Agblīihɔ-nɛ̄hi mɛ́mla ācɛ oyúklɔ́ ɔhá kú ipú Agblīihɔ-nɛ̄hi ā, le pɛ́ nyɔ̄ Ujerúsālɛm.

⁸Uwá gbɔɔ́ ŋmá Ubábīlɔn ɛ̄cī éyi kú ɔyā éyi kú iháyí ɔ́ɔmā.

⁹Ɔwɔicō tá uwā abɔ̄ jāā gbéeko nēé ga ajɛ Ujerúsālɛm, ɛ̄cī éyi kú ipú ɔyā ɛhɔ̄ kú iháyí ékpónú ɔ́ɔmā ā.

¹⁰Ɛ́sra kwú odúúdú oyēeyī kú nū ú tá kóō klɔ́ɔcɛ́ íne kú Óndú ā, mla ō yɔ̄ í yá klla í lɛ íne ā tū. Ó klla yɔ̄ ī nwū ācɛ kú Ísrɛ̄lu odúúdú íne kú Óndú ā mɛ́mla ɔ́da kú nū dóódu.

¹¹Átasásɛsi le aɔ́kpá nēe bá nyā kpó lɛ Ɛ́sra, ɔ̄cogwɛ́ɛya mɛ́mla ɔ̄cɛ o jɔ́kpá nɛ̄hi ā. Ó jé odée lɛyíkwu íne mɛ́mla ɔ́da kú Óndú nōó je lɛ ācɛ kú Ísrɛ̄lu ā nɛ̄ɛ̄nɛ̄hi.

¹²Ɔkpá nyā ŋmá ɛgiyí Átasásɛsi[4] ɔcɛ́ ā, ga ɛgiyī Ɛ́sra, ɔ̄cogwɛ́ɛya, mɛ́mla ɔ̄cɛ nōo klla jé íne kú Ɔwɔicō nōo lā ɔkpáncō ā nɛ̄hi ā[5]

¹³Ɔcɛ́nɛ̄hi ā kahíníī, “N le ɔ́da mɛ́mla ɛga je lɛ odúúdú ācɛ kú Ísrɛ̄lu, ācogwɛ́ɛya, aúlífāyi, mɛ́mla odúúdú ācɛ nēe cɛ̄ kéē nyɔ̄ ga Ujerúsālɛm mla awɔ ā ɛɛ́.

¹⁴Ami mɛ́mla aígabɔ̄ kú um ahāapa ā, géē tū uwɔ ɛhɔ̄ nyɔ̄ ga Ujerúsālɛm mɛ́mla Ujúda kú ā gaá lɛ uwá má, ɔ́dáŋ ka é bā í lɛ íne kú Ɔwɔicó kú aá nōó je lɛ aá tū klla í lɛyí táajɛ lɛ ɔ̄ ipú Ujerúsālɛm mɛ́mla Ujúda.

¹⁵A géē bī ugóolu (oje ɔdɔ), oje udɔ, mɛ́mla oje nɛ̄hɛ́ nɛ̄ ami mɛ́mla ācɛ ɔlɛ́ um mɛ́mla aígabɔ̄ kú um géē je yá Óndú ɛhi ā. A géē je kpó nyɔ̄ í bá ipú Agblīihɔ-nɛ̄hi kú Óndú ā Ujerúsālɛm dúú.

¹⁶A klla gēe kpó odúúdú ugóolu (oje ɔdɔ), oje udɔ, oje nɛ̄hɛ́ nāa géē mīyɛ ŋmá ɛgiyí odúúdú ācɛ kú ipú ajɛ kú um ā, mɛ́mla ɛhi nɛ̄ ācɛ kú Ísrɛ̄lu mɛ́mla ācogwɛ́ɛya géē je lɛ Ɔwɔicō kú uwá ā, ga Ujerúsālɛm. A géē kpó uwā bá ipú Agblīihɔ-nɛ̄hi kú Óndú ā dúú.

¹⁷A géē ŋmó ije nyā ɛlɛ́ɛ́lá, cɛ́ɛ́ a lɛ aɔ́bɛ́ɛna, ɔyí álá, omlede, ejé mɛ́mla īkpɔ̄dɛ̄hɔ̄ kpó lá. Cɛ́ɛ́ a kwú uwā ú kpó gwɛ́ɛya lɛ Óndú ā, ɛyí ede kú ipú Agblīihɔ-nɛ̄hi kú nū ā.

¹⁸A lɔfú bī ugóolu (oje ɔdɔ) mɛ́mla oje nɛ̄hɛ́ dúúmā nēe hile ā lɛ yá ɔdā dúúmā nōo he awɔ mɛ́mla ācɛ ɔlɛ́ uwɔ Ísrɛ̄lu ā ɔtū, o ŋmá lɛ ɛ́gɛ́nɛ̄ Ɔwɔicō cɛ̄ lɛ ā.

¹⁹A géē kpó odúúdú aíyó mɛ́mla ɔdá o bī le yúklɔ́ kú ipú Agblīihɔ-nɛ̄hi dóódu nēé kpó gā awɔ ā lɛ Óndú ā ipú Agblīihɔ-nɛ̄hi kú nū Ujerúsālɛm.

²⁰A géē kpó ɔdā dúúmā ɔhá nāa cɛgbá ohígbū Agblīihɔ-nɛ̄hi kú Óndú ā, ŋmá ɔlɛ́ ɔcɛ́.

²¹N kē í je ɔ́da lɛ odúúdú aígabɔ̄ kú ɛnɔ̄ɔ̄nɛ̄ kú Uyúfarétīisi ā ká ɔdā dúúmā nɛ̄ Ɛ́sra ɔ̄cogwɛ́ɛya ā, ɔ̄cɛ o jé íne kú Ɔwɔicō kú ɔkpáncō nɛ̄hi ā tíne ā, kéē le kpó lɛ ɔ́ bōōbū.

²²Ɔdā dúúmā nɛ̄ aá géē je lɛ ɔ́ géē kwu ɛkpa ofigwɛ́ɛnɛ ce igwɛ́ɛnɛ kú ije nɛ̄hɛ́, ɛkpa kú īkpɔ̄dā úlā ɛhɔ̄. Oli kú anɔ̄ kú ólīfu úlā ɛhɔ̄, mɛ́mla ɔmā mɛ́mla ɛ̄gbā kú uwá ɔhá dóódu nēé í cɛgbá ā.

²³Aá má ka, aá lɛ ɔdā dóódu nɛ̄ Ɔwɔicō kú ɔkpáncō kē í bī le yúklɔ́ kú Agblīihɔ-nɛ̄hi kú nū ā, kpó lɛ uwá, o yá kóō híī cɔ̄nū du um, ɛ́ɛ́ nōó gē cɔ̄nū mla aɔ́cɛ́ ɔhá kú alɔ nēe géē lé igbīhi um ā ŋ́.

²⁴Aá híī mīyɛ ije élí ŋmá ɛgiyí ācogwɛ́ɛya, aúlífāyi, ācogwíijē, ācogbɔ̄ɔwɛ kú Agblīihɔ-nɛ̄hi mɛ́mla ɔ̄cɛ ɔhá dúúmā nōo gē yúklɔ́ ipú Agblīihɔ-nɛ̄hi kú Óndú ā ŋ́.

²⁵Awɔ, Ɛ́sra, a í bī íjééyī nɛ̄ Ɔwɔicō kú uwɔ je gā awɔ ā, ká ā lɛ aótrɛ̄yí, aígabɔ̄, mɛ́mla ācohɛ́pɔ̄ fu kéē gbo odúúdú ācɛ nēe lā ɛnɔ̄ɔ̄nɛ̄ kú Uyúfarétīisi ā. O ŋmá lɛ ɛ́gɛ́nɛ̄ íne kú Ɔwɔicō kú aá lɛ á. A géē nwu ācɛ dóódu nɛ̄ ó jé íne kú Ɔwɔicō ŋ́ mā.

²⁶Ɔ́dáŋ ka ɔ̄cɛ dúúmā tá kóō lɛyí táajɛ lɛ íne kú Óndú, Ɔwɔicō kú uwɔ ā, mɛ́mla íne kú ajɔ̄ɔ̄cɛ́ kú um ā, ulé kú ɔ̄cɛ ɔ́ɔmā géē wɛ ikwū, ámāŋ ka, o mīyɛ odúúdú agbénú kú nū ŋmá ɛgiyí nū. Kwú ɔ̄ ú tá abɔ̄ áncā, ámāŋ ka o je ɔ́ nū ŋmá ipú ajɛ ā ga ajɛ éwɔhá, ámāŋ ka o kwú ɔ̄ ú tá agbá.”

²⁷Ɛ́sra kahíníi, “N cɛ̄tra awɔ Óndú, Ɔwɔicō kú aádáádā alɔ. A le yá ka ɔcɛ́nɛ̄hi ā kóō cɛ̄ klla lɛ ojīlīmā ce Agblīihɔ-nɛ̄hi kú uwɔ, Óndú ā, nōo yɔ̄ Ujerúsālɛm ā, ɔwɛ ɛ́gɛ́nyā.

²⁸Óŋmá lɛ eyinyinyi mɛ́mla ɔhā kú awɔ Ɔwɔicō, n má téeyī olɔhi kú ɔcɛ́nɛ̄hi ā mɛ́mla aígabɔ̄ kú nū mɛ́mla odúúdú aɔ́kákwu kú nū. Ɔwɔicō kú um, a klla lɛ ɔfú tū um iyē nɛ̄ n lɛ ɛlā ka lɛ aótrɛ̄yí kú ācɛ kú Ísrɛ̄lu, é klla cɛ̄ ka aá ɔ́ɔ géē nyɔ̄ ga Ujerúsālɛm mla um.”