Read idoma Ɛ́SRA 8 Bible Online

Ɛ́SRA 8 - idoma bible

Ɛ́SRA 8

¹Ɛ̄nyā wɛ iyē kú ācɛ kú Ujíyu mɛ́mla aótrɛ̄yí kú uwā nōo bá Ubábīlɔn, nōo pīyɛyí wā Ujerúsālɛm mla Ɛ́sra eko nɛ̄ Átasásɛsi ɔcɛ́nɛ̄hi ā jɛga lɛ uwá ā.

²Ugɛ́ssɔ́m ŋmá ipɔ́ɔma kú Ufínēhasi, Udánīyɛ̄lu ŋmá ipɔ́ɔma kú Utáma.

³Uhátussi ɔyí kú Ussɛkaníya ŋmā ipɔ́ɔma kú Udéfīdi. Usekaríya ŋmá ipɔ́ɔma kú Upárōssi mɛ́mla ācɛ kú ipɔ́ɔma kú nū ā, wɛ ofaahāapa ce igwó.

⁴Ɛliyehóyenāyi, ɔyí kú Userahíya ŋmá ipɔ́ɔma kú Upatimówābu mɛ́mla ācɛ ofigwó kú ipɔ́ɔma kú nū ā.

⁵Ussɛkaníya, ɔyí kú Ujáhasíyelu ŋmá ipɔ́ɔma kú Usátu mɛ́mla ācɛ ofu igwɛ́ɛhɔ̄ kú ipɔ́ɔma kú nū.

⁶Ébēdi, ɔyí kú Ujónátan ŋmá ipɔ́ɔma kú Ádām mɛ́mla ācɛ ofɛpa ce igwó.

⁷Ujéssáya ɔyí kú Atálīya ŋmá ipɔ́ɔma kú Ɛ́lam, mɛ́mla ācɛ ofɛtá ce igwó.

⁸Usɛbadíya ɔyí kú Umákɛ̄lu ŋmá ipɔ́ɔma kú Ussɛfatíya mɛ́mla ācɛ ofɛnɛ.

⁹Obadáya ɔyí kú Ujéhīyɛlu ŋmá ipɔ́ɔma kú Ujówābu mɛ́mla ācɛ ofigwó ce igwáahātá.

¹⁰Ussélōmiti, ɔyí kú Ujósīpíya ŋmá ipɔ́ɔma kú Ubáni mɛ́mla ācɛ ofaahātá.

¹¹Usekaríya ɔyí kú Ubébāyi ŋmá ipɔ́ɔma kú Ubébāyi mɛ́mla ācɛ ofu ce ahātá.

¹²Ujohánan ɔyí kú Uhákātan ŋmá ipɔ́ɔma kú Asigádi mɛ́mla ācɛ ofɛhɔ̄ ce igwó.

¹³Ɛlífɛ̄lɛti, Ujéyúwelu mɛ́mla Ussɛmáya ŋmá ipɔ́ɔma kú Adónīkam mɛ́mla ācɛ ofɛtá. Uwá ā, pīyɛyí igbīhāajɛ.

¹⁴Utáyi mɛ́mla Usákɔ ŋmá ipɔ́ɔma kú Ubígifāyi mɛ́mla ācɛ ofɛtá ce igwó.

¹⁵Ɛ́sra kahíníī, “N le odúúdú ācɛ ā kpó bá okónu ísu kú ɔ́gilɔ́ nōo gē pɛ́ ga igelī kú Aháfa ā, alɔ bá abɔ́ɔ ɛ̄cī ɛtá. N má ka ācogwɛ́ɛya ā bā ipú ācɛ nēe wā í jīla um eyī ā, amáŋ ayí kú Ulífāyi í bā ipú uwá ŋ́.

¹⁶Anɔ́ɔ n lɛ ɛhɔ̄ tū fu anyākwɔ́cɛ ahāanɛ ā, Ɛlíyēsa, Aríyɛlu, Ussɛmáya, Ɛlinátan, Ujárību, Ɛlinátan, Unátan, Usekaríya mɛ́mla Uméssūlam mɛ́mla aítíca ɛpa. Iyē kú uwā lé ka, Ujóyārību mɛ́mla Ɛlinátan.

¹⁷Anɔ́ɔ n le uwá tɛ̄hɔ̄ fu Ído, otrɛ̄yí kú ācɛ kú Ukasifíya gaá da anú mɛ́mla aígabɔ̄ kú nū kéē lɛ ācɛ o yúklɔ́ kú ipú Agblīihɔ-nɛ̄hi kú Óndú ā mɛ́mla ācɛ nēe géē cɛ̄ Ɔwɔicō ɛhɔ̄ ipú Agblīihɔ-nɛ̄hi ā, kpó tɛ̄hɔ̄ fu alɔ.

¹⁸O ŋmá lɛ eyīnyinyi kú Ɔwɔicō ā, é lɛ Ussiyɛbíya ɔ̄cɛ o jɔ́dā nɛ̄hi éyi tɛ̄hɔ̄ fu alɔ ŋmá ipɔ́ɔma kú Umáli, ayí nū mɛ́mla ayínɛ́ nū igwáahātá klla yɛce ɔ́ wā dúú.

¹⁹É klla lɛ Uhassábīya mɛ́mla Ujéssáya tɛ̄hɔ̄ fu alɔ ŋmá ipɔ́ɔma kú Umerári mɛ́mla aɔ́máapú uwá ofu.

²⁰É klla le ayí kú Ulífāyi ofu igwóléyi nɛ̄ Udéfīdi kpó úklɔ́ kú Agblīihɔ-nɛ̄hi ā lɛ aádáádā uwá mla ipɔ́ɔma kú uwá ā, kpó tɛ̄hɔ̄ fu alɔ kéē wā í kwu ācɛ ohile ā dúú.” Ɛ́sra lɛ iyē kú odúúdú ayí kú Ulífāyi ā tá tāajɛ.

²¹Ɛ́sra klla kahíníī, “Anɔ́ɔ okónu ísu nēé hī ka Aháfa ā, n le ɔ́da je lɛ odúúdú ācɛ ā, kéē lɛ okónu gwū, cɛ́ɛ́ kéē gbɔ̄ɔkɔ, kéē tá īyī uwā wāajɛ ipéyī Ɔwɔicō, kéē ba Ɔwɔicō kóō lɛ alɔ mɛ́mla ayí alɔ, mɛ́mla iyó mɛ́mla agbénú kú alɔ gbō ga ajɛ Ujerúsālɛm ɛbɔ́.

²²Ohígbū ka ó géē tū um uwēyī ɔ́dāŋ ka n klla le da ɔcɛ́ kú Upɛ́sīya kóō lɛ aícɔ́ɔja o cɔɔnya kpó lɛ alɔ kéē gbō alɔ ɛyí, ohígbū ka n tɛtɛ le da ɔcɛ́ ɛɛ́ ka, Ɔwɔicō kú alɔ gēe hɛ́ ɔhá ce ɔ̄cɛ dóódu klla í gbō ɔ̄cɛ nōo géē lɔtūce ɔ́ ā. Amáŋ ó í yá ɔ̄cɛ dóódu nōo lɛ igbīhi ce kwu ɔ́ klla í yá īkpɛ̄yí olɔfú tá ɔ̄ italā.

²³Anɔ́ɔ alɔ le okónu gwū, le ɔkɔ gbā lɛ Ɔwɔicō ka ó gbō alɔ ipú iyāwu kú alɔ. Anɔ́ɔ Ɔwɔicō le ɔkɔ nɛ̄ alɔ gbā lɛ ɔ́ ā pó, kllá le ohi tá alɔ á.”

²⁴Ɛ́sra klla ka kpɔ́ kahíníī, “N lɛ Ussiyɛbíya mɛ́mla Uhassábīya fu mla ācɛ igwó ɔhá.

²⁵Anɔ́ɔ é le ugóolu (oje ɔdɔ), oje nɛ̄hɛ́ mɛ́mla oje udɔ mɛ́mla iyó kú Agblīihɔ-nɛ̄hi mɛ́mla odúúdú ɔdā kú ɛhi nɛ̄ ɔcɛ́ mɛ́mla aígabɔ̄ kú nū kpó wā kú úklɔ́ kú Agblīihɔ-nɛ̄hi ā, kpó miya. Anɔ́ɔ n kwú odúūdú nū ú kpó lɛ ācogwɛ́ɛya á.

²⁶N kpó ɛkpa kú oje nɛ̄hɛ́ úlā ce ofigwɛ́ɛpa ce igwó mɛ́mla aócíbú kú oje nɛ̄hɛ́ nɛ̄ ɔ́lá nū lɔfú wɛ ígbó ije nɛ̄hɛ́ ofɛhɔ̄ glá, mɛ́mla īkpīje kú ugóolu (oje ɔdɔ) ofɛhɔ̄,

²⁷ocíbú ofu kú ugóolu (oje ɔdɔ) nɛ̄ ogbɛnú kú nū wɛ ukílōgram ahāanɛ ā mɛ́mla aócíbú ɛpa kú oje udɔ nōo lɛbɛ̄ɛka ugóolu (oje ɔdɔ) ā lɛ ācogwɛ́ɛya ā.

²⁸N da uwá kahíníi, ‘Aá wɛ ācɛ otīīhɔ kú Óndú, Ɔwɔicō kú aádáádā aá, ɛ́gɔ́ɔmā nɛ̄ odúúdú oje nɛ̄hɛ́ mɛ́mla aócíbú kú ugóolu (oje ɔdɔ) nēe wɛ ɔdā ɛya nēé kpó gé lɛ ɔ́ ŋmá ɔtū éékpó kú uwā ā lɛ dúú á.

²⁹Aá leyīkwu uwá kú aá gbō uwā lɔɔlɔhi gbéeko nɛ̄ aá le tá ipú Agblīihɔ-nɛ̄hi ā. Aá lɛ ɔ́ miya ipú inu kú ācogwɛ́ɛya ā, cɛ́ɛ́ kú aá kwú uwā ú kpó lɛ aótrɛ̄yí kú ācogwɛ́ɛya ā mɛ́mla ācɛ Ulífāyi mɛ́mla anyākwɔ́cɛ kú Ujerúsālɛm.”

³⁰Anɔ́ɔ ācogwɛ́ɛya ā mɛ́mla ayí kú Ulífāyi ā leyīkwu ugóolu (oje ɔdɔ), oje udɔ mɛ́mla ije nɛ̄hɛ́ mɛ́mla iyó kú Agblīihɔ-nɛ̄hi ōhī ā, jāā gbéeko nēé le iyó ā bī ga ipú Agblīihɔ-nɛ̄hi kú Óndú Ujerúsālɛm.

³¹Ɛ́sra kahíníī, “Ɛ̄cī igwɛ́ɛpa kú ɔyā éyi nɛ̄ alɔ nyɛ̄ɛ̄ ŋmá okónu ísu kú ɔ́gilɔ́ kú Aháfa, gbɔɔ́ ō nyɔ̄ Ujerúsālɛm ā. Ɔwɔicō kú alɔ yɔ̄ mla alɔ klla yɔ̄ í gbō alɔ ŋmá ɛgiyí aólɛlā kú alɔ, mɛ́mla ācɛ obɔ̄bí nēe kwāajɛ ipácí bā í gbēyī alɔ ā.

³²Eko nɛ̄ alɔ ga ajɛ Ujerúsālɛm ā, alɔ le mlɛ́nyɔ́ ɛ̄cī ɛtá.

³³Anɔ́ɔ ɛ̄cī ɔ́mɛɛnɛ ā, alɔ kwú pɛ́ ga ipú Agblīihɔ-nɛ̄hi kú Óndú ā. Alɔ kwú ugóolu (oje ɔdɔ), oje udɔ mɛ́mla oje nɛ̄hɛ́ mɛ́mla odúúdú iyó kú Agblīihɔ-nɛ̄hi kú Óndú ā ú kpó lɛ Umérɛ̄mɔtu, ɔ̄cogwɛ́ɛya ɔyí, kú Uríya ā. Ɛlísaa ɔyí kú Ufínēhasi mɛ́mla ayí kú Ulífāyi ɛpa, Ujósābadu ɔyí kú Ujéssuwa mɛ́mla Unoyádīya, ɔyá kú Ubínūni kē bá abɔ́ɔ mla ɔ̄cogwɛ́ɛya ā dúú.

³⁴Alɔ le odúúdú iyó kú Agblīihɔ-nɛ̄hi ā mɛ́mla ije nɛ̄ alɔ bī wā ā, gbaáluka klla lɛ ɔ́ miya. Anɔ́ɔ alɔ le odúúdú nū tá tū ɔkpá á.

³⁵Odúúdú ācɛ nēe pīyɛyí mla Ɛ́sra wā Ujerúsālɛm ā bī ɛhi alɛwa wā í le gwɛ́ɛya o yɔlá dúúdú lɛ Óndú, Ɔwɔicō kú Ísrɛ̄lu. Uwá bī aɔ́bɛ́ɛna igwɛ́ɛpa kú odúúdú ācɛ Ísrɛ̄lu, omlede ofɛnɛ ce igwɛ́ɛhīlī, ɔyí álá ofɛtá ce igwáahāapa le gwɛ́ɛya kú odúúdú íne nēé bīya ā. É le odúúdú aɛ́bɛ́ nēe bá nyā kpó yɔlá dúúdú kú ɛya o yɔlá dúúdú lɛ Óndú ā.

³⁶É kwú ɔkpá nɛ̄ ɔcɛ́nɛ̄hi kú Ubábīlɔn je lɛ uwá ā, ú lɛ aígbómína kú ɛyí ajɛ kú ɛnɔ̄ɔ̄nɛ̄ kú Uyúfarétīisi ā mɛ́mla odúúdú aígabɔ̄ kú uwá. Eko nēé lɛ ɔkpá nyā jé ā, aɔ́cɛ́ mɛ́mla aígabɔ̄ klla le ɛhi kú ije yá ācɛ Ujíyu ā, kú otábɔ̄ kú úklɔ́ kú Agblīihɔ-nɛ̄hi kú Óndú ā.”