Read idoma Ɛ́SRA 9 Bible Online

Ɛ́SRA 9 - idoma bible

Ɛ́SRA 9

¹Ɛ́sra klla yɔ̄ ī kɛlā gɔbū kpɔ́ kahíníī, “Eko nɛ̄ alɔ lɛ odúúdú ɛ̄nyā yá kwɛyí ā, anyākwɔ́cɛ kú ācɛ Ísrɛ̄lu mɛ́mla aótrɛ̄yí kú uwā ōhī ā, wā gaá da um ka, ācogwɛ́ɛya mɛ́mla aúlífāyi ōhī, ɛ́ɛ lɛ īyī uwā tū céé ŋmá ɛgiyī aéwo ɔhá nōo lā kwu alɔ ā ŋ́. Éwo kú Ámmɔn, Umówābu, Íjīpiti, Ukénana, ācɛ Uhɛ́ti, Upɛ́risi, Ujébusi mɛ́mla ācɛ Ámɔri. Ācogwɛ́ɛya mɛ́mla aúlífāyi ā bā í yá ucē elihɔ nɛ̄ aéwo ɔ́ɔmā ī yá ā.

²Ācɛ Ujíyu bā í lɛ ɔnyā ŋmá éwɔhá, ohígbū ɔ́ɔmā ā, ācɛ kú Ɔwɔicō ā le ucē elihɔ yá ɛɛ́. Aótrɛ̄yí mɛ́mla aígabɔ̄ kú ācɛ Ujíyu ā, yá ucē nyā fíyɛ́ dúú á.

³Eko nɛ̄ n lɛ ɛ̄nyā pó ā, n kwú īlī kú um hīla ipú ɔtūnōbí klla kwú ɛyí mɛ́mla ɔnwú agba kú um ú plla. Anɔ́ɔ n má cīce ipú ɔtūnōbí mɛ́mla ɔtū nōo bīya gā um ā.

⁴N cīce abɔ́ɔ yɔ̄ ī yá ɔtūnōbí jāā gbéeko nɛ̄ eko nēé gē gwɛ́ɛya kú ɔ̄nɔ̄ɔ̄nɛ̄ ā kē yá ā. Ācɛ gbɔɔ́ ō jīla tū um, ofíyɛ́ dúú ā, ācɛ nēe jé klla bā í yúufi ohígbū ɔdā nɛ̄ Ɔwɔicō kú Ísrɛ̄lu ka lɛyíkwu ɛdɔ kú íne nɛ̄ ācɛ nōo pīyɛyí wā ɔlɛ́ bōōbū nyā bīya ā.

⁵Eko nɛ̄ eko nēé gē gwɛ́ɛya kú ɔ̄nɔ̄ɔ̄nɛ̄ le yá ā, n cāŋjɛ ŋmá ɛga nɛ̄ n húmáyī cīce ā. N klla le áhingílí wu iyē kpɔ́, anɔ́ɔ n má kwōkwū le okwúukwu kwaajɛ, le abɔ̄ kú um nāŋda kwu Óndú, Ɔwɔicō kú um, le ɔkɔ gbā lɛ ɔ́ ka,

⁶‘Óndú, Ɔwɔicō kú um, uwēyī í cɛ̄ gā um je ɛyí gicō iyɔ̄bū uwɔ ŋ́. Íne kú uwɔ nɛ̄ alɔ bīya ā tīkwū ŋmá ajɛ jāā gicō. Ó klla yɛ jāā gaá kwu ɔkpáncō.

⁷O ŋmíífī aádáádā alɔ, alɔ húmáyī bīyíne klla bá ī lɛ́pɔ̄bí uwɔ piyóó. Ohígbū íne nɛ̄ alɔ ī bīya ā, alɔ, aɔ́cɛ́ kú alɔ, mɛ́mla ācogwɛ́ɛya kú alɔ húmáyī wɛ aɔ́fiyɛ kú éwɔhá piyóó. É kpó alɔ ŋmó bɛ̄ɛka ugwū ā. É klla gē kpó alɔ iyó wu ga ɔlɛ́ uwā. É klla kpó alɔ kwú tū agbá ga ɔlɛ́ uwā nyɔ̄ í cɛ̄ ɔfiyɛ kú uwā. Uwēyī húmáyī kwú alɔ jāā kwū ícɛ.

⁸Eko kpií nyā, Óndú Ɔwɔicō kú alɔ, a lɛ alɔ kpó ŋmá ipú abɔ̄ kú ɔfiyɛ nɛ̄ alɔ bá gē cɛ̄ klla le alɔ kpó wā í lā ajɛ otīīhɔ nyā. Abɔ̄ alɔ wɛ aɔ́fiyɛ nááná ā, a le oyēeyī ɛ̄yīpɛ̄ je lɛ alɔ.

⁹Alɔ wɛ aɔ́fiyɛ, amáŋ á mā alɔ tá ipú ɔfiyɛ nɛ̄ alɔ cɛ̄ ā ŋ́. A le yá ká ālɔ̄ má téeyī olɔhi kú ɔcɛ́ kú Ubábīlɔn mɛ́mla aɔ́cɛ́ kú Upɛ̄sīya. Anɔ́ɔ é lɛ ɛga je lɛ alɔ kā ālɔ̄ nyɔ̄ í lā ipú ajɛ kú alɔ, ká ālɔ̄ klla lɛ Agblīihɔ-nɛ̄hi kú Óndú ā, túgwó. Agblīihɔ-nɛ̄hi nōo húmáyī tá alácɛ̄ ā. A kē klla yá ká ālɔ̄ lā Ujúda amānyā ɛbɔ́.

¹⁰Amáŋ Óndú Ɔwɔicō kú alɔ, ɔdí nɛ̄ alɔ géē ka ohígbū ɔdā dóódu nēé yá ā mɛ́ɛ̄ a? Alɔ klla tá kā o lɛyí táajɛ lɛ íne kú uwɔ igbɔhá ɛɛ́.

¹¹Íne kú uwɔ nāa je lɛ alɔ bū okónu kú ācomɛ́ɛbɛ kú uwɔ ā. Ācomɛ́ɛbɛ kú uwɔ ā tɛtɛ da alɔ ka ajɛ nɛ̄ alɔ ɔ́ɔ géē nyɔ̄ í lā anú ā, ɔ́ɔ wɛ ajɛ kú ācobɔ̄bíipú mɛ́mla ācɛ o yá ɔdōbɔ̄bí. Ohígbū ka odúúdú ācɛ nēe lā abɔ́ɔ ā, bá í yá ɔdōbɔ̄bí nɛ̄hi. É klla bá yɔ̄ ī bīyíne kú uwɔ ipú odúúdú ajɛ ā.

¹² É klla le da alɔ ka, ɔ́dáŋ ka alɔ ɔ́ɔ tíne ká ālɔ̄ lā ipú ajɛ kú Ukénan ā piyóó, nɛ̄ alɔ í je ajɛ ā kóō wɛ ɔdā úgwū kú ayí alɔ piyóó, ayíka alɔ kóō híī lɛ ɔnyā ŋmá ipú aéwo ɔhá ŋ́, ɛ́ɛ́ nɛ̄ alɔ ɔ́ɔ gē je ayí alɔ lɛ uwá lɛ ɔnyā ŋ́.

¹³Ipú ɔdā dóódu nēe yá alɔ nōo wɛ ōwē kú italā kú íne nɛ̄ alɔ bīya mɛ́mla īkpɛ̄yí olɔfú nɛ̄ alɔ yá ā, nááná, alɔ jé ka awɔ Óndú, Ɔwɔicō kú alɔ ā, í yá alɔ italā ga ɛ̄jīla kú íne nɛ̄ alɔ bīya mɛ́mla ɔdōbɔ̄bí nɛ̄ alɔ yá ā ŋ́. A klla yá ká ālɔ̄ hile ícɛ kpɔ́.

¹⁴Ɔdíyá nɛ̄ alɔ klla cíkā ō leyī gwū íne kú uwɔ bónū igbɔhá, gaá lɛ ɔnyā ŋmá ipú ācɛ aéwɔhá obɔ̄bíipú nēe gē bīya íne kú uwɔ ɔ́ɔmā kpɔ́ ɛ́ɛ́ mā a? Ɔ́dáŋ ka alɔ gbɔɔ́ ō yá lɛ ā kpɔ́, ayíka a í cɔ̄nū mla alɔ, í je alɔ kpó yíífi ŋmá ajɛ dúúdú.

¹⁵Óndú Ɔwɔicō kú Ísrɛ̄lu, a le yēŋēē, á klla lɛ ɛcá dúúmā ŋ́. Ɔ́ɔmā yá ɛ́ɛ́ nāa cɛ̄ lɛ alɔ yēeyī ícɛ kpɔ́ mla íne kú uwɔ nɛ̄ alɔ bīya ā. Alɔ géē ka íne nɛ̄ alɔ bīya ā tɛ́ɛcɛ ga awɔ, kócōō kwú yá alɔ ɛhi. Alɔ í kōō cíkā ō wā iyɔ̄bū uwɔ ohígbū íne nɛ̄ alɔ bīya ā ŋ́.”