Read idoma UNEHEMÍYA 1 Bible Online

UNEHEMÍYA 1 - idoma bible

UNEHEMÍYA 1

¹Ɛ̄nyā wɛ ɔdā nɛ̄ Unehemíya ɔyí kú Uhalkalíya yá á. “Ipú ɔyā kú Ukíslefu, kú ipú iháyí ɔ́mofu nɛ̄ Átasásɛsi wɛ ɔcɛ́nɛ̄hi kú Upɛ́sīya ā, ami nōo wɛ Unehemíya ā yɔ̄ Usúsa nōo wɛ ɔlɛ́ ɔtāhɛ̄ kú Ubábīlɔn ā.

²Uhanáni, éyi kú ayínɛ́ um mɛ́mla ígwu kú ācɛ ɔhá, gā ŋmá Ujúda. N le ɔ̄kā da uwá ohígbū Ujerúsālɛm mɛ́mla ācɛ Ujíyu nēe pīyɛyí wā ɔlɛ́ ŋmá Ubábīlɔn ā.

³Anɔ́ɔ é tóohi ka, ācɛ nōo pīyɛyí ā mɛ́mla aɛ́nɛ̄ o hile ā, ɛ́ɛ má lā ɔlɛ́ Ujerúsālɛm ɛɛ́, amáŋ é lā ipú ákanya mɛ́mla uwēyī nɛ̄hi. Aéwɔhá nēe lā kwu uwá ā í kē je uwá kéē wɛ ɔdā dúúmā ŋ́. É klla keé da um ka, igá kú Ujerúsālɛm mɛ́mla aɔ́wɛ kú nū le kpó ca tāajɛ kpɔ́ ɛ́ɛ́. É ka ɔ̄cɛ dúúmā ɔ́ lɛ abɔ̄ kwu úklɔ́ ɔ́ɔmā jéjée ŋmífī nēé je ɔ́ yɔlá tā ajɛ ā ɛ́ɛ́ ŋ́.”

⁴Anɔ́ɔ Unehemíya kahíníī, “Eko nɛ̄ n lɛ ɛ̄nyā pó ā, n má cīce gbɔɔ́ ō jikwū. Ɛ̄cī alɛwa, n yɔ̄ í yá ɔtūnōbí kú ɛlā nyā. Ń lé ɔdōlé ɛ́ɛ́, nɛ̄ n kōō ī gwá ɔdā dúúmā ŋ́. Anɔ́ɔ n gbɔɔ́ ō gbɔ̄ɔkɔ lɛ Ɔwɔicō kahíníi

⁵‘Óndú, Ɔwɔicō kú ɔkpáncō, a nwuné, a klla tūufi, a lɛ ɛgahi nɛ̄hi. A gē lɛ okónu nāa ce mla ācɛ nāa he uwá ɔtū, nēe klla ī lɛyí táajɛ gā awɔ ā, tū eko dóódu.

⁶Óndú pīyeyī má um kú ā pó ɔkɔ nɛ̄ n gē gbā ā. Ɔkɔ nɛ̄ n yɔ̄ ī gbā, kwu otú kwu ɛnɔ ohígbū ācocɛ̄hɔ̄ kú uwɔ, ācɛ kú Ísrɛ̄lu ā. Alɔ mɛ́mla aádáádā alɔ wɛ ācobīyíne nɛ̄.

⁷Alɔ yá ucē kú ɔ́bíipú lɛyíkwu uwɔ. Alɔ í klla lɛyítáajɛ lɛ ɔ́da mɛ́mla íne nāa je lɛ alɔ ā ŋ́. Alɔ í lɛyí táajɛ lɛ odúúdú íne nāa je lɛ alɔ bū abɔ̄ kú Umósīsi ɔ̄cocɛ̄hɔ̄ kú uwɔ ā ŋ́.

⁸Óndú blakwu ɛlā nāa da Umósīsi ka, ‘Ɔ́dáŋ ka aá ācɛ kú Ísrɛ̄lu ā, í lɛyítáajɛ ga um ŋ́, n géē je aá pahīla tū ipú éwo dóódu kú ɛcɛ ā.

⁹Amáŋ, ɔ́dāŋ ka aá kwúcē wā ɛgiyí um, nɛ̄ aá gbɔɔ́ ō lɛyítáajɛ gā um klla gbɔɔ́ ō yá ɔdā nɛ̄ n da aá ka aá yá ā, n géē je aá kwúcē wā Ujerúsālɛm ɛga nɛ̄ n je ka aá géē gbā um ɛ̄gbā ā. Nááná nɛ̄ aá le fíyákátā ga oŋmɛ́yí kú ɛcɛ ā, n géē je aá kwúcē wā ɔlɛ́

¹⁰Óndú, ācɛ Ujíyu ā wɛ ācɛ kú ɔlɛ́ uwɔ mɛ́mla ācocɛ̄hɔ̄ kú uwɔ nɛ. A bī ɔfú nɛ̄hi mla íkwu kú uwɔ ā, le uwá hɛ́tá.

¹¹Óndú, pó ɔkɔ nɛ̄ n gē gbā gā uwɔ, mɛ́mla ɔkɔ nɛ̄ odúúdú ācocɛ̄hɔ̄ kú uwɔ ɔhá nēe gē lɛ ojīlīmā ce uwɔ klla í tíne kéē lɛyítáajɛ ga uwɔ ā, gē gbā ā. Óndú, tá um abɔ̄ ícɛ, cɛ́ɛ́ ka ɔcɛ́nɛ̄hi ā kóō lɛ āhɔ̄ jē gā um, kóō klla lɛ eyīnyinyi kú um má.” Ɛplá eko ɔ́ɔmā, Unehemíya ka anúɔ wɛ ɔ̄cɛ o tū ejé lɛ ɔcɛ́ á.