Read idoma UNEHEMÍYA 10 Bible Online

UNEHEMÍYA 10 - idoma bible

UNEHEMÍYA 10

¹Ɔ̄cɛ nōo lɛ abɔ̄ tɔ́ɔkpá nēé tā ā, aflɛ́yí ā wɛ Unehemíya, igbómína kú alɔ, ɔyínɔ̄nyīlɔ kú Uhálikāliya, ɛ́ɛ́ nɛ̄ Usedekíya lɛ abɔ̄ tɔ́ɔkpá ɔ̄ gboce ɔ́ á. Ācɛ ɔhá nēe bá nyā lɛ abɔ̄ tá ɔkpá ā ce īyī wā ŋmá ipú ācogwɛ́ɛya ā:

²Useráya, Asárīya, Ujeremíya,

³Upássɔ, Amárīya, Umálikīja,

⁴Uhátūsi, Ussebaníya, Umálúci,

⁵Uhárim, Umérēmɔtu, Obadáya,

⁶Udánīyɛ̄lu, Ugínētɔn, Ubáruku,

⁷Uméssūlam, Ábīja, Umijámin,

⁸Umáasīya, Ubíligāyi mɛ́mla Ussɛmáya.

⁹Ācɛ nēe lɛ abɔ̄ tɔ́ɔkpá ā ŋmá ipɔ́ɔma kú Ulífāyi ā wɛ: Ujéssuwa, ɔyí kú Asánīya, Ubinúwi ŋmá ipɔ́ɔma kú Uhenádadi, Ukádimīyɛlu, Ussebaníya, Uhódīya Ukélīta,

¹⁰Upéláya, Uhánan,

¹¹Umíka, Uréhōbu, Uhassábīya,

¹²Usákɔ, Ussiyɛbíya, Ussebaníya,

¹³Uhódīya, Ubáni mɛ́mla Ubénīnu.

¹⁴Aótrɛ̄yí kú ācɛ nēe lɛ abɔ̄ tɔ́ɔkpá ā wɛ: Upárōssi, Upáhāti, Umówābu, Ɛlām, Usátu, Ubáni,

¹⁵Ubúni, Asigādi Ubébāyi,

¹⁶Adónīja, Ubígifāyi, Adin,

¹⁷Áta, Uhesekíya, Ássɔ,

¹⁸Uhódīya, Uhássum, Ubésa,

¹⁹Uharífi, Ánatōtu, Ubébāyi,

²⁰Umágipīyasi, Uméssūlam, Uhɛ́siyɛ,

²¹Umɛssɛ́sābɛlu, Usádɔ̄ku, Ujádúya,

²²Upélatīya, Uhánan, Anáya,

²³Uhóssēya, Uhananíya, Uhássubu,

²⁴Uhállōhesi, Upíliha, Ussóbɛ̄ku,

²⁵Uréhum, Uhássābina, Umáasáya,

²⁶Ahíya, Uhána, Ánan,

²⁷Umálūci, Uhárim mɛ́mla Ubaána.

²⁸“Alɔ nēe wɛ ācɛ kú Ísrɛ̄lu ā, ācogwɛ́ɛya, ācɛ Ulífāyi, ācogbo Okómpíinu kú Agblīihɔ-nɛ̄hi, ācogwííjē kú Agblīihɔ-nɛ̄hi ā, odúúdú ācoyúklɔ́ kú ipú Agblīihɔ-nɛ̄hi ā, mɛ́mla odúúdú alɔ nēe lɛyítáajɛ lɛ íne kú Ɔwɔicō ā klla lɛ īyī alɔ kpó bɛ̄cɛ ŋmá ipú éwɔhá nēe lā ipú ajɛ kú alɔ ā, alɔ mɛ́mla anyā alɔ mɛ́mla ayí alɔ nēe jɛ́ɛ́yí ɔdā glá ɛɛ́ ā,

²⁹gē gbɛɛka ícɛ ka odúúdú alɔ géē lā lɛ Ɔwɔicō, ɛ́gɛ́nɛ̄ íne kú Ɔwɔicō lɛ a, íne nɛ̄ Ɔwɔicō je lɛ alɔ bū abɔ̄ kú Umósīsi ā ka ɛka í kwú ɔ̄cɛ dóódu nōo lɛ íne ā nyílá. Alɔ klla cokónu ka alɔ géē lɛyítáajɛ lɛ odúúdú ɔ́da mɛ́mla íne nɛ̄ Óndú ā Ɔwɔicō kú alɔ je lɛ alɔ ā. Alɔ kē í lɛ odúúdú íne ā mɛ́mla ɔ́da kú nū dóódu tū, klla í yá odúúdú nū.

³⁰Alɔ í gáā lɛ anyā ŋmá ipú aéwɔhá nēe lā ipú alɔ mɛ́mla ipú ajɛ kú alɔ ā gɛ ŋ́.

³¹ Ɔ́dáŋ ka aéwɔhá le īkpɔ̄dɛ̄hɔ̄, amáŋ ka ɔdɔ̄há dúúmā bī wā í je lá lɛ alɔ ɛ̄cī Usábāti, alɔ í gáā lá ŋmá abɔ̄ uwá ŋ́. Ipú iháyí ahāapa dóódu, alɔ géē je omlɛ́nyɔ́ lɛ ajɛ ɛhɔ̄ kú alɔ, alɔ í gáā hí ɔdā dúúmā ipú ajɛ ā ŋ́. Odúúdú ācɛ nēe bī alɔ ulé ā, alɔ géē je kpó yá uwá ɛhi ipú iháyí ɔ́mahāapa ā.

³²Ipú iháyí dóódu, ɔnyɔɔnyɛ kú alɔ géē cíla ije nɛ̄hɛ́ ɛhɔ̄ tū ipú ɛgbá kú Agblīihɔ-nɛ̄hi kú Óndú ā.

³³Alɔ̄ cɛ̄ tɔ̄há ka alɔ géē da aɔ́dā nēe bá nyā kéē bī lɛ gbɛ̄gbā ipú Agblīihɔ-nɛ̄hi ā: igbō nɛ̄ ó gē nū ŋ́ mā, umu, ɛna mɛ́mla álá kú ɔdā ɛgbā kú ɛya o yɔlá dúúdú kú ɛ̄cī dóódu, mɛ́mla ɛya otīihɔ kú Usábāti, eko kú ucɛ kú ɔyā ɛ̄yīpɛ̄ mɛ́mla eko ucɛ ɔhá dóódu. Alɔ klla í bī ɔdā ɛ̄gbā, cɛ́ɛ́ kéē kwú íne nɛ̄ ācɛ Ísrɛ̄lu bīya ā, í yá uwā ɛhi. Alɔ klla í kpó aɔ́dā ɔhá dóódu nōo cɛgbá ipú Agblīihɔ-nɛ̄hi kú Óndú ā wā dúú.

³⁴Alɔ mɛ́mla ācogwɛ́ɛya, mɛ́mla ācɛ Ulífāyi géē bā í tá ūlī iháyí dóódu kú ālɔ̄ jé ipɔ́ɔma nōo géē yɔ̄ í cɛ̄ ɛfú kú ɛya o yɔlá dúúdú lɛ Óndú, Ɔwɔicō kú alɔ ɛ́gɛ́nɛ̄ é ka ipú íne ā lɛ ā.

³⁵Iháyí dóódu, alɔ géē yɔ̄ ī bī ɔdɛ̄hɔ̄ aflɛ́yí kú alɔ gé lɛ Óndú ā, ipú Agblīihɔ-nɛ̄hi kú nū. Alɔ géē bī ikpɔ̄cí kú alɔ dóódu nōo géē pīya aflɛ́yí ā wā dúú.

³⁶Alɔ géē bī ɔ́kplá kú alɔ dóódu ga ɛgiyí ācogwɛ́ɛya ipú Agblīihɔ-nɛ̄hi gaá je ɔ́ tū Ɔwɔicō abɔ̄, ɛ́gɛ́nɛ̄ é tá ipú íne lɛ ā. Ɔyí aflɛ́yí kú ɛna, álá, mɛ́mla ɛwū kú alɔ, alɔ géē kpó uwā gé lɛ Óndú ā ipú Agblīihɔ-nɛ̄hi kú nū dúú.

³⁷ Igbō kú aflɛ́yí nēé géē yá ŋmá ɔdɛ̄hɔ̄ kú alɔ iháyí dóódu ā, alɔ géē bī gē lɛ ācogwɛ́ɛya ipú Agblīihɔ-nɛ̄hi kú Óndú ā, iháyí dóódu mɛ́mla ɛhi kú īkpɔ̄dā, ejé, anɔ̄ kú ólīfu mɛ́mla ɛdɔ īkpɔ̄cí ɔhá dóódu. Ɛhi kú éyi ŋmá ipíigwó kú ɔdɛ̄hɔ̄ kú alɔ dóódu, alɔ géē je kpó gé lɛ ācɛ Ulífāyi nēe gē mīyɛ ɛhi nyā igelī nɛ̄ŋcɛ́ kú alɔ dóódu ā.

³⁸Ɔ̄cogwɛ́ɛya, ɔyí kú ipɔ́ɔma kú Árɔ̄ni ā, géē yɔ̄ mla ācɛ Ulífāyi eko nēé géē mīyɛ ɛhi kú éyi ŋmá ipú igwó nyā, nēé gē bī gaá yúklɔ́ ipú Agblīihɔ-nɛ̄hi. Ayí kú Ulífāyi kē í kpó ɛhi kú éyi ŋmá ipú igwó nyā bá inu ɛga o kpó ɔdɛhi nyā tū kú ipú Agblīihɔ-nɛ̄hi kú Óndú ā.

³⁹Ācɛ kú Ísrɛ̄lu mɛ́mla ayí kú Ulífāyi géē bī ɛhi kú īkpɔ̄dɛ̄hɔ̄, ejé, anɔ̄ kú ólīfu, gāa kpó tū ipú inu ɛga o kpó iyó kú úklɔ́ kú ipú Agblīihɔ-nɛ̄hi tū, ɛga nɛ̄ ācogwɛ́ɛya gē bá ī yúklɔ́ ā. Ɛga nɛ̄ ācogbō okómpíinu kú Agblīihɔ-nɛ̄hi mɛ́mla ācogwíije klla lā ā. Alɔ í gáā lɛ eyī gwū Agblīihɔ-nɛ̄hi kú Óndú, Ɔwɔicō kú alɔ bónū ŋ́.