Read idoma UNEHEMÍYA 11 Bible Online

UNEHEMÍYA 11 - idoma bible

UNEHEMÍYA 11

¹Aótrɛ̄yí ā lā Ujerúsālɛm, anɔ́ɔ ācɛ o hile ā le ūlī tá, cɛ́ɛ́ kéē fu ipɔ́ɔnū éyi ŋmá ipú ipɔ́ɔnū igwó kéē nyɔ̄ í lā Ujerúsālɛm. Cɛ́ɛ́, ācɛ ohile kú uwā ā, géē nyɔ̄ í lā aígelī nɛ̄hi ohile kú Ujerúsālɛm.

²Ācɛ cɛ̄tra ɔ̄cɛ dúúmā nōo cɛ̄ abɔ̄yī nū ka anúɔ géē nyɔ̄ í lā Ujerúsālɛm.

³Ācɛ kú Ísrɛ̄lu, ācogwɛ́ɛya, ācɛ Ulífāyi, ācoyúklɔ́ kú ipú Agblīihɔ-nɛ̄hi ā, mɛ́mla ayí kú ācocɛ̄hɔ̄ kú Usólōmɔn lā ipú ajɛ kú abɔ̄yī uwā mɛ́mla ipú igelī nɛ̄ŋcɛ́ kú abɔ̄yī uwā. Ɛ̄nyā wɛ iyē kú ācɛ nēe ŋmá ipɔ́ɔma ɛyɛ́ɛyɛ́yí nyɔ̄ í lā Ujerúsālɛm ā.

⁴Ācɛ nēe ŋmá ipɔ́ɔma kú Ujúda ā wɛ: Atáya, ɔyí kú Usíya ɔyí kú ɔyí kú Usékarīya. aádáádā nū ɔhá ā wɛ, Amárīya, Ussɛfatíya, mɛ́mla Umahalálelu, ayí kú ɔyí kú Ujúda, Upɛrɛ́si.

⁵Umáasīya, ɔyí kú Ubárūki ɔyí kú ɔyí kú Ukólihōse. Aádā nū ɔhá ā wɛ, Uhásīya, Adáya, Ujóyāribu mɛ́mla Usekaríya, odúúdú uwá wɛ ayí kú Uséla, ɔyí kú Ujúda.

⁶Ayí kú ipɔ́ɔma kú Upɛrɛ́si nēe lā Ujerúsālɛm ā wɛ úlā ce ofɛtá ce ahātá.

⁷Ācɛ nēe ŋmá ipɔ́ɔma kú Ubénjamīn nēe lā Ujerúsālɛm ā wɛ, Usálu, ɔyí kú Uméssūlam, ɔyí kú ɔyí kú Ujówēdi. aádáádā nū ohile wɛ, Upedáya, Ukoláya, Umáaséya, Itíyɛlu mɛ́mla Ujessáya.

⁸Ugábali mɛ́mla Usaláyi, aɔ́máapú kú Usaláyi ajaajɛ. Odúúdú ācɛ kú ipɔ́ɔma kú Ubénjamīn nēe lā Ujerúsālɛm ā wɛ úlā ɛpa ce ofɛhīlī ce ahātá.

⁹Ujówɛ̄lu, ɔyí kú Usíkiri wɛ otrɛ̄yí kú uwá, ɛ́ɛ́ nɛ̄ Ujúda, ɔyí kú Uhássēnuwa kpokónu ce ɔ̄ á.

¹⁰Ācogwɛ́ɛya nēe lā Ujerúsālɛm ā wɛ, Ujédāya, ɔyí kú Ujoyárību mɛ́mla Ujácin.

¹¹Usɛráya, ɔyí kú Uhílikīya, ɔyí kú ɔyí kú Uméssūlam, aádáádā nū ohile ā wɛ: Usádɔ̄ku, Umérāyɔ̄tu mɛ́mla Ahítūbu, nōo wɛ otrɛ̄yí kú ācogwɛ́ɛya ā.

¹²Ācɛ úlā ɛpa ce ofu cɛpa kú ipɔ́ɔma nyā gē yúklɔ́ ipú Agblīihɔ-nɛ̄hi kú Óndú ā. Adáya, ɔyí kú Ujérōham, ɔyí kú ɔyí kú Upélālíya. Ádáádā nū wɛ, Ámsi, Usekaríya, Upássɔ mɛ́mla Umálikīja.

¹³Ācɛ ofu igwɛ́ɛpa cɛpa ŋmá ipú uwā wɛ aótrɛ̄yí kú aípɔ́ɔma kú uwā á. Amássāyi, ɔyí kú Asárɛ̄lu, ɔyí kú ɔyí kú Ássāyi. Aádā nū wɛ Umessílēmɔ̄tu mɛ́mla Ímma.

¹⁴Ācɛ ofɛhīlī ce ahātá kú ipɔ́ɔma nyā wɛ aícɔ́ɔja o jɔ́dā nɛ̄hi. Otrɛ̄yí kú uwá wɛ Usábudíyɛlu.

¹⁵Ācɛ kú Ulífāyi nēe lā Ujerúsālɛm ā wɛ, Ussɛmáya ɔyí kú Asríkam, Uhásbābīya mɛ́mla Ubúni.

¹⁶Ussabetáyi mɛ́mla Ujósābādi, é wɛ ācɛ Ulífāyi nēe gē leyīkwu úklɔ́ kú eyɛ̄ɛ̄cɛ kú Agblīihɔ-nɛ̄hi ā.

¹⁷Umɛtánīya, ɔyí kú Umíka, ɔyí kú ɔyí kú Usábadi, ayí kú Ásāfu. Anú gē kpó ācogwíijē trɛ̄yí kéē gwííjē eko nēé gē gbɔ̄ɔkɔ ī tá Ɔwɔicō ahínyá ā. Ubakibukíya kpókónu ce Umɛtánīya á. Ábuda, ɔyí kú Ussamúwa ɔyí kú ɔyí kú Ugálalu ŋmá ipɔ́ɔma kú Ujédūtun.

¹⁸Odúúdú ācɛ Ulífāyi nēe lā Ujerúsālɛm ā wɛ ofu igwɛ́ɛnɛ ce ɛnɛ.

¹⁹Ācogbō okómpíinu kú Agblīihɔ-nɛ̄hi nēe lā Ujerúsālɛm ā, wɛ Ákūbu, mɛ́mla Utámɔn nōo wɛ aɔ́máapú uwá ā. É wɛ, ofu ahātá ce igwɛ́ɛpa.

²⁰Ācɛ ohile kú Ísrɛ̄lu mɛ́mla ācogwɛ́ɛya nēe hile ā, mɛ́mla ācɛ Ulífāyi nēe lā ipú ajɛ kú abɔ̄yī uwā ipú aígelī nɛ̄hi ɔhá ā, mɛ́mla aígelī nɛ̄ŋcɛ́ ɔhá kú Ujúda ā.

²¹Ācoyúklɔ́ kú ipú Agblīihɔ-nɛ̄hi ā lā āyā kú Ujerúsālɛm nēé hī ka Ófelu ā. Usíha mɛ́mla Ugísipa gē leyīkwu úklɔ́ kú uwā á.

²²Ɔ̄cɛ nōo gē leyīkwu úklɔ́ kú ācɛ Ulífāyi nōo lā Ujerúsālɛm ā wɛ Ússi, ɔyí kú Ubáni, ɔyí kú ɔyí kú Uhassábīya, ɔyí kú Umɛtánīya mɛ́mla Umíka. É kē wɛ ācɛ ipɔ́ɔma kú Ásāfu, ipɔ́ɔma nēe gē gwíijē ipú Agblīihɔ-nɛ̄hi kú Óndú ā eko nēe kú ɛ̄gbā ō gbā Óndú ā.

²³Ɔcɛ́ le ɔ́da je lɛ uwā ɛ́gɛ́nɛ̄ ipɔ́ɔma kú uwá ā géē bā í gwííjē hīla abɔ̄ ipú Agblīihɔ-nɛ̄hi ɛ̄cī dóódu ā.

²⁴Upetahíya, ɔyí kú Umɛssɛ́sābɛlu nōo ŋmá ipɔ́ɔma kú Uséra kú ipɔ́ɔma kú Ujúda ā, kwɛyí ācɛ kú Ísrɛ̄lu únɛ́pɔ̄ (ukɔ́tu) kú ajɛ kú Ubábīlɔn (Upɛ́siya) á.

²⁵Ācɛ alɛwa kú uwā lā aígelī nɛ̄hi nēe kwu ɛhɔ̄ kú uwā ajaajɛ ā. Ācɛ nēe ŋmá ipɔ́ɔma kú Ujúda ā lā Ukɛriyáti Aába, Udíbɔn, mɛ́mla Ujékābisiil, mɛ́mla aípɔ́lɛ́ nɛ̄ŋ́cɛ́ nēe kwu igelī nɛ̄hi kú uwā a.

²⁶É klla lā aígelī nɛ̄hi kú Ujéssuwa, Umólāda, Ubɛtipɛ́lēti.

²⁷Uhasassūwalu, Ubiyɛssíba mɛ́mla aéyīpɔ́lɛ́ nēe yɛ uwá jīla tá ā.

²⁸É klla lā aígelī nɛ̄hi kú Usíkilāgi mɛ́mla Umekóna mɛ́mla aɔ́lɛ́ nɛ̄ŋcɛ́ kú uwá.

²⁹Ipú Enrimmɔ́n, Usóra, ipú Ujámūtu,

³⁰Usánōwa, Adulám mɛ́mla aípɔ́lɛ́ nɛ̄ŋcɛ́ kú uwá. É lā Ulákiss mɛ́mla ɛhɔ̄ nōo kwu ɔ́ ajaajɛ ā, Asɛ́ka mla aípɔ́lɛ́ kú uwá. Ācɛ kú Ujúda ā lā ɔtāhɛ̄ kú Ubiyɛssíba ɛháajɛ mɛ́mla ɔpɛ́ kú Uhínom ɛhícō.

³¹Ācɛ kú ipɔ́ɔma kú Ubénjamīn ā lā Ugéba, Umíkimāsi, Áyi, Ubɛ́tɛlu, mɛ́mla aéyīpɔ́lɛ́ nēe kwu uwá ajaajɛ ā.

³²Anátōtū, Unóbu, Ananíya,

³³Uhásɔ, Uráma, Ugítayím,

³⁴Uhádīdi, Usebáyim, Unebálāti,

³⁵Ulódu, mɛ́mla Óno, mɛ́mla aípɔ́lɛ́ kú ācoyúklábɔ̄ ā.

³⁶É le ígwu ōhī kú Ulífāyi nēe lā ipú ajɛ kú Ujúda ā kpó nyɔ̄ í lā ipú ajɛ kú Ubénjamīn dúú.