Read idoma UNEHEMÍYA 12 Bible Online

UNEHEMÍYA 12 - idoma bible

UNEHEMÍYA 12

¹Aíyē kú ācogwɛ́ɛya mɛ́mla ācɛ Ulífāyi nēe pīyɛyí ŋmá Ubábīlɔn wā Ujerúsālɛm mɛ́mla Userúbābɛlu, ɔyí kú Ussɛ́ltīyɛlu, mɛ́mla Ujessúwa, otrɛ̄yí kú ācogwɛ́ɛya ā, bá yɔ̄ á: Useráya, Ujeremíya, Ɛ́sra,

²Amárīya, Umállūci, Uhátɔ̄si,

³Ussɛkaníya, Uréhum, Umérēmɔtu,

⁴Íddo, Ugínnetōyi, Ábīja,

⁵Umijámin, Umaádīya, Ubíliga,

⁶Ussɛmáya, Ujóyāribu, Ujedáya,

⁷Usálu, Ámɔ̄ku, Uhílikīya, mɛ́mla Ujedáya. Ācɛ nēe bá nyā wɛ aótrɛ̄yí kú ācogwɛ́ɛya ɔ́mpa uwā eko kú Ujessúwa á.

⁸Ācɛ kú Ulífāyi nēe bá nyā leyīkwu ijē ō gwó kú ahínyá ō tá Ɔwɔicō á: Ujessúwa, Ubinúwi, Ukadimíyɛlu, Userebíya, Ujúda mɛ́mla Umataníya.

⁹Ayí Ulífāyi kú ipú ācogwííjē nēe gē cɛ̄ ijē ā bá yɔ̄ á: Ubakibukíya, Úno, mɛ́mla aúlífāyi ɔ́mpa uwā.

¹⁰Ujessúwa wɛ ádā kú Ujóyākim nōo ma Ɛlíyāssibu, nōo kē ma Ujóyāda ā.

¹¹Ujóyāda ma Ujonátan, nōo kē ma Ujadúwa ā.

¹²Eko nɛ̄ Ujóyākim wɛ otrɛ̄yí kú ācogwɛ́ɛya ā, ācogwɛ́ɛya nēe bá nyā wɛ aótrɛ̄yí kú ipɔ́ɔma kú ācogwɛ́ɛya ā: Umeráya wɛ otrɛ̄yí kú ipɔ́ɔma kú Useráya á. Uhanánīya wɛ otrɛ̄yí kú ipɔ́ɔma kú Ujeremíya á.

¹³Uméssūlam wɛ otrɛ̄yí kú ipɔ́ɔma kú Ɛ́sra á. Ujehónānan wɛ otrɛ̄yí kú ipɔ́ɔma kú Amaríya á.

¹⁴Ujonátan wɛ otrɛ̄yí kú ipɔ́ɔma kú Umáluci á. Ujósɛ̄fu wɛ otrɛ̄yí kú ipɔ́ɔma kú Ussebaníya á.

¹⁵Ádīna wɛ otrɛ̄yí kú ipɔ́ɔma kú Uhárim á. Uhekáyi wɛ otrɛ̄yí kú ipɔ́ɔma kú Umeráyɔ̄tu á.

¹⁶Usekaríya wɛ otrɛ̄yí kú ipɔ́ɔma kú Ído á. Uméssūlam wɛ otrɛ̄yí kú ipɔ́ɔma kú Ugínnētɔn á.

¹⁷Usíkiri wɛ otrɛ̄yí kú ipɔ́ɔma kú Ábīja á. Ɔ̄cɛ éyi ŋmá ipɔ́ɔma kú Uminiyámin. Upílitāyi wɛ otrɛ̄yí kú ipɔ́ɔma kú Umowadíya á.

¹⁸Ussamúwa wɛ otrɛ̄yí kú ipɔ́ɔma kú Ubíliga á. Ujehónātan wɛ otrɛ̄yí kú ipɔ́ɔma kú Ussɛmáya á.

¹⁹Umatɛnáyi wɛ otrɛ̄yí kú ipɔ́ɔma kú Ujoyárību á. Ússi wɛ otrɛ̄yí kú ipɔ́ɔma kú Ujedáya á.

²⁰Ukálāyi wɛ otrɛ̄yí kú ipɔ́ɔma kú Usálāyi á. Éba wɛ otrɛ̄yí kú ipɔ́ɔma kú Ámɔ̄ku á.

²¹Uhassābīya wɛ otrɛ̄yí kú ipɔ́ɔma kú Uhílikīya á. Unetánɛ̄lu kē wɛ otrɛ̄yí kú ipɔ́ɔma kú Ujedáya ɔhá ā á.

²²É le iyē kú aótrɛ̄yí kú ācɛ Ulífāyi mɛ́mla ācogwɛ́ɛya tá eko kú aótrɛ̄yí kú ācogwɛ́ɛya nēe bá nya: Ɛlíyāssību, Ujóyāda, Ujonátan, mɛ́mla Ujadúwa. É tá iyē nyā tāajɛ kwɛyí eko nɛ̄ Udáyírɔ̄si wɛ ɔcɛ́nɛ̄hi kú Upésīya ā.

²³Amáŋ eko kú Ujonátan ɔyí kú ɔyí kú Ɛlíyāssību klɔ́dɔ́ɔ́ nēé tá iyē kú ācɛ kú Ulífāyi tāajɛ á.

²⁴Uhassabíya, Usserebíya, Ujessúwa, ɔyínɔ̄nyīlɔ kú Ukadimíyɛlu, mɛ́mla ācɛ Ulífāyi ɔ́mpa uwā, yá kéē lɛ ācɛ Ulífāyi ohile ā kɔ̄ ígwu ɛpa nēe géē gwíijē ō cɛ̄tra Ɔwɔicō ipú kú Agblīihɔ-nɛ̄hi ā. Ígwu ɛpɛɛpa gē bā í gwííjē ī cɛ̄tra, klla í tá Ɔwɔicō ahínyá ɛ́gɛ́nɛ̄ íne nɛ̄ Udéfīdi, ɔ̄cɛ kú Ɔwɔicō je lɛ uwá ā ka lɛ ā.

²⁵Ācɛ kú Ulífāyi nēe gē gbāajɛ kú ɛga okpó iyó tū nōo yɔ̄ okómpíinu kú Agblīihɔ-nɛ̄hi ā bá yɔ̄ á: Umataníya, Ubakibukíya, Obadáya, Uméssūlam, Utálimɔn mɛ́mla Ákɔ̄bu.

²⁶Ācɛ nēe bá ā lā klla yúklɔ́ kú uwá eko kú Ujóyākim, ɔyí kú Ujessúwa, ɔyí kú ɔyí kú Ujehósādaki mɛ́mla eko kú Unehemíya, igbómína, mɛ́mla Ɛ́sra, ɔ̄cogwɛ́ɛya mɛ́mla ɔ̄cɛ o jé íne nɛ̄hi ā.

²⁷Eko nēé bá í je ɔdɔ kú Ujerúsālɛm ā tū Ɔwɔicō abɔ̄ ā, é le odúúdú ācɛ kú Ulífāyi nōo ŋmá ɛga dóódu nēé lā ā, hīgwú wā ipú Agblīihɔ-nɛ̄hi ā, cɛ́ɛ́ kéē gwéeyē klla gwíijē ō cɛ̄tra Ɔwɔicō gē tá ɔ̄ ahínyá. É bā ī gwó oké mɛ́mla ɛ̄ngwū tū ijē kú uwā ā dúú.

²⁸Odúúdú ācogwíijē kú Ulífāyi ā le pɛ́ ŋmá ɛga dóódu nēé lā jīla Ujerúsālɛm tá mɛ́mla aígelī nɛ̄hi nēe yɛ Unétōfa jīla tá ā gaá le jīla ipú Ujerúsālɛm.

²⁹É klla ŋmá Ubɛtigígalu, Ugéba, mɛ́mla Asimáfɛ̄ti.

³⁰Ācogwɛ́ɛya ā le uculo kú iyē ō gwu kú īyī uwā, mɛ́mla ákú ācɛ ā yá. É le ákú ɔdɔ kú Ujerúsālɛm ā, mɛ́mla odúúdú okónɔɔwɛ kú nū ú kpó yá dúú.

³¹N le odúúdú aótrɛ̄yí kú Ujúda ā kpó gaá le jīla icō kú ɔdɔ ā. Anɔ́ɔ n kwú uwā ú yá otrɛ̄yí kú ígwu ɛpa nɛ̄hi kú ācɛ ā, cɛ́ɛ́ kéē nɔwɔ jīla igá kú igelī ā, bá gē tá Ɔwɔicō ahínyá. Ígwu kú aflɛ́yí ā le yɛ ga abɔ̄lɔ́ná, icō kú ɔdɔ ā lɛyíkwu okónɔɔwɛ kú útrīmū ā[5]

³²Uhossáya mɛ́mla āyā éyi kú aótrɛ̄yí kú ācɛ Ujúda ā, nɔwɔ tá ācogwíijē ā igbīhi.

³³Ācogwɛ́ɛya nēe tá uwā igbīhi bá í tá opo ā bá yɔ̄ á: Asaríya, Ɛ́sra, Umessúllam,

³⁴Ujúda, Ubénjamīn, Ussɛmáya mɛ́mla Ujeremíya.

³⁵Ācogwɛ́ɛya nēe bá nyā bá ī tá opo gboce uwá á: Usekaríya, ɔyí kú Ujonátan, ɔyí kú ɔyí kú Ussɛmáya nɛ̄ aádáádā nū wɛ, Umataníya, Umíkāya mɛ́mla Usákɔ kú ipɔ́ɔma kú Ásāfu ā, mɛ́mla

³⁶ācɛ aípɔ́ɔma kú ɔlɛ́ nū ɔhá. Ācɛ ā bá yɔ̄ á: Ussɛmáya, Asárɛlu, Umilálāyi, Ugilálāyi, Umaáyi, Unetánɛ̄lu, Ujúda mɛ́mla Uhanáni. Odúúdú ācɛ nēe bá nyā bī ɛdɔ ɔdā ō bī gwíijē dóódu nɛ̄ Udéfīdi, ɔ̄cɛ kú Ɔwɔicō tɛtɛ gē bī le gwííjē ā abɔ̄. Ɛ́sra, ɔ̄cogwɛ́ɛya mɛ́mla ɔ̄cɛ o jé íne nɛ̄hi ā bī ígwu nyā tá á.

³⁷É le yɛ gico ɛgiyí okónɔɔwɛ kú okónu obugā nōo yɛ ga igelī nɛ̄hi kú Udéfīdi ā. É klla le yɛ bū agbla kú Udéfīdi gaá le yɛ tá okónɔɔwɛ kú éŋkpɔ̄, nōo yɔ̄ ɛnɔ̄ɔ̄nɛ̄ kú igelī nɛ̄hi ā.

³⁸Ígwu ɔhá kú ācɛ nēe gē tá ahínyá ā, yɛ lɛyíkwu abɔ̄lúfīyē kú ɔdɔ ā. N yɛce ígwu éyi kú ācɛ ɔ́ɔmā. Alɔ yɛ gaá bū ɛgiyí inɔ̄ɔda kú útuló ɛgiyí ɔdɔ nēé hī ka ɔdɔ ō cɔkpɛ́nú nɛ̄hi ā.

³⁹Alɔ ŋmá abɔ̄ gaá bū okónɔɔwɛ kú Ɛ́frem, mɛ́mla okónɔɔwɛ nɛ̄ncɛ̄, gaá bū okónɔɔwɛ nēé hī ka ákú ɛbéenyi, klla gaá le bū ɛgiyí inɔ̄ɔda kú Uhanánɛlu mɛ́mla ɛgiyí inɔ̄ɔda nēé hī ka ákú ofɛhɔ̄ ā. Alɔ klla le yɛ ga okónɔɔwɛ nēé hī ka ákú aálá ā. Iyāwu kú ígwu kú alɔ ā gaá le ŋmɛ́yí okónu okónɔɔwɛ kú Agblīihɔ-nɛ̄hi ā.

⁴⁰Anɔ́ɔ ígwu ɛpɛlɛ́ɛpa nēe bā í gwííjē, bā i gwó ɔdā, klla bá ī tá Ɔwɔicō ahínyá ā, gaá le jīla ɛgiyí Agblīihɔ-nɛ̄hi kú Óndú ā. Anɔ́ɔ ami mɛ́mla ígwu kú anyākwɔ́cɛ nēe bá mla am ā,

⁴¹mɛ́mla ācogwɛ́ɛya nēe bá nyā bá ipú ígwu kú um dúú. É wɛ Ɛlíyākim, Umáasēya, Uminiyámin, Umikáya, Ɛlíyōnāyi, Usekaríya mɛ́mla Uhananíya bá í tá opo dúú.

⁴²Ussɛmáya, Ɛlísa, Ússi, Ujehóhanān, Umákīya, Ɛ́lam, mɛ́mla Ésa gboce uwá. Ācogwíijē nɛ̄ Ujeremíya wɛ otrɛ̄yí kú uwā ā, bā í gwííjē gbōmgbōm mla odúúdú ɔfú kú uwā.

⁴³Ācɛ gwɛ́ɛya nɛ̄hi ícíícɛ ɔ́ɔmā. Ohígbū ka Ɔwɔicō le yá kú ɔtū kóō he uwá. Anɔ́ɔ é gwéeyē nɛ̄hi á. Kwu ācɛnyā mɛ́mla ayípɛ̄nɛ̄ŋ́cɛ́ ā bā í gwéeyē dúú. Ācɛ pó uya kú éeyē nēé bā ī gwó ā, ɛga dóódu.

⁴⁴Eko ɔ́ɔmā, é lɛ ācɛ kpó kéē leyīkwu aɔ́dā nēé gē da wā ipú Agblīihɔ-nɛ̄hi ā. Uwá klla gē leyīkwu ɛhi kú ɔdɛ̄hɔ̄ aflɛ́yí nēé gē cē ā, mɛ́mla ɛhi kú éyi ŋmá ipú igwó kú ɔdɛ̄hɔ̄ dóódu nēé cē iháyí dóódu ā. Ācɛ ɔ́ɔmā klla ī mīyɛ ɔdɛ̄hɔ̄ nēe wɛ ukpɛ̄ kú ācogwɛ́ɛya mɛ́mla ācɛ Ulífāyi ā. É gē mīyɛ ukpɛ̄ nyā ŋmá ɛhɔ̄ nēe kwu aígelī nɛ̄hi ajaajɛ ā, ɛ́gɛ́nɛ̄ íne ka lɛ ā. Ɔdā nɛ̄ ācogwɛ́ɛya mɛ́mla ācɛ Ulífāyi bá gē yá ā he odúúdú ācɛ Ujúda ɔtū.

⁴⁵É le Uculo kú iyē ō gwu mɛ́mla aúculo ɔhá dóódu nēé tá ipú íne kú Ɔwɔicō ā yá kwɛyí. Ācogwíijē mɛ́mla ācogbāajɛ kú okónɔɔwɛ kú Agblīihɔ-nɛ̄hi kē le úklɔ́ kú uwā yá ɛ́gɛ́nɛ̄ Udéfīdi, ɔcɛ́ ā, mɛ́mla Usólōmɔn, ɔyí nū je íne lɛyíkwu uwá lɛ ā.

⁴⁶O ŋmífī kú eko kú Udéfīdi, ɔcɛ́ ā, mɛ́mla Ásāfu, ɔ̄cɛ o leyīkwu ɔ̄cogwíijē kú íkée ā, ācogwíijē húmáyī í bī ācɛ tá mla ijē nēé bá gē gwó ī cɛ̄tra Ɔwɔicō klla bá yɔ̄ gē tá ɔ̄ ahínyá.

⁴⁷Eko kú Userúbābɛlu mɛ́mla ami, Unehemíya gē gbō ācɛ Ísrɛ̄lu ā, odúúdú ācɛ kú Ísrɛ̄lu, gē je ɛhi nēé cíkā ō je kú ɛgbá kú ɛ̄cī dóódu kú eyī ō kwu ācogwíijē mɛ́mla ācogbāajɛ kú Agblīihɔ-nɛ̄hi ā, mɛ́mla ákú ayí ulífāyi. Cɛ́ɛ́ aúlífāyi ā gē je ukpɛ̄ kú ɔdā nēé mīya ā lɛ ācogwɛ́ɛya ā mɛ́mla ayááyí kú Árɔ́n ā dúú.