Read idoma UNEHEMÍYA 13 Bible Online

UNEHEMÍYA 13 - idoma bible

UNEHEMÍYA 13

¹Eko nēé bā í jé íne kú Umósīsi lɛ uwá ā, é le jé wā ɛga éyi nōo ka, “Ācɛ kú Ámɔn, amáŋ ka Umówābu dúúmā í gáā wɛ ipú ācɛ kú Óndú ā ŋ́.”

²Ohígbū ka, ācɛ kú Ámɔn mɛ́mla Umówābu nyá ācɛ kú Ísrɛ̄lu éŋkpɔ̄ ō gwá eko nɛ̄ ācɛ kú Ísrɛ̄lu yɔ̄ ī wā ŋmá ajɛ kú Íjīpiti á. Ikɔkɔ ɔ́ɔmā ā, é lɛ ije cílá Ubálam kóō lɛ okónu tá lɛ ācɛ kú Ísrɛ̄lu, amáŋ, Ɔwɔicō kú alɔ kwú okónu nōó tá ɔ́ɔmā ú pīya ɔhā lɛ alɔ

³Eko nɛ̄ ācɛ kú Ísrɛ̄lu le íne nēé jé tɛ́ɛcɛ ā pó ā, é le odúúdú áéwɔhá ā kpó yā ŋmá ipú uwā bá ɛgɛyɛ́yí.

⁴Ɛlíyāssibu, ɔ̄cogwɛ́ɛya nōo gē leyīkwu inu okpíyó kú Agblīihɔ-nɛ̄hi tū a, wɛ oklóbīya kú Utobíya nɛ̄hi.

⁵Ó kwú inu o kpíyó tū kú Agblīihɔ-nɛ̄hi nēé cíkā ō kpó ɔdā ɛya kú ikpɔ̄dɛ̄hɔ̄ mɛ́mla ɔtulalī, aíyó nēé lɛ yá uculo ipú Agblīihɔ-nɛ̄hi tū ā, mɛ́mla éyi ŋmá ipú igwó kú aíkpɔ̄dɛ̄hɔ̄, ejé, mɛ́mla anɔ̄ kú ɔcí nēé gē hī ka ólīfu nēé le kpó lɛ aúlífāyi, ācogwíije, mɛ́mla ācogbāajɛ kú Agblīihɔ-nɛ̄hi ā tū ā ú lɛ Utobíya.

⁶Eko nɛ̄ aɔ́dā nēe bá nyā yɔ̄ í yá ā, Unehemíya ka anúɔ í yɔ̄ Ujerúsālɛm ŋ́, ohígbū ka ipú iháyí ofu ce igwɛ́ɛpa nɛ̄ Átasásɛsi cɔcɛ́[6] ā, n kwúcē ga ɛgiyí nū gaá ka lɛ ɔ́ ɛ́gɛ́nɛ̄ alɔ yɛ í kwu lɛ ā, ɛ́gɛ́nɛ̄ ó je eko ga um lɛ ā. Eko kpií ā, n mīyɛ ɛga ŋmá ɛgiyí nū,

⁷anɔ́ɔ n kwúcē wā, Ujerúsālɛm á. Eko nɛ̄ n le pó ka Ɛlíyāssibu kwú inu éyi kú Agblīihɔ-nɛ̄hi ā lɛ Utobíya ā, okónu í kōō hɛ́ um ŋ́.

⁸N le cɔ̄nū nɛ̄ɛ̄nɛ̄hi, anɔ́ɔ n le odúúdú iyó kú Utobíya kpó tá bónū ŋmá ipú inu ā á.

⁹N le ɔ́da je kéē lɛ inu a gwu, kéē klla lɛ iyó ō bī yúklɔ́ kú ipú Agblīihɔ-nɛ̄hi ā, mɛ́mla ɛhi kú īkpɔ̄dɛhɔ̄ mɛ́mla ɔtulalī ā, kpó kwúcē wā í bá ɛgiyí nū.

¹⁰N klla le pó ka ācogwíijē, mɛ́mla ācɛ Ulífāyi, o yúklɔ́ kú Agblīihɔ-nɛ̄hi le pɛ ŋmá ipú Agblīihɔ-nɛ̄hi Ujerúsālɛm ā nyɔ̄ í lā ipú ɔlɛ́ uwá gbɔɔ́ ō hɛ́ɛhɔ̄, ohígbū ka ācɛ ā í je ɔdōlé lɛ uwá lé jē uwá glá ŋ́.

¹¹N lɛ ifulá ka tū aígabɔ̄ ā klla le uwá ahɔ̄ pí ɛ́gɛ́nɛ̄ é lɛ eyī tá Agblīihɔ-nɛ̄hi kú Óndú ā ŋ́ lɛ ā. Anɔ́ɔ n kwú ācɛ ācogwíijē mɛ́mla ācɛ Ulífāyi ā ú kwúcē wā ipú Agblīihɔ-nɛ̄hi ā á.

¹²Anɔ́ɔ odúúdú ācɛ kú Ísrɛ̄lu klla gbɔɔ́ ō kpó ɛhi mɛ́mla ɛhi kú éyi ŋmá ipú igwó kú ikpɔ̄dɛ̄hɔ̄, ejé mɛ́mla anɔ̄ kú ɔcí nēé hī ka ólīifu ā. wā ipú inu okpíyó kú Agblīihɔ-nɛ̄hi kú Óndú ā tū ā igbɔhá kpɔ́ á.

¹³N le ācɛ nēe bá nyā fu kéē leyīkwu ínu o kpíyó kú Agblīihɔ-nɛ̄hi ā tū ā: Usádɔ̄ku, ɔ̄cogwɛ́ɛya mɛ́mla ɔ̄cɛ o jé íne nɛ̄hi mɛ́mla Upedáya, ɔ̄cɛ Ulífāyi. Uhánan, ɔyí kú Umɛtánīya klla géē tá uwá abɔ̄. N lɔtūce ācɛ nēe bá nyā ka é géē kɔ̄ Ukpɛ̄ kú ɛhi ā mla ācoyúklɔ́ ɔ́mpa uwá ohile ā kpaakpa.

¹⁴Óndú ā Ɔwɔicō kú um, blakwu odúúdú ɔdā nɛ̄ n yá lɛ Agblīihɔ-nɛ̄hi kú uwɔ mɛ́mla ɛ̄gbā kú nū nɛ̄ n gē gbā ā.

¹⁵Eko ɔ́ɔmā, n má ācɛ Ujúda bā í pí enyi ŋmá īkpō Ufáyin ɛ̄cī Usábāti. Ācɛ ōhī kú uwá bī aíjakī bā í kpó īkpɔ̄dɛ̄hɔ̄, ejé, ufáyin, Ufígi,, mɛ́mla iyó ɔhá ga Ujerúsālɛm ɛ̄cī Usábāti dúú. N kē lɛ uwá ahɔ̄ pi kéē híī je ɔdā dúúmā lá ɛ̄cī Usábāti gɛ ŋ́.

¹⁶Ācɛ kú Utáya ōhī lā Ujerúsālɛm, anɔ́ɔ é le ɛdɔ iyō dóódu kpó wā igelī nɛ̄hi kú Ujerúsālɛm mɛ́mla ɛbéenyi gáā je kpó lá lɛ ācɛ ɔlɛ́ alɔ ɛ̄cī Usábāti.

¹⁷Anɔ́ɔ n le ɛgba dɛ̄ tū aótrɛ̄yí kú ācɛ Ujíyu ā kahíníī, “Aá má ɔdōbɔ̄bí nɛ̄ aá bā í yá ā. Aá gē nyíla Usábāti ā cɛ́ɛ́ kóō tīihɔ gɛ ŋ́.

¹⁸Ɔdā nōo yá ɛɛ́ nɛ̄ Ɔwɔicō yá aádáádā aá italā klla je igelī nɛ̄hi nyā yíífi ā yɔ̄ á. Aá klla bā í tíne kú Ɔwɔicō kóō cɔ̄nū mla alɔ, o ŋmá lɛ o nyíla Usábāti kpɔ́.”

¹⁹Anɔ́ɔ Unehemíya le ɔ́da je kahíníī, “Aá lɛ odúúdú aókónɔɔwɛ kú igelī nɛ̄hi kú Ujerúsālɛm ā kpó gwu ŋmá ɔcɔ̄ɔ̄cī kú Usábāti ā jāā gbó ɔ̄nɔ̄ɔ̄nɛ̄ kú nū. É klla gāá nwūla ɔwɛ ā ŋ́, jāā gbéeko nɛ̄ Usábāti le gla. N le ācɛ kú um ōhī kpó kwāajɛ, kéē má ka ɔ̄cɛ dúúmā kóō híī bī ɔdā dúúmā wā gāá je lá ipɔ́lɛ́ kú Ujerúsālɛm ɛ̄cī Usábāti ŋ́.

²⁰Igbeéyi ámāŋ ka igbɛɛpa ācɛ o tá ɔ́sú nēe gē je ɛdɔ iyó dóódu lá ā, le gbo iyɛ̄cɛ kú igá kú Ujerúsālɛm ā ɔ̄nɔ̄ɔ̄nɛ̄ kú Ajúmā gbéeko nɛ̄ Usábāti mɛ.

²¹N klla da ācotɔ́hí ā kahíníi, “Aá híī gbēyī ɛcɛ kú igá kú igelī nɛ̄hi ā gbéeko nɛ̄ ɛ̄cī Usábāti kóō mɛ ŋ́. Ɔ́dáŋ ka n lɛ aá má abɔ́ɔ igbɔhá, n géē kpɔ́fú kwu aá.” Oŋmá eko ɔ́ɔmā ā, é bī ɔdā kú ɔ́sí kú uwá wā ɛ̄cī Usábāti ɛ́ɛ́ gɛ ŋ́.

²²N le ɔ́da je lɛ ācɛ kú Ulífāyi kéē lɛ īyī uwā gwu yēŋēē kéē nyɔ̄ í gbō ɔwɛ kú igelī nɛ̄hi ā, cɛ́ɛ́ kéē má ka ācɛ ā le ɛ̄cī Usábāti tīihɔ. Ɔwɔicō, Óndú um, ményinyi um, ká ā lɛ um nyatá ohígbū ihɔtū nɛ̄hi kú uwɔ ā.

²³N klla má eko ɔ́ɔmā dúú ka, ācɛ Ujíyu alɛwa lɛ anyā lɛ ŋmá Ássidɔ̄du, Ámmɔn, mɛ́mla Umówābu.

²⁴Ayí nēé ma ā, ōhī kú uwā gē ka ucē kú áéwɔhá kú ɔlɛ́ ɛ́nɛ́ uwā. É klla jé ō ka ucē kú alɔ gɛ ŋ́.

²⁵Anɔ́ɔ n le ācɛ nēe lɛ anyā éwɔhá ā ahɔ̄ pi lɔɔlɔhi, lɛ okónu tá lɛ uwá, cá uwá ɛcá, klla ŋmó uwá ijē. N le uwá īnyīlɛyí kpó fu ŋmá īkpɛ̄yí. Anɔ́ɔ n cɛ̄ lɛ uwá bī iyē kú Ɔwɔicō le ɛka gbo ka, uwá mɛ́mla ayípɛ̄ ɔlɛ́ uwā í klla gáā lɛ anyā éwɔhá gbóógbóō ɛ́ɛ́ gɛ ŋ́.

²⁶N da uwá kahíníi, “Anyā éwɔhá nɛ̄ Usólōmɔn lɛ ā, yá ɛ́ɛ́ nɛ̄ ó bīya íne kú Ɔwɔicō á. Amáŋ anú lɔfú, le ojīlīmā klla fāajɛ fíyɛ́ aɔ́cɛ́ kú éwo dóódu ā. Ɔwɔicō yíihɔtū tá ɔ̄ nɛ̄hi klla kwú ɔ̄ u pīya ɔcɛ́ kú odúúdú Ísrɛ̄lu, nááná anyā éwɔhá cɛ̄ lɛ ɔ́ má gwōnū tá ipú íne ō bīya

²⁷Alɔ gbla aá yá kú ālɔ̄ híī lɛyítáajɛ lɛ Ɔwɔicō kú alɔ ŋ́, kú ālɔ̄ bá ī lɛ anyā éwɔhá mɛ́ɛnɛ ɛɛ?”

²⁸Ujóyāda wɛ ɔyí kú Ɛlíyāssibu, otrɛ̄yí kú ācogwɛ́ɛya amáŋ, éyi kú ipú ayí kú Ujóyāda ā lɛ adá kú Usánbālati lɛ ŋmá igelī nɛ̄ŋcɛ́ kú Ubɛtórɔn, ohígbū ɔ́ɔmā, n kwú anú mɛ́mla ɔnyā nū ā ú nū ŋmá Ujerúsālɛm

²⁹Ɔwɔicō, Óndú um, n gbɔ̄ɔ̄kɔ gā uwɔ ká ā blakwu ɛ́gɛ́nɛ̄ ācɛ nēe bá nyā nyíla āhɔ̄ kú úklɔ́ kú ācogwɛ́ɛya mla okónu nāa ce mla ācogwɛ́ɛya mɛ́mla ācɛ Ulífāyi ā, cɛ́ɛ́ káā lɛ italā yá uwā.

³⁰N le odúúdú ācɛ ā iyē gwu yēŋēē, ŋmá ucē kú éwɔhá dóódu nēé kpó abɔ̄ tū ɔ̄ ā. N klla le íne je lɛ ācogwɛ́ɛya mɛ́mla ācɛ Ulífāyi dóódu, cɛ́ɛ́ kú ɔnyɔɔnyɛ kú uwā kóō jé ɛ́gɛ́nɛ̄ ó géē yúklɔ́ kú nū ipú Agblīihɔ-nɛ̄hi lɛ ā.

³¹N klla le yá kéē le ɛfú kú ɔdā ɛ̄gbā kú ɛya ō yɔlá dúúdú ā, tútū eko okpaakpa. Kéē klla lɛ ɛhi kú īkpɔ̄dɛ̄hɔ̄ mɛ́mla īkpɔ̄cí kú uwā nēe pīya aflɛ́yí ā kpó wā eko okpaakpa ā. Óndú, Ɔwɔicō kú um, blakwu odúúdú aɔ́dā nɛ̄ n yá nyā, kú ā géē le ɔdā olɔhi yá gā um ohígbū uwā.