Read idoma UNEHEMÍYA 2 Bible Online

UNEHEMÍYA 2 - idoma bible

UNEHEMÍYA 2

¹Eko nɛ̄ ɔyā ɛnɛ gaá le gla ā, Ɔcɛ́nɛ̄hi ā yɔ̄ í lé ɔdōlé ɛ̄cī éyi, anɔ́ɔ n lɛ ejé bī gé lɛ ɔ́ á. N le cɔ̄nū, lɛ eyī kwúhílá ká. Ɔcɛ́ ā í má um cɔ̄nū lɛ ā jéjée ɛ́ɛ́ ŋ́.

²Anɔ́ɔ ó da um ɔ̄kā kahíníi, “Ɔdí gē tū uwɔ ɔnū ā? A gē doōcē nɛɛ? Má eyī kú uwɔ ɛ́ɛ́? Ɔtū í hi uwɔ ŋ́ nɛɛ?” Ufi gbɔɔ́ ō yá um nɛ̄hi,

³Anɔ́ɔ n tá ɔcɛ́nɛ̄hi ohi kahíníī, “Ɔwɔ kóō lɛ Ágábáidu ɛyí tāápátɛ́cɔ̄. Abɔ̄ ó yá lɛ ɛ́ɛ́ nɛ̄ ɔtū géē he um glá ā. Eko nɛ̄ ɔlɛ́ ádā um, Ujerúsālɛm ɛga nɛ̄ aádáádā um lā ā, tá alácɛ̄, nɛ̄ igá mɛ́mla aɔ́wɛ kú nū nɛ̄ ɔlá je gbliífi ā, le gblífi tá ipú alácɛ̄ kpɔ́ ā?”

⁴Ɔcɛ́nɛ̄hi ā tá um ohi kahíníī, “Ɔdí nɛ̄ ā cɛgbá āa?” Anɔ́ɔ n lɛ ɔkɔ gbā lɛ Ɔwɔicō kú ɔkpáncō á.

⁵Anɔ́ɔ n tá ɔcɛ́nɛ̄hi ā ohi kahíníī, “Ɔ́dáŋ ka awɔ nōo wɛ Ágábáidu ā, géē méyīnyinyi um glá, nāa géē yá ɛ̄ba mɛ́mla ɛgbá kú um gā um glá, ayíka Ágábáidu kóō lɛ ɛga je gā um, ká n̄ le tá Ujúda, ɛga nɛ̄ únóji kú aádáádā um yɔ̄ ā, ká n̄ lɛ igá kú igelī ɔ́ɔmā ā túgwó.”

⁶Ɔ̄cɛ́nɛ̄hi mɛ́mla ɔnyā nū nōo cīce pīyɔ̄ dúú ā, cɛ̄ɛ̄lā mɛ́mla ɛ̄ba nɛ̄ um ba ā. Ó da um ɔ̄kā ka eko nyā nɛ̄ n géē pīyɛyí wā eko nɛ̄ n le yɛ tá abɔ́ɔ ā? N lɛ eko ā ka lɛ ɔ́.

⁷Anɔ́ɔ n da ɔ kōó lɛ ɔkpá je gā um gé lɛ aígbómína kú ɛnɔ̄ɔ̄nɛ̄ kú Uyúfarētīisi[1] ā, cɛ́ɛ́ kéē lɛ ɛga je gā um ka n ga Ujúda.

⁸N klla le da ɔ́ kóō lɛ ɔkpá je gā um kú n̄ le bī gé lɛ Ásāfu, nōo gē leyīkwu ɔcí kú ɔlɛ́ ɔcɛ́nɛ̄hi ā, cɛ́ɛ́ kóō géē lɛ ɔcí je gā um kú n̄ géē bī le yá ɔcí ō cíla aɔ́wɛ icō kú inu kú ācɛ o gbāajɛ kú Agblīihɔ-nɛ̄hi ā, ɔcí kú igá kú igelī ā, mɛ́mla ákú inu nɛ̄ n gáā lā anú ā. Odúúdú ɔdā nɛ̄ um ba ŋmá abɔ̄ ɔcɛ́nɛ̄hi ā, ó kwú kpó gā um kpɛ́mm, ohígbū ka Óndú ā Ɔwɔicō yɔ̄ mla um.

⁹Ɔcɛ́nɛ̄hi ā le aótrɛ̄yí kú aícɔ́ɔja mɛ́mla aícɔ́ɔja o cɔɔnya kpó kē nyɔ̄ mla um. Anɔ́ɔ n le yɛ tá ɛnɔ̄ɔ̄nɛ̄ kú Uyúfaretīisi á. N kwú ɔkpá kú ɔcɛ́nɛ̄hi ā ú lɛ aígbómína ā.

¹⁰Amáŋ, ācɛ ɛpa bá abɔ̄ nēé hī uwā ka Usánbālati nōo ŋmá igelī kú Ubɛti Uhórɔn ā mɛ́mla Utobíya éyi kú aígabɔ̄ kú ajɛ kú Ámɔn á. Anɔ́ɔ é le pó ka, ɔ̄cɛ éyi ɔ́ɔ gā gáā yúklɔ́ ohígbū olɔhi kú ayí kú Ísrɛ̄lu ɛɛ́ ā. Anɔ́ɔ é kwú cɔ̄nū nɛ̄hi á.

¹¹N le yɛ tá Ujerúsālɛm. N yɔ̄ abɔ́ɔ ɛ̄cī ɛtá.

¹²Ń da ɔ̄cɛ dúúmā ɔdā nɛ̄ Ɔwɔicō da um ka ami ɔ́ɔ̄ yá Ujerúsālɛm ā ɛ́ɛ́ ŋ́. Anɔ́ɔ ahāpōtú, ami mɛ́mla aóklóbīya um ōhī le pɛ́ bɛ̄cɛ. Ɛbɛ́ ofōōfūnū nɛ̄ alɔ bī ā, wɛ ijakī nɛ̄ n ce ɛyí nū ā.

¹³Otú nɛ̄ ajɛ wɛ ō dobū kpɔ́ ɛ́ɛ́ mā, nɛ̄ n nyɛ̄ɛ̄ ŋmá igelī nɛ̄hi ā á. N yɛ bū ɔwɛ kú ɔpɛ́ nōo yɔ̄ ɛnɔ̄ɔ̄nɛ̄ ā, anɔ́ɔ alɔ yɛ ga ɛháajɛ bū obuga kú anyaká klla yɛ ga ɔwɛ kú útrīmū ā. N le igá kú Ujerúsālɛm nēe catāajɛ ā mɛ́mla ɔdūngwɔ̄wɛ kú nū nɛ̄ ɔlá je yi tāajɛ ā kpó jila.

¹⁴N le tá ɛhícō gāá bū okónu ɔkpá kú ɔcɛ́ ā ŋmá ɛnɔ̄ɔ̄cī kú igelī nɛ̄hi ā. Abɔ́ɔ ā, ijakī nɛ̄ n ce ɛyí nū ā í má ɔwɛ yɛ ipú ɔ́tɔ mɛ́mla ácí ā glá gɛ ŋ́.

¹⁵Anɔ́ɔ n le yɛ ga ɛháajɛ gaá kwú bū ɔpɛ́ kú Ukídrɔn, yɔ̄ í jila igá kú Ujerúsālɛm ā, abɔ̄ n ce ɛyí ijakī yɔ̄ í nyɔ̄ ā. Anɔ́ɔ n kwúcē bū ɔwɛ nɛ̄ n bū nyɔ̄ ā, gaá le bū ɔwɛ kú ɔpɛ́ ā ga ipú igelī nɛ̄hi ā kpɔ́.

¹⁶Ɔ̄cɛ dúúmā kú aígabɔ̄ ā í jé ɛga nɛ̄ n nyɔ̄ ā, ɛ́ɛ́ nēé gē jé ɔdā nɛ̄ n yɔ̄ í yá ā ŋ́. N kōō ka ɔdā dúúmā lɛ ācɛ Ujíyu ɔ́mpa um ɛ́ɛ́ ŋ́. Kwu ācogwɛ́ɛya oo, kwu aótrɛ̄yí oo, aígabɔ̄ ámāŋ ka ɔ̄cɛ ɔhá dúúmā nōo lɔfú yúklɔ́ ā glá ā, ń ka ɔdā dúúmā lɛ uwá ŋ́.

¹⁷Igbīhāajɛ ā, n da uwá kahíníī, “Aá má unwalu mɛ́mla uwēyī nɛ̄ alɔ bá ipú nū āa? Ohígbū ka igá kú Ujerúsālɛm le ca tāajɛ klla tá alácɛ̄ kpɔ́ ɛ́ɛ́. Aá wā kú alɔ lɛ igá kú Ujerúsālɛm ā túgwó, cɛ́ɛ́ kú uwēyī kú alɔ kóō mɛ.’

¹⁸Anɔ́ɔ n le da uwá ɛ́gɛ́nɛ̄ Ɔwɔicō húmáyī yɔ̄ mla um ipú ɛlā nyā lɛ ā, mɛ́mla ɛ́gɛ́nɛ̄ ó húmáyī tá um abɔ̄ lɛ ā, mɛ́mla odúúdú ɔdā nɛ̄ ɔcɛ́nɛ̄hi ka gā um klla yá gā um ā. Anɔ́ɔ é tá um ohi kahíníī, “Alɔ cɛ̄, ká ālɔ̄ lɛ igá kú Ujerúsālɛm ā túgwó igbɔhá.” Anɔ́ɔ é le tútū kéē gbo úklɔ́ kú igá ō gwó kpɔ́ á.

¹⁹Eko nɛ̄ Usánbālati mɛ́mla Utobíya mɛ́mla ɔ̄cɛ Árābu éyi nēé hī ka, Ugéssem ā lɛ ɔdā nɛ̄ alɔ yɔ̄ í tútū ō yá ā pó ā, é le ɛhɛ yɛ tū ācɛ Ujíyu kahíníi, “Ɔdí nɛ̄ aá gbɛlá ka aá ɔ́ɔ bā í yá ā? Aá gáā yá īkpɛ̄yī olɔfú tá ɔcɛ́nɛ̄hi ā nɛɛ?”

²⁰Anɔ́ɔ n tá uwá ohi kahíníī, “Ɔwɔicō kú ɔkpáncō í tá alɔ abɔ̄, nɛ̄ alɔ géē yúklɔ́ ā. Alɔ wɛ ācocɛ̄hɔ̄ kú Ɔwɔicō nɛ̄, alɔ í gbo úklɔ́ ā. Amáŋ aá ā, aá lɛ abɔ̄ ipú agbénú dúúmā kú Ujerúsālɛm ŋ́, ɛ́ɛ́ nɛ̄ aá gē lɛ ukpɛ̄ dúúmā ipú ɔdā úgwū mɛ́mla ucē, mɛ́mla ɔwɛ, mɛ́mla oyēeyī kú ācɛ Ujerúsālɛm ŋ́.’”