Read idoma UNEHEMÍYA 3 Bible Online

UNEHEMÍYA 3 - idoma bible

UNEHEMÍYA 3

¹Ɛ́gɛ́nyā nēé hɛ́ ɔdɔ kú igá kú igelī nɛ̄hi kú Ujerúsālɛm ā igbɔhá á. Otrɛ̄yí kú ācogwɛ́ɛya ā, Ɛlíyāssibu mɛ́mla ācogwɛ́ɛya ɔ́mpa nū ā le ɔwɛ kú álá ā gwó, klla lɛ ɔhā hɛ́ ce ɔ́, kwú ɔ̄ ú tū Ɔwɔicō abɔ̄. É klla kwú odūngwɔ̄wɛ ā ú kwu ɛga nōó tɛtɛ kwu ā. É klla le ɔdɔ hɛ́ ŋmá abɔ́ɔ, gaá kwú ɔ̄ ú jāā ga ɛgiyí inɔ̄ɔda kú ofɛhɔ̄ ā, mɛ́mla ɛgiyí inɔ̄ɔda kú Uhanánɛlu. É klla le ɔhā hɛ́ ce ɔdɔ ā kwú ɔ̄ ú tū Óndú ā abɔ̄.

²Ācɛ kú Ujérīko le āyā ɔhá nōo gbo ce ɔ́ ā gwó. Usákɔ, ɔyí kú Ímri, gwó āyā ɔhá nēe gboce ɔ́ ā.

³Ipɔ́ɔma kú Uhásenaa gwó ɔwɛ kú Ɛbéenyi á, é kwú ɔcí ō cíla ɔwɛ ā ú cíla anú, kwú odūngwɔ̄wɛ mɛ́mla oje nēé gé bī le gwū ɔwɛ ā kpó kwu uwá.

⁴Umérɛ̄mɔtu ɔyí kú Uríya, ɔyí kú ɔyí kú Uhákosi ma ɔdɔ kú nū gboce uwá á. Umɛssúlam, ɔyí kú Ubérekíya, ɔyí kú ɔyí kú Umɛssɛ́sābɛlu ma ɔdɔ kú nū gboce Umérēmɔtu á. Usádɔ̄ku, ɔyí kú Ubaána klla ma āyā nōo gboce ɔ́ ā.

⁵Ācɛ kú Utékowa ma āyā nōo gboce Usádɔ̄ku á. Amáŋ aótrɛ̄yí kú ipú igelī nɛ̄ŋcɛ́ ā, tá ka aá í gáā yúklɔ́ nɛ̄ ɔ̄coleyī kwu úklɔ́ je lɛ uwá ā ŋ́.

⁶Ujóyāda, ɔyí kú Upásēya mɛ́mla Umɛssúlam ɔyí kú Ubesodéya ma ɔwɛ kú Ujessána á[2] É kwú ɔcí ō cíla ɔwɛ ā ú ce ɔ́, anɔ́ɔ é kwú odūngwɔ̄wɛ ā ú kpó kwu ɔ́, anɔ́ɔ é kwú oje o gwū ɔwɛ ā ú kpó kwu ɔ́ á.

⁷Umélatíya ŋmá Ugíbeyɔn mɛ́mla Ujádɔn nōo ŋmá Umérónɔtu mɛ́mla ācɛ kú Ugíbeyɔn, Umísāti, klla le āyā kú ɔdɔ nɛ̄ gboce uwá ā ma jāā ga ɔlɛ́ igbómína kú ɛnɔ̄ɔ̄nɛ̄ kú Uyúfaretīisi ā.

⁸Usíyɛ̄lu, ɔyí kú Uhaháya nōo gē na ɔwá kú ugóolu (oje ɔdɔ) ā, ma ɔdɔ gboce uwá ŋmá abɔ́ɔ á. Uhananíya nōo gē yá ɔtulālī ā klla ma ɔdɔ ā gboce ɔ́, ŋmá abɔ́ɔ jāā gāá kwu ɔdɔ olɔwá nɛ̄hi kú igelī ā á.

⁹Urefáya, ɔyí kú Uhɔ́ɔ, ɛ̄nɛ̄ o wɛ ɔcɛ́ kú āyā éyi kú igelī nɛ̄hi kú Ujerúsālɛm ā ma ɔdɔ kú nū gboce ɔ́ á.

¹⁰Ujedáya, ɔyí kú Uharúmāfu ma ɔdɔ kú āyā kú ɛga nōo lā ā gboce ɔ́ á. Uhátūsi, ɔyí kú Uhassabinéya ma āyā ɔhá á.

¹¹Umálikīja ɔyí kú Uhárim mɛ́mla Uhássūbu, ɔyí kú Upahamówābu ma āyā ɔhá nōo gboce ɔ́ mɛ́mla inɔ̄ɔda kú Ófen á.

¹²Ussálum, ɔyí kú Uhálōhessi, ɔ̄cogbāajɛ kú āyā éyi kú Ujerúsālɛm ma ɔdɔ gboce ɔ́ á. (ayí nū nɔ̄nyā tá ɔ̄ abɔ̄ ipú úklɔ́ ɔ́ɔmā dúú.)

¹³Uhánɔn mɛ́mla ācɛ kú igelī nɛ̄hi kú Usánōwa ma ɔwɛ kú ɔpɛ́ ā á. É le Odūngwɔ̄wɛ ā gbā, kwú ɔ̄ ú kwu ɛga nɛ̄ ó tɛtɛ kwu ā. É klla le oje nēé géē bī lɛ gwū ɔwɛ ā kpó kwu ɔ́. É klla le ɔdɔ kú igá ā ma bɛ̄ɛka umíta úlāce ofɛpa (440) ā jāā gaá kwu ɔwɛ kú útrīmū ā.

¹⁴Umálkīja, ɔyí kú Urékābu, otrɛ̄yí kú āyā kú igelī kú Ubɛtihácērem ā, le ɔwɛ kú útrīmū ā ma. Ó kwú Odūngwɔ̄wɛ ā ú kwu ɔ́, klla le oje nēé gē bī gwū ɔwɛ ā kpó kwu ɔ́.

¹⁵Ussálum, ɔyí kú Ukóhōse otrɛ̄yí kú āyā kú igelī nɛ̄hi kú Umísipa, le ɔwɛ kú obugā ā ma. Ó le Odūngwɔ̄wɛ gbā, klla le aóje o bī le gwū ɔwɛ yá kwu ɔ́. Ó klla lɛ ɔdɔ kú āyā kú Unjɔlɔ kú Uséla ā gwó ŋmá abɔ́ɔ jāā gaá kwu ɛhɔ̄ kú ɔcɛ́. Ó klla le ɔdɔ ā túgwó jāā gaá kwu agidigbé nōo yɛ gaajɛ ŋmá igelī nɛ̄hi kú Udéfīdi ā.

¹⁶Unehemíya, ɔyí kú Ásibūku, otrɛ̄yí kú āyā kú ipɔ́lɛ́ kú Ubɛ́tūsɔ, ma ɔdɔ nōo gboce ɔ́ á. Ó ŋmá abɔ́ɔ jāā gaá kwu Únóji kú Udéfidi, mɛ́mla njɔlɔ ā mɛ́mla ɔlɛ́ aícɔ́ɔja.

¹⁷Ayí kú Ulífāyi nēe bá nyā, ma āyā alɛwa kú ɔdɔ kú igá kú igelī ā dúú. Uréhum, ɔyí kú Ubáni ma ɔdɔ gboce Unehemíya, Uhasábīya, otrɛ̄yí kú āyā éyi kú ajɛ Ukeyíla ma āyā kú ɔdɔ kwɛyí ācɛ ipɔ́lɛ́ kú nū.

¹⁸Ubáfāyi, ɔyí kú Uhenádadi otrɛ̄yí kú āyā éyi kú ajɛ́ Ukeyíla, ma āyā ɔhá kú ɔdɔ ā á.

¹⁹Ésa, ɔyí kú Ujésuwa, otrɛ̄yí kú Umísipa ma ɔdɔ kú āyā ɔhá nōo yɔ̄ ɛga o kpó iyɔ́fú tū á. Ó ma ɔdɔ ā jāā gaá kwu ɛga nɛ̄ ɔdɔ ā pīyeyī ā.

²⁰Ubárūku, ɔyí kú Usábāyi ma āyā ɔhá kú ɔdɔ nōo yɛ gaá kwu ɔwɛ kú ɔlɛ́ Ɛlíyāssibu, otrɛ̄yí kú ācogwɛ́ɛya ā.

²¹Umérɛ̄mɔtu, ɔyí kú Uríya, ɔyí kú ɔyí kú Uhákōsi ma āyā ɔhá kú ɔdɔ nōo yɛ gaá ŋmɛ́yí ɔlɛ́ kú Ɛlíyāssibu á.

²²Ācogwɛ́ɛya nēe bá nyā yúklɔ́ kú ɔdɔ ō ma ɛga alɛwa. Ācogwɛ́ɛya nēe ŋmá aɔ́lɛ́ nēe yɛ jīla Ujerúsālɛm tá ā ma ɔdɔ kú āyā nēe gboce ɔlɛ́ Ɛlíyāssibu ā.

²³Ubénjamīn mɛ́mla Uhássūbu ma ɔdɔ kú igybū ɔlɛ́ uwá á. Asárīya, ɔyí kú Umaásēya, ɔyí kú ɔyí kú Ananíya ma ɔdɔ kú igbū ɔlɛ́ uwā dúú á.

²⁴Ubinúwi, ɔyí kú Uhenádādi ma ɔdɔ ŋmá ɔlɛ́ Asárīya gaá kwu ɔ́kíkā kú ɔdɔ ā.

²⁵Upálalu, ɔyí kú Usáyi ma ɔdɔ ŋmá ɔ́kíkā ā, mɛ́mla ɛgiyí inɔ̄ɔda kú ɛgiyí Agblɔ̄cɛ́ ā gaá kwu ɛgiyí ācogbāajɛ ā á.

²⁶Upedáya, ɔyí kú Upárōssi gbɔɔ́ ō ma ŋmá abɔ́ɔ gaá kwu ɛgiyí ɛnɔ̄ɔ̄nɛ̄ nōo kwu Ɔwɛ kú éŋkpɔ̄ mɛ́mla inɔ̄ɔda nōo tá wɛ̄ɛcɛ ā. (Ɛ̄nyā yɔ̄ kwu ipɔ́lɛ́ kú ófɛlu, ɛga nɛ̄ ācoyúklɔ́ kú ipú Agblīihɔ-nɛ̄hi ā lā ā ajaajɛ.)

²⁷Ācɛ kú Utekówa ma ɔdɔ ɛga ɔ́mpa kpɔ́. É ma ŋmá ɛga éyi nōo pīyeyī kwu inɔ̄ɔda nōo gē gbō Agblīihɔ-nɛ̄hi ā, gaá kwu ɔdɔ nōo kwu ófɛlu ajaajɛ ā.

²⁸Aígwu kú ācogwɛ́ɛya klla ma āyā ōhī nōo yɛ ga ɛhícō kú Ɔwɛ kú ɔnya á. Ɔnyɔ̄ɔnyɛ kú uwā ma ɔdɔ nōo yɔ̄ iyɔ̄bū ɔlɛ́ nū.

²⁹Usádɔ̄ku, ɔyínɔ̄nyīlɔ kú Ímma ma āyā ɔhá kú ɔdɔ nōo yɔ̄ iyɔ̄bū ɔlɛ́ nū á. Ussɛmáya, ɔyí kú Ussɛkáníya, ɔ̄cɛ nōo gē gbō Ɔwɛ kú ɛnɔ̄ɔ̄cī ā, ma āyā ɔhá kú ɔdɔ nōo yɔ̄ iyɔ̄bū ɔlɛ́ nū ā á.

³⁰Uhananíya, ɔyí kú Ussɛlɛmíya mɛ́mla Uhánɔn, ɔyí ɔ́mɛhīlī kú Usálāfu klla ma ɔdɔ gboce ɔ́. Ɛ̄nyā wɛ igbo ɔ́mpa kú āyā kú ɔdɔ nēé ma á. Uméssūlam, ɔyí kú Ubérekíya ma āyā kú ɔdɔ nōo kwu iyɔ̄bū ɔlɛ́ nū ā á.

³¹Umálikīja, onɔwá kú ugóolu (oje ɔdɔ) ā ma ɔdɔ ce ɔ́ ŋmá abɔ́ɔ jāā gaá kwu inu kú ācoyúklɔ́ kú ipú Agblīihɔ-nɛ̄hi ā, mɛ́mla inu kú ācɛ o tɔ́ɔ́hí nēe bá okónu ɔwɛ kú Umákījadi, ɛ̄nɛ̄ e kwu inu-icō kú ɛhícō kú ɛnɔ̄ɔ̄cī kú ɔ́kíkā kú ɔdɔ ā.

³²Ācɛ onɔwá ugóolu (oje ɔdɔ) mɛ́mla ācɛ o tɔ́ɔ́hí ā, je ɛga o hile ā ma tū ɔ̄, ŋmá abɔ́ɔ jāā gaá kwu Ɔwɛ kú álá ā.