Read idoma UNEHEMÍYA 4 Bible Online

UNEHEMÍYA 4 - idoma bible

UNEHEMÍYA 4

¹Unehemíya kahíníī, “Eko nɛ̄ Usánbālati le pó ka alɔ nōo wɛ ācɛ Ujíyu ā gbɔɔ́ ō ma ɔdɔ kú Ujerúsālɛm igbɔhá ā, ó kwú cɔ̄nū nɛ̄hi klla gbɔɔ́ ō yá alɔ ɛbɛ́.

²Ó gē yá alɔ ɛbɛ́ ipéēyī kú aɔ́mpānū mɛ́mla aícɔ́ɔja kú Usamérīya ā gē kahíníī, ‘Ɔdí nɛ̄ aɛ́flɛ́ɛfu, ācɛ Ujíyu nyā gbɛlá ka aá gē yá glá ā? É gbɛlá ka aá géē gwó igelī ā glá nɛɛ? É gbɛlá ka, o ŋmá lɛ ɛya ō gwó, aá géē je úklɔ́ ā yá kwɛyí ɛ̄cī ékpónú nɛɛ? É gē gbā ɛcɔ̄ ō bī gwó ɔlɛ́ ŋmá ipú ɛyítutulu kú inu nōo le yɔlá glá ā?’”

³Ó ka Utobíya māháyi pīyɛ̄ ɔ̄ abɔ́ɔ dúú. Anɔ́ɔ ó tóohi tū ɛlā ā kahíníī, “Ɛdɔ ɔdɔ nyá nēé géē gwó glá āa. Ɔ́dāŋ ka ɛpā kōō le yɛ ɛyí nū, ó géē je ca tāajɛ.”

⁴Unehemíya ka anúɔ le ɔkɔ gbā lɛ Ɔwɔicō kahíníi, “Ɔwɔicō kú um, a pó abɔ̄ é bā í yá alɔ ɛbɛ́ abɔ́ɔ āa? Ká ɛbɛ́ nēé bā ī yá alɔ ɔ́ɔmā kóō gaá ce uwá ɛyí. Uwī kā o lɛ odúúdú ɔdā dúú nēé lɛ ā kpó ŋmáajɛ, cɛ́ɛ́ kéē lɛ uwá kpó bɛ̄ɛka aálagbá kú ɛfú ga ajɛ kú éwɔhá.

⁵Ā híī mlanyī obɔ̄bí nēé bī nyā ŋ́, ā kē je íne nēé bīya ā yá uwā ɛhi ŋ́, ohígbū keé le ɛcá cá alɔ nēe bá yɔ̄ ī ma ɔdɔ kú igá ā.”

⁶Unehemíya ka aá bá í ma ɔdɔ ā gɔbū kpɔ́. Ó ka ɔdɔ ā kwú jɛ̄ gaá kwu ɔtāhɛ̄ fíyaa, ohígbū ka ācɛ ā bá í nwúleyīkwū tū úklɔ́ ā.

⁷Usánbālat, Utobíya mɛ́mla ācɛ Árābu, Ámmɔn mɛ́mla Ássidɔ̄du le pó ka, úklɔ́ kú ɔdɔ kú Ujerúsālɛm ā ɔ́ɔ yɔ̄ í gɔbū. É klla yɔ̄ gē je ɛpá nɛ̄ ɔ́ɔ tá ɔdɔ ā hegwū. Anɔ́ɔ é kwú cɔ̄nū nɛ̄hi á.

⁸Anɔ́ɔ é lɛ ojuju tū ka aá géē wā í kpɛ́fú tá ācɛ Ujerúsālɛm, cɛ́ɛ́ kéē lɛ útú hɛ́ ɔtāhɛ̄ ācɛ ā.

⁹Ó ka amáŋ, aá le ɔkɔ gbā lɛ Ɔwɔicō kú aá, klla lɛ ācɛ kpó kwāājɛ ohígbū uwā, otū mɛ́mla ɔlɛ́ɛnɔ.

¹⁰Ó lɛ ijē nɛ̄ ācɛ kú Ujúda yɔ̄ ī gwó eko ɔ́ɔmā kahíníi, “Ɛ̄jɛ̄ kú iyó ōbī le jɛ̄ alɔ, klla yɔ̄ í cē alɔ gwōnū, alɔ í klla lɔfú yúklɔ́ ɔdɔ ō ma ā glá gɛ ŋ́.

¹¹Aólɛlā kú alɔ gbɛlá ka alɔ í gáā má uwā ámāŋ ka o jé ɔdā nōo yɔ̄ ī yá ā ŋ́, jāā gbéeko nēé gaá fu alɔ igbledū, lɛ alɔ kpó ŋmó, cɛ́ɛ́ úklɔ́ kú alɔ ā kwú ci.”

¹²Unehemíya yɔ̄ ī kɛlā gɔbū kpɔ́ kahíníī, “Amáŋ eko dóódu, ācɛ Ujíyu nēe lā ipú olɛlā kú alɔ ā, gē wā í pi alɔ ahɔ̄ lɛyíkwu odúúdú ojuju nɛ̄ aólɛlā kú alɔ gē yá lɛyíkwu alɔ ā[3]

¹³Ɛga dóódu nɛ̄ ɔdɔ ā í je kwɛyí ɛ́ɛ́ ŋ́ mā, n lɛ ācɛ kpó kwāajɛ ɛ́gɛ́nɛ̄ ipɔ́ɔma kú uwā lɛ ā. É bī ɔtā, ɔyī, óbō, ɔkpacaŋ́gelī mɛ́mla iyɔ́fú ɔhá dóódu.

¹⁴Eko nɛ̄ n má ka ācɛ ā bá ī yúufi ā, n cāŋjɛ klla da uwá kéē híī yúufi kú aólɛlā kú uwā ŋ́. N da uwá kéē blakwu ɛ́gɛ́nɛ̄ Óndú, Ɔwɔicō kú uwā tūūfi lɛ ā. Ó géē kpɛ́fú lɛ uwá mɛ́mla ayí uwā mɛ́mla anyā uwā mɛ́mla ɔlɛ́ uwā.”

¹⁵Ó klla ka kpɔ́ ka, “Abɔ̄ aólɛlā kú alɔ ā le jé ka, alɔ le jé keé le ojuju yá lɛyíkwu alɔ ā, nɛ̄ Ɔwɔicō kú alɔ, kē le ojuju kú uwā bīya ɛɛ́ mā, alɔ kē kwúcē gaá gbɔɔ́ ō ma ɔdɔ kú igá ā kpɔ́.

¹⁶O ŋmá eko ɔ́ɔmā gɔbū ā, āyā éyi kú ācɛ ɔlɛ́ um bā í ma ɔdɔ, āyā kú uwá ɔhá kwāajɛ, le úwé ɔkplɛ́fú wu iyē bī óbó, ɔkplɛ́fú, mɛ́mla ɔtā mla ɔyī. Aótrɛ̄yí le okwúukwu kwu

¹⁷ācɛ nēe bā í ma ɔdɔ ā igbīhi. Ācɛ nēe bā í kpó iyó úklɔ́ lɛ ācɛ ō ma ɔdɔ ā bī abɔ̄ éyi gē le kpó iyó, é kē bī abɔ̄ ɔhá le bī iyɔ́fú.

¹⁸Ɔ̄cɛ dóódu nēe kē yɔ̄ í ma ɔdɔ ā lɛ ɛ̄wā kú nū tūlé wu ɛ́nyɔ́, ɔ̄cɛ nōo géē tá opo ɛfú ā, kē klá pī um.

¹⁹N da ācɛ ā, mla aótrɛ̄yí kú uwá kahíníī, “Úklɔ́ ā le pahīla bá ɛgaligbó hī iyī uwā tá, ɛ̄nɛ̄ o yá kú ālɔ̄ le kɔ̄ bá ɛgaligbó hī iyī alɔ tá ɛgiyí ɔdɔ kú igá ā.

²⁰Ɔ́dāŋ nɛ̄ aá lɛ opo kú ɛfú pó, aá wā gaá le jīla ɛgiyí um, Ɔwɔicō kú alɔ géē kpɛ́fú lɛ alɔ.”

²¹Anɔ́ɔ o ŋmá eyī ō nyā foó kú ɛ̄cī dóódu, jāā gbéeko nɛ̄ otú le bī nɛ̄ aínyílɔ́wɔ gā ɛcɛ ɔkpáncō, āyā éyi kú alɔ yɔ̄ gē ma ɔdɔ, āyā ɔhá gē gbāājɛ le tútū le óbō bī abɔ̄ kéē kpɛ́fú.

²²N klla le da odúúdú ācɛ nēe gē yúklɔ́ ā, mɛ́mla ācɛ nōo gē tá uwā abɔ̄ ā, ka eko dóódu nɛ̄ otú le bī, kéē béē nyɔ̄ í gbo ipú igelī nɛ̄hi kú Ujerúsālɛm, cɛ́ɛ́ kú ālɔ̄ bēē gbāajɛ ipú ɔlɛ́ ā otú dúú. Cɛ́ɛ́ kú ālɔ̄ kē yúklɔ́ ɔlɛ́ɛnɔ dúú.

²³Ami mɛ́mla aɔ́mpa um ā, mɛ́mla aíkonó kú um, mɛ́mla ācɛ nɛ̄ gē gbō um ā, ɔ̄cɛ dúúmā kú alɔ í kōō plla úwé mla iyɔ́fú kú uwā bá ajɛ eko dúúmā ŋ́, kwu otú kwu ɔlɛ́ɛnɔ. Odúúdú alɔ le tútú klla lɛ iyɔ́fú kú alɔ bī abɔ̄ eko dóódu.