Read idoma UNEHEMÍYA 5 Bible Online

UNEHEMÍYA 5 - idoma bible

UNEHEMÍYA 5

¹Unehemíya kahíníī, “Igbīhāajɛ ā, ācɛ Ujíyu kwu ācɛnyā mɛ́mla ācɛnyīlɔ gbɔɔ́ ō ka iŋini lɛyíkwu ācɛ Ujíyu ɔ́mpa uwā.

²Ācɛ ōhī kú uwá ka aá lɛ aíkonó alɛwa nɛ̄hi, aá gē cɛgbá igbāmkpa amáŋ ígwu kú aá lé, cɛ́ɛ́ kú aá yēeyī.”

³Ó ka aígwu ɔhá kahíníī, “Alɔ gē kpó ajɛ kú ɛhɔ̄, ɔcí ufáyin mɛ́mla ɔlɛ́ alɔ cābɔ̄, o yá ɛ́ɛ́ kú ɔkpɛtā kóō kpó alɔ ŋmó ŋ́ mā.”

⁴Unehemíya klla ka aígwu ɔhá kahíníī, “Alɔ gē kplá ije ɛ́ɛ́ nɛ̄ alɔ gē le gbā ije ɔlɛ́ lɛ ɔcɛ́ mɛ́mla ije kú ajɛ ɛhɔ̄ kú alɔ á.

⁵Alɔ í wɛ ācɛ ékpónú mla ācɛ Ujíyu dúú ŋ́ nɛɛ? Ayí alɔ í lɔhi klla wɛ ayí bɛ̄ɛka ayí uwā ŋ́ nɛɛ? É kwú ayínɔ̄nyā kú alɔ ōhī ú kpó lá ɔfiyɛ ɛɛ́. Alɔ í kē lɛ ācɛ dúúmā nōo í tá alɔ abɔ̄ ŋ́, ohígbū ka é kwu ɛhɔ̄ ɔcí ufáyin kú alɔ ú kpó ŋmá ɛgiyí alɔ.”

⁶Ó kahíníī, “Eko nɛ̄ n lɛ odúúdú iŋini ā pó ā, n kwú cɔ̄nū.

⁷Anɔ́ɔ n le ɔdā nɛ̄ n gáā yá ā miya ipú ɔtū kú um. N le odúúdú aótrɛ̄yí mɛ́mla aígabɔ̄ kú ācɛ ā ŋmɛ́pɔ̄bí, klla da uwá kahíníī, “Aá gē pīya ācɛ Ujíyu, ayínɛ́ aá tū.” N le odúúdú ācɛ ā kpó hīgwú í jīla um eyī, ká n̄ yá kú unwalu ā kóō mɛ ŋmá ajɛ.

⁸N da uwá kahíníi, “Ɛ́gɛ́nɛ̄ alɔ lɛ ɔfú gāá kwu lɛ ā, alɔ bá í fūla ayínɛ́ alɔ, ācɛ Ujíyu nēe je iyī uwā lá lɛ ācɛ éwɔhá ā. Abālɔbányā, aá klla bá ī pi ayínɛ́ aá, ācɛ Ujíyu ɔ́mpa aá abɔ̄fú kéē je īyī uwā kpó lá ɔfiyɛ lɛ aá.” Aótrɛ̄yí ā í kōō má okónu kɛlā ŋ́, é bá cíí icííci.

⁹Anɔ́ɔ ó ka anúɔ da uwá kahíníī, “Ɔdā nɛ̄ aá gē yá nyā í lɔhi ŋ́. Aá cíkā ō yúufi Ɔwɔicō kú aá, cɛ́ɛ́ kú aá yá ɔdā nōo le kpaakpa ā. Cɛ́ɛ́ kú aá jɛɛga lɛ aólɛlā kú aá, aólufíyé ā kéē yá aá okónu klla lɛ okónu kwu aá iyē ŋ́.

¹⁰Ācɛ kplá ije mɛ́mla ɔdōlé ŋmá ɛgiyí um dúú, ɛ́gɔ́ɔmā nēé kplá ije mɛ́mla ɔdōlé ŋmá ɛgiyí aɔ́mpa um dúú á. Ālɔ̄ kwú odúúdú ɔdā nēé kplá ŋmá ɛgiyí alɔ ā ú yá uwá ɛhi.

¹¹Aá kwú odúúdú ulé nēé bī aá ā ú yá uwá ɛhi. Kwu ije, īkpɔ̄dā, ámāŋ ejé, ámāŋ anɔ̄ kú ólīfu. Aá kwú odúúdú ɔdā nēé le ce aá abɔ̄ ā, kwu ajɛ̄ɛ̄hɔ̄ kú uwá, ɛhɔ̄ ɔcí ufáyin, ɛhɔ̄ kú ɔcí ólīfu, mla inu kú uwā ú kpó lɛ uwá bōōbū.”

¹²Aótrɛ̄yí ā tá ɔ̄ ohi kahíníi, “Alɔ géē yá ɔdā dóódu nāa ka āa. Alɔ géē je iyó mɛ́mla agbénú kú uwā kpó cīgbīhi lɛ uwá. É klla gāá cílá alɔ ulé gɛ ŋ́.” Anɔ́ɔ Unehemíya ka anúɔ lɛ ācogwɛ́ɛya ā kpó hīgwú wā, klla cɛ̄ lɛ aótrɛ̄yí ā le ɛka gbo iyɔ̄bū uwā ka, ɔdā dóódu nɛ̄ é cokónu nū ā, ká ē lɛ ɔ́ yá jīla.

¹³Ó ka anúɔ klla kwú alítā nɛ̄ anúɔ le tū ohí ā ú, lɛ ɔ gwó bónū, anɔ́ɔ anúɔ kahíníī, “Ɔwɔicō géē gwō ɔ̄cɛ dóódu nōo cokónu lɛ ɔ́ nɛ̄ ó lɛ ɔ́ tū ŋ́ mā bónū ɛ́gɛ́nɛ̄ n gwō alítā nyā bónū ā. Ɔwɔicō géē mīyɛ ɔlɛ́ aá, ɔdā dóódu nɛ̄ aá lɛ ā. Ó klla í cɛ̄ lɛ aá tá abɔ̄ áncā. Ɛjɛ̄ɛ̄jī ójila nēe jīla bá abɔ́ɔ ā cɛ̄ duu ka ‘Amɛn,’ anɔ́ɔ é le cɛ̄tra Óndú ā. Anɔ́ɔ aótrɛ̄yí mɛ́mla aígabɔ̄ ā lɛ okónu nɛ̄ é ce yá.

¹⁴Unehemíya kahíníī, “Ipú iháyí igwɛ́ɛpa nɛ̄ n wɛ igbómína kú Ujúda ā, o ŋmá ipú iháyí ɔ́mofu nɛ̄ Átasásɛsi ce ɔcɛ́nɛ̄hi ā, jāā gaá kwu iháyí ɔ́mofu ce igwɛ́ɛpa ā, ami mɛ́mla ācɛ ɔlɛ́ um, amáŋ ka aɔ́mpa um dúúmā í lé ɔdōlé nōo cíkā ō wɛ ukpɛ̄ kú ami nōo wɛ ígbómína ā ŋ́.

¹⁵Aígbómína dóódu nēe bá gbɔbū gā um ā húmáyī lɛ iyó ce ācɛ ā. É klla í da ācɛ ā kéē je ije nɛ̄hɛ́ ofɛpa lɛ aá ɛ̄cī dóódu, kú aá le lé ɔdōlé mɛ́mla ō le gwá ejé. Ācocɛ̄hɔ̄ kú uwá klla ī yá ācɛ ōwē dúú. Amáŋ ucē kú um í lɛ ā ŋ́, n wɛ ɛyɛ́ɛ́yí, ohígbū ka n gē yúufi Ɔwɔicō.

¹⁶N kwú odúúdú ɔfú kú um ú tá lɛ ō ma ɔdɔ kú Ujerúsālɛm ā. Ń tú ɔdā agbénú dúúmā tū lɛ iyī um ŋ. Odúúdú ācɛ nēe gē yúklɔ́ mla um ā, kē yúklɔ́ kú ɔdɔ ō ma āa.

¹⁷Ɛ̄cī dóódu, ācɛ Ujíyu mɛ́mla aígabɔ̄ kú uwá nēe gē lé ɔdōlé mla um ā, wɛ ofu ahāapa cigwó. Aéwɔhá nēe gē wā ɛgiyí um ā, í wɛ ipú áluka nyā ɛ́ɛ́ ŋ́.

¹⁸Ɛ̄cī dóódu n gē ŋmó ɛna éyi, álá ɛhīlī, mɛ́mla ugwū alɛwa. N klla í he ejé ɛ̄cī igwó dóódu. Amáŋ abɔ̄, nɛ̄ n jé iyó mɛ́mla ákanya kú ācɛ ā, ije kú ɔdōlé nyā nɛ̄ n cíkā ō mīyɛ, nɛ̄ o kē wɛ ukpɛ̄ kú ami nōo wɛ igbómína ā ń da uwá kéē je ga um ŋ́.

¹⁹N le ɔkɔ gbā lɛ Óndú Ɔwɔicō kú um ka, “N gē gbɔ̄ɔkɔ gā awɔ, kú ā lɛ ulé kú ɔdā nɛ̄ n yá lɛ ācɛ ā cíla um.”