Read idoma UNEHEMÍYA 6 Bible Online

UNEHEMÍYA 6 - idoma bible

UNEHEMÍYA 6

¹Unehemíya kahíníī, “Usánbālati, Utobíya mɛ́mla Ugéshem mɛ́mla aólɛlā kú alɔ o hile ā, le pó ka alɔ ɔ́ɔ le ɔdɔ kú Ujerúsālɛm ā ma kwɛyí ā, nɛ̄ ɛpá dúúmā í klla tá ipú ɔdɔ ā gɛ ŋ́ mā. Nááná nɛ̄ alɔ í kpó ɔwɛ ā kwu ajɛ ɛ́ɛ́ ŋ́ mā.

²Usánbālati mɛ́mla Ugéshem le ɛhɔ̄ tū fu um ka ami ɔ́ɔ̄ gaá jīla aá eyīpɔ́lɛ́ éyi kú ajɛ kú Óno. Ɛ̄nyā wɛ ula kú uwā nēé gbō kéē géē yá um ɔdée.

³Anɔ́ɔ n le ɛhɔ̄ tū gaá da uwá kahíníi, “N yɔ̄ ī yúklɔ́ nɛ̄hi, ń má ɛga ga abɔ́ɔ ɛ́ɛ́ nóó. Ń gáā ma úklɔ́ ā tá wā í má aá glá nóó.

⁴Igbīhi ɛ̄nyā, é le ɛhɔ̄ tū fu um igbo ɛnɛ. Igbɛ ɛnɛnɛ́lɛnɛ ɔ́ɔmā, n kē tá uwá ohi ékpónú ā.

⁵Anɔ́ɔ Usánbālati lɛ éyi kú ācocɛ̄hɔ̄ kú nū tɛ̄hɔ̄ fu um igbo ɔ́mɛhɔ̄ mla ɔkpá nēé hɔja klá anú ŋ́.

⁶Ó tá tū ipú ɔkpá nōó tá ā kahíníi, “Ugéssém da um kahíníi, ɛga dóódu nɛ̄ alɔ nyɔ̄ ā, alɔ gē pó okónu ɔ̄kā ka awɔ mɛ́mla ācɛ Ujíyu ā tíne kú aá kwú hɛ́ ŋmá ipú alɔ, cɛ́ɛ́ kú aá kwú pīya ācɛ abɔ̄yī aá. Ɔ́ɔmā yá ɛ́ɛ́ nɛ̄ aá bā í tú ɔdɔ kú Ujerúsālɛm ma kpɔ́ á. Ó klla da um ka, aá pó awɔ ɔ́ɔ yɔ̄ ī yá ojuju kú ā kwú iyī uwɔ ú pīya ɔcɛ́.

⁷A klla lɛ ācomɛ́ɛbɛ tútū nōo géē je uwɔ cɔcɛ́ Ujerúsālɛm. A klla í ka tɛ́ɛcɛ ka, awɔ ɔ́ɔ wɛ ɔcɛ́ kú Ujúda á. Ɔdā nāa yɔ̄ í yá nyā, ɔcɛ́nɛ̄hi géē pó piíí. Ohígbū ɔ́ɔmā, ami mɛ́mla awɔ kóō le jīla, cɛ́ɛ́ kú ālɔ̄ lɛ ɛlā nyā gwó tū.”

⁸Anɔ́ɔ Unehemíya ka anúɔ da ɔ́ ka odúúmā kú ɛlā nɛ̄ ɔ́ɔ yɔ̄ ī ka ā í wɛ ɔkwɛ̄yi ŋ́. Ka anú yɔ̄ ī kɛlā ā abɔ̄yī nū á.

⁹Ó klla ka é bá gē tū aá ufi, cɛ́ɛ́ kéē lɛ aá úklɔ́ ā ci, amáŋ anúɔ le ɔkɔ gbā kahíníī, “Óndú, Ɔwɔicō kú um, lɛ ɔfú tū um iyē.

¹⁰Ɛpléeko nyā, n le tá ɔlɛ́ Ussɛmáya, ɔyí kú Udeláya, ɔyí kú ɔyí kú Uméhetābelu nōó bɛ̄cɛ ŋmá inu glá gɛ ŋ́ mā, gāá má ɔ̄. Anɔ́ɔ ó da um kahíníi, “Ami mɛ́mla awɔ kóō gāá le kwu tayínū ɛga otīīhɔ fíyɛ́ dúú ā ipú Agblīihɔ-nɛ̄hi ka ālɔ̄ gāá lɛ ɔwɛ gwū tū īyī alɔ, ohígbū kēé gē wā gāá ŋmó uwɔ. Otú dúúdú ŋmá ícɛ é géē wā gāá ŋmó uwɔ.”

¹¹Anɔ́ɔ n tá ɔ̄ ohi kahíníi, “Ń wɛ ɛdɔ ɔ̄cɛ nōo gē kwu gāá tayínū ā nóó. A gbɛlá ka ami ɔ́ɔ gē nya oyēeyī kú um tá ŋmá lɛ ō nyɔ̄ í kwu tayínū ipú Agblīihɔ-nɛ̄hi nɛɛ? Ń gáā yá ɔ́ɔmā glá ŋ.”

¹²Abɔ̄ n gbɛlá tū ɛlā kú Ussɛmáya nyā, n le má ka, Ɔwɔicō í kɛlā lɛ Ussɛmáya ŋ́, amáŋ Utobíya mɛ́mla Usánbālati le omíci je lɛ ɔ́ lé kú ɔ̄ lɛ ukɔ̄ nyā tū um.

¹³É le ije je lɛ ɔ́ kóō lɛ ufi tū um, cɛ́ɛ́ ká n̄ lɛ íne bīya, cɛ́ɛ́ kéē géē lɛ um iyē bīya, cɛ́ɛ́ kéē klla í lɛ okónu kwu um iyē.

¹⁴N lɛ ɔkɔ gbā lɛ Ɔwɔicō kahíníī, “Ɔwɔicō, lɛ ɛlá kwu ɔdā nɛ̄ Utobíya mɛ́mla Usánbālati yá um ā, cɛ́ɛ́ kú ā géē lɛ italā yá uwā. Lɛ ɛlā kwú Unowadíya ɔnyā omɛ́ɛbɛ ɔ́ɔmā, mɛ́mla ācomɛ́ɛbɛ ɔhá nēe yá kéē tū um ufi ā dúú, ká ā lɛ italā yá uwā dúú.”

¹⁵Ipú ɛ̄cī ofucɛhɔ̄ kú ɔyā kú Ɛ́lulu ā, eko nɛ̄ alɔ lɛ úklɔ́ yá ɛ̄cī ofɛpa ce igwɛ́ɛpa ɛɛ́ mā, odúúdú úklɔ́ ā mɛ.

¹⁶Eko nɛ̄ aólɛlā kú alɔ kú aéwɔhá nēe yɛ alɔ jīla tá ā lɛ ɛ̄nyā pó ā, é le má ka uwēyī lɛ uwá kwú, ɛ́gɛ́nɛ̄ odúúdú ācɛ jé ka, Ɔwɔicō ɔ́ɔ tá alɔ abɔ̄ ɛɛ́ nɛ̄ alɔ yá úklɔ́ ā mɛ á.

¹⁷Ɛpllá nɛ̄ alɔ yɔ̄ gē yúklɔ́ nyā, aótrɛ̄yí mɛ́mla aígabɔ̄ kú ācɛ Ujíyu ā bā í tɔ́kpá fu Utobíya eko dóódu.

¹⁸Ācɛ kú Ujúda alɛwa yɛce Utobíya, ohígbū ádā ɔnyā kú Utobíya Ussicaníya ɔyí kú Ára, nōo wɛ ɔ̄cɛ Ujíyu ā. Ɔyí kú Utobíya, Ujehóhānan klla lɛ adá kú Uméssūlam, ɔyí kú Ubérekíya lɛ.

¹⁹É gē bá ī kɛlā olɔhi kú Utobíya iyɔ̄bū um eko dóódu. Cɛ́ɛ́ é klla gē ka lɛ Utobíya ɛlā dóódu nɛ̄ n ka ā. Cɛ́ɛ́ Utobíya yɔ̄ í tɔ́kpá fu um eko dóódu, cɛ́ɛ́ kóō géē tū um ufi.