Read idoma UNEHEMÍYA 7 Bible Online

UNEHEMÍYA 7 - idoma bible

UNEHEMÍYA 7

¹Unehemíya ka aá kwú ɔdɔ ā ú gwó kwɛyí, klla kwú odúúdú ɔcí kú ɔwɛ ā ú kpó kwú ɛga nēé tɛtɛ kwu ā. Ó ka é le úklɔ́ otɛtɛ kú ācogbɔ̄ɔwɛ kú Agblīihɔ-nɛ̄hi ā, mɛ́mla ācogwíije ā, mɛ́mla ācɛ Ulífāyi o hile ā kpó kwúcē lɛ uwá ipú Agblīihɔ-nɛ̄hi kú Óndú ā.

²Ó ka anúɔ le ācɛ ɛpa fu kéē wɛ igbómína kú igelī nɛ̄hi kú Ujerúsālɛm. Ó ka é wɛ anúɔ, Uhanáni mɛ́mla Uhananíya gē leyīkwu aícɔ́ɔja kú ɔlɛ́ nēé le igá olɔfú cē tū ɔ̄ á. Ó ka Uhananíya ɔ́ɔ wɛ ɔ̄cɛ nɛ̄ ɔ̄cɛ ɔ́ɔ lɛ ɔtū ce ɔ́ glá. Ó ka ɔ́ɔ klla ī yúufi Ɔwɔicō nɛ̄hi nɛ̄ ɛ́gɔ́ nū í gbɛɛpa ŋ́.

³Ó ka anúɔ da uwá kéē híī nwūla ɔwɛ kú igelī ā ŋ́ jāā gbéeko nɛ̄ eyī ɔ́ɔ le nyā lɔɔlɔhi. Ó ka anúɔ klla da uwá ka eko nɛ̄ ɛnɔ gbɔɔ́ ō gaajɛ, kéē lɛ ɔwɛ kú igelī nɛ̄hi ā kpó gwū, cɛ́ɛ́ kéē lɛ igodó kpó kwu ɔ́. Kéē klla lɛ ogbló kú ɔwɛ ā kpó wu ɔ́. Unehemíya ka anúɔ klla da uwá kéē lɛ ācɛ fu ŋmá igelī kú Ujerúsālɛm kéē bá í gbāajɛ okónu ɔwɛ dóódu. Ká ē klla bá ī yɛ igelī nɛ̄hi ā biílí, cɛ́ɛ́ kéē bēē jīla ajɛ.

⁴Ó ka Ujerúsālɛm ɔ́ɔ wɛ igelī nōo nwuné nɛ̄hi, amáŋ ācɛ alɛwa í lā ipú nū ŋ́, ɛɛ́ nēé gē gwó ɔlɛ́ alɛwa tū ɔ̄ ŋ́.

⁵Ó ka Ɔwɔicō ɔ́ɔ lɔfú tū anúɔ iyē, cɛ́ɛ́ kú anúɔ lɛ ācɛ ā, mɛ́mla aótrɛ̄yí mɛ́mla aígabɔ̄ kú uwā túbá, cɛ́ɛ́ ká aá lɛ ɔkpá kú iyē kú ipɔ́ɔma kú uwā dóódu jila. Ó klla ka anúɔ le ɔkpá kú iyē kú ācɛ nēe pīyɛyí ŋmá Ubábīlɔn aflɛ́yí wā ɔlɛ́ ā má ɛɛ́. Ó ka ɔdā nɛ̄ anúɔ má ipú ɔkpá ā yɔ̄ á.

⁶Ó ka ācɛ alɛwa kú uwā pīyɛyí ŋmá Ubábīlɔn wā Ujerúsālɛm mɛ́mla Ujúda. Ó ka ɔnyɔɔnyɛ kú uwā pīyɛyí ga ipɔ́lɛ́ nū. Uwá mɛ́mla aíkonó kú uwá húmáyī í lā Ubábīlɔn, ŋmífī nɛ̄ Unebúkádinēsa, ɔcɛ́ kú Ubábīlɔn ā, kpó uwā nyɔ̄ abɔ́ɔ ā.

⁷Ó klla ka aótrɛ̄yí kú uwā eko ɔ́ɔmā wɛ: Userúbābɛlu, Ujóssuwa, Unehemíya, Asárīya, Uráamíya, Unahamáni, Umɔ́dekāyi, Ubílssan, Umispereti, Ubífāyi, Unéhum, mɛ́mla Ubaána.

⁸Ó ka ɛ̄nyā wɛ iyē kú ācɛ kú Ísrɛ̄lu nēe ŋmá ipɔ́ɔma dóódu mɛ́mla áluka kú ipɔ́ɔma kú uwā nēe pīyɛyí wā ɔlɛ́ ā. Ipɔ́ɔma kú Upárōssi wɛ úlā ɛhɔ̄ ce ofahātá ce igwɛ́ɛpa.

⁹Ācɛ nēe ŋmá ipɔ́ɔma kú Ussɛfatíya wɛ, ofu igwáahātá ce igwɛ́ɛpa.

¹⁰Ācɛ nēe ŋmá ipɔ́ɔma kú Ára wɛ, úlā ce ofigwɛ́ɛpa ce ācɛ igwɛ́ɛpa.

¹¹Ācɛ nēe ŋmá ipɔ́ɔma kú Upahatimówābu ā wɛ, ayí kú Ujéssuwa mɛ́mla Ujówābu ā. É wɛ úlā ahāapa ce ācɛ igwáahātá.

¹²Ɛlam wɛ, úlā ɛtá ce ofɛpa ce igwɛ́ɛnɛ.

¹³Usátu wɛ, úlā ɛpa ce ofɛpa ce ɛhɔ̄.

¹⁴Usákāyi wɛ úlā ce ofu igwáahātá.

¹⁵Ubinúwi wɛ úlā ce ofigwɛ́ɛpa ce ahātá.

¹⁶Ubébāyi wɛ, úlā ce ofigwóléyi ce ahātá.

¹⁷Ayí kú Asigādi wɛ ācɛ, úlā ɛhɔ̄ ce ofigwɛ́ɛhīlī ce ɛpa.

¹⁸Adónīkam wɛ ācɛ úlā ce ofahātá ce ahāapa.

¹⁹Ubígifāyi wɛ ācɛ úlā ɛhɔ̄ ce ofɛtá ce ahāapa.

²⁰Adin wɛ ācɛ úlā ce ofu igwɛ́ɛpa ce igwɛ́ɛhɔ̄.

²¹Áta wɛ ācɛ, ofɛnɛ ce igwáahātá, é gē hī ipɔ́ɔma nyā ka Uhesekíya dúú.

²²Uhássum wɛ ācɛ ofu igwɛ́ɛhīlī ce ahātá.

²³Ubésāyi wɛ ācɛ ofu igwɛ́ɛhīlī ce ɛnɛ.

²⁴Uhárīfu wɛ ofɛhɔ̄ ce igwɛ́ɛpa.

²⁵Ugíbeyɔn wɛ ofɛnɛ ce igwɛ́ɛhɔ̄.

²⁶Ó ka ācɛ nɛ̄ aádáádā ūwū lā aígelī nɛ̄ŋcɛ́ nēe bá nyā, klla pīyɛyí ŋmá Ubábīlɔn wā ɔlɛ́ mla uwá dúú. Ācɛ nēe ŋmá Ubɛ́tilɛhɛm mɛ́mla Unétōfa ā wɛ ofahāanɛ ce ahātá.

²⁷Ācɛ nēe ŋmá Ánatōtu wɛ ofu ɛhīlī ce ahātá.

²⁸Ācɛ nēe ŋmá Ubetasimáfeti ā wɛ ofɛpa ce ɛpa.

²⁹Ācɛ nēe ŋmá Ukɛriyati Ujēyarím, Ucefíra mɛ́mla Ubéerɔ̄tu wɛ úlā ce ofigwáahāpa ce ɛtá.

³⁰Ācɛ kú Uráma mɛ́mla Ugéba wɛ úlā ce ofigwóléyi ce éyi.

³¹Ācɛ nēe ŋmá Umíkimāsi ā wɛ ofɛhīlī ce ɛpa.

³²Ācɛ nēe ŋmá Ubɛ́tɛlu mɛ́mla ayí uwā wɛ, ofɛhīlī ce ɛtá.

³³Ācɛ nēe ŋmá Umébo ɔhá ā wɛ ofɛpa ce igwɛ́ɛpa.

³⁴Ayínɔ̄nyīlɔ ɔhá kú Ɛ́lam ā wɛ úlā ɛtá ce ofɛpa ce igwɛ́ɛnɛ.

³⁵Ācɛ nēe ŋmá Uhíram ā, wɛ ofigwɛ́ɛhīlī.

³⁶Ācɛ nēe ŋmá Ujérīko ā wɛ, ofigwáahāpa ce ɛhɔ̄,

³⁷Ayínɔ̄nyīlɔ kú Ulódu, Uhádidi mɛ́mla onō wɛ, úlā ce ofigwɛ́ɛhīlī ce éyi.

³⁸Ayínɔ̄nyīlɔ kú Usénaa wɛ, úlā ahāanɛ ce ofigwɛ́ɛhīlī ce igwó.

³⁹Ó klla ka iyē mɛ́mla áluka kú ipɔ́ɔma kú ācogwɛ́ɛya nēe pīyɛyí wā ɔlɛ́ ŋmá Ubábīlɔn ā wɛ, Ujedáya, ayí kú ipɔ́ɔma kú Ujéssuwa wɛ, úlā ɛpa ce ofahātá ce igwɛ́ɛtá.

⁴⁰Ācɛ nēe ŋmá ipɔ́ɔma kú Íma wɛ, úlā ɛpa ce ofigwɛ́ɛpa ce igwɛ́ɛpa.

⁴¹Ācɛ nēe ŋmá Upássɔ ā wɛ ācɛ úlā ɛtá ce ofɛpa ce ahāapa.

⁴²Ācɛ nēe ŋmá Uhíram ā wɛ ācɛ úlā ɛpa ce ofigwó ce igwáahāpa.

⁴³Ācɛ nēe ŋmá ipɔ́ɔma kú ācɛ kú Ulífāyi nēe pīyɛyí wā ɔlɛ́ ā wɛ, Ujéssuwa mɛ́mla Ukádimiyelu, ayí kú ipɔ́ɔma kú Uhódafīya wɛ ofɛtá ce igwɛ́ɛnɛ.

⁴⁴Ācogwíje kú Agblīihɔ-nɛ̄hi ā, nēe ŋmá ipɔ́ɔma kú Ásāfu ā wɛ ofahāapa ce ahātá.

⁴⁵Ācogbɔ̄ɔwɛ kú Agblīihɔ-nɛ̄hi, ayí kú ipɔ́ɔma kú Ussálum, Áta, Utálimɔn Ákūūbu, Uhátīta mɛ́mla Ussóbāyi ā wɛ, ofɛhīlī ce igwáahātá.

⁴⁶Ācɛ nēe ŋmá ipɔ́ɔma kú ācoyúklɔ́ kú ipú Agblīihɔ-nɛ̄hi nēe pīyɛyí wā Ujerúsālɛm ŋmá Ubábīlɔn ā wɛ, Usíha, Uhásūpa, Utábāwɔtu,

⁴⁷Ukérosi, Usíya, Upádɔn,

⁴⁸Ulébāna, Uhágāba, Ussálimāyi,

⁴⁹Uhánan, Uhídelu, Ugáha,

⁵⁰Uréyáya, Urésin, Unekóda,

⁵¹Ugásam, Úsaa, Upásīi,

⁵²Ubesáyi, Uméyúnim, Uméfūsésim,

⁵³Ubákibūki, Uhákūpa, Uháhɔ,

⁵⁴Ubásilīti, Uméhīyada, Uhássa,

⁵⁵Ubákosi, Usisɛ́ra, Utéma,

⁵⁶Unesíya mɛ́mla Uhátīpa.

⁵⁷Ipɔ́ɔma kú aíkonó kú Usólōmɔn nēe pīyɛyí wā ɔlɛ́ mla uwá dúú ā wɛ, Usótāyi, Usófɛ̄rɛti, Upɛrída,

⁵⁸Ujáala, Udákɔn, Ugídeli,

⁵⁹Ussɛfatíya, Uhátilu, Upókereti, Uhasebáyīm mɛ́mla Ámɔn.

⁶⁰Odúúdú ɛwa kú aíkonó kú Usólōmɔn mɛ́mla ayí uwā nēe pīyɛyí mla uwá ā wɛ, ofigwáahāanɛ ce igwɛ́ɛpa,

⁶¹Ācɛ kú ipɔ́lɛ́ kú Uteliméla, Utelihása, Ucérūbu, Ádɔn mɛ́mla Ímma pīyɛyí mla uwá dúú, amáŋ abɔ̄ uwá í jé ɛma kú uwá gɛ ŋ́ mā, é je uwá bɛ̄ɛka ācɛ kú Ísrɛ̄lu ā ŋ́.

⁶²Ācɛ nēe pīyɛyí ŋmá ipɔ́ɔma kú Udeláya, Utobíya, mla Unekóda ā wɛ, úlā ce ofigwɛ́ɛpa ce ɛpa.

⁶³Ipɔ́ɔma kú ācogwɛ́ɛya nēe bá nyā í klla jé ipɔ́ɔma nēé ŋmá gɛ ŋ́ dúú. É wɛ, Uhobáya, Uhákosi, mla Ubasílāyi, Ádā kú ipɔ́ɔma kú Ubasílāyi lɛ ɔnyā ŋmá ipɔ́ɔma kú Ubasílāyi kú Ugílɛ́di, klla kwú iyē kú ohilí nū ā ú ce ipɔ́ɔma kú nū.

⁶⁴Ɛ́gɛ́nɛ̄ é jé ɔkwu mɛ́mla ipɔ́ɔma nēé ŋmá ŋ́ mā, é mīyɛ uwá tá ipú ācogwɛ́ɛya ā ŋ́.

⁶⁵Igbómína kú ācɛ Ujíyu ā da uwá keé gáā lé ɔdōlé kú ɛya nēé gē gwó lɛ Óndú ā ŋ́ jāā gbéeko nɛ̄ ācogwɛ́ɛya ā bī anwa kú Úrim mla Utúmmim lɛ ɔ̄kā da Ɔwɔicō.

⁶⁶Odúúdú ɛwa kú ācɛ Ujíyu nēe pīyɛyí ŋmá Ubábīlɔn wā ɔlɛ́ aflɛ́yí ā wɛ, úlā ofɛhɔ̄ ce úlā ɛhɔ̄, ce ofigwáahātá.

⁶⁷Ācocɛ̄hɔ̄ nɔ̄nyā mɛ́mla ācocɛ̄hɔ̄ nɔ̄nyīlɔ kú uwá wɛ, úlā igwáahātá ce ofɛhīlī ce igwáahāpa.

⁶⁸Aɔ́nya kú uwá wɛ, úlā ce ofigwɛ́ɛhīlī ce igwɛ́ɛhīlī. Aɛ́na kú uwā wɛ, ofigwɛ́ɛpa ce ɛhɔ̄.

⁶⁹Aínyankwūlūmī kú uwā wɛ, úlā ce ofu ce igwɛ́ɛhɔ̄. Aíjakī wɛ úlā igwáhāpa ce ofigwɛ́ɛhīlī.

⁷⁰Ācɛ alɛwa kú uwā da ije, cɛ́ɛ́ kéē bī le glá Agblīihɔ-nɛ̄hi kú Óndú ā yá. Igbómína ā je īkpō ije kú ugóolu (oje ɔdɔ) úlā ɛpa cofucigwó, mɛ́mla ocíbú kú oje udɔ ofɛpa ce igwó mɛ́mla awulú kú ācogwɛ́ɛya úlā ce ofɛhīlī ce igwɛ́ɛhɔ̄.

⁷¹Aótrɛ̄yí kú aípɔ́ɔma ā je īkpō ugóolu (oje ɔdɔ) úlā ofɛpacigwó, mɛ́mla īkpō ije nɛ̄hɛ́ úlā ɛhɔ̄ ce ofigwó.

⁷²Ācɛ ohile ā je īkpō ije úlā ofɛpacigwó kú īkpō ije ugóolu (oje ɔdɔ), īkpō ije nɛ̄hɛ́ kē wɛ úlā ɛhɔ̄ mɛ́mla awulú kú ācogwɛ́ɛya ofɛtá ce ahāapa.

⁷³Ācogwɛ́ɛya ā, ācɛ Ulífāyi, ācogbɔ̄ɔwɛ kú Agblīihɔ-nɛ̄hi ā, ācogwííjē, ācɛ ɔlamu ohile mɛ́mla ācɛ ɔhá nēe gē yúklɔ́ ipú Agblīihɔ-nɛ̄hi kú Óndú ā, mɛ́mla odúúdú ācɛ ɔhá kú Ísrɛ̄lu ā, má lā aígelī nɛ̄ŋcɛ́ mɛ́mla aígelī nɛ̄hi kú Ujúda ā.