Read idoma UNEHEMÍYA 8 Bible Online

UNEHEMÍYA 8 - idoma bible

UNEHEMÍYA 8

¹Ɛplá ɔyá ahāapa ā, ācɛ kú Ísrɛ̄lu ā má lā ipú aígelī nɛ̄hi kú ɔlɛ́ uwá dóódu. Ɛ̄cī éyi kú ɔyá ɔ́ɔmā piíí ā, odúúdú ācɛ ā gaá le jīla ɔpu kú ɔwɛ kú éŋkpɔ̄ ā kú Ujerúsālɛm. Anɔ́ɔ é da Ɛ́sra, ɔ̄cogwɛ́ɛya nōo klla jé íne nɛ̄hi ā, kóō kwú íne kú Óndú ā nōó je lɛ ācɛ kú Ísrɛ̄lu bū abɔ̄ kú Umósīsi ā, ú wɛ̄ɛcɛ.

²Anɔ́ɔ Ɛ́sra kwú ɔkpá ā ú wā ɛga nɛ̄ ācɛnyā, ācɛnyīlɔ, mɛ́mla ayípɛ̄ nōo dē jé odée gílá ā, jīla tɔ̄há ā.

³Anɔ́ɔ Ɛ́sra le íne ā jé lɛ uwá ŋmá ɔkpá ā. Ó le eyī pīya kwu ɛyíyɔ́pu nōo yɔ̄ ipú Okómpinu kú éŋkpɔ̄ ā. Ó jé ɔ̄ ŋmá ɔcɔ̄ɔ̄cī gbó ɛnɔ oyɛ̄ɛyí. Anɔ́ɔ odúúdú uwā kē le ahɔ̄ jē lɛ ɔ́ lɔɔlɔhi.

⁴Ɛ́sra ce ɛyí ede kú ɔcí nēe gwó ohígbū kú ojīla nyā ā. Ācɛ nēe bá nyā māhayi abɔ̄lɔ́ná kú nū, Umáttitīya, Uséma, Anáya, Uríya, Uhílikīya mɛ́mla Umáasēya. Ācɛ nēe bá ā kē háyi abɔ̄lúfīyē kú nū, Upedáya, Umíssāwɛlu, Umálikīja, Uhássum, Uhássabadána, Usékaríya mɛ́mla Uméssūlam.

⁵Abɔ̄ Ɛ́sra māhayicō iyɔ̄bū uwá abɔ́ɔ ā, odúúdú uwā leyī kpó kwu ɔ́. Obōōbū nōó lɛ ɔkpá kú íne ā nwūla ā, odúúdú uwá cāŋjɛ.

⁶Anɔ́ɔ Ɛ́sra kahíníi, “Aá cɛ̄tra Óndú ā, kú aá klla bī Óndú, Ɔwɔicō nōo nwuné fíyɛ́ dúú ā wóófu.” Anɔ́ɔ odúúdú ācɛ ā le abɔ̄ kú uwā kpó gicō klla tóohi ka, “kóō le yá lɛ ā, kóō le yá lɛ ā.” É le okwúukwu kpó kwajɛ, túkpɛɛ́ lɛ eyī pīya klá ajɛ gbɔɔ́ ō gbā Óndú ā ɛgbā.

⁷É cāŋjɛ klla má māháyi icō, ɛga nēé tɛtɛ háyi ā. Anɔ́ɔ ācɛ kú Ulífāyi nēe bá nyā gbɔɔ́ ō cɔ̄ɔwɔ kú íne ā lɛ uwá. É wɛ Ujéssuwa, Ubáni, Ussiyɛbíya, Ujámin, Ákūb, Ussɛbetáyi, Uhódīya, Umaaséya, Ukélíta, Asárīya, Ujósābadi, Uhánan mɛ́mla Upeláya.

⁸É le ɔwɔ kú íne kú Ɔwɔicō nē é jé ā,[4] cɛ̄ lɛ uwá okónu ucē kú ɔlɛ́ uwā, cɛ́ɛ́ ka ācɛ kéē géē jé ɛyí nū.

⁹Abɔ̄ ācɛ ā lɛ ɔdā nōo yɔ̄ ipú íne ā pó ā, odúúdú uwā gbɔɔ́ ō jikwū. Anɔ́ɔ Unehemíya nōo wɛ igbómína ā, mɛ́mla Ɛ́sra ɔ̄cogwɛ́ɛya nōo jé íne nɛ̄hi ā, mɛ́mla ācɛ Ulífāyi nēe bā gē cɔ̄ɔwɔ kú íne kú Ɔwɔicō nyā lɛ uwá ā, da odúúdú ācɛ ā kahíníi, “Ícɛ wɛ ɛ̄cī otīihɔ lɛ Óndú, Ɔwɔicō kú aá, aá gáā yá ɔtunobí, ɛ́ɛ́ nɛ̄ aá gē jikwú ŋ́.

¹⁰Aá nyɔ̄ ɔlɛ́ aá, cɛ́ɛ́ kú aá gaá lɛ ucɛ yá. Aá le ɔdōlé mɛ́mla ejé kú ucɛ kú aá ā, kɔ̄ mla ācɛ nɛ̄ abɔ̄ nyɛ́ lɛ uwá ā. Ícɛ wɛ ɛ̄cī otīihɔ lɛ Óndú, Ɔwɔicō kú aá. Ohígbū ɔ́ɔmā, aá híī yá ɔtūnōbí ŋ́. Éeyē nɛ̄ Óndú, Ɔwɔicō kú aá yá kú aá gwó ā, kóō lɛ ɔfú tū aá iyē.”

¹¹Ācɛ kú Ulífāyi ā bá í yɛ ipú uwā bilíbilí, bá gē trú uwá ikwū. É gē da uwá kéē híī yá ɔtūnōbí ɛ̄cī otīihɔ kú Óndú ā ŋ́.

¹²Anɔ́ɔ odúúdú ācɛ ā le pɛ́ kwúcē ga ɔlɛ́ uwā, gaá le ucɛ yá lé. É klla le ucɛ ā kɔ̄ mla ācɛ ɔhá dúú. É bá gē gwéeyē, ohígbū ka é le ɛyí kú ɔkpá kú íne kú Ɔwɔicō nēé jé lɛ uwá ā jé.

¹³Oŋmɔ́ɔ̄cī nū, aótrɛ̄yí kú ācɛ ā, ācogwɛ́ɛya mɛ́mla ācɛ Ulífāyi le tá ɛgiyí Ɛ́sra gaá kllɔcɛ́ ɔdā nɛ̄ íne ā gē nwū ā.

¹⁴Anɔ́ɔ é le má ka, íne nɛ̄ Óndú ā, ɔ́ɔ je bū abɔ̄ kú Umósīsi ā ɔ́ɔ ka, eko kú uce kú áklɔ̄kpɛ ā, ācɛ ɔ́ɔ cíkā ō lā ipú áklɔ̄kpɛ

¹⁵Anɔ́ɔ é le ɔ́da je klla le ɛhɔ̄ tū ga Ujerúsālɛm mɛ́mla odúúdú aígelī nɛ̄hi mɛ́mla aígelī nɛ̄ŋcɛ́ kahíníī, “Áa nyɔ̄ ga ɛyí aɛ́fu nɛ̄ŋcɛ́, kú aá gaá hɛ́ abɔ̄ kú alī, ēpū ɔcí kú ólífu, ɔcí ufáyin mɛ́mla ābɔ̄ kú ɔcí nē é hī ka Umɛ́tulu mɛ́mla aɔ́cí ō lɛ ēpū jugwujugwu dóódu, cɛ́ɛ́ kú aá lɛ áklɔ̄kpɛ kpó ce ɛcɛ, kú aá lā ipú nū ɛ́gɛ́nɛ̄ é tá tū ipú ɔkpá kú íne lɛ ā.”

¹⁶Anɔ́ɔ ācɛ ā le pɛ́ i yɛ gaá le ābɔ̄ kú aɔ́cí kpó, anɔ́ɔ é gaá le áklɔ̄kpɛ kpó cēce icō ɛyí inu kú uwā, ódúdɔ̄lɛ́ uwā, mɛ́mla ódúúdɛ̄cɛ kú Agblīihɔ-nɛ̄hi kú Ɔwɔicō kú uwā mɛ́mla okónu Ɔwɛ kú Ɛ́frem ā.

¹⁷Odúúdú ācɛ nēe pīyɛyí wā Ujerúsālɛm ŋmá Ubábīlɔn ā le áklɔ̄kpɛ kpó ce, mā lā ipú nū. Ɛ̄nyā wɛ áklɔ̄kpɛ aflɛ́yí nēé cēce ŋmífī eko kú Ujessúwa ɔyí kú Unún ā. Odúúdú uwā kē gwéeyē nɛ̄hi, ɔtū klla kē he uwá nɛ̄hi dúú.

¹⁸Oŋmá ɛ̄cī aflɛ́yí kú ucɛ kú áklɔ̄kpɛ ā, jāā ga ɛ̄cī ámōōmɛ kú ucɛ ā, é bā í jé āyā éyi kú íne kú Ɔwɔicō ā lɛ uwá ɛ̄cī dóódu. É lé ucɛ ā ɛ̄cī ahāapa, anɔ́ɔ ɛ̄cī ɔ́mahātá ā, é le túbá tɔ̄há le ɛ̄gbā gbā Ɔwɔicō ɛ́gɛ́nɛ̄ é tá ipú ɔkpá kú íne kéē yá ā.