Read idoma UNEHEMÍYA 9 Bible Online

UNEHEMÍYA 9 - idoma bible

UNEHEMÍYA 9

¹Ɛ̄cī ofu ce ɛnɛ kú ɔyā éékpónú ɔ́ɔmā ā, ācɛ kú Ísrɛ̄lu le jīla, le okónu gwū klla lɛ īlī ekwu kpó wu iyē klla le ewo gwu klá ɛyí.

²Anɔ́ɔ odúúdú ācɛ kú Ísrɛ̄lu ā lɛ īyī uwā kpó bɛ̄cɛ ŋmá ipú aéwɔhá dóódu nōo lā ipú ajɛ kú uwā ā. Anɔ́ɔ é háyi abɔ́ɔ gbɔɔ́ ō ka íne nɛ̄ uwá mɛ́mla aádáádā uwā bīya ā tɛ́ɛcɛ lɛ Ɔwɔicō.

³É háyi abɔ́ɔ bɛ̄ɛka áwa ɛtá ā, abɔ̄ nēé bā í jé íne kú Ɔwɔicō tɛ́ɛcɛ lɛ uwá ā. Ipú áwa ɛtá ɔhá ā, é le íne nēé bīya ā ka tɛ́ɛcɛ anɔ́ɔ é le ɛ̄gbā gbā Ɔwɔicō kú uwā á.

⁴É le ɔda ce lɛ ayí kú Ulífāyi kéē ce ɛyí nū. Ujéssuwa, Ubáni, Ukádimíyelu, Ussébanīya, Ubúni, Usérebīya, Ubáni mɛ́mla Ukénāni ce ɛyí ɔda ā dúú. É le ɔkɔ cɛyí le ɔkɔ gbā lɛ Óndú ā Ɔwɔicō kú uwá gbōmgbōm.

⁵Ācɛ kú Ulífāyi nēe bá nyā, Ujéssuwa, Ukádimíyēlu, Ubáni, Uhássibinēya mɛ́mla Upétahīya kpó ācɛ kú Ísrɛ̄lu ohile ā trɛ̄yí nēé gbā Óndú ā ɛ̄gbā á. É da ācɛ ā kahíníi, “Aá cāŋjɛ kú aá cɛ̄tra Óndú, Ɔwɔicō kú aá, cɛ́ɛ́ kú aá tá ɔ̄ ahínyá. Aá cɛ̄tra anú kú aá wóófu iyē kú nū piyóó ipú ɛcɛ. Odúúdú ācɛ kéē cɛ̄tra iyē otīīhɔ kú nū nɛ̄ ɔlɛɛcɛ í kōo má okónu ō bī le cɛ̄tra anú gaajɛ glá ŋ́.”

⁶Anɔ́ɔ ācɛ kú Ísrɛ̄lu le ɔkɔ gbā lɛ Óndú ā kahíníi, “Awɔ Óndú ā, awɔ ofōōfū uwɔ wɛ Óndú á. Awɔ yá ɔkpáncō mɛ́mla aínyílɔ́wɔ kú ɔkpáncō mɛ́mla ɔdā dóódu nēe bá ipú nū á. Awɔ yá ɛcɛ mɛ́mla ísu mɛ́mla ɔdā dóódu nōo bá ipú uwā á. Awɔ je oyēeyī lɛ odúúdú uwā klla gē lɛ uwá tū á. Odúúdú aígabɔ̄ nēe lɔfú, klla lɛ íkwu kú ɔkpáncō dóódu gē túkpɛɛ́ gē gbɔ̄ɔkɔ gā awɔ.

⁷Awɔ Óndú, Ɔwɔicō fu Ébram klla bī ɔ̄ bɛ̄cɛ ŋmá ipú ajɛ kú Ɔ́ɔru kú Ubábīlɔn á. Awɔ klla je iyē kú nū pīyabɔ̄ ga Ébrahām á.

⁸Abɔ̄ a má koó lɛyí táajɛ gā uwɔ klla yɛce uwɔ kpaakpa ā, a le okónu ce mla anú. A lɛ okónu ce lɛ ɔ́ ka anúɔ géē je ajɛ kú Ukéna, ajɛ kú ācɛ Upɛ́rīsi, Ujébusi, Uhám, Ámɔn mɛ́mla ajɛ kú Ugɛ́gassi lɛ anú mɛ́mla ayí nū ká ɔ̄ wɛ ɔdā úgwū kú uwā nēé géē lā anú piyóó. Okónu nāa ce ɔ́ɔmā, a kē lɛ ɔ́ tū ohígbū ka a wɛ Óndú, Ɔwɔicō ō yá ucē nēe le kpaakpa.

⁹A má ɛ́gɛ́nɛ̄ aádáádā alɔ móōwē ipú ajɛ kú Íjīpiti lɛ ā. A klla lɛ ɔkɔ nē é gbā gā awɔ okónu ísu igwɛ̄bɛ́ ā pó.

¹⁰A yúklɔ́ idáagó alɛwa nɛ̄hi ɛgiyí Uféro, ɔcɛ́ ā, mla aígabɔ̄ mɛ́mla odúúdú ācɛ kú ajɛ kú ɔlɛ́ nū, ohígbū ka a jé ɛ́gɛ́nɛ̄ é yá ācɛ ɔlɛ́ uwɔ ōwē lɛ ā. Ojīlīma nāa lɛ mɛ́mla iyē kú uwɔ nōo lɔfú jāā kwu ícɛ nyā ŋmá ɔdā nāa yá ā.

¹¹A lɛ ɔwɛ kú ajɛ íkpākplā tá lɛ ācɛ ɔlɛ́ uwɔ bū ipú ísu Ācɛ nēe bā gē nū uwā ā, le pɛ́ gebí ipú ísu. É le pɛ́ ga ipú enyi gɔɔlii bɛ̄ɛka ápátɛ́cɔ̄ nōo gē mīya ŋmá ɛcɛ ga ɔkwu isú ā.

¹²A bī ojuja le bī uwá tá ɔlɛ́ɛnɔ. A klla bī ɔlá ofíyajɛ le ma ɔwɛ fú lɛ uwá otú.

¹³A gā ajɛ ɛgiyí uwā ŋmá ɔkpáncō ɛyí ɛfu kú Usayínāyi ā. A kɛlá lɛ ācɛ ɔlɛ́ uwɔ abɔ́ɔ. A klla je íne ɔ̄kwɛ̄yi lɛ uwá. A klla nwū uwā ɔdā nōo le kpaakpa abɔ́ɔ.

¹⁴A le nwū uwá kéē lɛ ɛ̄cī Usábāti tū. A klla le íne kú uwɔ ohile ā je lɛ uwá, bū abɔ̄ kú Umósīsi, ɔ̄cocɛ̄hɔ̄ kú uwɔ.

¹⁵Eko nɛ̄ ɛmiyɛ gbɔɔ́ ō ŋmó uwā, a je umaná lɛ uwá ŋmá ɔkpáncō. Eko nɛ̄ ijēēnyi ŋmó uwā ā, a je éŋkpɔ̄ lɛ uwá ŋmá ápátɛ́cɔ̄ kéē gwá. A da uwá kéē nyɔ̄ í mīyɛ ajɛ nɛ̄ anúɔ cokónu ō je lɛ uwá ā.

¹⁶Amáŋ aádáádā alɔ gbɔɔ́ ō yá ɔbɔ́cɛ klla gbɔɔ́ ō yá īkpɛ̄yí o lɔfú tá uwɔ. É tá kéē lɛyítáajɛ lɛ íne kú uwɔ.

¹⁷É tá kéē lɛyítáajɛ gā awɔ É kwú mlanyī odúúdú úklɔ́ idáagó nāa yá lɛ uwá ā. Ipú ɔbɔ́cɛ kú uwá ā, é lɛ otrɛ̄yí kú abɔ̄yī uwā éyi fu, kóō lɛ uwá kpó kwúcē ga Íjīpiti, ajɛ kú ɔfiyɛ nāa kpó uwā ŋmá ā. Amáŋ a wɛ Ɔwɔicō nōo gē je odōbɔ̄bí yá ācɛ ɛhi. A klla gē yíihɔtū tá ācɛ ɔlɛ́ uwɔ. A gbonɛnɛ nɛ̄hi, á klla gē cɔ̄nū fíyaa ŋ́. A wɛ Ɔwɔicō nōo gē méyīnyinyi ācɛ nɛ̄hi. Á kē cīgbīhi kwu uwá ŋ́.

¹⁸É lɛ ikpékwúja kú ɛna ma lɛ īyī uwā, anɔ́ɔ é ka anú ɔ́ɔ wɛ ɔwɔ kú aá nōo kpó aá bɛ̄cɛ ŋmá Íjīpiti ā. Ɛ̄nyā wɛ ɛcá nēé cá uwɔ á.

¹⁹Amáŋ, á mā uwā tá ipú ígbíli abɔ́ɔ ŋ́, ohígbū ka a gē méyīnyinyi nɛ̄hi. Á kē je ojuja mɛ́mla ɔlá nēe gē cɛ̄ lɛ uwá jé ɔwɛ otú mɛ́mla ɔlɛ́ɛnɔ ā, ŋmá ɛgiyí uwá ŋ́.

²⁰Abɔ̄ a gē yá ɔdōlɔhi ā, a da uwá ɔdā nēé cíkā ō yá ā. A je umaná lɛ uwá lé klla je éŋkpɔ̄ lɛ uwá gwá.

²¹Ipú iháyí ofɛpa nēé bá ipú ígbíli ā, a yá ɛgbá kú uwá dóódu lɛ uwá. Īlī kú uwá mɛ́mla áblákpá kú uwá í gbɛnɛ̄ncɛ̄, ɛ́ɛ́ nōó gē híla ŋ́. Ikpó kú uwā í kē mi ipú iyāwu kú uwá ā ŋ́.

²²Nááná a cɛ̄ lɛ uwá lɛ aéwo mɛ́mla ajɔ̄ɔ̄cɛ́ dóódu nōo tɛ̄ɛjī kwu uwá ā yálé. É mīyɛ ajɔ̄ɔ̄cɛ́ kú Uhɛ́ssibɔn, ɛga nɛ̄ Usíhɔn cɔcɛ́ ā. É klla mīyɛ ajɔ̄ɔ̄cɛ́ kú Ubássan, ɛga nɛ̄ Ógu cɔcɛ́ ā.

²³A kpó ayí nēe lɛwa bɛ̄ɛka aínyílɔ́wɔ kú ɔkpáncō ā lɛ uwá. A cɛ̄ lɛ uwá mīyɛ ajɛ alɛwa nāa cokónu nū ō je lɛ aádáádā uwā ā, anɔ́ɔ é klla má lā ipú ajɛ ā.

²⁴É mīyɛ ajɛ kú ācɛ Ukénan A cɛ̄ lɛ uwá lɛ ācɛ kú abɔ́ɔ yálé. A je ɔfú lɛ ācɛ ɔlɛ́ uwɔ kéē yá ɔdā dóódu nōo hi uwá ɔtū mla aɔ́cɛ́ mɛ́mla ācɛ kú ajɛ Ukénan ā.

²⁵Ācɛ kú uwɔ ā klla mīyɛ aígelī nɛ̄hi nēé le igá o lɔfú nɛ̄hi hɛ́ tū uwā. Ajɛ olɔhi, inu nōo le mu mla agbénú. Obugā nēé tɛtɛ le bu táajɛ, ɔcí kú ólīfu, ɔcí ufáyin mɛ́mla īkpɔ̄cí o lé. É lé ɔdā dúúmā nōo he uwá ɔtú ā anɔ́ɔ é le ipú nū klla le kpó jɔ̄kwū. É jɔ́nyɛ kú ɔdā olɔhi dóódu nāa kpó lɛ uwá ā.

²⁶Amáŋ, ācɛ kú uwɔ le īkpɛ̄yí olɔfú yá tá uwɔ, kwú igbīhi í cēkwu íne kú uwɔ. É le ācomɛ́ɛbɛ nēe pi uwá ahɔ̄ ɔ̄ ā kpó ŋmó, ācɛ nēe da uwá kéē lɛ cīgbīhi wā ɛgiyí uwɔ ā. É gē cá uwɔ ɛcá eko dóódu.

²⁷Anɔ́ɔ ohígbū ɔ́ɔmā ā, a cɛ̄ lɛ aólɛlā kú uwā lɛ uwá yálé klla gbɔɔ́ ō gbō uwā bɛ̄ɛka ɔcɛ́ kú uwā ā. Ipú unwalu kú uwā ā, é le uwɔ hīgwú kú ā wā í tá uwā abɔ̄. A kē lɛ ohi tá uwā ŋmá ɔkpáncō. Abɔ̄ a gē méyīnyinyi uwā nɛ̄hi ā, a le aótrɛ̄yí nēe nya uwá tá ŋmá abɔ̄ kú aólɛlā kú uwā kpó gé lɛ uwá.

²⁸Eko nēé má bá ɛbɔ́ nɛɛ, é klla gbɔɔ́ ō bīya íne kú uwɔ kpɔ́. A klla cɛ̄ lɛ aólɛlā kú uwá kéē lɛ uwá yálé kpɔ́. Eko dúúmā nēé le pīyabɔ̄, klla lɛ ɔkɔ gbā gā uwɔ kú ā lɛ aá nyatá nɛɛ, a kē í pó ɔkɔ kú uwá ɔkpáncō. Cɛ́ɛ́ a klla le uwá nyatá. O ŋmá eko tá eko, a gē pó ɔkɔ nēé gbā gā awɔ ā, cɛ́ɛ́ a kē le eyīnyinyi uwā má, le uwá hɛ́tá.

²⁹A gē pi uwá ahɔ̄ kéē lɛyítáajɛ lɛ ɔdā nāa gē nwū ā, amáŋ ipú ɔbɔ́ɔcɛ mɛ́mla oōgɔ̄ kú uwá ā, é tá kéē bī íne kú uwɔ yúklɔ́. Náaná íne kú uwɔ ō le tū, gē cɛ̄ lɛ ɔ̄cɛ yēeyī ā. Ipú īkpɛ̄yī olɔfú mɛ́mla ɔtú olɔfú kú uwá ā, é tá kóō lɛyítáajɛ lɛ íne kú uwɔ.

³⁰Iháyí dóódu, a kē yɔ̄ í pi uwá ahɔ̄ Awɔ gē je ɔfú lɛ ācomɛ́ɛbɛ kú uwɔ kéē kɛlā lɛ uwá á, amáŋ ācɛ kú ɔlɛ́ uwɔ wɛ aódahɔ̄. Anɔ́ɔ a cɛ̄ lɛ aéwɔhá kéē lɛ uwá yálé.

³¹Abɔ̄ a gē méyīnyinyi ācɛ íbí ā, á habɔ̄ uwā tá nāa kōō í je uwá yíífi ŋ́. A wɛ Ɔwɔicō nōo gē yíihɔtū klla ī méyīnyinyi ācɛ.

³²Ɔwɔicō, Ɔwɔicō kú alɔ, a lɔfú nɛ̄hi a lɔfú nɛ̄hi, a klla tūufí nɛ̄hi. A le odúúdú okónu nāa ce ā tū. A klla le uwá kpó yá jīla. O ŋmífī nɛ̄ ācɛ kú Asírīya húmáyī lɛ abɔ̄ da alɔ ɛyí tāajɛ ā, jāā gaá kwu abālɔbányā, alɔ móōwē nɛ̄hi. Aɔ́cɛ́ kú alɔ, aótrɛ̄yí kú alɔ, ācogwɛ́ɛya mɛ́mla ācomɛ́ɛbɛ kú alɔ, aádáádā alɔ, mɛ́mla odúúdú ācɛ kú alɔ móōwē nɛ̄hi. Óndú blakwu ɛ́gɛ́nɛ̄ alɔ móōwē nwuné lɛ ā.

³³A yá lɔhi ɛ́gɛ́nɛ̄ a yá alɔ italā lɛ ā. A húmáyī í yá mla alɔ kpaakpa, nááná nɛ̄ alɔ gē bīya íne kú uwɔ ā.

³⁴Ádáádā alɔ, aótrɛ̄yí kú alɔ, mɛ́mla ācogwɛ́ɛya kú alɔ ā, í lɛ íne kú uwɔ tū ŋ́. Alɔ í jahɔ̄ lɛ ɔ́da kú uwɔ ŋ́. Alɔ í kē le ɛlá wu ahɔ̄ nāa gē pi alɔ ā ŋ́.

³⁵Awɔ hɔ́hā ce aɔ́cɛ́ kú alɔ, ɛ́ɛ́ nēé gbō ācɛ ɔlɛ́ uwɔ eko nēé lā ipú ajɛ olɔhi nāa je lɛ uwá ā. Amáŋ, é kwúcē ŋmá íne kú uwɔ ō bīya ŋ́.

³⁶Abālɔbányā, alɔ kwú pīya ɔfiyɛ ipú ajɛ nāa je lɛ alɔ ā ɛɛ́. Ipú ajɛ olɔhi kú ɔdōlé nāa je lɛ alɔ nyā, alɔ wɛ aɔ́fiyɛ ipú ajɛ kú abɔ̄yī alɔ.

³⁷Ɔdā dúúmā nēé yá alɔ mɛ́mla aɔ́dāajɛ kú alɔ ā, alɔ bá ipú ɔtūnōbí.”

³⁸Ohígbū aɔ́dā nēe yá nyā, alɔ nēe wɛ ācɛ kú Ísrɛ̄lu ā, le okónu ce klla le ɔ́ tá tū ɔkpá klla le abɔ̄ bá ɔ̄ ícɛ nyā, anɔ́ɔ aótrɛ̄yí kú alɔ, ācɛ Ulífāyi kú alɔ mɛ́mla ācogwɛ́ɛya kú alɔ le ɔja kú uwā ja klá ɔkpá ā á.”