Read idoma Ɛ́STA 2 Bible Online

Ɛ́STA 2 - idoma bible

Ɛ́STA 2

¹Igbīhaajɛ nɛ̄ eyī gbo ɔcɛ́ gɔɔ ā, ó gbɔɔ́ ō gbɛlá kwu ucē nɛ̄ Ufássiti yá ā, mɛ́mla íne nōó tá ohígbū nū ā.

²Anɔ́ɔ ācɛ nēe kwu ɔcɛ́ ajaajɛ klla í nwū ɔ̄ ɛlā ā, da ɔ́ kahíníī, “Kéē lɛ ayípɔ̄nɔ̄nyā nēé jé ɔ̄cɛnyīlɔ ɛ́ɛ́ ŋ́ ma dɔ̄ɔ̄ka ŋmá ipú ajɛ ɔlɛ́ uwɔ gā awɔ.

³Lɛ ɔdá je lɛ aígabɔ̄ kú uwɔ nēe bá ɛga dóódu ipú ajɛ ɔlɛ́ uwɔ ā, kéē lɛ ayípɔ̄nɔ̄nyā ɛ́gɔ́ɔmā kpó ŋmá ɛga dóódu kú ipú ajɛ kú uwɔ ā. Kéē wā í jīla uwɔ eyī Usúsa, amānyā. Kéē lɛ uwá kpó tū Uhégāyi, idibo nōo gē leyīkwu anyā ɔlɛ́ ɔcɛ́ ā abɔ̄, cɛ́ɛ́ kéē je ɔdōlé mɛ́mla ɔdā nōo géē yá kéē jɔ̄ɔnyā klla lɔhi fíyɛ́ ā lɛ uwá.

⁴Cɛ́ɛ́ a kwú ɔyípɔ̄nɔ̄nyā nōo géē he uwɔ ɔtū fíyɛ́ dúú ŋmá ipú uwā ā ú pīya ɔcányā kú uwɔ.” Ɔcɛ́ ā má ka ɛlā olɔhi nɔ́ɔ nwū anúɔ á. Anɔ́ɔ ó le yɛce ɛlā nōó nwū ɔ̄ nyā á.

⁵Ɔ̄cɛ Ujíyu éyi lā Usúsa nēé hī iyē nū ka, Umɔ́dɛkāyi, ɔyí kú Ujɛ́ɛ. Ó ŋmá ipɔ́ɔma kú Ubénjamīn mɛ́mla ɔkwu kú Ukísi mɛ́mla Ussiméyi.

⁶Eko nɛ̄ Unebúkádinēsa, ɔcɛ́nɛ̄hi kú Ubábīlɔn, je Ujehóyākin, ɔcɛ́ kú Ujúda ŋmá Ujerúsālɛm, mɛ́mla ígwu kú ācɛ nēé kpó ɔfiyɛ ga Ubábīlɔn ā, Umɔ́dɛkāyi yɔ̄ ipú ācɛ nēe kpó ɔ́ɔmā dúú.

⁷Ɔyí kú ɔyínɛ́ nū éyi, Ɛ́sta, nɛ̄ iyē kú Uhíburu kú nū wɛ Uhadása ā, yɔ̄ pī ɔ̄ abɔ́ɔ. Ɛ́sta lɔhi klla jɔ̄ɔ́ncɛ́nyā nɛ̄hi. Eko nɛ̄ ádā nū mɛ́mla ɛ́nɛ́ nū le pɛ́ gekwú ā, Umɔ́dɛkāyi le ɔ́ fō klla lɛ ɔ́ bī jɛ̄ bɛ̄ɛka ɔyī abɔ̄ īyī nū ā.

⁸Eko nɛ̄ ɔcɛ́ le ɔ́da ɛ̄yīpɛ̄ kú nū ā je ā, nēé bā í kpó ayípɔ̄nɔ̄nyā alɛwa ga Usúsa ā, Ɛ́sta wɛ éyi kú uwá dúú. É klla kwú ɔ̄ ú tū Uhégāyi nōo gē leyīkwu ayípɔ̄nɔ̄nyā ā abɔ̄ dúú.

⁹Ɛ́sta he Uhégāyi ɔtū nɛ̄hi. Anɔ́ɔ ó gbɔɔ́ ō kpó ɔdōlé olɔhi mɛ́mla aɔ́dā ō nyīyē nēe gē cɛ̄ lɛ ɔ̄cɛ héyīfuú gé lɛ ɔ́ fíyafíya á. Ó klla lɛ ayípɔ̄nɔ̄nyá ahāapa fu ŋmá ɔlɛ́ ɔcɛ́ ā nēe gē cɛ̄ ɔ̄ ɛhɔ̄. Ó klla le anú mɛ́mla ācocɛ̄hɔ̄ kú nū ā kpó ga ɛga nōo lɔhi fíyɛ́ dúú ipú ɛga nɛ̄ ācɛnyā kú ɔlɛ́ ɔcɛ́ ī bá ā.

¹⁰Ɛ́gɛ́nɛ̄ Umɔ́dɛkāyi nwū Ɛ́sta lɛ ā, ó ka lɛ ɔ̄cɛ dúúmā ka anúɔ wɛ ɔ̄cɛ Ujíyu ŋ́.

¹¹Ɛ̄cī dóódu Umɔ́dɛkāyi gē wā í yɛ ɛga nɛ̄ Ɛ́sta klá ā, kóō klla má ɔdā nōo gáā yá ɔ̄ ā.

¹²Ó je ɔnyā yá kóō je héyīfuú nɛ̄hi kóō kwú jɔ̄ɔ̄nyā kwɛyí ā, gē je iháyí odunkulu. É gē lē anɔ̄ kú umáari nya ɔ́ iyē ɔyā ɛhīlī. É kē ī lɛ anɔ̄ kú ubásam nya ɔ́ iyē, ɔyā ɛhīlī kpɔ́. Igbīhi ɛ̄nyā, cɛ́ɛ́ é gē je ɔ̄cɛnyā éyééye gé lɛ ɔcɛ́ ā, kóō je ɔ̄cɛ nōo jɔ́ncɛ́nyā fíyɛ́ dúú ā ŋmá ipú uwā. Cɛ́ɛ́ ó kwú ɔ̄cɛnyā ɔ́ɔmā ú yá ɔcányā kú nū.

¹³Eko nɛ̄ ɔyípɔ̄nɔ̄nyā gē ŋmá ɛga nēé bá ga agblɔ̄cɛ́ ɛgiyí ɔcɛ́ ā, a ɔ́dīfa dóódu nēe he ɔ́ ɔtū ā nɛ̄ ó gē wiiyē á.

¹⁴Ó géē nyɔ̄ abɔ́ɔ ɔ̄nɔ̄ɔ̄nɛ̄, cɛ́ɛ́ oŋmɔ́ɔ̄cī nū, ɔ̄cɔ̄ɔ̄cī ā, é gē je ɔ́ ga ɛga nēé bá ā. Cɛ́ɛ́ é kwú ɔ̄ ú tū Ussaássigāsi, idibo nōo gē leyīkwu anyā ɔlɛ́ ɔcɛ́ ā abɔ̄. Ó klla gáā ga ɛgiyí ɔcɛ́ ā igbɔhá ɛ́ɛ́ gɛ ŋ́, ayíka ɔ̄cɛ́nyā ɔ́ɔmā he ɔcɛ́ ā ɔtū nɛ̄hi, nɛ̄ ɔcɛ́ ā lɛ ɛhɔ̄ tū lɛ iyē nū hī, kéē lɛ ɔ́ bī gé lɛ ɔ́.

¹⁵Ɔgba gaá ce Ɛ́sta, ɔyínɔ̄nyā kú Abíhēlu, ɔyí kú ɔyínɛ́ kú Umɔ́dɛkāyi nōó bī jɛ̄ bɛ̄ɛka ɔyí abɔ̄yī nū ā, kóō ga ɛgiyí ɔcɛ́ ā. Odúúdú ācɛ nēe má Ɛ́sta ā bá ī hɔ́kɔ nū. Eko nōó gáā nyɔ̄ ɛgiyí ɔcɛ́ ā, īlī nɛ̄ Uhégāyi nōo gē leyīkwu ayípɔ̄nɔ̄nyā ā, mafú lɛ ɔ́ ā, anú nōó kpó wiiyē, le yíifa ga ɛgiyí ɔcɛ́ ā á.

¹⁶Ipú iháyí ahāapa nɛ̄ Ahásɛ̄rɔ̄si cɔcɛ́ ā, ipú ɔyā igwó kú ɔyā nēé hī ka ɔyā kú Utébēti ā, é lɛ Ɛ́sta bī wā ɛgiyí ɔcɛ́ ā ipú agblɔ̄cɛ́ kú nū.

¹⁷Obōōbū nɛ̄ ɔcɛ́ ā lɛ ɔ́ má ā, ó kwu he ɔcɛ́ ɔtū fíyɛ́ odúúdú ayípɔ̄nɔ̄nyā ohile ā. Anɔ́ɔ ɔcɛ́ ā kwú ɔdōkwɛyí kú ɔcányā ú kwu ɔ́ ɛyí. Anɔ́ɔ Ɛ́sta le ɔcányā lé kwɛyí Ufássiti á.

¹⁸Anɔ́ɔ ɔcɛ́ ā le ucɛ nɛ̄hi yá klɛ́ɛcɛ lɛ Ɛ́sta, klla lɛ odúúdú aígabɔ̄ kú nū kpó hīīgwú wā ɔnū ucɛ ā. Ó klla lɛ omlɛ́nyɔ́[1] je lɛ odúúdú ācɛ kú ipú ajɔ̄ɔ̄cɛ́ kú nū ā. Ó klla le ɛhi kpó lɛ odúúdú ācɛ kú ipú ajɛ ɔlɛ́ nū ā, ɛ́gɛ́nɛ̄ ɔcɛ́ cíkā ō yá ɛhi lɛ ā.

¹⁹Eko nēé kwú ayípɔ̄nɔ̄nyā ohile ā í kpó kwúcē ga ɛga nēé gē bá ā. Ɔcɛ́ ā le Umɔ́dɛkāyi fu kóō wɛ éyi kú aígabɔ̄ kú ɔlɛ́ nū. Ó gē nyɔ̄ ī yúklɔ́ ipɔ́ɔnū ɔlɛ́ ɔcɛ́ ā.

²⁰Eko nyā ɛ́gɛ́nɛ̄ Umɔ́dɛkayi pi Ɛ́sta ahɔ̄ lɛ ā, Ɛ́sta lɛyítáajɛ lɛ ɔ́ ɛ́gɛ́nɛ̄ ó gē lɛyítáajɛ lɛ ɔ́, eko ɔyípɛ̄ kú nū ā. Anɔ́ɔ ó kē da ɔ̄cɛ dúúmā ka anúɔ wɛ ɔ̄cɛ Ujíyu ŋ́.

²¹Eko ɔ́ɔmā nɛ̄ Umɔ́dɛkāyi yɔ̄ í yúklɔ́ ipú Agblɔ̄cɛ́ ā, Ubigitána mɛ́mla Uterési, aídibo ɛpa nēe bá ī gbō okónɔɔwɛ kú ɔlɛ́ ɔcɛ́ ā, gbɔɔ́ ō wɔ́ɔtū ɔcɛ́ Ahásɛ̄rɔ̄si nɛ̄hi. Anɔ́ɔ é le ujɔ̄ tū kéē lɛ ɔcɛ́ ā ŋmó.

²²Eko nɛ̄ Umɔ́dɛkāyi lɛ ɛ̄nyā pó ā, ó le ka lɛ ɔcányā, Ésta. Anɔ́ɔ Ɛ́sta gaá le ɔdā nōó pó ā ka lɛ ɔcɛ́ á.

²³Eko nēé lɛ ɔkwu ɛlā ā bū ā, é le má ka ɛlā ā wɛ okwɛ̄yi. Anɔ́ɔ é kwu ācɛ nēe tū ujɔ̄ nyā ú kpó tōōlī playiicō á. Ɔcɛ́ ā lɛ ɔ́da je kéē lɛ ɔdā nōo yá nyā tá tū ipú ɔkpá kú ajɛ kú Upɛ́sīya mɛ́mla Umɛ́dīya.