Read idoma Ɛ́STA 4 Bible Online

Ɛ́STA 4 - idoma bible

Ɛ́STA 4

¹Eko nɛ̄ Umɔ́dɛkāyi le odúúdú ɔdā nēé yá nyā jé ā, ó le īlī kú nū híla ipú íwɔtū mɛ́mla ɔtūnōbí. Ó le īlī ekwu kpó wiiyē, le ewo gwu klá ɛyí, yɔ̄ gē jikwū, ī tɛ̄gá gbōō bū ɔtāhɛ̄ igelī nɛ̄hi kú Usúsa.

²Jāa gbéeko nɛ̄ ó ga okómpinu kú agblɔ̄cɛ́ ā. Ó bēé ga ipú inu ŋ́, ohígbū ka ɔ̄cɛ dúúmā nōo lɛ īlī ekwu wiiyē í gē ga ipú agblɔ̄cɛ́ ā ŋ́.

³Ipú odúúdú ajɛ kú Upɛ́sīya mɛ́mla Umɛ́dīya ā, ɛga dúúmā nēé lɛ ɔkpá kú ɔ́da kú ɔcɛ́ nyā jé, cɛ́ɛ́ ācɛ Ujíyu nēe bá abɔ́ɔ ā gbɔɔ́ ō jikwū wōōō. É gwōkónu, gbɔ̄ɔkɔ, jikwū, klla yɔ́tūnōbí. É kpó īlī ekwu wu iyē le ewo gwu klá ɛyí, klla má gwutá ipú ewo dúú.

⁴Eko nɛ̄ ācocɛ̄hɔ̄ nɔ̄nyā mɛ́mla aídibo kú ɔlɛ́ ɔcányā, Ɛ́sta ā, le ɔdā nɛ̄ Umɔ́dɛkāyi yɔ̄ ī yá ā, ka lɛ ɔ́ ā, ó junwalu lɛ Ɛ́sta nɛ̄hi. Anɔ́ɔ ó lɛ īlī kpó tɛhɔ̄ fu Umɔ́dɛkāyi, kú ɔ̄ le kpó wiiyē, cɛ́ɛ́ kóō gā. Amáŋ ó tá kóō mīyɛ īlī ā.

⁵Anɔ́ɔ ó lɛ Uhátāki, éyi kú aídibo nɛ̄ ɔcɛ́ fu lɛ ɔ́ ā, hīgwú, lɛ ɔ́ tɛhɔ̄ fu Umɔ́dɛkāyi, kóō gāá da ɔ́ ɔ̄kā, ɔdā nōo yá ɛ́ɛ́ nɛ̄ ó yɔ̄ gē yēkwu gē yɔ́tūnōbí nɛ̄hi nyā ā.

⁶Anɔ́ɔ Uhátāki le tá ɛgiyí Umɔ́dɛkāyi, eyɛ̄ɛcɛ kú okómpīinu kú agblɔ̄cɛ́ āa.

⁷Anɔ́ɔ Umɔ́dɛkāyi lɛ odúúdú ɔdā nōo yá nyā kpó ka lɛ ɔ́, mɛ́mla áluka kú ije nɛ̄ Uháman cokónu ka anúɔ géē gbā lɛ ɔcɛ́, ɔ́dāŋ́ ka ɔ́ɔ cɛ̄ kéē lɛ odúúdú ācɛ Ujíyu kpó ŋmó ā.

⁸Ó kwú ɔkpá mɛ́mla ɔ́da nɛ̄ ɔcɛ́ je kéē lɛ odúúdú ācɛ kú Ísrɛ̄lu kpó ŋmó ā ú lɛ Uhátāki. Umɔ́dɛkāyi le da ɔ́ ká ɔ̄ lɛ ɔkpá ɔ́ɔmā bī gē lɛ Ɛ́sta kɔ́ɔ̄ klla lɛ odúúdú ɛlā ā kpó ka lɛ ɔ́ kɔ́ɔ̄ da ɔ́ dúú, kɔ́ɔ̄ nyɔ̄ í gbɔ̄ɔkɔ lɛ ɔcɛ́ cɛ́ɛ́ kóō ményīnyinyi kú ācɛ ɔlɛ́ anúɔ, ācɛ Ujíyu ā.

⁹Uhátāki nyɔ̄ í le ɛhɔ̄ nyā cɛ̄ lɛ Ɛ́sta.

¹⁰Anɔ́ɔ Ɛ́sta klla lɛ ɛhɔ̄ tū ɔ̄ fu Umɔ́dɛkāyi kahíníī,

¹¹“Ɔ́dāŋ́ ka ɔ̄cɛ dúúmā le tá inu ɛgiyí ɔcɛ́ gāá lɛ ɔ́ má, nōó wɛ ɔcɛ́ hī ɔ̄ igwú wā ɛgiyí nū ŋ́, é géē ŋmó ɔ̄cɛ ɔ́ɔmā piíí. Ɛ̄nyā kē wɛ íne á. Ódúúdú ācɛ ɔlɛ́ ɔcɛ́ mɛ́mla aígabɔ̄ ā jé íne ā. Ɔwɛ ékpónú nɛ̄ ɔ̄cɛ géē bī le yá íne nyā lé glá ā, ɔ́dāŋ́ ka ɔ̄cɛ dúúmā le tá ɛgīyī ɔcɛ́, nōó wɛ ɔcɛ́ hī ɔ̄ ígwu ā ŋ́, nɛ̄ ɔcɛ́ lɛ ɔ́ má klla le okwute ugóolu (oje ɔdɔ) kú nū je gicō lɛ ɔ́. Cɛ́ɛ́ é gáā ŋmó ɔ̄cɛ ɔ́ɔmā gɛ ŋ́. Amáŋ ɔyā éyi yɔ̄ mɛ́ɛ̄ á, nɛ̄ ɔcɛ́ í hī um igwú wā ɛgiyí nū ŋ́ má.”

¹²Eko nɛ̄ Umɔ́dɛkāyi mīyɛ olɛhɔ̄ kú Ɛ́sta nyā ā,

¹³ó le ɛhɔ̄ tū gāá pi Ɛ́sta ahɔ̄ kahíníī, “Ā gbɛlá ka abɔ̄ a yɔ̄ agblɔ̄cɛ́ ā, abɔ̄ í gáā kwu uwɔ glá ŋ́ nɛɛ ŋ́. Abɔ̄ géē kwu uwɔ mɛ́mla ācɛ Ujíyu ɔhá ā dúú.

¹⁴Ɔ́dāŋ́ ka a cīce ce ɛlā nyā bá ajɛ, nɛ̄ á ka ɔdā dúúmā lɛyíkwu ɔ́ ŋ́. Otábɔ̄ géē wā lɛ ācɛ Ujíyu ŋmá ɛga ɔhá, amáŋ a í kwú, cɛ́ɛ́ ɔkwu kú inu kú ádā uwɔ mɛ ŋmá ajɛ. Ɔ̄nyɛ jé, ó lɔfú ohígbū eko ɛ́gɛ́nyā nāa lé ɔcányā kú Upɛ́sīya á.”

¹⁵Ɛ́sta klla le ɛhɔ̄ tū fu Umɔ́dɛkāyi kahíníī,

¹⁶“Nyɔ̄ gāá lɛ odúúdú ācɛ Ujíyu nēe lā Usúsa ā kpó hīgwú tɔ̄há. Cɛ́ɛ́ aá le okónu gwū ɛ̄cī ɛtá, kwu otú kwɛɛnɔ kú aá gbɔ̄ɔkɔ ohígbū um. Ɛ̄cī ɛtá ɔ́ɔmā, aá híī lé ɔdā dúúmā ŋ́. Ami mɛ́mla ācocɛ̄hɔ̄ nɔ̄nyā kú ɔlɛ́ um géē gwōkónu, klla í bá ī gbɔ̄ɔkɔ ohígbū aá dúú. Igbīhi ɔ́ɔmā ā, n géē nyɔ̄ gaá má ɔcɛ́. Náaná nɛ̄ n jé ka italā kú nū wɛ ikwú ā, n géē nyɔ̄ kpɔ́. Ó wɛ ikwū nɛɛ ayíka n gekwú.”

¹⁷Anɔ́ɔ Umɔ́dɛkāyi nyɛ̄ɛ̄ gāá le ɔdā dóódu nɛ̄ Ɛ́sta ka ā kpó yá á.