Read idoma Ɛ́STA 9 Bible Online

Ɛ́STA 9 - idoma bible

Ɛ́STA 9

¹Ɛ̄cī ɔ́migwɛ́ɛtá kú ɔyā ɔ́migwɛ́ɛpa nɛ̄ é hī ka Áda ā. Ɛ̄cī ɔ́ɔmā nɛ̄ ɔ́da nēé je kéē ŋmó ācɛ Ujíyu ā cíkā ō gbɔɔ́ ō yúklɔ́ á. Ɛ̄cī nɛ̄ aólɛlā kú uwā leyīce ka, aá géē kpó uwā ŋmó á. Amáŋ ikɔkɔ nēé géē kpó ācɛ Ujíyu ŋmó ā, ācɛ Ujíyu klla le aólɛlā kú uwā kpó ŋmó, klla le uwá yálé.

²Āyā dóódu kú ɛga nɛ̄ ācɛ Ujíyu lā ipú odúúdú ajɛ kú Upɛ́sīya mla Umɛ́dīya ā, ɔ̄cɛ dúúmā nōo wā gáā lɛ abɔ̄ kwu ācɛ Ujíyu dúúmā, odúúdú ācɛ Ujíyu ā gē pīya tɔ̄ɔ̄há ī nūunu tá ɔ̄cɛ ɔ́ɔmā. Anɔ́ɔ ācɛ gbɔɔ́ ō yúufi ācɛ Ujíyu ā ɛga dóódu. Anɔ́ɔ ɔ̄cɛ dúúmā í yɔ̄, nōo géē ŋmó uwā glá ɛ́ɛ́ gɛ ŋ́ má.

³Odúúdú aígbómína, aícɔ́ɔja mɛ́mla odúúdú aígabɔ̄ kú Upɛ́sīya mɛ́mla Umɛ́dīya ā bá í tá ācɛ Ujíyu abɔ̄, ohígbū ka é bā í yúufi kú Umɔ́dɛkāyi.

⁴Ohígbū ka Umɔ́dɛkāyi kwú pīya ɔ̄cɛ olɔfú nɛ̄hi ipú agblɔ̄cɛ́. Ó klla yɔ̄ í lɔfú tōotū ɔ̄ gɔbū.

⁵Ohígbū ɔ́ɔmā, ācɛ Ujíyu lɔfú yá ɔdā dúúmā, nōo he uwá ɔtū mla aólɛlā kú uwá glá. É bī ɔkpacaŋgelī le kpɔ́fú kwu aólɛlā kú uwā klla le uwá kpó ŋmó.

⁶Usúsa, ɔlɛ́ ɔtāhɛ̄ kú Upɛ́sīya mɛ́mla Umɛ́dīya ā, ācɛ Ujíyu ŋmó aólɛlā kú uwā úlā ce ofu ɛhɔ̄.

⁷É ŋmó Upassandáta, Událifɔn mɛ́mla Asipáta,

⁸Uporáta, Adalíya, Aridáta,

⁹Upamássita, Arisáyi, Arídāyi mɛ́mla Ufáyísāta.

¹⁰Ācɛ nēé hī iyē uwā nyā wɛ ayínɔ̄nyīlɔ igwó kú Uháman, ɔyí kú Uhamedáta, olɛlā kú ācɛ Ujíyu ā. Amáŋ é wu iyó kú odúúmā kú uwá ŋ́.

¹¹Ícícɛ ɔ́ɔmā, é le áluka kú ācɛ nēé ŋmó Usúsa ā ka lɛ ɔcɛ́.

¹²Anɔ́ɔ ɔcɛ́ ā le ɛhɔ̄ tū fu ɔcánya, Ɛ́sta kahíníī, “Usúsa ōfōōfūnū ā, ācɛ Ujíyu ŋmó ācɛ úlā ce ofu ɛhɔ̄ mɛ́mla ayínɔ̄nyīlɔ kú Uháman igwó ā. Ācɛ nēé ŋmó ipú odúúdú ajɛ ā, í gáā lɛ ō jé áluka uwā ŋ́. Ɔdí ɔhá nāa klla gē tíne ɛɛ́? Da um ɔdā dúúmā ɔhá nāa tíne ɛ́ɛ́ mā. N géē je ɔdā ɔ́ɔmā gā awɔ.”

¹³Ɛ́sta tá ɔcɛ́ ā ohi kahíníī, “Ɔ́dáŋ ka ɔcɛ́ cɛ̄ nɛɛ, ayíka ó lɛ ɛga je lɛ ācɛ Ujíyu kú ɔdā nēé yá ícɛ nyā kéē klla le yá óócí kpɔ́ ɛ́ɛ́. Cɛ́ɛ́ é lɛ okwū kú ayí kú Uháman ā kpó tū ɔ́ŋgbá playi icō.”

¹⁴Ɔcɛ́ ā lɛ ɔ́da je kéē lɛ yá lɛ ā. Anɔ́ɔ é lɛ íne ā tá ɛga dóódu kú Usúsa. Anɔ́ɔ é le aókwū kú ayínɔ̄nyīlɔ kú Uháman ā kpó tū ɔ́ŋgbá playi icō ɛcɛ, ká odúúdú ācɛ kéē má uwá.

¹⁵Ɛ̄cī ɔ́migwɛ́ɛnɛ kú ɔyā nēé hī ka Áda ā, ācɛ Ujíyu nēe lā Usúsa ā klla le túbá, lɛ aólɛlā kú Ujíyu ofigwɛ́ɛhɔ̄ kpó ŋmó Usúsa. Amáŋ é wu iyó kú ɔ̄cɛ dúúmā kú uwā ŋ́ kpɔ́.

¹⁶Ācɛ Ujíyu nēe bá ɛga dóódu kú ajɛ kú Upɛ́sīya mɛ́mla Umɛ́dīya ā, le túbá klla le aólɛlā kú uwā úlā ofu ahāanɛ ce úlā ahāapa ce ofigwó (75,000) kpó ŋmó ŋmá ipú ajɛ kú Upɛ́sīya mɛ́mla Umɛ́dīya ā. Amáŋ é wu iyó kú ɔ̄cɛ dúúmā kú olɛlā kú uwā ā ŋ́.

¹⁷Eko nēé lɛ aólɛlā kú uwā ā kpó ŋmó kwɛyí, ɛ̄cī ɔ́migwɛ́ɛtá mɛ́mla ɛ̄cī ɔ́migwɛ́ɛnɛ kú ɔyā nēé hī ka Áda ā, é klla má aólɛlā kú uwá dúú ŋmó ɛ̄cī ɔ́migwɛ́ɛhɔ̄ ā ɛ́ɛ́ gɛ ŋ́. Anɔ́ɔ é kwu ɛ̄cī ɔ́ɔmā ú yá ucɛ kú éeyē ō gwó á.

¹⁸Amáŋ ācɛ Ujíyu nēe lā Usúsa ā kwú ɛ̄cī ɔ́migwɛ́ɛnɛ kú ɔyā nēé hī ka Áda ɔ́ɔmā ú pīya ɛ̄cī omulɛ́nyɔ́, ohígbū kéē bī ɛ̄cī ɔ́migwɛ́ɛtá mla ɛ̄cī ɔ́migwɛ́ɛnɛ kú ɔyā ɔ́ɔmā ā le kpó aólɛlā kú uwā ŋmó dúúdú.

¹⁹Ɔdā nōo yá ɛ́ɛ́ nɛ̄ ācɛ Ujíyu nēé lā ipɔ́lɛ́ nɛ̄ŋcɛ́ ā gē lɛ ɛ̄cī ɔ́migwɛ́ɛnɛ kú ɔyā nēé hī kú Áda tū kóō wɛ eko omlɛ́nyɔ́, mla ɛ̄cī kú éeyē, mla ɛ̄cī nēe gē kɔ̄ ɔdōlé gé lɛ ācɛ nēe lā kwu uwá ā yɔ̄ abɔ́ ɔ á. Ɛ̄cī nēé je aólɛlā kú uwá kpó yálé ā.

²⁰Umɔ́dɛkāyi le ɔdā nōo yá nyā tá tāajɛ, klla lɛ ɔkpá kú nū kɔ̄ ga ɛgiyí ācɛ Ujíyu ɛga dóódu nēé lā ipú ajɛ kú Upɛ́sīya ā.

²¹Ó klla le da uwá ka ɛ̄cī ɔ́migwɛ́ɛnɛ mɛ́mla ɛ̄cī ɔ́migwɛ́ɛhɔ̄ kú ɔyā nēé hī ka Áda kú iháyí dóódu ā, é géē lɛ ɔ́ tū kóō wɛ ɛ̄cī omlɛ́nyɔ́ mɛ́mla éeyē mɛ́mla ucɛ ō lé.

²²Ɛ̄cī nēe bá nyā, wɛ ɛ̄cī nɛ̄ ācɛ Ujíyu kpó aólɛlā kú uwā ŋmó ŋmá ajɛ á. Ɔyā nyā géē yɛ í wɛ ɔyā kú ɔtūnōbí, ikwū ō je, mɛ́mla ekwu ō yɔ̄, amáŋ ó kwú pīya ɔyā kú éeyē mɛ́mla ɔtū nɛ̄hɛ́ mɛ́mla ucɛ ō lé. É da uwá ka ɛ́ɛ lɛ ɛ̄cī nēe bá ā tū géē yɔ̄ ō gwéeyē klla bá ī yá ucɛ. Ká ē bá ī kɔ̄ ɔdōlé gé lɛ aɔ́mpa uwā mɛ́mla ācogbɛhá.

²³Anɔ́ɔ ācɛ Ujíyu le yɛce ɛlā kú Umɔ́dɛkāyi ā, anɔ́ɔ ucɛ nyā kwú pīya ɔdā kú iháyí dóódu ŋmá eko ɔ́ɔmā.

²⁴Uháman, ɔyí kú Uhammedáta, ɔ̄cɛ ipɔ́ɔma kú Ágāgi, olɛlā kú ācɛ Ujíyu ā, le ɛbā anwa gwó (Upúrim) cɛ́ɛ́ kéē géē jé ɛ̄cī nēé géē je ācɛ Ujíyu kpó yíífi. Ó lɛ ujɔ̄ tū nēe géē je ācɛ Ujíyu kpó ŋmó ŋmá ajɛ dúúdú

²⁵Amáŋ Ɛ́sta le tá ɛgiyí ɔcɛ́ ā ohígbū ɛlā ā, anɔ́ɔ ɔcɛ́ le ɔ́da nēé tá tāajɛ ā je. Ɔ́da ā kwú pīya ikwū Uháman mɛ́mla ayínɔ̄nyīlɔ kú ɔlɛ́ nū. Anɔ́ɔ é lɛ uwá kpó tōōlī playi icō á.

²⁶Ɔdā nōo yá ɛɛ́ nēé gē hī ɛ̄cī ā ka Upúrim ā yɔ̄ ā. Ohígbū ɔkpá nɛ̄ Umɔ́dɛkāyi tá mɛ́mla ɔdā nōo yá ɛ̄cī ɔ́ɔmā piíí ā.

²⁷Ācɛ Ujíyu kwú Upúrim nyā ú pīya íne lɛ īyī uwā mɛ́mla ayááyí uwā, mɛ́mla ɔ̄cɛ ɔhá dóódu nōo géē je pīya ɔ̄cɛ Ujíyu ā. Ka eko nɛ̄ ɛ̄cī kú Upúrim nyā gā, iháyí dóódu, é gēe lɛ ɛ̄cī ɛpa ɔ́ɔmā tū klla í ya ucɛ kú nū ɛ́gɛ́nɛ̄ Umɔ́dɛkāyi tá ɔkpá kú nū lɛ ā.

²⁸É klla cɛ̄ ka odúúdú ayí igbīhi kú ipɔ́ɔnū kú ācɛ Ujíyu dóódu, ɛga dóódu nēé bá ā cíkā ō blakwu ɛ̄cī kú Upúrim nyā klla í lɛ ɔ́ tū piyóó ipú ɛcɛ nyā.

²⁹Anɔ́ɔ Ɛ́sta, ɔcányā, ɔyínɔ̄nyā kú Abíhēlu mɛ́mla Umɔ́dɛkāyi klla le ɔkpá ɔhá tá kpɔ́ ohígbū ɛ̄cī mɛ́mla ucɛ kú Upúrim nyā klla le abɔ̄ tá ɔ̄.

³⁰É tá ɔkpá nyā fu odúúdú ācɛ Ujíyu, klla lɛ ɔ́ kpó kɔ̄ ga odúúdú ɛyí ajɛ ofu ɛhīlī ce ahāapa kú ajɔ̄ɔ̄cɛ́nɛ̄hi kú Upɛ́siya ā. É tá tū ɔkpá nyā ka, ācɛ Ujíyu kéē lā ɛbɔ́ klla lɛ abɔ̄ bī ɛlā ɔ̄kwɛ̄yi.

³¹Ó klla da uwá mɛ́mla ayááyí uwá kéē lɛ ɛ̄cī kú Upúrim mɛ́mla ucɛ kú nū ā tū eko kú nū. É kéē yá ɛ̄nyā ɛ́gɛ́nɛ̄ é lɛ ɛ̄cī nēé gē gwōkónu mɛ́mla ɛ̄cī nɛ̄ é gē yɔ́tūnōbí ā. Ɛ́sta, ɔcányā mɛ́mla Umɔ́dɛkāyi tá ɔkpá nyā klla je ɔ́da nyā tɔ̄ɔ̄há á.

³²É le ɔ́da nɛ̄ Ɛ́sta je ohígbū íne kú Upúrim ā, tá tū ipú ɔkpá ā.