Read idoma OŌYƐBƐ̄CƐ 1 Bible Online

OŌYƐBƐ̄CƐ 1 - idoma bible

OŌYƐBƐ̄CƐ 1

¹Ayí kú Ujékɔ̄pu nēe wā Íjīpiti mɛ́mla anú ā bá yɔ̄ á: Ɔnyɔɔnyɛ kú uwā wā mla aíkonó kú ɔlɛ́ nū.

²Urúbɛ̄n, Usímīyɔn, Ulífāyi, mla Ujúda.

³Ísāka, Usébūlɔn mɛ́mla Ubɛ́njamīn.

⁴Udán, Unáfutáli, Ugádi mɛ́mla Ássa.

⁵Odúúdú ayí kú Ujékɔ̄pu ā wɛ ofɛtá cigwó. [1] Ujófɛ̄fu ā tɛtɛ yɔ̄ Íjīpiti ɛɛ́.

⁶É bá abɔ́ɔ gbóógbó ā, Ujófɛ̄fu mɛ́mla ayínɛ́ nū ā mɛ́mla odúúdú ayí kú ipɔ́ɔma kú eko ɔ́ɔmā le pɛ́ gekwú.

⁷Amáŋ, ayááyí kú Ísrɛ̄lu ā le nyīla klla kwú lɛwa nɛ̄hi. É klla kwú lɔfú nɛ̄hi dúú. É le agbénú nɛ̄hi klla le fāajɛ ā nɛ̄hi.

⁸Iháyí alɛwa le gla, ɔ̄cɛ ɛ̄yīpɛ̄ nɛ̄ ó nōó jé Ujófɛ̄fu ŋ́ mā, le ɔcɛ́ kú ajɛ Íjīpiti lé.

⁹Anɔ́ɔ ó da ācɛ ɔlɛ́ nū kahíníī, “Aá má ɔ̄, ācɛ kú Ísrɛ̄lu kwú lɛwa nɛ̄hi, é klla i lɔfú ce alɔ abɔ̄ bá.

¹⁰Ɔ̄cɛ í jé ŋ́ nɛ̄ eko kú ɛfú nēé lɔfú cɛ̄tɔ̄há mla aólɛlā kú alɔ, o yá ɛ́ɛ́ kéē kpɛ́fú tá alɔ, cɛ́ɛ́ é le pɛ́ kwu ŋmá ajɛ ɔlɛ́ alɔ. Ālɔ̄ tíne ɔwɛ ɔhá nōo í yá kéē híī nyīla glá gɛ ŋ́.

¹¹Anɔ́ɔ ācɛ kú Íjīpiti ā le ācɛ nōo gē leyīkwu aɔ́fiyɛ fu kéē leyīkwu uwá, kéē klla yá uwá ōwē. Ayí kú Ísrɛ̄lu gwó aígelī nɛ̄hi kú Upíto mɛ́mla Urámēses ɛga nɛ̄ Uféro ī kpó iyó kú nū tū ā á.

¹²Amáŋ, ɛ́gɛ́nɛ̄ ācɛ Íjīpiti yá uwá ōwē nwuné lɛ ā, ɛ́gɔ́ɔmā nēé nyīla bá ɛga dóódu kú ajɛ ā lɛ á. Ācɛ kú Íjīpiti ā bá gē yúufi kú ācɛ kú Ísrɛ̄lu eko dóódu.

¹³Ohígbū ɔ́ɔmā ā, é yá ācɛ kú Ísrɛ̄lu ā ōwē fíyɛ́.

¹⁴É gē pi ācɛ Ísrɛ̄lu abɔ̄fú bɛ̄ɛka aɔ́fiyɛ ā kéē gwó ɛdɔ kú aínu ɛyɛ́ɛyɛ́yí mɛ́mla ɛdɔ kú úklɔ́ olɔfú dóódu nēe bá ɛhɔ̄ kú uwā ā.

¹⁵Ɔcɛ́ kú Íjīpiti ā le ɛlā ka lɛ Ussípfra mɛ́mla Upúwa, anyōkɔ́ɔma nēe gē kɔ́ anyā Uhíbru ɔma ā kahíníī,

¹⁶“Eko dóódu nɛ̄ aá gáā kɔ́ anyā kú Uhíbru dúúmā ɔma, nɛ̄ aá má ka ɔyí ā wɛ ɔ̄cɛnyīlɔ, aá le ɔ́ ŋmó, ɔ́dāŋ́ ka ó wɛ ɔ̄cɛnyā, aá mā ɔ̄ tá kóō yēeyī.”

¹⁷Amáŋ, anyōkɔ́ɔma ā gé yúufi Ɔwɔicō. Anɔ́ɔ uwá í yá ɛ́gɛ́nɛ̄ ɔcɛ́ kú Íjīpiti ā je íne lɛ uwá kéē yá lɛ ā ŋ́. Amáŋ é gē mā ayí ācɛnyīlɔ ā tá kéē yēeyī.

¹⁸Anɔ́ɔ ɔcɛ́ kú Íjīpiti ā, le anyōkɔ́ɔma ā kpó hīgwú, anɔ́ɔ ó da uwá ɔ̄kā kahíníī, “Ɔdíyá ɛ́ɛ́ nɛ̄ aá yɔ̄ ī yá ɛ̄nyā ā? Nɛ̄ aá cɛ̄ lɛ ayínɔ̄nyīlɔ ā yēeyī ā?”

¹⁹Anyōkɔ́ɔma ā da Uféro kahíníī, “Anyā kú Uhíbru ā í lɛbɛ̄ɛka ācɛnyā kú Íjīpiti ā ŋ́. É lɔfú nɛ̄hi. Ɛ́ɛ́ ká ɔnyōkɔ́ɔma kóō ga ɛgiyí uwā dúú ā, é gē kwú ɔyí ú ma.”

²⁰Abɔ̄ anyōkɔ́ɔma ā gē yúufi Ɔwɔicō ā, ó le ɔdā olɔhi yá lɛ uwá. Anɔ́ɔ ācɛ Uhíbru ā bá ī nyīla klla ī lɔfú nɛ̄hi.

²¹Abɔ̄ nɛ̄ anyōkɔ̄ɔma ā gē yúufi Ɔwɔicō ā, ó le ayí abɔ̄yī uwā kpó lɛ uwá.

²²Ámōōmɛ ā Uféro le íne tá lɛ odúúdú ācɛ ɔlɛ́ nū kahíníī, “Ayínɔ̄nyīlɔ dóódu nɛ̄ ācɛ kú Uhíbru ā ma ā, aá lɛ uwá kpó tū ipú ísu kú Unáyīlu, amáŋ odóódu nōo wɛ ɔ̄cɛnyā aá mɔ̄ɔ̄ tá kóō yēeyī.”