Read idoma OŌYƐBƐ̄CƐ 10 Bible Online

OŌYƐBƐ̄CƐ 10 - idoma bible

OŌYƐBƐ̄CƐ 10

¹Anɔ́ɔ Óndú ā da Umósīsi kahíníī, “Nyɔ̄ gaá lɛ Uféro má. N le ɔtū kú nū mɛ́mla ákú aígabɔ̄ kú nū ā yá lɔfú, o yá ɛ́ɛ́ ká n̄ lɔfú yá aɔ́dā ōhídáagó nēe bá ā ipéyī ūwā,

²mɛ́mla o yá ɛ́ɛ́ kú ā géē ka lɛ ayípɛ̄ ɔlɛ́ aá ɛ́gɛ́nɛ̄ n yá ācɛ kú Íjīpiti ɛbɛ́ klla yá uwā olíla lɛ ā mɛ́mla ɔdā idáagó nɛ̄ n yá ipéyī uwā o yá kú ā jé ka ami ɔ́ɔ wɛ Óndú á.”

³Umósīsi mɛ́mla Árɔ̄ni le tá ɛgiyí Uféro, anɔ́ɔ é da ɔ́ kahíníī, “Óndú ā, Ɔwɔicō kú ācɛ Uhíbru ā kahíníī, ‘Eko nyá nāa géē tá ka anúɔ í gáā tú iyī uwɔ wā ajɛ gā um ŋ́ gaá kwu ā? Mā ācɛ ɔlɛ́ um tá kéē nyɔ̄, cɛ́ɛ́ kéē gaá gbā um ɛ̄gbā.

⁴Ɔ́dāŋ́ ka a tá ō cɛ̄ lɛ uwá nyɔ̄, óócí n géē bī ɔwa kú efūma wā í klá ɔlɛ́ uwɔ.

⁵É géē klá ɛyí ajɛ kú ɔlɛ́ uwɔ, nɛ̄ ɔ̄cɛ dúúmā í gáā má ajɛ eyī glá ŋ́. É géē je ɔdɛ̄hɔ̄ kú aá nōo hile, nɛ̄ ɛcɔ̄ɔwɔ ā í bīya ŋ́ mā kpó lé. Kwu aɔ́cí nēe hile bá ī jɛ̄ ipácí ā.

⁶É géē mu inu ɔlɛ́ uwɔ mɛ́mla inu ɔlɛ́ aígabɔ̄ kú ɔlɛ́ uwɔ, mɛ́mla inu kú odúúdú ācɛ kú Íjīpiti ā. Ɛ̄nyā ā í bɔ̄bí fíyɛ́ ɔdā dóódu nɛ̄ ádā aá mɛ́mla aádáádā aá í kōō má jééjéē ɛɛ́ ŋ́.’” Anɔ́ɔ ó le pīyeyī nyɛ̄ɛ̄ á.

⁷Aígabɔ̄ kú Uféro da ɔ́ kahíníī, “Eko nyá nɛ̄ ɔ̄cɛ ā géē junwalu lɛ alɔ í kwu ā? Mā ācɛ kú Ísrɛ̄lu ā tá kéē nyɔ̄, kéē gáā gbā Óndú ā, Ɔwɔicō kú uwā ɛ̄gbā n̄. Á jé ka Íjīpiti le yíífi ɛ́ɛ́ ŋ́ nɛɛ?”

⁸Anɔ́ɔ é lɛ Umósīsi mɛ́mla Árɔ̄ni cīgbīhi wā ɛgiyí Uféro. Anɔ́ɔ ó da uwá kahíníī, “Aá nyɔ̄ ká aá gáā gbā Óndú ā, Ɔwɔicō kú aá ɛ̄gbā amáŋ ānyāānyɛ gáā nyɔ̄ ā?”

⁹Umósīsi tá ohi kahíníī, “Odúúdú alɔ gáā nyɔ̄ á. Alɔ mɛ́mla ayí alɔ nɔ̄nyīlɔ mɛ́mla ayí alɔ nɔ̄nya, mɛ́mla aɛ́na, aálá, mɛ́mla odúúdú ɔdā nɛ̄ alɔ lɛ ā. Ohígbū ka alɔ géē yá ucɛ klɛ́ɛcɛ lɛ Óndú alɔ.”

¹⁰Anɔ́ɔ Uféro tá uwā ohi kahíníī, “Óndú ā kóō tá ka n cɛ̄ kú aá nyɔ̄, mɛ́mla anyā aá mɛ́mla ayí aá. Aá bī ojuju obɔ̄bí ipú ɔtū kú aá.

¹¹Ehée, ācɛnyīlɔ kú ipú aá ōfōōfū uwā gáā nyɔ̄ í gbā Óndú ā ɛ̄gbā á, ɔ́dāŋ́ ka ɔ́ɔnia wɛ ɔdā nɛ̄ aá dɔɔ̄kā ā yɔ̄ abɔ́ɔ á.” Anɔ́ɔ é le Umósīsi mɛ́mla Árɔ̄ni nū ŋmá ɛgiyí Uféro á.

¹²Óndú ā da Umósīsi kahíníī, “Lɛ abɔ̄ kú uwɔ nā kwu ajɛ kú Íjīpiti kú efūma kéē wā í klá ajɛ ā. É géē kpó ɔdɛ̄hɔ̄ dóódu nēe hile ipú ajɛ kú Íjīpiti ā lé ŋmáajɛ.”

¹³Anɔ́ɔ Umósīsi le okwutɛ kú nū nā kwu ajɛ kú Íjīpiti á. Anɔ́ɔ Óndú ā le yá kú owu kú ɛnɔ̄ɔ̄cī ā kóō tá ɛyí ajɛ ɛ̄cī ɔ́ɔmā jāā otú kpɔ́ɔcī. Ɔ̄cɔ̄ɔ̄cī kú eyī nōo nyā ā, owu ā le aéfūma kpó gla wā.

¹⁴Efūma ā wā í klá odúúdú ajɛ kú Íjīpiti. Ɛwa ká efūma ā wɛ ɛnɛ̄hi. Ɛdɔ nɛ̄ ó yɔ̄ jéējéē ɛɛ́ ŋ́, nɛ̄ ó kē gáā yɔ̄ ɛ́ɛ́ gɛ ŋ́ mā.

¹⁵É klá odúúdú ajɛ ā gbéeko nɛ̄ ajɛ ā kwú pīya onōbí juu. É kwú odúúdú ɔcí, ikpɔ̄cí nɛ̄ ɛcɔ̄ɔwɔ ā mā ɔ̄ tá ā, mɛ́mla odúúdú ɔcí kú ajɛ kú Íjīpiti ā ú kpó lé ŋmáajɛ. Ɔdā dóódu nēe wɛ ɛ̄mɛ̄ɛ̄mɛ̄ cɔɔ́ɔ́ ā í hile ajɛ kú Íjīpiti gɛ ŋ́.

¹⁶Uféro gaā le Umósīsi mɛ́mla Árɔ̄ni hīgwú, anɔ́ɔ ó da uwá kahíníī, “N le íne kú Óndú ā, Ɔwɔicō kú aá bīya, n klla le ɔdōbɔ̄bí yá aá.

¹⁷Abālɔbányā, N gbɔ̄ɔkɔ lɛ aá, aá kwú íne nɛ̄ n bīya ā í yá um ɛhi. Ó kōō igbeékpónú nyā ōfōōfūnū, cɛ́ɛ́ kú ā lɛ ɔkɔ gbā lɛ Ɔwɔicō kú aá, kóō kwú italā ō ŋmó ɔ̄cɛ nyā í ŋmá ɛgiyí um.”

¹⁸Umósīsi nyɛ̄ɛ̄ ŋmá ɛgiyí Uféro gaá le ɔkɔ gbā le Ɔwɔicō.

¹⁹Anɔ́ɔ Óndú ā le owu nɛ̄hi kú ɛnɔ̄ɔ̄nɛ̄ ā tɛ̄hɔ̄ gaá lɛ efūma ā kpó gla ga ipú ísu igwɛ̄bɛ́ ā. Efūma ékpónú í hile ipú odúúdú ajɛ kú Íjīpiti ā ɛ́ɛ́ gɛ ŋ́.

²⁰Amáŋ, Óndú ā lɛ ɔtū kú Uféro yá lɔfú kpɔ́, anɔ́ɔ ó cɛ̄ lɛ ayí kú Ísrɛ̄lu nyɔ̄ ŋ́ kpɔ́ á.

²¹Óndú ā da Umósīsi kahíníī, “Lɛ abɔ̄ kú uwɔ nā kwu ɔkpáncō cɛ́ɛ́ obū nɛ̄hi nōo lɛbɛ̄ɛka ɔdā nɛ̄ ɔ̄cɛ í lɛ abɔ̄ kwu ɔ́ glá ā kóō wā í klá odúúdú ajɛ kú Íjīpiti.”

²²Anɔ́ɔ Umósīsi lɛ abɔ̄ kú nū nā kwu ɔkpáncō, anɔ́ɔ obū nɛ̄hi kpímm wā í klá odúúdú ajɛ kú Íjīpiti, ɛ̄cī ɛtá.

²³Ipú ɛ̄cī ɛtá ɔ́ɔmā ā, ɔ̄cɛ dúúmā í má ɔ́mpānū, ɛ́ɛ́ nē é ī mɛ́ɛbɛ cāŋjɛ ŋmá ɛga nē é bá ā ŋ́. Amáŋ, ɛnɔ yɔ̄ ī fíyajɛ ɛga dóódu nɛ̄ ācɛ kú Ísrɛ̄lu lā ā gēdēē.

²⁴Uféro lɛ Umósīsi hīgwú, anɔ́ɔ ó da ɔ́ kahíníī, “Aá nyɔ̄ kú aá gaá gbā Óndú ā ɛ̄gbā. Ayí aá kéē nyɔ̄ mla aá dúú. Amáŋ aá gáā kpó aɛ́na mɛ́mla aálá kú aá nyɔ̄ mla aá ŋ́. É géē bá amānyā.”

²⁵Amáŋ Umósīsi da ɔ́ kahíníī, “A géē kpó aɛ́bɛ́ nɛ̄ alɔ géē lɛ gwɛ́ɛya mɛ́mla ɛ̄nɛ̄ alɔ í bī gwɛ́ɛya o yɔlá dúúdú lɛ Óndú ā, Ɔwɔicō kú alɔ lɛ alɔ.

²⁶Aɛ́na, aálá mɛ́mla aɛ́wū kú alɔ géē nyɔ̄ mla alɔ dúú. Odúúmā kú uwā í gáā hile igbīhi ŋ́. Ohígbū ka ipú uwā ā, nɛ̄ alɔ gáā je ɔdōogwɛ́ɛya ŋmá le gbā Óndú ā, Ɔwɔicō kú alɔ ɛ̄gbā á. Alɔ í jé ɛ̄nɛ̄ alɔ gáā bī gbā Óndú ā ɛ̄gbā ɛɛ́ ŋ́, jāā gbéeko nɛ̄ alɔ i táajɛ abɔ́ɔ.”

²⁷Amáŋ Óndú ā lɛ ɔtū kú Uféro yá lɔfú kpɔ́, anɔ́ɔ ó cɛ̄ lɛ uwá nyɔ̄ ŋ́ má.

²⁸Uféro da Umósīsi kahíníī, “Nyɛ̄ɛ̄ ŋmá ipéyī kú um. A híī yá ká n̄ má eyī kú uwɔ igbɔhá ɛ́ɛ́ gɛ ŋ́! Ícíícɛ nɛ̄ n lɛ uwɔ mā, a géē kwú.”

²⁹Umósīsi kahíníī, “Kó ō lɛ ɛ́gɛ́nɛ̄ a ka ā mɛ́ɛnɛ. N gáā má eyī kú uwɔ igbɔhá ɛ́ɛ́ gɛ ŋ́.”