Read idoma OŌYƐBƐ̄CƐ 13 Bible Online

OŌYƐBƐ̄CƐ 13 - idoma bible

OŌYƐBƐ̄CƐ 13

¹Anɔ́ɔ Óndú ā da Umósīsi kahíníī,

²“Aá kwú odúúdú aɔ́kplá kú aá ú kéē wɛ ācɛ o tīihɔ gā um. Ɔyí aflɛ́yí kú ācɛ kú Ísrɛ̄lu dóódu, kwu ɔyí aflɛ́yí kú ɛbɛ́ ɔlɛ́ kú uwā dóódu, wɛ ákú um.

³Umósīsi da ācɛ ā kahíníī, “Aá blakwu ɛ̄cī nyā, nɛ̄ aá bɛ̄cɛ ŋmá ajɛ kú Íjīpiti, ɛga nɛ̄ aá wɛ aɔ́fiyɛ ā. Ɛ̄cī nyā nɛ̄ Ɔwɔicō bī ɔfú nɛ̄hi kú nū lɛ kpó aá bɛ̄cɛ á. Aá híī lé igbō dúúmā nōo gē nū ŋ́.

⁴Aá yɔ̄ ī nyɛ̄ɛ̄ ŋmá ajɛ kú Íjīpiti ā ícɛ, ɛ̄cī aflɛ́yí kú ɔyā kú Abíbu.

⁵Eko nɛ̄ Óndú ā lɛ aá kpó wā ajɛ kú ācɛ Ukénan, Uhɛ́ti, ācɛ Ámɔn, ācɛ Uhám mla ācɛ Ujébūsi ā, nɛ̄ ó cokónu kú nū lɛ aádáádā āá. Ajɛ nōo gē gbo iyē nɛɛɛ ā, aá géē yá ucɛ nyā ɛ̄cī aflɛ́yí kú ɔya aflɛ́yí kú iháyí dóódu.

⁶Ipú ɛ̄cī ahāapa, aá géē lé igbō nōó gē nū ŋ́ mā. Ɛ̄cī ɔmahāapa ā géē wɛ ɛ̄cī ucɛ kú ojīlīmā ō ce Óndú ā.

⁷Ipú ɛ̄cī ahāapa ɔ́ɔmā ā, aá gáā lé igbō nōo gē nū ŋ́. Ɔdōnīgbō dúúmā ámāŋ ka igbō nōo gē nū kóō híī yɔ̄ ɔlɛ́ aá ŋ́.

⁸Eko nɛ̄ uculo kú ucɛ nyā gbɔɔ́, aá géē da ayí aá ka, aá gē yá ucɛ ā ohígbū ɔdā nɛ̄ Óndú ā yá lɛ aá eko nɛ̄ aá nyɛ̄ɛ̄ ŋmá ajɛ kú Íjīpiti ā.

⁹Ucɛ nyā nɛ̄ aá géē yɔ̄ ī yá, í blatū aá bɛ̄ɛka ɔdā nɛ̄ aá le gbō bá aá abɔ̄, ámāŋ ka údɔ̄bū kú aá ā. Ó géē tú aá ɛlá kwu ɔ́, kú aá jé aíne kú Óndú ā tɛ́ɛcɛ, kú aá klla kllɔcɛ́ nū, ohígbū ka Óndú ā bī ɔfú nɛ̄hi kú nū ā, le kpó aá bɛ̄cɛ ŋmá Íjīpiti.

¹⁰Ohígbū ɔ́ɔmā, aá géē yá oblatū kú ucɛ nyā ɛ́pleéko eko nū iháyí dóódu.”

¹¹Umósīsi klla kahíníī, “Óndú ā géē kpó aá ga ipú ajɛ kú ācɛ Ukénan, nōó cokónu ō je lɛ aádáádā aá. Eko nōó kwú lɛ aá,

¹²aá géē je ayí aflɛ́yí kú aá lɛ Óndú ā, kwu ɔyí aflɛ́yí kú ɛbɛ́ ɔlɛ́ kú aá ā wɛ ákú Óndú ā dúú.

¹³Amáŋ aá géē bī aálá le hīla ɔyí aflɛ́yí kú ijakī dóódu ŋmá ɛgiyí Óndú ā. Ɔ́dāŋ́ ka aá dɔɔ̄kā ō hīla ɔyí ijakī ā ŋ́, aá lɛ ɔ́ ɔkɔ cē. Amáŋ aá géē hīla ɔ́kplá kú aá dóódu.

¹⁴Eko ɔbū ā, eko nɛ̄ ayí aá lɛ ɔ̄kā kú ɔdā nōo wɛ ɛyí ucɛ nyā ā da, aá géē tá uwā ohi ka, ‘Óndú ā bī ɔfú nɛ̄hi kú nū le kpó alɔ bɛ̄cɛ ŋmá ajɛ kú Íjīpiti, ɛga nɛ̄ alɔ wɛ aɔ́fiyɛ tɛtɛ ā.

¹⁵Eko nɛ̄ Uféro le ɔtū kú nū yá lɔfú, nɛ̄ ó tá kóō cɛ̄ lɛ alɔ nyɛ̄ɛ̄ ŋ́ mā. Óndú ā lɛ odúúdú aɔ́kplá kú ācɛ kú Íjīpiti ā kpó ŋmó, kwu ákú ācɛ mɛ́mla ɛbɛ́ ɔlɛ́. Ɔdā nōo yá ɛ́ɛ́ nɛ̄ alɔ gē je ɔyí aflɛ́yí kú alɔ mɛ́mla ákú aɛ́bɛ́ ɔlɛ́ kú alɔ gwɛ́ɛya lɛ Óndú ā yɔ̄ abɔ́ɔ á. Amáŋ alɔ gē hīla ayínɔ̄nyīlɔ kú alɔ cīgbīhi.

¹⁶Ucɛ nyā géē blatū alɔ lɛbɛ̄ɛka ɔdā nɛ̄ alɔ gē gbō bá abɔ̄ amáŋ o gbō bá údɔ̄bū kú alɔ ā. Ó géē blatū alɔ ka Óndú ā ɔ́ɔ bī ɔfú nɛ̄hi kú nū ā le kpó alɔ bɛ̄cɛ ŋmá Íjīpiti á.’”

¹⁷Eko nɛ̄ Uféro cɛ̄ ka ācɛ kú Ísrɛ̄lu kéē nyɛ̄ɛ̄ ā, Ɔwɔicō í cɛ̄ lɛ uwá bū ajɛ kú Ufilístiya ŋ́, nááná nōó le kpií ā. Ohígbū ka Óndú ā kahíníī, “Eko nɛ̄ ācɛ ā le má ka aá géē kpɛ́fú ɔwɛ, é géē pīya ɔtū kú uwā abɔ̄, cɛ́ɛ́ é kwú cīgbīhi ga Íjīpiti.”

¹⁸Anɔ́ɔ ó cɛ̄ lɛ uwá le pīya biílí le bū ígbíli lɛyíkwu ísu igwɛ̄bɛ́ ā. [5] Ācɛ kú Ísrɛ̄lu le iyē kwú mla iyɔ́fú, le tútū kú ɛfú eko nēé bɛ̄cɛ ŋmá Íjīpiti ā.

¹⁹Anɔ́ɔ Umósīsi lɛ ikpokwū kú Ujófɛ̄fu kpó, ohígbū ka Ujófɛ̄fu cɛ̄ lɛ ācɛ kú Ísrɛ̄lu ā lɛ ɛka gbō kahíníī, “Eko nɛ̄ Óndú ā géē wā ɛgiyí aá gáā kpó aá bɛ̄cɛ ā, aá géē kpó ikpokwú kú okwū kú um nyɔ̄ mla iyī aá ŋmá amānyā.”

²⁰É gbɔɔ́ ŋmá Usúkɔ́tu gáā bá Étam, okónōgwu kú ígbíli ā.

²¹Óndú ā gē gbo iyɔ̄bū uwā ɔlɛ́ɛnɔ bɛ̄ɛka ojuja kpúm ā, cɛ́ɛ́ kóō ma ɔwɛ fú lɛ uwá. Otú ā, ó gē gbɔbū lɛ uwá bɛ̄ɛka ɔkpá ɔlá ōfíyajɛ nɛ̄hi ā, o yá kéē mɛ́ɛbɛ otú glá. Ó yá ɛ̄nyā cɛ́ɛ́ kéē lɔfú yɛ otú mɛ́mla ɔlɛ́ɛnɔ glá.

²²Ojuja ā yɔ̄ ī yɛ mla uwá ɔlɛ́ɛnɔ, ɔ́kpa kú ɔlá ōfíyajɛ ā í gē nyɛ̄ɛ̄ ŋmá ɛgiyí uwā otú ŋ́.