Read idoma OŌYƐBƐ̄CƐ 15 Bible Online

OŌYƐBƐ̄CƐ 15 - idoma bible

OŌYƐBƐ̄CƐ 15

¹Anɔ́ɔ Umósīsi mɛ́mla ācɛ kú Ísrɛ̄lu le ijē gwó lɛ Ondú ā kahíníī, “N géē gwííje lɛ Óndú ā, ohígbū ka ó le aólɛlā kú nū yálé ɔgbɛ́fú nɛ̄hi éyi, ó le ācɛ o cɔɔnya kpɛ́fú mɛ́mla aɔ́nya kú uwā kpó tá tū ipú ísu.

²Ondú ā le ɔfú tū um iyē á, anú yá ɛ́ɛ́ nɛ̄ n gē gwííjē á. Anú nya um tá ŋmá abɔ̄ kú aólɛlā kú um á. Ó wɛ Ɔwɔicō kú um, n kē í cɛ̄tra anú klla í lɛ ojīlīmā ce ɔ́, ó wɛ Ɔwɔicō kú ádā um. N géē gwííjē í bī ɛ́gɛ́nɛ̄ ó lɔfú lɛ ā gwō.

³Óndú ā, wɛ iyē nū á. [7]

⁴“Ó le Uféro mɛ́mla aícɔ́ɔja mla aúgbɔ́nya ɛfú kú nū ā kpó tá tū ipú ísu. Aótrɛ̄yí olɔhi fíyɛ́ dúú kú aícɔ́ɔja kú ɔlɛ́ nū le pɛ́ gebí ipú ísu igwɛ̄bɛ́ ā.

⁵Enyi nɛ̄hi ā gaá klá uwá, é le tá ɛháajɛ kú ísu ā bɛ̄ɛka ɛcɔ̄ ā.

⁶A bī abɔ̄lɔ́ná kú uwɔ nōo lɔfú nɛ̄ɛ̄nɛ̄hi ā Óndú, anɔ́ɔ a le aólɛla kú uwɔ catāajɛ nyɛŋɛnyɛŋɛ á.

⁷A lɛ ojīlīmā nɛ̄hi lɛ o ŋmá lɛ o yá aólɛlā kú uwɔ lé klla le uwá kpó yíífi ŋmáajɛ. A le cɔ̄nū bɛ̄ɛka ɔlá ōkwɔ́lá nɛ̄hi ā. A kē le aólɛlā kú uwɔ kpó yɔlá ŋmáajɛ bɛ̄ɛka ɔdā nēé wɛ ácí ā.

⁸A lɛ owu tū klá ísu, ó kwú tīkwú háyicō gónóó, ó maháyi icō kpaakpa bɛ̄ɛka ɔdɔ ā. Ɛga nōo liipú fíyɛ́ kú ipú ísu ā le ŋmó ŋmá ajɛ kloklo.

⁹Aólɛlā kú uwɔ le gwō ka, aá géē nū alɔ inya, cɛ́ɛ́ ká aá lɛ alɔ kwú lɛ agbénú kú alɔ kpó kɔ̄, cɛ́ɛ́ aá lɛ ɔdā nōo he aá ɔtū ā yá alɔ. É ka aá géē pi ɔkpacaŋgelī kú aá ŋmá apɛ́, cɛ́ɛ́ aá lɛ alɔ kpó ŋmó.

¹⁰Amáŋ, owu nāa fu áncā ā Óndú, cɛ̄ lɛ úgbagwú kú enyi kwú ācɛ Íjīpiti í kpó bí. É le pɛ́ ga ɛháajɛ ísu ā bɛ̄ɛka ígbɛ́cɔ̄ ipú ísu o túgbagwú nɛ̄hi ɔ́ɔmā.

¹¹Ɔwɔ nyá yɔ̄ ipú aɔ́wɔ ā, bɛ̄ɛka awɔ ā? Ɔ̄nyɛ lɛbɛ̄ɛka awɔ ā, ipú ɛgahi mɛ́mla otīihɔ ā? Ɔ̄nyɛ yúklɔ́ idáagó bɛ̄ɛka awɔ ā?

¹²A lɛ abɔ̄lɔ́ná kú uwɔ nāŋ́daa, kwu aólɛlā ā kwú uwɔ ú kpó mule.

¹³Ipú ihɔtū kú uwɔ nōo ī mɛ ŋ́ mā, a bī ɔfú kú uwɔ lɛ ācɛ kú uwɔ nāa hɛ́tá ā bī jé ɔwɛ ga ɛga nōo wɛ ákú uwɔ nāa lā ā.

¹⁴Aéwɔhá ā le pó, é bá ī fīyégbúlú kpáákpá ipú ufi, ufi le mu ācɛ Ufilístiya ipú.

¹⁵Aɔ́cɛ́ kú Ɛ́dɔm bá ī yúufi, ācogbāājɛ kú Umówābu bá ī fīyégbúlú ipu ufi. Odúúdú ācɛ nēe lā ajɛ kú Ukénan ā lɛ ja piyontoo ipú ufi ɛɛ́.

¹⁶Égbúlú mɛ́mla ufi lɛ mu uwá ipú, ohígbū ɔfú kú abɔ̄ kú uwɔ. É bá cíí bɛ̄ɛka ɛcɔ̄ ā, gbéeko nɛ̄ ācɛ kú uwɔ nāa nyatá ā gaá le pɛ́ le yɛ.

¹⁷A géē bī uwā wā ipú, klla í bī uwā tū ɛyí ɛfu kú uwɔ. Ɛga nɛ̄ awɔ nōo wɛ Óndú ā tútū oōlā ā, Áklɔ̄kpīihɔ kú uwɔ nāa le kwu ajɛ ā.

¹⁸Awɔ, Óndú ā géē ce ɔcɛ́ piyóó.

¹⁹Eko nɛ̄ ɔnya ɛfú mɛ́mla ācɛ o kpɛ́fú ɔnya, mɛ́mla aícɔ́ɔja kú ɔlɛ́ Uféro a pɛ́ ga ipú éŋkpɔ̄ ā, Óndú ā lɛ éŋkpɔ̄ bī wā í klá uwá. Amáŋ, ayí kú Ísrɛ̄lu ā yāwu ɛyí ajɛ o ŋuaŋ mókókó, ɔtahɛ̄ éŋkpɔ̄ ā.

²⁰Anɔ́ɔ Umíriyam, ɔ̄cɛnyā omɛ́ɛbɛ ā, nōo wɛ ɔyínɛ́ kú Árɔ̄ni ā, kwú ɔdā ō bī gwíijē kú nū ú anɔ́ɔ odúúdú ācɛnya le pɛ́ wɛ̄ɛcɛ gbɔɔ́ ō gwō ɔdā ō bī gwíijē kú uwā, klla bá gē jīijē.

²¹Anɔ́ɔ Umíriyam gwíijē lɛ uwá ka, “Gwííjē lɛ Óndú ā, ohígbū ka ó le yálé ɔgbɛ́fú nɛ̄hi. Ó le ɔnya mɛ́mla ācɛ o cɔnya ā kpó tá tū ipú ísu.”

²²Anɔ́ɔ Umósīsi le ācɛ kú Ísrɛ̄lu ā bī gɔbū ŋmá ɛga ísu igwɛ̄bɛ́ ā, anɔ́ɔ é le tá ipú ígbíli kú Ussɔ́ á. É yɛ ipú ígbíli ɛ̄cī ɛtá, é má éŋkpɔ̄ ŋ́.

²³Eko nēé gā ɛgiyí éŋkpɔ̄ kú Umára ā, é gwá éŋkpɔ̄ kú Umára ā glá ŋ, ohígbū ka ó gē hɔ́ɔnɔ. Anú yá ɛ́ɛ́ nɛ̄ iyē nū lé ka Umára á.

²⁴Anɔ́ɔ ācɛ ā gbɔɔ́ ō ka iŋini, da iyi uwá ɔ̄kā ka “Ɔdí nɛ̄ alɔ géē gwá āa?”

²⁵Anɔ́ɔ Umósīsi le ikwū je ga ɛgiyí Óndú ā. Anɔ́ɔ Óndú ā lɛ ɔcí éyi mafú lɛ ɔ́, anɔ́ɔ Umósīsi lɛ ɔcí ā tá ga ipú éŋkpɔ̄ ā, anɔ́ɔ éŋkpɔ̄ ā kwú pīya éŋkpɔ̄ olɔhi ō gwá á. Abɔ́ɔ ā, anɔ́ɔ Óndú ā le ācɛ ɔlɛ́ nū jámá klla lɛ íne mla ɔ́da je le uwá ka,

²⁶“Ɔ́dāŋ ka, aá géē jāhɔ̄ lɛ ɔkɔ kú Óndú ā, ami nōo wɛ Ɔwɔicō kú aá, nɛ̄ aá gē yá ɔdā nɛ n je ka ó le kpaakpa, ń gáā bī ɛdɔ kú ōcē nɛ n tū klá ācɛ Íjīpiti ā lɛ yá aá italā ŋ́. Ami Óndú ā wɛ ohɔ́nyɛtá kú aá á.”

²⁷Anɔ́ɔ é gā Ɛ́lim, ɛga nɛ̄ Obuga igwɛ́ɛpa bá ipú alī ofu ɛtá ce igwó (70) ā. Anɔ́ɔ é má bá pi éŋkpɔ̄ ā abɔ́ɔ ɔ̄ á.