Read idoma OŌYƐBƐ̄CƐ 16 Bible Online

OŌYƐBƐ̄CƐ 16 - idoma bible

OŌYƐBƐ̄CƐ 16

¹Odúúdú ācɛ kú Ísrɛ̄lu ā gbɔɔ́ ŋmá Ɛ́lim, anɔ́ɔ ɛ̄cī ɔ́migwɛ́ɛhɔ̄ kú ɔyā ɔ́mpa nēé nyɛ̄ɛ̄ ŋmá Íjīpiti ā, é gā ígbíli kú Ínōōbīya, nōo yɔ̄ ɔtāhɛ̄ kú Ɛ́lim mɛ́mla Usáyínāyi ā.

²Abɔ́ɔ ā, odúúdú ācɛ kú Ísrɛ̄lu le iŋini ka lɛyíkwu Umósīsi mɛ́mla Árɔ̄ni kahíníī,

³“Ó géē yɛ í he alɔ ɔtū fíyɛ́ ká Óndú ā kóō lɛ alɔ kpó ŋmó ajɛ kú Íjīpiti. Ɛ́gɛ́ dúú nōó lɛ, abɔ́ɔ ā, alɔ gē lé ɛbɛ́ klla ī lé ɛdɔ ɔdōlé ɔhá dóódu nɛ̄ alɔ dɔɔ̄kā a. Amáŋ, aá lɛ alɔ kpó wā ígbíli amānyā kú ɔkpɛtā kóō lɛ alɔ kpó ŋmó bónū.”

⁴Óndú ā da Umósīsi kahíníī, “N géē yá ka ɔdōlé kóō yā wāajɛ bɛ̄ɛka ɔwɔ ā ŋmá ɔkpáncō. Ācɛ ā kē í nyɔ̄ í tú ɔdōlé kú ɛ̄cī ékpónú ōfōōfūnū bá. N géē bī ɔwɛ nyā le jé uwā má, ɔ́dāŋ ké géē lɛyitáajɛ lɛ ukɔ́ nɛ̄ n géē tū ā.

⁵Ɛ̄cī omɛhīlī ā, ɔdōlé ɔ́klá ɛpa kú ɛ̄nē é gē kpó ɛ̄cī dóódu ā nēé géē kpó klla í tú ɔ̄ tū á.”

⁶Anɔ́ɔ Umósīsi mɛ́mla Árɔ̄ni lɛ da ācɛ kú Ísrɛ̄lu ā kahíníī, “Ɔ̄nɔ̄ɔnɛ̄, aá géē jé ka Óndú ā ɔ́ɔ bī aá bɛ̄cɛ ŋmá ajɛ kú Íjīpiti á.

⁷Ɔ̄cɔ̄ɔ̄cī ā, aá kē í má ɔlá ōceyī nɛ̄hi ō mafú ɛga nɛ̄ Óndú ā yɔ̄ ā. Ó le iŋini nɛ̄ aá gē ka lɛyíkwu ɔ́ ā pó ɛɛ́. Ɔdí wɛ alɔ ɛ́ɛ́, nɛ̄ aá gē ka iŋni tá alɔ ā.”

⁸Anɔ́ɔ Umósīsi da uwá kahíníī, “Óndú ā géē je ɛbɛ́ lɛ aá ɔ̄nɔ̄ɔnɛ̄ klla í je igbō lɛ á ɔ̄cɔ̄ɔ̄cī nɛ̄ aá géē lé klla í nū ipú. Ohígbū ka Óndú ā le iŋini nɛ̄ aá ka lɛyíkwu ɔ́ ā pó ɛɛ́. Ɔ̄nyɛ wɛ alɔ ā? Aá ka iŋini tá alɔ ŋ́, amáŋ aá ī ka iŋini tá Óndú ā.”

⁹Anɔ́ɔ Umósīsi da Árɔ̄ni kahíníī, “Le ka lɛ ójila kú Ísrɛ̄lu ā, kéē wā ajaajɛ gaá háyi iyɔ̄bū Óndú ā. Ohígbū koó le iŋini nēé ka ā pó ɛɛ́.”

¹⁰Abɔ̄ Árɔ̄ni yɔ̄ ī kɛlā lɛ odúúdú ójila kú Ísrɛ̄lu ā. É pīyeyī má ígbíli ā, anɔ́ɔ é má ɔlá ōceyī nɛ̄hi ō mafú ɛga nɛ̄ Óndú ā yɔ̄ ā ipú ojuja á.

¹¹Anɔ́ɔ Óndú ā da Umósīsi kahíníī,

¹²“N le iŋini ká ācɛ kú Ísrɛ̄lu ā pó ɛɛ́. Le ka lɛ uwá ka ipú ajɛ odobū fulufulu kú ɔ̄nɔ̄ɔ̄nɛ̄ ā, é géē lɛ ɛbɛ́. Ɔ̄cɔ̄ɔ̄cī, é géē lɛ igbō nōo í nū uwā ipú. Anɔ́ɔ é géē jé ka ami ɔ́ɔ wɛ Óndú ā, Ɔwɔicō kú uwā á.”

¹³Ɔ̄nɔ̄ɔnɛ̄ ā, ígwu kú ɛwá ɔkpá nɛ̄hi le wu wā gáā klá ajɛ, le mu ɛga dóódu kú ɛga nēé cē áklɔ̄kpɛ ce ā. Anɔ́ɔ ɔ̄cɔ̄ɔ̄cī ā, ébú nɛ̄hi le ce le uwá yɛ jīla tá.

¹⁴Eko nɛ̄ ébú á mɛ ā, odée bɛ̄ɛka iwili pétépété kú ɛcɔ̄ɔwɔ klá ajɛ ipú ígbíli ɛbɛɛbɛ.

¹⁵Eko nɛ̄ ācɛ kú Ísrɛ̄lu le ɔ́ má ā, é da iyī uwā ɔ̄kā kahíníī, “Ɔdí yɔ̄ ā?” Ohígbū keé jé ɔdā nɛ̄ ó wɛ ā ŋ́. Anɔ́ɔ Umósīsi tá uwá ohi kahíníī, “Ɛ̄nyā wɛ ɔdōlé nɛ̄ Óndú ā je lɛ aá kú aá lé á.

¹⁶Ɔdā nɛ̄ Óndú ā ka ā yɔ̄ á. ‘Ɔnyɔɔnyɛ kú aá kóō nyɔ̄ í lɛ ɔdōlé ā túbá, ɛ́gɛ́nɛ̄ ó lɔfú lé lɛ glá ā. Ɔnyɔɔnyɛ kóō kpó okoolo ɛpɛɛpa kú ɔdōlé ā, īkpɛ̄yí ɔnyɔɔnyɛ kú ipɔ́ɔnū ɔlɛ́ nū.’”

¹⁷Anɔ́ɔ ācɛ kú Ísrɛ̄lu ā lɛ yá lɛ ā. Ācɛ ōhī kpó nwuné fíyɛ́, ācɛ ōhī kē kpó nyɛ́ fíyɛ́.

¹⁸Amáŋ eko nēé lɛ ɔdā nēé túbá ā miya ā, ācɛ nēe kpó nwuné fíyɛ́ ā, í lɛ nwuné cabá fíyɛ́ ŋ́, anɔ́ɔ ācɛ nēé kpó nwuné ŋ́ mā, í kē lɛ nyɛ́ fíyɛ́ ŋ́. Ó le jɛ̄ uwā yíílí. Ɔnyɔɔnyɛ kpó ɛ́gɛ́nɛ̄ ó lɔfú lé glá ā.

¹⁹Anɔ́ɔ Umósīsi da uwā kahíníī, “Ɔ̄cɛ dúúmā kóō lɛ ɔ́ tū gbɔ́ɔ̄cī ŋ́.”

²⁰Amáŋ, ācɛ ōhī kú uwā í jāhɔ̄ lɛ Umósīsi ŋ́, anɔ́ɔ é le ɔ́ tū gbɔ́ɔ̄cī á. Ɔ̄cɔ̄ɔ̄cī ā, ó kwú wā klla le gbɛkɔ̄ yɔ̄ i nú ípī fiyúu. Anɔ́ɔ Umósīsi le cɔ̄nū mla uwá á.

²¹Ɔ̄cɔ̄ɔ̄cí dóódu ɔnyɔɔnyɛ gē nyɔ̄ ī kpó ɛ́gɛ́nɛ̄ ɛgbá kú nū lɛ ā. Eko nɛ̄ ɛnɔ le cɛ̄ nɛ̄hi, ɔdā nōo hile bá ajɛ ā kwú kpó ja tāajɛ.

²²Ɛ̄cī ɔ́mɛhīlī ā, é le ɔdōlé ā kpó lɛ iyī uwā fíyɛ́ ɛga ɛpa. Ɔnyɔɔnyɛ kpó okoolo ɛnɛɛnɛ. Anɔ́ɔ odúúdú anyākwɔ́cɛ kú ójila kú Ísrɛ̄lu ā gaá le ka lɛ Umósīsi á,

²³ anɔ́ɔ Umósīsi da uwá kahíníī, “Ɛ̄nyā wɛ ɔ́da nɛ̄ Óndú ā je á, ‘Óócí wɛ usábāti, [8] ɛ̄cī otīihɔ kú ami nōo wɛ Óndú ā, ɛ̄cī nɛ̄ aá cíkā ō mlɛ́nyɔ́ ŋmá úklɔ́ dóódu ō yá. Aá lɛ ɔdā nɛ̄ aá ŋmɔ́lá glá ā, ŋmɔ́lá. Aá lɛ ɔdā nɛ̄ aá le cɔlá glá ā cɔlá, aá lɛ ɔdā dóódu nōo hile ā kpó bá gbɔ́ɔ́cī.’”

²⁴É kwú ɔdā nōo hile ā í tū gbɔ́ɔ̄cī ɛ́gɛ́nɛ̄ Umósīsi da uwá ā. Ó kē bīya ŋ́, ɛ́ɛ́ nɛ̄ ó gē gbɛkɔ̄ ŋ́.

²⁵Umósīsi da uwá kahíníī, “Aá kwú ɛ̄nyā ú lé ícɛ ohígbū ka ícɛ wɛ ɛ̄cī usábáti kú Óndú ā. Aá gáā má ɔdōlé ā dúú ajɛ ícɛ nyā ŋ́.”

²⁶Aá géē tū ɔdōlé ā bá lɛ iyī aá, ipú ɛ̄cī ɛhīlī ā, amáŋ ɛ̄cī ómahāapa ā, wɛ ɛ̄cī kú omlɛ́nyɔ, odúúmā í gáā yɔ̄ ŋ́.

²⁷Ɛ̄cī ómahāapa ā, ācɛ ōhī kú uwā le yɛ kéē gaá yá ɔdōlé ā, uwá í má odúúmā ŋ́.

²⁸Anɔ́ɔ Óndú ā da Umósīsi kahíníī, “Eko nyá nɛ̄ ācɛ ā géē tá kéē lɛyítáayɛ lɛ íne kú um gaá kwú ā?

²⁹Bla ka ami, nōo wɛ Óndú ā, je ɛ̄cī kú omlɛ́nyɔ́ lɛ aá. Ɔdā nōo yá ɛ́ɛ́ nɛ̄ n gē je ɔdōlé kú ɛ̄cī ɛpa lɛ aá, ɛ̄cī ómɛhīlī ā yɔ̄ abɔ́ɔ á. Ɔnyɔɔnyɛ kóō klá ɔlɛ́ nú kóō híī bɛ̄cɛ ŋmá ɔlɛ́ nū ɛ̄cī ómahāapa ā ŋ́.”

³⁰Anɔ́ɔ ācɛ ā í yúklɔ́ dóódu ɛ̄cī ómahāapa á ŋ́ má.

³¹Ācɛ kú Ísrɛ̄lu hī iyē kú ɔdōlé nyā kahíníī, “Umaná.” Ó le lígíi bɛ̄ɛka īkpɔ̄dā nɛ̄hɛ́ ā, ó kē lɔnyɛ bɛ̄ɛka āmplā nēé bī ɛnwú le yá ɔ̄ ā.

³²Anɔ́ɔ Umósīsi kahíníī, “Óndú ā le da alɔ ka ālɔ̄ lɛ umaná ōhī tū, kú alɔ géē mafú lɛ ayí alɔ, cɛ́ɛ́ kéē má ɔdōlé nɛ̄ Óndú ā je lɛ alɔ ipú ígbíli, eko nɛ̄ ó kpó alɔ bɛ̄cɛ ŋmá ajɛ kú Íjīpiti ā.”

³³ Umósīsi da Árɔ̄ni kahíníī, “Kwú ɔjá ú, cɛ́ɛ́ a lɛ okolo kú umaná ɛpa pīya tū ɔ̄, kú ā kwú ɔ̄ ú ce iyɔ̄bū kú Óndú ā, kóō ce gbēyī ayááyí igbīhi kú alɔ.”

³⁴Ɛ́gɛ́nɛ̄ Óndú ā ka lɛ Umósīsi lɛ á, Árɔ̄ni kwú ɔ̄ ú ce iyɔ̄bū ikpati kú Okónuō ce, kú Óndú ā, cɛ́ɛ́ kóō géē yɔ̄ gbēyī ayí igbīhi ā.

³⁵Ācɛ kú Ísrɛ̄lu a lé umaná ā iháyí ofɛpa jāā gbéeko nēé wā ajɛ kú Ukénan, ɛga nēé lā ā.

³⁶(Okoolo éyi nēé bī le miya ɔdā kú uwā eko ɔ́ɔmā wɛ okoolo ofu).