Read idoma OŌYƐBƐ̄CƐ 17 Bible Online

OŌYƐBƐ̄CƐ 17 - idoma bible

OŌYƐBƐ̄CƐ 17

¹Odúúdú ójila kú ācɛ Ísrɛ̄lu ā nyɛ̄ɛ̄ ŋmá ígbíli kú Ínoobīya. Anɔ́ɔ é yɔ̄ gē yɛ ŋmá ɛga éyi ga ɛga ɔhá ɛ́gɛ́nɛ̄ Óndú ā gē je ɔ́da lɛ uwá lɛ ā. É gaá lɛ áklɔ̄kpɛ cē ci Urefidím, amáŋ éŋkpɔ̄ í yɔ̄ abɔ́ɔ nɛ̄ ācɛ ā gé gwá ŋ́.

²Ohígbū ɔ́ɔmā ā, ācɛ ā gbɔɔ́ ka iŋini tá Umósīsi, anɔ́ɔ é da ɔ́ kahíníī, “Je éŋkpɔ̄ lɛ alɔ kú ālɔ̄ gwá.” Anɔ́ɔ Umósīsi da uwá kahíníī, “Ɔdíyá nāa géē ka iŋini tá um ā? Ɔdíyá nɛ̄ aá gē jé Óndú ā má ā?”

³Amáŋ, ijēēnyi yɔ̄ ī ŋmó ācɛ ā, anɔ́ɔ é ba gē ka iŋini tá Umósīsi kpɔ́ á. É kahíníī, “Ɔdíyā nāa kpó alɔ bɛ̄cɛ ŋmá Íjīpiti ā? Ká ā gaá kpó alɔ mɛ́mla ayí alɔ mɛ́mla anyā alɔ mɛ́mla aɛ́na mɛ́mla aálá bá kú ijēēnyi kóō kpó alɔ ŋmó nɛɛ?”

⁴Anɔ́ɔ Umósīsi le ikwū je klá Óndú ā da ɔ́ kahíníī, “Ɔdí nɛ̄ n géē yá mla ācɛ nēe bá nyā ā? É le tútū kéē tá ɛcɔ̄ klá um ɛɛ́.”

⁵Óndú ā da Umósīsi kahíníī, “Le anyākwɔ́cɛ kú ācɛ ā ōhī kpó ká a nyɔ̄ iyɔ̄bū kú ācɛ ā, kwú okwutɛ kú uwɔ nāa miya kwu ísu kú Unáyilu ā ú.

⁶N géē háyi iyɔ̄bū uwɔ, ɛyí ápátɛ́cɔ̄ kú ɛfu kú Uhɔ́rɛ̄bu ā. A géē lɛ okwutɛ ā fīyɛ̄ ápátɛ́cɔ̄ ā, éŋkpɔ̄ géē bɛ̄cɛ ŋmá anú lɛ ācɛ ā kéē gwá.” Umósīsi le ɔdā nɛ̄ Óndú ā ka ā yá ipéyī anyākwɔ́cɛ kú ācɛ Ísrɛ̄lu ā.

⁷É kwú iyé í ce abɔ́ɔ ka Umása mɛ́mla Umɛ́rība, [9] ohígbū ka ācɛ kú Ísrɛ̄lu ka iŋini klla jé Óndú ā má eko nēé dɔɔ̄ka ka ka, “Óndú ā yɔ̄ mla alɔ kɛ̄ɛ, ka ó yɔ̄ mla alɔ ŋ́?”

⁸Ācɛ Ámālɛ̄ki wā gáā le ɛfú kpó tú uwá Urefidím.

⁹Anɔ́ɔ Umósīsi da Ujóssuwa kahíníī, “Le ācɛnyīlɔ ōhī fu lɛ alɔ, kéē nyɔ̄ gáā nuunu mla ācɛ Ámālɛ̄ki óócí. N géē háyi ɛyí ɛfu kú Óndú ā lɛ okwutɛ ā bī abɔ̄ kú um.

¹⁰Anɔ́ɔ Ujóssuwa le yá ɛ́gɛ́nɛ̄ Umósīsi da ɔ́ ā. Anɔ́ɔ ó le bɛ̄ɛcɛ kóō kpɛ́fú tá ācɛ Ámālɛ̄ki á. Anɔ́ɔ Umósīsi mɛ́mla Árɔ̄ni mɛ́mla Uhɔ́ɔ le yɛ tá ɛyí ɛfu ā.

¹¹Eko dúúmā nɛ̄ Umósīsi bī abɔ̄ kú nū kwiicō, ācɛ kú Ísrɛ̄lu gē yálé, eko dúúmā nɛ̄ ó kwu abɔ̄ ú wāajɛ, ācɛ Ámālɛ̄ki gbɔɔ́ ō yálé.

¹²Amáŋ abɔ̄ kú Umósīsi gbɔɔ́ ō gbogwú, anɔ́ɔ Árɔ̄ni mɛ́mla Uhɔ́ɔ lɛ ɛcɔ̄ bī gé lɛ ɔ́, anɔ́ɔ ó má cīce ɛyí nū á. Anɔ́ɔ é bī ɔ̄ abɔ̄ kwiicō, ɔ̄cɛ éyi bī abɔ̄ éyi, ɔ̄cɛ ɔhá bī abɔ̄ ɔhá. Anɔ́ɔ abɔ̄ kú nū kwiicō jāā gbó ɛnɔ ogajɛ á.

¹³Ujóssuwa bī ɔkpacańgelī le ācɛ Ámālɛ̄ki kpó wúlatāajɛ.

¹⁴Anɔ́ɔ Óndú ā da Umósīsi ka “Lɛ ɛ́gɛ́nɛ̄ aá yá ācɛ ā lé ā tá táajɛ, cɛ́ɛ́ kéē géē blakwu ɔ́. Le ka lɛ Ujóssuwa kahíníī, “N géē je ācɛ kú Ámālɛ̄ki yíífi ŋmá ajɛ nɛ̄ ɔ̄cɛ dúúmā kú ipú ɛcɛ nyā í gáā blakwu uwá ɛ́ɛ́ gɛ ŋ́.”

¹⁵Umósīsi lɛ ede gwó abɔ́ɔ, anɔ́ɔ ó kwú iyē í ce abɔ́ɔ ka “Óndú ā wɛ otúta kú um á.”

¹⁶Ó da uwá kahíníī, “Aá bī otúta kú Óndú ā kwu icō. Cɛ́ɛ́ Óndú ā géē kpɛ́fú tú ācɛ Ámālɛ̄ki ŋmá ayááyí ga ayááyí.”