Read idoma OŌYƐBƐ̄CƐ 18 Bible Online

OŌYƐBƐ̄CƐ 18 - idoma bible

OŌYƐBƐ̄CƐ 18

¹Ohilí kú Umósīsi, Ujɛ́tro, nōo wɛ ɔ̄cogwɛ́ɛya kú Umídīyan ā, lɛ odúúdú ɔdā nɛ̄ Ɔwɔicō yɔ̄ ī yá lɛ Umósīsi mɛ́mla ācɛ kú Ísrɛ̄lu ā, mɛ́mla ɛ́gɛ́nɛ̄ ó kpó uwá bɛ̄cɛ ŋmá Íjīpiti ā pó.

²Anɔ́ɔ ó ga ɛgiyí Umósīsi mɛ́mla ɔnyā kú Umósīsi, Usipóra nɛ̄ Umósīsi mā ɔ̄ tá igbīhi, ɔlɛ́ ádā nū ā,

³mla ayípɛ̄ ɔlɛ́ nū ɛpa, nɛ̄ ó hī iyē kú uwā lé ka, Ugássɔm, nɛ̄ ɛyí nū wɛ, “N wɛ ugbɔga ipú ajɛ nyā”,

⁴Mɛ́mla Ɛlísaa, nɛ̄ ɛyí nū wɛ, Ɔwɔicō Ádā um ā wɛ otábō kú um á. Ó ka ohígbū ka ó lɛ um nyatá ŋmá abɔ̄ kú Uféro.”

⁵Ádā ɔnyā nū, Ujɛ́tro ā gā ɛgiyí nū mɛ́mla ɔnyā nū, mɛ́mla ayí nū ɛpa ā, ɛga nɛ̄ó yɔ̄ ipú ígbíli ɛyí ɛfu kú Ɔwɔicō ā.

⁶Ó le ɛhɔ̄ tū fu Umósīsi ka aá ɔ́ɔ yɔ̄ ī wā,

⁷anɔ́ɔ Umósīsi le tɛ́ɛcɛ gaá jīla anú ɔwɛ, le túkpɛɛ́ iyɔ̄bū nū, lɛ ɔ́ kwú bɔ́tū. Lɛ ɔ̄kā kú ɔbɔ́lā kú iyí uwā da. Anɔ́ɔ é le pɛ́ tá ipú áklɔ̄kpɛ kú Umósīsi á.

⁸Anɔ́ɔ Umósīsi le ka lɛ ohilí nū, odúúdú ɔdā nɛ̄ Óndú ā yá Uféro mɛ́mla ācɛ kú Íjīpiti, ohígbū ācɛ kú Ísrɛ̄lu ā, mɛ́mla ɛdɔ ōwē dóódu nɛ̄ ó má ā, mɛ́mla ɛ́gɛ́nɛ̄ Óndú á nya uwá tá lɛ ā.

⁹Anɔ́ɔ Ujɛ́tro gwéeyē ohígbū odúúdú olɔhi nɛ̄ Óndú ā yá lɛ ācɛ kú Ísrɛ̄lu ā, mɛ́mla ɛ́gɛ́nɛ̄ ó nya uwá tá ŋmá abɔ̄ kú ācɛ kú Íjīpiti ā.

¹⁰Anɔ́ɔ Ujɛ́tro kahíníī, “N cɛ̄tra Óndú ā, nōo nyā aá tá ŋmá abɔ̄ kú Uféro mɛ́mla abɔ̄ kú ācɛ kú Íjīpiti ā. N cɛ̄tra Óndú ā nōo nya ācɛ ɔlɛ́ nū tá ŋmá ɔfiyɛ ā!

¹¹Ícɛ nyā, n le jé ka Óndú ā nwuné fíyɛ́ ɔwɔ dóódu kpɛ́mm á, ohígbū ka ó lɛ ācɛ kú nū hɛ́tā ŋmá abɔ̄ kú ācɛ kú Íjīpiti o yɔ́bɔ́ɔcɛ, nēe bá ī yá uwā ōwē ā.”

¹²Anɔ́ɔ Ujɛ́tro, ádā ɔnyā kú Umósīsi lɛ ɛya o yɔlá. dúúdú gwó lɛ Ɔwɔicō á. Anɔ́ɔ Árɔ̄ni wā mla anyākwɔ́cɛ kú Ísrɛ̄lu ā, gaá lɛ ɔdōlé lé mla ohilí kú Umósīsi ipéyī Ɔwɔicō á.

¹³Oŋmɔ́ɔ̄cīnū, Umósīsi yɔ̄ ī kɛpɔ̄ kú ācɛ ā, ŋmá ɔ̄cɔ̄ɔ̄cí jāā gbó otú.

¹⁴Eko nɛ̄ ohilí Umósīsi le ɔdā nɛ̄ Umósīsi yɔ̄ ī yá lɛ ācɛ ā má ā, Ó da ɔ̄kā kahíníī, “Ɔdí nāa yɔ̄ ī yá lɛ ācɛ ā yɔ̄ ā? Ɔdíyá nāa cīce ōfōōfū uwɔ, nɛ̄ ācɛ le jīla tā uwɔ ŋmá ɔ̄cɔ̄ɔ̄cī jāā gbó otú ā?”

¹⁵Anɔ́ɔ Umósīsi da ohilí nū kahíníī, “N géē yá ɛ̄nyā piíí, ohígbū ka ācɛ ā gē wā ɛgiyí um, gáā jé ɔdā nɛ̄ Ɔwɔicō bī ɔtū lɛyíkwu uwá ā.

¹⁶Eko nɛ̄ ācɛ ɛpa le gbɛlā, é gē wā ɛgiyí um, cɛ́ɛ́ n gē da uwá ɔ̄cɛ nɛ̄ ɛlā kú nū le kpaakpa ā. Cɛ́ɛ́ n klla gē da uwá ɔdā nɛ̄ íne kú Ɔwɔicō ka lɛyíkwu ɔ́ ā.”

¹⁷Anɔ́ɔ ohilí kú Umósīsi ā da Umósīsi kahíníī, “Ɔdā nāa gē yá nyā, á yɔ̄ ī yá ɔ̄ ɔwɛ okpaakpa ŋ́.

¹⁸Ɛ̄jɛ̄ géē jē awɔ mɛ́mla ācɛ ā ānāānā. Iyó ā le gbɛnú ce uwɔ bá. Á gáā yá ɔ̄ ōfōōfū uwɔ glá ŋ́.

¹⁹Lɛ ahɔ̄ jē gā um abālɔbányā ká n̄ lɛ ɛlā olɔhi nwū uwɔ, Ɔwɔicō kē í yɔ̄ mla awɔ. Ó le kpaakpa kú ā kwɛyí ācɛ ā iyɔ̄bū Ɔwɔicō klla ī bī ɛpɔ̄ kú uwā wā ɛgiyí nū.

²⁰A cíkā ō nwū uwā íne ā, kú ā klla yá kéē jé ɔwɛ nɛ̄é gé yɛ mla ɔdā nēé cíkā ō yá ā.

²¹Ofíyɛ́ dúú ā, lɛ ācɛ nēe lɔfú klla ī yúufi Ɔwɔicō, nɛ̄ ɔ̄cɛ géē lɛ ɔtūce uwá glá, mɛ́mla ācɛ nēe géē tá kéē miyɛ omíci ā fu. Kéē lɛ ācɛ ā kɔ̄ úlúúlā, mɛ́mla ofɛɛhɛhɔ̄ mɛ́mla ofɛpa cigwó ofɛpa cigwó, mɛ́mla igwíígwó kéē gbō uwā.

²²Lɛ ɛga je lɛ uwá kéē kɛpɔ̄ kú ācɛ ā eko dóódu. Ɛpɔ̄ nōo ce uwá abɔ̄ bá ā, nēé géē bī wā gé lɛ uwɔ mɛ́ɛ̄ á, cɛ́ɛ́ kóō le tɔ́ɔtɛ́ gā uwɔ. Cɛ́ɛ́ é cē uwɔ bī iyó ā.

²³Ɔ́dāŋ ka a lɛ ɔdā nɛ̄ n da uwɔ nyā yá, ɛ́gɛ́nɛ̄ Ɔwɔicō je ɔ́da gā uwɔ lɛ ā. Á gáā gbagbafú ŋ́, nááná nɛ̄ odúúdú ācɛ nēe bá ā géē ga ɔlɛ́ uwá ɛbɔ́, abɔ̄ nēé le ɛpɔ̄ kú uwā ka lɛ uwá ā”.

²⁴Umósīsi le ɛlā nɛ̄ ohilí nū ka ā pó.

²⁵Anɔ́ɔ ó le ācɛ ɔ̄kwɛ̄yi fu ŋmá ipú odúúdú ācɛ kú Ísrɛ̄lu ā. Ó fu uwá kéē wɛ aótrɛ̄yí kú ācɛ úlúúlā, mɛ́mla ācɛ ofɛɛhɛ̄hɔ̄ mɛ́mla ācɛ ofɛpa cigwó ofɛpa cigwó mɛ́mla ācɛ igwíígwó.

²⁶Uwá gē kɛpɔ̄ kú ācɛ ā eko dóódu á. Ɛpɔ̄ nōo le lɔnɔ nɛ̄hi ā, nɛ̄é gē bī gé lɛ Umósīsi á. Ɛpɔ̄ nɛ̄ŋcɛ́ ɔhá ā, é gē ka abɔ̄yī uwā.

²⁷Anɔ́ɔ Umósīsi lɛ ohilí nū tá úŋmóō, anɔ́ɔ ohilí nū ā nyɛ̄ɛ̄ le tá ɔlɛ́ nū á.