Read idoma OŌYƐBƐ̄CƐ 2 Bible Online

OŌYƐBƐ̄CƐ 2 - idoma bible

OŌYƐBƐ̄CƐ 2

¹Ɛplé eko nyā, ɔ̄cɛnyílɔ éyi ŋmá ipɔ́ɔma kú Ulífāyi gaá lɛ ɔyínɔ̄nyā kú ipɔ́ɔma kú Ulífāyi éyi lɛ ɔnyā.

²Anɔ́ɔ ɔnyā nū ā lɛ ipú yɔ̄, le ɔyí ɔ̄cɛnyīlɔ éyi ma lɛ ɔ́ á, eko nɛ̄ ó má ka ɔyí ā ɔ́ɔ lɔhi nɛ̄hi ā, ó kwú ɔ̄ ú tayínū ɔyā ɛtá.

³Eko nɛ̄ ɔnyā ā má ka anúɔ í lɛ ɔyí ā tayínū glá ɛ́ɛ́ gɛ ŋ́ mā. Ó kwú ómblí, nēé tá ácí nē é hī ka upápīrɔ̄si ā, anɔ́ɔ ó le ácí kpó tū ɔ̄, lɛ unɛ kú “ukoluta” ja klá ɔ́ ɔkwu. Anɔ́ɔ ó kwú ɔyí ā ú tá ipú nū, kwú ɔ̄ ú cɛyí ácí kú okónu ɔkpá ā.

⁴Ɔyínɛ́ kú ɔyí ā, Umíriyam gaá hāyi ɛgoligbó lígíí ŋmá ɛgiyí ɔyí ā kóō má ɔdā nōo gaá yá ɔ́ ā.

⁵Adá kú Uféro gā ɔkpá gaá gwīiyē, anɔ́ɔ ācocɛ̄hɔ̄ kú nū bá okónu ɔkpá ā biílí. Igbeékpónú ó pīyeyī le ómbilí nōo háyi ipácí okónu ɔkpá ā má, anɔ́ɔ ó le ɔ̄cocɛ̄hɔ̄ kú nū éyi tɛ̄hɔ̄ kóō nyɔ̄ í kwú ɔyí ā ú wā.

⁶Adá kú Uféro le ómbilí ā nwūla anɔ́ɔ ó le ɔyínɔ̄nyilɔ má ipú nū á. Ɔyí ā yɔ̄ ī jīkwū, ó le tū ɔ̄ eyīnyinyi. Anɔ́ɔ ó kahíníī, “Ɛ̄nyā wɛ éyi kú ayí kú ācɛ Uhíbru nɛ̄.”

⁷Anɔ́ɔ ɔyínɛ́ nɔ̄nyā kú ɔyí ā, da adá kú Uféro ā ɔ̄kā kahíníī, “N̄ gaá lɛ ɔnyā éyi nōo gē bī ɔyí ā glá hīgwú wā gé lɛ uwɔ ŋmá ipú anyā kú Uhíbru ā nɛɛ?”

⁸Anɔ́ɔ adá kú Uféro ā tá ɔ̄ ohi ka ī “Nyɔ̄.” Anɔ́ɔ ɔ̄ncɛnyā ā le yɛ gaá lɛ ɛ́nɛ́ kú ɔyí piíí ā hīgwú wā gé lɛ ɔ́.

⁹Anɔ́ɔ adá kú Uféro ā da ɔnyā ā kahíníī, “Kwú ɔyí nyā ú nyɔ̄, ká ā lɛ ɔ́ bī jɛ̄ gā um. N géē cíla uwɔ ulé. Anɔ́ɔ ɔnyā ā kwú ɔyí ā ú kóō bī ɔ̄ jɛ̄ á.

¹⁰Eko nɛ̄ ó le ɔyí ā bī jɛ̄ ā, ó lɛ ɔ́ bī gé lɛ adá kú Uféro ā. Anɔ́ɔ ó kwú pīya ɔyí kú adá kú Uféro á. Ó hī iyē kú ɔyí ā ka “Umósīsi.” ohígbū ka, ó kahíníī, “N pi ɔ́ bɛ̄cɛ ŋmá ipú éŋkpɔ̄.”

¹¹ Eko nɛ̄ Umósīsi le jɛ̄ ā, ɛ̄cī éyi, ó le yɛ ga ɛcɛ, ɛgiyí ācɛ ɔlɛ́ nū, ācɛ Uhíbru, anɔ́ɔ ó má ɛgɛ́nɛ̄ é bá ī pi uwá abɔ̄fú kéē yúklɔ́ olɔfú ā. Ó kōō má ɛ́gɛ́nɛ̄ ɔ̄cɛ Íjīpiti éyi yɔ̄ ī ŋmó ɔ̄cɛ Uhíbru kú ɔlɛ́ Umósīsi éyi ijē lɛ ā.

¹²Anɔ́ɔ Umósīsi pīyeyī má amu má anú, abɔ̄ ó má ɔ̄cɛ dúúmā ŋ́ mā, ó le ɔ̄cɛ Íjīpiti ā ŋmó, kwú ɔ̄ ú nyi ipú ɔjɛ.

¹³Oŋmɔ́cī nū, ó le tɛ́ɛcɛ, anɔ́ɔ ó má ācɛ Uhíbru ɛpa bá ī nuunu. Ó da ɔ̄cɛ nōo lé ɛpɔ̄bí ā ɔ̄kā kahíníī, “Ɔdíyá nɛ̄ a yɔ̄ ī ŋmó ɔyínɛ́ uwɔ ijē āa?

¹⁴Anɔ́ɔ ó tá ɔ̄ ohi kahíníī, “Ɔ̄nyɛ je uwɔ yá ɔcɛ́ mɛ́mla ɔcɛ́ ō kɛpɔ̄ kú alɔ āa? A dɔɔ̄kā ō ŋmó um ɛ́gɛ́nɛ̄ a ŋmó ɔ̄cɛ Íjīpiti ā dúú nɛɛ?” Anɔ́ɔ Umósīsi gbɔɔ́ ō yúufi klla gbɔɔ́ ō da iyī nū kahíníī, “Ɔdā nɛ̄ n yá ā, ācɛ lɛ ɔ́ jé ɛɛ́.”

¹⁵Eko nɛ̄ Uféro le ɛlā nyā pó ā, ó dɔɔ̄kā kóō lɛ Umósīsi ŋmó. Amáŋ, Umósīsi le kwu ŋmá ɛgiyí nū le yɛ gaá lā ajɛ kú ācɛ kú Umídiyan.

¹⁶Ɛ̄cī éyi, eko nɛ̄ Umósīsi cice okónu obugā ā, ayínɔ̄nyā ahāapa kú ɔ̄cogwɛ́ɛya kú Umídiya ā le pɛ́ wā gáā pi éŋkpɔ̄ tū ipú ɔdā ō bī gwá éŋkpɔ̄ tū ɔ̄ lɛ aálá mɛ́mla aɛ́wu kú ádā uwā ā.

¹⁷Amáŋ, ācogbāálá ɔhá ā gaá gbɔɔ́ ō nū ayí nɔ̄nyā nānyā ā ŋmá abɔ́ɔ. Amáŋ, Umósīsi cāŋjɛ, le abɔ̄ tá uwā le éŋkpɔ̄ je lɛ aɔ́dāajɛ kú uwā ā.

¹⁸Eko nēé pīyɛyí wā ɛgiyí ádā uwā ā, ó le ɔ̄kā da kahíníī, “Abɔ̄ ó yá lɛ ɛ́ɛ́ nɛ̄ aá wā fíyaa ícɛ yɔ̄ dúú?”

¹⁹É da ɔ́ kahíníī, “Ɔ̄cɛ kú Íjīpiti éyi hɛ́ alɔ tá ŋmá abɔ̄ kú ācogbāálá ɔhá ā á. Ó klla lɛ éŋkpɔ̄ pi lɛ alɔ klla le kpó lɛ aɔ́dāajɛ kú alɔ le gwá.

²⁰Anɔ́ɔ ó da ayí nū nɔ̄nyā ā kahíníī, “Iní nɛ̄ ɔ̄cɛ ā kē yɔ̄ ā.” Ɔdíyá nɛ̄ aá mā ɔ̄cɛ ɔ́ɔmā tá āa? Aá nyɔ̄ í lɛ ɔ́ hīgwú wā kóō gaá lɛ ɔdōlé lé.”

²¹Umósīsi cɛ̄ kóō yɔ̄ mla ɔ̄cɛ ɔ́ɔmā. Anɔ́ɔ Ujétro kwú adá kú nū, Usipɔ́ra ú lɛ Umósīsi kóō wɛ ɔnyā nū.

²²Ó le ɔyínɔ̄nyīlɔ éyi lɛ ɔ́. Anɔ́ɔ Umósīsi kwú iyē ú ce ɔ́ ka, Ugássɔm, nɛ̄ ɛyí nū wɛ, “N wɛ ugbɔga ipú ajɛ nyā.”

²³Iháyí alɛwa igbīhi ɛ̄nyā ā, ɔcɛ́ kú Íjīpiti ā gekwú. Amáŋ, ayí kú Ísrɛ̄lu ā bá ī hīla ayīnu ipú ōwē kú úklɔ́ ɔfiyɛ nēé bá ī yá ā, anɔ́ɔ é le ikwū je klá Ɔwɔicō kóō tá uwā abɔ̄. Anɔ́ɔ Ɔwɔicō le ikwū nēé je ā pó á.

²⁴Anɔ́ɔ Ɔwɔicō le ikwū nēé je yɔ̄ ī hīla ayínū ā pó, anɔ́ɔ ó le blakwu okónu nōó nɛ̄ ó ce lɛ Ébrahām, mla Áyísīki mla Ujékɔ̄pu āa.

²⁵Ɔwɔicō le ɔfiyɛ nēé bá gē cɛ̄ ā má, anɔ́ɔ ó le kwú ɔ̄ iyē lɛ uwá. [2]