Read idoma OŌYƐBƐ̄CƐ 21 Bible Online

OŌYƐBƐ̄CƐ 21 - idoma bible

OŌYƐBƐ̄CƐ 21

¹Óndú ā da Umósīsi kóō kwú íne nēe bá ā kpó lɛ ācɛ Ísrɛ̄lu kahíníī. “Kwú íne nēe bá nyā ú lɛ ācɛ kú Ísrɛ̄lu.

²Ɔ́dāŋ́ ka aá lɛ ɔfiyɛ kú ɔ̄cɛ Uhíbru lá, ó géē yúklɔ́ lɛ aá iháyí ɛhīlī. Aá géē hɛ́ ɔ̄ tá iháyí ɔ́mahāapa ā, nɛ̄ ó gáā gbā ɔdā dúúmā lɛ aá ŋ́.

³Ɔ́dāŋ́ kaó wɛ okló ɛ́ɛ́ nɛ̄ó wā ɔlɛ́ uwɔ á nɛɛ, ó gáā bī ɔnyā dúú ŋmá ɔlɛ́ aá eko nɛ̄ó nyɛ̄ɛ̄ ŋ́. Amáŋ ɔ́dāŋ ka ó le ɔnyā lɛ ɛ́ɛ́ nɛ̄ó wā ɔlɛ́ uwɔ á nɛɛ, ó lɔfú je ɔnyā nū nyɔ̄ mla iyī nū glá.

⁴Ɔ́dāŋ́ ka ɔkpani nū je ɔnyā lɛ ɔ́ á nɛɛ, nɛ̄ó le ayínɔ̄nyā mɛ́mla ayínɔ̄nyīlɔ á nɛɛ, ɔnyā ā mɛ́mla ayí nū ā géē wɛ ákú ɔkpani nū ā. Ɔfiyɛ nɔ̄nyīlɔ ā ōfōōfūnū géē nyɔ̄ á.

⁵Amáŋ, ɔ́dāŋ́ ka ɔfiyɛ ā le ka tɛ́ɛcɛ ka ɔkpani anúɔ, ɔnyā mɛ́mla ayí anúɔ ɔ́ɔ he anúɔ ɔtū, anɔ́ɔ ó dɔɔ̄kā kéē hɛ́ anúɔ tá ŋ́,

⁶ó lɛ ā, ɔkpani nū ā géē lɛ ɔ́ bī wā ɛgiyí Ɔwɔicō, ó géē bī ɔ̄ wā Okómpinu kú ɛga nēé gē gbā Ɔwɔicō ɛ̄gbā ā, cɛ́ɛ́ ó lɛ ɔɔ́ ahɔ̄ bū. Cɛ́ɛ́ ó kwú pīya ɔfiyɛ kú nū piyóó.

⁷Ɔ́dāŋ́ ka ɔ̄cɛ kwú ɔyínɔ̄nyā kú nū ú lá ɔfiyɛ ā, é gáā hɛ́ ɔ̄ tá bɛ̄ɛka ɔfiyɛ nɔ̄nyīlɔ ā ŋ́.

⁸Ɔ́dāŋ́ ka ó kwú ɔ̄ ú lá lɛ ɔ̄cɛ nōo bī ɔ̄ ɔtū kóō lɛ ɔ́ yá odiyɔ kú nū, amáŋ nɛ̄ó he ɔ́ ɔtū ŋ́. Ádā nū kóō lɛ ɔ́ fūla, é gáā je ɔ́ lá lɛ ɔ̄cɛ ílɔ́wá ŋ́ ohígbū ka óndú ɔfiyɛ ā le okónu nēé ce ā nyílá.

⁹Ɔ́dāŋ́ ka ɔ̄cɛ le ɔfiyɛ nɔ̄nyā lá kóō je ɔ́ lɛ ɔyí nū nɔ̄nyīlɔ kóō wɛ ɔnyā nū, ó géē je ɔ́ bɛ̄ɛka éyi kú ɔyínɔ̄nyā kú nū ā.

¹⁰Ɔ́dāŋ́ ka ɔ̄cɛ lɛ ɔnyā ɔ́mpa lɛ, ó géē yɔ̄ ī je ukpɛ̄ kú ɔdōlé mɛ́mla īlī ō tōōhí mɛ́mla ukpɛ̄ kú íkwu kú ɔlɛ́ ɔbá lɛ ɔnyā aflɛ́yí kú nū ā kpɔ́.

¹¹Ɔ́dāŋ́ ka ɔbá ā í yá aɔ́dā ɛtá nēe bá nyā glá ŋ́, ó í habɔ̄ ɔnyā ā tá kóō nyɛ̄ɛ̄ ŋmá ɔlɛ́ nū, ó gáā mīyɛ ije īkpɛ̄yí nū ŋ́.

¹²Ɔ̄cɛ dúú nōo le ɔdée yá ɔ́mpa nū, nɛ̄ ɔ́mpa nū ā gekwú, é géē je ɔ́ ŋmó kwɛyí nū.

¹³Amáŋ ɔ́dāŋ́ kaó jégēdē ŋmó ɔ̄cɛ ā ŋ́, nɛ̄ ó wɛ ámíyā nɛɛ, ó lɔ́fú kwinya ɔ́ci ga ɛga nɛ̄ n géē mafú lɛ aá ā. Abɔ̄ í gáā kwu ɔ́ abɔ́ɔ glá ŋ́.

¹⁴Amáŋ ɔ́dāŋ́ ka ɔ̄cɛ dúúmā jédēdē le cɔ̄nū lɛ ɔ̄cɛ ŋmó, é cíkō lɛ ɔ́ ŋmó, ɔ́dāŋ nɛ̄ó kōō le inya īkpɛ̄yí kú nū kwu ga ɛgiyí ede kú um nááná.

¹⁵Ɔ̄cɛ dúúmā nōo lɛ ɔdée fīyɛ̄ ádā nū ámāŋ ɛ́nɛ́ nū, aá lɛ ɔ́ ŋmó.

¹⁶Ɔ̄cɛ dúú nōo lɛ ɔ̄cɛ kwú uwī, káo je ɔ́ lá, ámāŋ kóō lɛ ɔ́ tá ɔlɛ́ kóō kwú pīya ɔfiyɛ kú nū, é géē ŋmó ɔ̄cɛ ɔ́ɔmā piíí.

¹⁷Ɔ̄cɛ dúú nōo lɛ okónu tá lɛ ádā nū ámāŋ ɛ́nɛ́ nū, kéē lɛ ɔ́ ŋmó piíí.

¹⁸Ɔ́dāŋ́ ka ɔ̄cɛ dúúmā le ikpɛ́lā yá mla ɔ́mpā nū, nɛ̄ó bī ɛcɔ̄ ámāŋ akwū lɛ tū ɔ́mpā nū ā, lɛ ágbe yá ɔ́. Ɔ́dāŋ ka ɔ̄cɛ nɛ̄ó yá ɔ̄ ágbe ā gwutá ajɛ ōcē,

¹⁹amáŋ nɛ̄ ɔ̄cɛ ā cāŋjɛ ŋmá ōcē ā igbīhājɛ, nɛ̄ó kwū ŋ́, nɛ̄ó gbɔɔ́ ō yɛ ɛcɛ, é gaá yá ɔ̄cɛ nōo yá ɔ̄ odée ā ɔdā dúú ŋ́. Amáŋ ó géē gbā ulé kú eko nɛ̄ó kpó ɔ̄ anú bónū ā, ó kē í leyīkwu ɔ̄ jāā gbéeko nɛ̄ ōcē kú nū mɛ.

²⁰Ɔ́dāŋ́ ka ɔ̄cɛ dúú bī ɔcí lɛ ŋmó ɔfiyɛ kú nū ijē, ó kōō wɛ ɔ̄cɛnyīlɔ ámāŋ ɔ̄cɛnyā oo, nɛ̄ ɔfiyɛ ā gekwú abáábɔ́ɔ, é í yá óndú ɔfiyɛ ā italā.

²¹Amáŋ, ɔ́dāŋ́ ka ɔfiyɛ ā yēeyī ɛ̄cī éyi ámāŋ ɛ̄cī ɛpa, é gáā yá óndú ɔfiyɛ ā italā ŋ́. Ufu kú agbénú kú nū nōo cē ɔ̄ ā kwɛyí italā.

²²Ɔ́dāŋ́ ka ācɛ le unu nu, le ɔnyā ō yīipú dúúmā yá ágbe, nɛ̄ó lɛ ɔyí plla, nɛ̄ ɔdā ɔhá dúú í yá ɔ̄ ŋ́, ɔ̄cɛ nōo yá ɔ̄ ágbe ā, géē gbā ɔdā dúúmā nɛ̄ ɔbá ɔnyā ā ka ā, ɔ́dāŋ ka ācɛ o kɛpɔ̄ ā cɛ̄ lɛ ā.

²³Amáŋ, ɔ́dāŋ́ ka ɔ̄cɛnyā abɔ̄yīnū nēé yá ágbe ā gekwú nɛɛ, italā kú nū géē wɛ oyēeyī kwɛyí oyéeyī,

²⁴īkpēyī kóō kwɛyí īkpēyī, ayīnu kóō kwɛyí ayīnu, abɔ̄ kóō kwɛyí abɔ̄, ikpó kóō kē kwɛyí ikpó.

²⁵Iyē ōyɔlá kwɛyí iyē ōyɔlá, ágbe kwɛyí ágbe, iyē ōplla kwɛyí iyē ōplla.”

²⁶Ɔ́dāŋ́ ka ɔ̄cɛ dúúmā lɛ ɔdée fīyɛ̄ ɔfiyɛ nɔ̄nyīlɔ kú nū ámāŋ ɔfiyɛ nɔ̄nyā kú nū eyī, nɛ̄ eyī ā kwú pu, ó géē hɛ́ ɔfiyɛ ā tá kóō nyɔ̄ icííci kóō kwɛyí eyī kú nū nōo pu ā.

²⁷Ɔ́dāŋ́ kaó lɛ ayīnu éyi kú ɔfiyɛ kú nū nɔ̄nyīlɔ ámāŋ ɔfiyɛ nɔ̄nyā ā fu tónū, ó géē hɛ́ ɔfiyɛ ā tá kóō nyɔ̄ icííci kwɛyí ayinu éyi kú nu nōo fu ā.

²⁸Ɔ́dāŋ́ ka ɛna lɛ ɔ̄cɛnyīlɔ ámāŋ ɔ̄cɛnyā dúúmā iyē catāpū, nɛ̄ó gekwú, é géē bī ɛcɔ̄ lɛ ŋmó ɛna ā, ɔ̄cɛ dúúmā í kē gáā lé ɛbɛ́ kú nū ŋ́, amáŋ é gáā yá óndú kú ɛna ā italā ŋ́.

²⁹Amáŋ ɔ́dāŋ́ kaó wɛ ucē kú ɛna ā, tɛtɛ kóō lɛ ajī tū ɔ̄cɛ, nēé le ka lɛ óndú kú ɛna ā, igbo alɛwa, ɛ́ɛ́ nɛ̄ ó kwú ɔ̄ wāajɛ ŋ́ má, anɔ́ɔ ó lɛ ɔ̄cɛnyīlɔ ámāŋ ɔ̄cɛnyā ŋmó, é géē bī ɛcɔ̄ le ŋmó ɛna ā, é klla géē ŋmó óndú kú ɛna ā dúú.

³⁰Nááná, ɔ́dāŋ́ keé lɛ olófi dúú hɛ́ óndú ɛna ā, ó géē gbā ɔ̄ kwɛyí oyēeyī kú nū, cɛ́ɛ́ kóō lɛ oyēeyī kú nū fūla.

³¹Ɔ́dāŋ́ ka ɔbɛ́ɛna le ɔyínɔ̄nyīlɔ ámāŋ ka ɔyínɔ̄nyā ŋmó, íne ɛdɔ ékpó ɔ́ɔmā géē kwú ɔ̄ dúú á.

³²Ɔ́dāŋ́ ka ɛna lɛ ajī gwū ɔfiyɛ nɔ̄nyīlɔ ámāŋ ɔfiyɛ nɔ̄nyā, óndú ɛna ā géē gbā ije o lɛbɛ̄ɛka égō ofu cigwó lɛ óndú kú ɔfiyɛ ā. É kē í bī ɛcɔ̄ lɛ ŋmó ɛna ā.

³³Ɔ́dāŋ́ ka ɔ̄cɛ dúúmā kwú ɔ̄wū ú ŋmá okónu ɔ̄gɔ̄, ámāŋ kaó lɛ ɔ̄gɔ̄ bū, nɛ̄ó gwū ɔ̄ ŋ́, nɛ̄ ɛna ámāŋ ka ijakī kú ɔ̄cɛ ɔhá mágwōnū tá ipú nū,

³⁴ɔ̄cɛ nōo bu ɔ̄gɔ̄ ā géē gbā ije kú ɛna ā lɛ óndú kú ɛbɛ́ ā, cɛ́ɛ́ ó bī okwu kú ɛbɛ́ ā.

³⁵Ɔ́dāŋ́ ka ɛna éyi lɛ ajī gwu ɛna ɔ́mpā nū, nɛ̄ ɔ́mpā nū ā gekwú, é géē je ɛna oyēeyī ā lá, cɛ́ɛ́ é lɛ ije kú nū kɔ̄. É kē í kɔ̄ ɛbɛ́ kú ɛna nōo kwú ā lɛ óndú ɛna nōo yēeyī mɛ́mla óndú ɛna nōo kwú ā.

³⁶Amáŋ ɔ́dāŋ́ ka ācɛ tɛtɛ jé ka ɛna nōo yēeyī ā, ɔ́ɔ gē dɔɔ̄kɛ̄lā, ɛ́ɛ́ nɛ̄ óndú nū í kwú ɔ̄ wāajɛ ŋ́ má, ayíka óndú ɛna ā géē je ɛna oyēeyī kwɛyí ɛna lɛ ɔ̄cɛ nēé ŋmó ɛna kú nū ā, cɛ́ɛ́ ó kē bī okwū kú ɛna ā.