Read idoma OŌYƐBƐ̄CƐ 23 Bible Online

OŌYƐBƐ̄CƐ 23 - idoma bible

OŌYƐBƐ̄CƐ 23

¹Aá híī bī ɔ̄kā ɛ̄kɛ̄mgbɛ̄ le yá awanda gē yɛ ŋmá ɛga éyi ga ɛga ɔhá ŋ́. Aá híī cīījáalí ɛ̄kɛ̄mgbɛ̄ lɛ ɔ̄cɛ o yá ɔdōbɔ̄bí ŋ́.

²Aá kɛlā ɔkwɛ̄yi eko dóódu únɛ́pɔ̄ eko nēé yɔ̄ ī hɛ́pɔ̄, ó kōō wɛ eko nɛ̄ ɛjɛ̄ɛ̄jī ācɛ, bá gē cīijáalí ɛ̄kɛ̄mgbɛ̄ nááná, aá híī wɛ ŋ́.

³Aá híī méyīgoo je ɛpɔ̄ pīyeyī klá ajɛ eko nēé gē kɛpɔ̄ tū ɔ̄cogbɛhá ŋ́.

⁴Ɔ́dāŋ́ ka aá má ɛna ámāŋ ijakī kú olɛlā kú aá yɔ̄ ī bī, lɛ ɔ́ kwú cīgbīhi gé lɛ ɔ́.

⁵Ɔ́dāŋ́ ka lɛ ijakī nɛ̄ ɔ̄cɛ nōo gē wɔ́tū uwɔ le iyó nɛ̄hi gbō ce ɔ́ anɔ́ɔ ó má gwōnū, tá ɔ̄ abɔ̄ kú aá kwú ijakī ā ú je gicō ŋmá ajɛ. A híī nyɛ̄ɛ̄ icííci ŋ́.

⁶Aá pīya ɛpɔ̄ okpaakpa kú ɔ̄cogbɛhá eyī klá ajɛ inɛ̄pɔ̄ ŋ́.

⁷Aá híī cīije bá ɔ̄cɛ ŋ́. Aá kē híī ŋmó ācɛ ipú áncā ŋ́. Ohígbū ka n géē ŋmó ɔ̄cɛ dúúmā nōo yá ɔdōbɔ̄bí ɛ́gɔ́ɔmā ɛpɔ̄bí.

⁸Aá híī mīyɛ omíci ŋ́, ohígbū ka omíci gē pu ɔ̄cɛ eyī kóō híī mā ɛlā okpaakpa ŋ́, cɛ́ɛ́ kóō lɛ ɛpɔ̄ kú ɔ̄cɛ nɛ̄ ó lɛ́pɔ̄bí ŋ́ mā píyeyī klá ajɛ.

⁹Aá híī yá aílɔ́wá ɔdōbɔ̄bí ŋ́. Aá kē tɛtɛ jé ɔdā nɛ̄ ílɔ́wá ō wɛ ajɛ éwɔhá wɛ ā, ohígbū ka aá tɛtɛ wɛ aílɔ́wá ajɛ kú Íjīpiti.

¹⁰Aá géē hɛ́ɛhɔ̄ í nyi ɔdɛ̄hɔ̄ ipú ajɛ kú aá klla í cē ɔdɛ̄hɔ̄ ā ipú iháyí ɛhīlī.

¹¹Amáŋ iháyí ɔ́mahāapa ā, á géē mā ajɛ ā tá kóō mlɛ́nyɔ́ cɛ́ɛ́ kú ō lūgwū. Aá híī cē inana kú ɔdɛ̄hɔ̄ dóódu nōo gē bū ipú ajɛ ā ŋ́. Cɛ́ɛ́ kú ācogbɛhá kéē lɔfú má ɔdōlé ŋmá anú. Aɛ́bɛ́ kē í lé aɔ́dā nēe hile āa. Ɛ́gɔ́ɔmā nāa géē yá mla ɛhɔ̄ kú ɔcí ufáyin mɛ́mla ɔcí olīifu kú aá dúú ā.”

¹²Ɛ̄cī ɛhīlī ā, a géē yúklɔ́ kú uwɔ̄ ā, amáŋ ɛ̄cī ɔ́mahāapa ā, ā géē mlɛ́nyɔ́. Ɛna mɛ́mla ijakī kú aá, mɛ́mla aɔ́fiyɛ kú aá mɛ́mla aéwɔhá nēe gē yúklɔ́ lɛ aá géē mlɛ́nyɔ́ cɛ́ɛ́ kéē le lūgwū.

¹³Aá lɛ abɔ̄ bī ɛjɛ̄ɛ̄jī ukɔ́ nɛ̄ ami, Óndú ā, tū aá ā. Aá kōō híī gbā aɔ́wɔ ɔhá ɛ̄gbā ŋ́ ámāŋ kōō hī iyē kú uwā ŋ́.

¹⁴Aá lɛ ojīlīmā ce um, cɛ́ɛ́ kú aá lé ucɛ igbɛɛtá ipú iháyí.

¹⁵Aá géē yá ucɛ kú igbō nɛ̄ó gē nū ŋ́ ɛ́gɛ́nɛ̄ n je ɔ́da kú nū lɛ aá lɛ ā ipú ɔyā nēé hī Abíbu nɛ̄ aá nyɛ̄ɛ̄ ŋmá Íjīpiti ā. Ɛplá ɛ̄cī aháapa nɛ̄ aá géē le lé ucɛ ā, aá gáā lé igbō nēé le ɔdōnigbō tū ɔ̄ ŋ́. Ɔ̄cɛ dóódu kóō tá abɔ̄ áncā wā í gbā um ɛ̄gbā ŋ́.

¹⁶Aá géē yá ucɛ kú ɔdɛ̄hɔ̄ ō cē kú aá, eko nɛ̄ aá gáā cē ɔdɛ̄hɔ̄ kú aá. Oŋmɛ́yí kú iháyí ā, Aá géē lé ucɛ kú áklɔ̄kpɛ, eko nɛ̄ aá gē kpó īkpō nōo ŋmá ɛhɔ̄ kú ɔcí ufáyin ā mɛ́mla ɛhɔ̄ īkpɔ̄cí kú aá bá ɛgéégée.

¹⁷Iháyí dóódu, ɛplá ucɛ ɛtá nēe bá ā, odúúdú ācɛnyīlɔ kú aá géē wā iyɔ̄bū ami Óndú ā, Ɔwɔicō kú aá gaá gbā um ɛ̄gbā.

¹⁸Āa híī bī igbō nēé le ɔdōnīgbō tū ɔ̄ wā eko nɛ̄ aá bī ɛbɛ́ wā í lɛ gwɛ́ɛya gā um ŋ́. Ijē kú ɛbɛ́ nēé bī wā í lɛ gwɛ́ɛya gā ā um kóō híī hile gbó ɔ̄cī ŋ́.

¹⁹Iháyí dóódu, aá géē bī ɔdɛ̄hɔ̄ kú aflɛ́yí nɛ̄ aá cē ā wā gé lɛ Óndú ā, Ɔwɔicō kú aá. Aá híī he ɛbɛ́ kú ɔyí álá, ámāŋ ka opī ipú enyi amɛ̄ kú ɛ́nɛ́ nū ŋ́.

²⁰Aá má ɔ̄, n géē tū alelékwū ōtɛ̄hɔ̄ kú um ɛhɔ̄ kóō gbɔbū lɛ aá, kóō gbɔ̄ aá ɔwɛ, cɛ́ɛ́ kóō lɛ aá bī wā ɛga nɛ̄ n tútū lɛ aá ā.

²¹Aá jāhɔ̄ lɛ ɔ́, kú aá lɛyítáajɛ lɛ ɛlá kú nū. Aá híī cāŋjɛ lɛyíkwu ɔ́ ŋ́. Ohígbū ká ami tū ɔ̄ ɛhɔ̄ á. Ó gaá je odōbɔ̄bí ɔ́ɔmā yɛ́ɛhi ŋ́.

²²Amáŋ ɔ́dāŋ́ ka aá lɛ abɔ̄ bī ɛlā kú nū, nɛ̄ aá kē lɛ odúúdú ɔdā nɛ̄ n ka ā yá, n géē nuunu tú odúúdú aólɛlā kú aá.

²³Alelékwū ōtɛ̄hɔ̄ kú um ā géē gbɔbū lɛ aá, géē bī aá ga ajɛ kú ācɛ Ámɔn, ācɛ Uhɛ́ti, ācɛ Upɛrís, ācɛ Ukénan, ācɛ Uhám, mɛ́mla ācɛ Ujébūsi. N géē je uwá yíífi ŋmá ajɛ iyɔ̄bū aá.

²⁴Aá híī tɛ́yíkpɛɛ́ lɛ aɔ́wɔ kú uwā ŋ́, ɛ́ɛ́ nɛ̄ aá géē gbā uwā ɛ̄gbā ŋ́. Aá kóō híī wɛ ipú ɛ̄gbā ō gba ɔwɔ kú uwā ŋ́. Aá lɛ aɔ́wɔ mɛ́mla ɛcɔ̄ kú ɛcí kú uwā kpó ca bónū.

²⁵Ɔ́dāŋ ka aá gbā ami, Óndú ā, Ɔwɔicō kú aá ɛ̄gbā, n géē hɔ́hā kú ɔdōlé mɛ́mla ɔhā kú éŋkpɔ̄ ce aá, cɛ́ɛ́ n klla lɛ ōcē kpó ŋmá ɛgiyí aá.

²⁶Ipú ajɛ kú aá ā, ɔnyā dóódu í gáā plla ɔyí, ɛ́ɛ́ nɛ̄ ɔnyā dóódu gē wɛ ɔdɔma ŋ́. N géē yá kú aá lɛ́ɛcɛ.

²⁷N géē yá ká ācɛ nēe gē bɛ̄yíkwu aá ā, kéē yúufi um. N géē bī ígbájí wā ɔtāhɛ̄ kú ācɛ nēe gē nuunu tá aá ā. N géē yá odúúdú aólɛlā kú aá, kéē lɛ igbīhi cē kwu aá, kéē lɛ kwu ŋmá ɛgiyí aá.

²⁸N géē yá kú ɔtū kú aólɛlā kú aá kóō lɛ wuklíicō, [11] N géē nū ācɛ Uhɛ̄fi, mɛ́mla ācɛ Ukénan, mɛ́mla ācɛ Uhám hīla aá abɔ̄ aá géē yɔ̄ ī wā ā.

²⁹Ń gáā nū uwā bɛ̄cɛ ɛplá iháyí ékpónú ŋ́. Ohígbū nɛ̄ ajɛ ā géē má tá áncā, nɛ̄ ɛbɛ́ obɔ̄bí alɛwa géē le nyīla ca aá bá.

³⁰Ikɔkɔ ɔ́ɔmā n géē nū uwā bɛ̄cɛ kléklé jāā gbéeko nɛ̄ aá le lɛwa ma ajɛ ā eyī.

³¹N géē tū ɛjī kú ajɛ kú aá ŋmá ísu igwɛ̄bɛ́ ā, jāā ga ísu kú ācɛ Ufilístiya, ohígbū ka n géē je ɔfú lɛ aá kú aá yá uwā lé ɔgbɛ́fú, cɛ́ɛ́ aá lɛ uwá kpó nū ŋmá ajɛ ā.

³²Aá gáā cokónu dóódu mla uwá, ámāŋ ka aɔ́wɔ kú uwā ŋ́.

³³Uwá í gáā lā ipú ajɛ kú aá ŋ́, ohígbū nēé géē yá aá, kú aá bīya íne kú um. Ɔ́dāŋ́ ka aá gbɔɔ́ ō gbā ɔkɔ lɛ aɔ́wɔ kú uwā ā, ó géē lɛbɛ̄ɛka ukpa kú ikwū ā lɛ aá ā.”