Read idoma OŌYƐBƐ̄CƐ 24 Bible Online

OŌYƐBƐ̄CƐ 24 - idoma bible

OŌYƐBƐ̄CƐ 24

¹Ɔwɔicō da Umósīsi kahíníī, “Wā icō ɛfu ā, ɛgiyí um. Awɔ mɛ́mla Árɔ̄ni, mɛ́mla Unádābu mɛ́mla Abíhu, mla anyākwɔ́cɛ ofɛtá cigwó ŋmá ipú anyākwɔ́cɛ kú ācɛ Ísrɛ̄lu ā. Eko nɛ̄ó hile lígíí kú aá wā ɛyí ɛfu ā, aá túkpɛɛ́ kú aá gbā um ɛgbā.

²Umósīsi ōfōōfūnū géē wā icō ɛfu ajaajɛ ɛgiyí um á. Ācɛ ohile ā í kōō gáā túbla ɛfu ā dɛ̄ɛ̄ ŋ́.”

³Umósīsi le yɛ gaá lɛ odúúdú aíne mɛ́mla ukɔ́ nɛ̄ Óndú ā tū ā kpó ka lɛ ācɛ kú Ísrɛ̄lu ā. Anɔ́ɔ odúúdú ācɛ ā bī ɔkɔ ékpó le tóohi kahíníī, “Alɔ géē yá odúúdú ɛlā nɛ̄ Óndú ā ka ā.”

⁴Umósīsi le odúúdú íne mɛ́mla ukɔ́ nɛ̄ Óndú ā je lɛ ɔ́ ā kpó tá tāajɛ. Anɔ́ɔ ó cāŋjɛ ɔ̄cɔ̄ɔ̄cī blibli lɛ ɛcɔ̄ igwɛ́ɛpa kpó le ede gwó ikpó ɛfu ā, ɛcɔ̄ éyééye kwɛyí ipɔ́ɔma éyééye kú Ísrɛ̄lu ā.

⁵Anɔ́ɔ ó le ayípōklóbīya tɛ̄hɔ̄ kéē bī aɔ́bɛ́ɛna le ɛya o yɔlá dúúdú mɛ́mla ɛya kú ɛbɔ́ gwó lɛ Óndú ā.

⁶Umósīsi kwú ohɛ́ɛpa kú oyī kú ɛbɛ́ ā ú pīya tū aócíbú, anɔ́ɔ ó kwú áyā ɔhá ā í cē klá ede ā.

⁷Anɔ́ɔ ó kwū ɔkpá kú Okónu ōce ā ú, anɔ́ɔ ó le ɔ́ jé tɛ́ɛcɛ lɛ ācɛ ā kéē pó á. Anɔ́ɔ odúúdú ācɛ ā tóohi kahíníī, “Alɔ géē lɛyítáajɛ lɛ Óndú, alɔ klla í yá ɛjɛ̄ɛ̄jī ɛlā nɛ̄ó da alɔ ā.”

⁸Anɔ́ɔ Umósīsi kwú oyī ā ú, le ɔ́ mī klla ācɛ ā. Anɔ́ɔ ó kahíníī, “Okónu nɛ̄ Óndú ā ce mla aá eko nɛ̄ó je aíne ā, oyī nyā he ɔ́ gwū á.”

⁹Umósīsi, Árɔ̄ni, Unádābu mɛ́mla Abíhu mɛ́mla anyākwɔ́cɛ ofɛtá cigwó kú ācɛ Ísrɛ̄lu ā, le tíicō ɛfu ɛgiyí Óndú ā.

¹⁰Anɔ́ɔ é le Ɔwɔicō kú Ísrɛ̄lu ā má. Ɛháajɛ ikpó kú nū wɛ ɔdā nōo lɛbɛ̄ɛka ubɔ́ nēé ma mla ɛcɔ̄ o gbɔɔ́lá nēé hī usáfāya nōo wɛ ublúu bɛ̄ɛka ɔkpáncō ā.

¹¹Ɔwɔicō í yá aótrɛ̄yí kú ācɛ nēe bá nyā ɔdā dúúmā ŋ́. É le Ɔwɔicō má eyī, anɔ́ɔ é le ɔdōlé lé klla le gwá tɔ̄há á.

¹²Óndú ā da Umósīsi kahíníī, “Wā icō ɛfu ɛgiyí um, abɔ̄ a klá amānyā a, N géē kpó isiléti kú ɛcɔ̄ nɛ̄ n tá aíne o bī lɛ tū ācɛ ɔlɛ́ um ukɔ́ tū ɔ̄ ā gā awɔ.”

¹³Umósīsi mɛ́mla ɔ̄cocɛ̄hɔ̄ kú nū, Ujóssuwa le tútū, anɔ́ɔ Umósīsi gbɔɔ́ ō tīīcō ga icō ɛfu kú Ɔwɔicō āa.

¹⁴Umósīsi da aótrɛ̄yí kú ācɛ ā kahíníī, “Aá gbēyī alɔ amanyā jāā gbéeko nɛ̄ alɔ pīyɛyí. Árɔ̄ni mɛ́mla Uhɔ́ɔ yɔ̄ amanyā mla aá, ɔ̄cɛ dóódu nōo lɛ ɛpɔ̄ dúúmā kóō nyɔ̄ ɛgiyí uwā.”

¹⁵Umósīsi le yɛ tá ɛyí ɛfu ā. anɔ́ɔ ojuja gaá klá ɛfu ā á.

¹⁶Ɔlá ōfíyajɛ oceyī o cābɔ̄ ka Ɔwɔicō ɔ́ɔ yɔ̄ ɛga éyi ā, gāajɛ ɛyí ɛfu ā. Ācɛ kú Ísrɛ̄lu má ɔlá ā lɛbɛ̄ɛka ɔlá nōo yɔ̄ ī yi ɛyí ɛfu ā. Ojuja ā klá ɛyí ɛfu ā ɛ̄cī ɛhīlī, anɔ́ɔ ɛ̄cī ɔ́mahāapa ā, Óndú le Umósīsi hīgwú ŋmá ipú ojuja ā.

¹⁷Oōmá kú ɛgahi kú Ɔwɔicō, ɛyí ɛfu ā lɛbɛ̄ɛka ígblɛ́nyī ɔlá, ɛyí ɛfu ipú eyī kú odúúdú ācɛ kú Ísrɛ̄lu ā.

¹⁸Umósīsi le tíícō ga ɛyí ɛfu ga ipú ojuja ā. Umósīsi yɔ̄ ɛyí ɛfu ā ɛ̄cī ofɛpa, mla otú ofɛpa.