Read idoma OŌYƐBƐ̄CƐ 25 Bible Online

OŌYƐBƐ̄CƐ 25 - idoma bible

OŌYƐBƐ̄CƐ 25

¹Óndú ā da Umósīsi ka,

²“Le ka lɛ ācɛ kú Ísrɛ̄lu kéē lɛ ɛya gwó gā um. Mīyɛ ɔdā kú ɛ̄gbā dóódu ŋmá ɛgiyí ɔ̄cɛ dóódu nɛ̄ ɔtū kú nū miya lɛ ɔ́ kóō je ā.

³Ɔdā kú ɛ̄gbā nāa í mīyɛ ŋmá ɛgiyí uwá yɔ̄ á, ugóolu (oje ɔdɔ), oje nɛ̄hɛ́ mɛ́mla oje udɔ.

⁴Īlī mlɛ́mlɛ́, lɔɔlɔhi, īlī odufā, īlī ɔgalúlā, mɛ́mla īlī nɔwā, mɛ́mla īlī nɛ̄ uwá yá ŋmá ɔnwū kú ɛwū.

⁵Ɔkpá kú omlede o tɛ̄ɛ̄tū nɔwā nōo le ŋmó, ɔkpá ɛwū, ɔcí kú akésiya,

⁶anɔ̄ ō le tū agege, mɛ́mla anɔ̄ ɔtulalī ō le tū ɔ̄cɛ ɛyí mɛ́mla ɔtulalī ō kpóocu,

⁷ɛcɔ̄ ō gbɔɔ́lá nēé hī ucanɛ́liyan ā mɛ́mla aɛ́cɔ̄ ō gbɔɔ́lá ɔhá nēé gē lɛ wu ipú ɛ́fɔ̄du ō playi ɔtū kú ɔ̄cogwɛ́ɛya ā, mɛ́mla ipú ɛkpa ō bɔ́ɔtū kú nū a.

⁸Ācɛ ā géē gwó Áklɔ̄kpīihɔ gā um, nɛ̄ n géē lā mla uwá.

⁹A géē gwó Áklɔ̄kpīihɔ ā klla í yá aíyó kú nū ɔwɛ nɛ̄ n géē mafú gā uwɔ ā.

¹⁰Aá lɛ ikpati gbā ŋmá ɔcí kú akésiya ā. Olīkpō kú nū kóō wɛ, ɔwá kú nū kóō wɛ ikpó ɛpa ce āyā, olicō kú nū kóō wɛ ikpó ɛpa ce āyā.

¹¹Lɛ ugóolu (oje ɔdɔ) ma plá iyēpú mɛ́mla iyɛ̄cɛ kú nū, cɛ́ɛ́ a lɛ oje ɔdɔ tíína tū ɔ̄ biílí.

¹²Lɛ eliká kú ugóolu (oje ɔdɔ) nēé géē bī le je ɔ́ ŋmá ajɛ kē bī ɔ̄ ī yɛ ā yá kwu ikpó ɛnɛnɛ́ɛnɛ ā, cɛ́ɛ́ kú eliká ɛpɛɛpa kóō bá abɔ̄ éyééye.

¹³Lɛ ogbló nēé gē lɛ bī ikpati ā yá ŋmá ɔcí kú akésiya, cɛ́ɛ́ a lɛ ugóolu (oje ɔdɔ) ma plá anú iyē.

¹⁴Kéē kwú ogbló ā í wu ipú eliká nēe playi áklō ɛplɛ́ɛpa kú ikpati ā.

¹⁵É géē hābɔ̄ aógbló ā tá wu ipú aéliká. É gáā pi ɔ́ ŋmá anú ŋ́.

¹⁶Cɛ́ɛ́ a kwú usiléti ɛpa kú ɛcɔ̄ nēé tá aíne tū ɔ̄, nɛ̄ n géē kpó gā uwɔ̄ ā í kpó tū ipú nū.

¹⁷A géē bī ugóolu (oje ɔdɔ) le yá ɛgocīce kú eyīnyinyi tū ikpati ā. Olikpō kú nū kóō wɛ ekābɔ̄ ofɛhɔ̄ cigwó, olɔwá kú nū kóō wɛ ekābɔ̄ ofɛtá ce ɛhīlī.

¹⁸A géē bī ugóolu (oje ɔdɔ) nēé bī omútāgā cabɔ́há ā le yá ojibó kú Ucérūbim, tū áklɔ̄ ɛplɛ́ɛpa, cɛ́ɛ́ kéē háyi áklɔ̄ ɛplɛ́ɛpa kú ikpati ā.

¹⁹Ucérūbim éyééye géē háyi áklɔ̄ éyééye kú ɔ̄wū kú ikpati ā. A géē yá odúúdú uwā cɛ́ɛ́ kéē wɛ ékpónú tɔ̄há kwɔhá mla ɔ̄wū nū.

²⁰Ucérūbim ɛpa ā géē lɛ acá kú uwá nāńda klá ɔ̄wū kú ikpati ā kúē géē pīyeyī tá iyī uwā. Cɛ́ɛ́ acá kú uwá nōo nāŋdaa ā géē klá ɛyí ɔ̄wū ā.

²¹Kwú isiléti kú ɛcɔ̄ ā ú kpó tū ipú ikpati ā, cɛ́ɛ́ a kwú ɔ̄wū ú klá ɛyí nū.

²²N géē jīla mla uwɔ, n kē í je odúúdú aíne kú um lɛ ācɛ kú Ísrɛ̄lu ŋmá icō kú ɔ̄wū, ɛplá kú Ucérūbim ɛpa nēe háyi ābɔ̄ ɛplɛ́ɛpa kú ikpati ā.

²³Ɔwɔicō klla da Umósīsi kahíníī, “Lɛ utébulu gbā ŋmá ɔcí kú akésiya. Olīkpō kú nū kóō wɛ ekābɔ̄ ofɛnɛ ce ahātá, olɔwá kú nū kóō wɛ ekābɔ̄ ofɛpa ce ɛnɛ. Olicō kú nū kóō kē wɛ ofɛtá ce ɛhīlī.

²⁴Lɛ ɔ́ plla mla ugóolu (oje ɔdɔ). A klla í bī ugóólū (oje ɔdɔ) ā le hijā tū ókónu nū biílí.

²⁵Lɛ ɔcí gbā ce okónu nū biílí nɛ̄ olɔwá kú nū géē wɛ ayíkābɔ̄ éyi. A klla géē ma ugóólu (oje ɔdɔ) klá anú biílí dúú.

²⁶Lɛ eliká ɛnɛ kú ugóólu (oje ɔdɔ) nēé géē bī le je ɔ́ yá kwu ákló ɛnɛ kú ikpó ɛnɛnɛ́ɛnɛ kú nū.

²⁷Ɛliká nɛ̄é géē lɛ ogbló nōo géē bī utébulu ā wu ɔ́ ā kóō kwu ɛgiyí akā nōo ce okónu nū ā ajaajɛ.

²⁸Lɛ ogbló kú ɔcí kú akésiya gbā, ká ā lɛ ugóólu (oje ɔdɔ) ma plla anú.

²⁹Lɛ ocíbú, íkókwū, ɔjá, mɛ́mla ógo nēé gē bī eko nēé gē gwɛ́ɛya kú ejé ā tútū. A géē bī ugóólu (oje ɔdɔ) ya odúúdú uwā.

³⁰A géē je utébulu ā háyi iyɔ̄bū kú ikpati kú Okónu ō ce ā. Igbō otīihɔ kú um ā kóō cɛyí utébulu ā eko dóódu.”

³¹Ó klla da ɔ́ kpɔ́ kahíníī, “Lɛ ɔdā ō lɛ agege ce ɔ́ kú ugóólu (oje ɔdɔ) yá. A géē bī ugóólu (oje ɔdɔ) lɛ īkpɛ̄yí mɛ́mla ɔkwu nū ā yá plákátáa. Lɛ ɔ́ yíifa lɔɔlɔhi mla ɛdɔ ododó ɛyɛ́ɛyɛ́yí, odúúdú nū kóō kwu ɔhá mla ɔcí ā.

³²Abɔ̄ kú nū géē wɛ ɛhīlī, ɛtá ŋmá abɔ̄ éyi, ɛtá ŋmá abɔ̄ ɔhá.

³³É géē yá íkókwū ifa bɛ̄ɛka ohépu kú ododó kú ɔcí nēé hī álumɔ̄ndu mɛ́mla oōnwūla kú ododó kú nū ā.

³⁴É géē yá oje kú ɔtāhɛ̄ kú nū ifa mla íkókwū nēé yá gbla ohépu kú ɔcí nēé hī álmɔ̄ndu mɛ́mla ododó oōnwūla kú nū.

³⁵Ododó éyééye kóō kwu ɔtāhɛ̄ kú abɔ̄ ɛtá ā.

³⁶Ohépu kú uwā mɛ́mla abɔ̄ kú uwā, géē wɛ ugóólu (oje ɔdɔ) ékpónú, nēé bī omútāgā na tɔ̄há.

³⁷Aá géē yá agege ahāapa cɛ ɔ́. A géē lɛ agege nēé yá mla ugóólu (oje ɔdɔ) ā tū gicō, cɛ́ɛ́ kóō fíyajɛ ga iyɔ̄bū.

³⁸A géē bī ugóólu (oje ɔdɔ) le yá odúúdú nū.

³⁹A géē bī ugóólu (oje ɔdɔ) nɛ̄ ogbɛnū kú nū wɛ ukílōgram ofu cigwáahātá ā lɛ yá ɔdā o lɛ agege ce ɔ́ mɛ́mla odúúdú iyo nēe bá ā.

⁴⁰Lɛ ɛlá kwu ɔ́ kú ā lɛ aɔ́dā nēe bá ā yá ɔwɛ nɛ̄ n cābɔ̄ gā uwɔ ɛyí ɛfu ā.”