Read idoma OŌYƐBƐ̄CƐ 26 Bible Online

OŌYƐBƐ̄CƐ 26 - idoma bible

OŌYƐBƐ̄CƐ 26

¹Óndú ā da Umósīsi kahíníī, “Aá bī ukɔ́tin ɛgɔ́ igwó kú aá le yá eyīpú kú Áklɔ̄kpīihɔ kú um ā ifa. Aá géē bī owú nēé hī ka ulínin ā mɛ́mla owú oblú, owú ublúcéelé, owú odufā, owú ɔgalúlā mɛ́mla owú nɔ̄wá lɛ wu ukɔ́tin ā. É géē bī abɔ̄ ɔka hiijā kú ifotó kú ɔdā ō lɛ acá nēé hī ucérūbim ā tū ɔ̄ lɔɔlɔhi.

²Aá le yá ka ukɔ́tin dóódu ā kéē jóonjīlɛ̄. Olīkpō kú nū kóō wɛ ekābɔ̄ igwɛ́ɛpa, ō lɔwá kú nū kóō wɛ ekābɔ̄ ɛpa.

³Aá í gɔ́ ɛgɔ̄ ɛhɔ̄ kú ukɔ́tin ā kwɔhá kóō le pīya ígwu éyi, a klla í yá ɔdā ékpónú ɔ́ɔmā mla aɛ́hɔ̄ o hile ā.

⁴Aá lɛ īlī odufā tíígbíngbli tū okónógwu kú iyɛ̄ɛcɛ kú ígwíígwu kú ukɔ́tin ā dúú.

⁵Lɛ íkōtō ofɛpa ce igwó flá tū ígwu kú ukɔ́tin aflɛ́yí ā. A klla í flá íkōtō ofɛpa ce igwó tū ɛgɔ́ kú ígwu ɔ́mpa kú ukɔ́tin ā, cɛ́ɛ́ kéē le jōōnjīlɛ mla ígwu kú aflɛ́yí ā.

⁶Aá lɛ uwɔ ofɛpa ce igwó kú ugóolu (oje ɔdɔ) yá, nōo géē kwú ɛgɔ́ ō gɔ́kwɔhá kú ukɔ́tin éyi mla o gɔ́kwɔhá kú ɔhá bɔ́há.

⁷Aá lɛ īlī ō lɛ klá Áklɔ̄kpīihɔ ā ɛgɔ́ igwóléyi tá ŋmá ɔnwū kú ɛwū.

⁸Aá lɛ odúúdú uwā yá jōōnjīlɛ̄. Olīkpō kú nū kóō wɛ ekābɔ̄ igwɛ́ɛtá, ōlɔwá kú nū kóō wɛ ekābɔ̄ ɛpa.

⁹Aá lɛ ɛgɔ́ ɛhɔ̄ kú nū gɔ́ kwɔhá ékpónú, aá klla lɛ ɛgɔ́ ɛhīlī kú nū ā gɔ̄ kwɔhá ékpónú. A klla í cē ɔ́mɛɛhīlī ā bá ɛpa ce iyɔ̄bū kú Áklɔ̄kpīihɔ ā.

¹⁰Lɛ íkōtō kú īlī odufā ofɛpa ce igwó tá kéē bá okónōgwu kú ígwu kú ɛgɔ́ kú ukɔ́tin éyi, íkōtō ofɛpa ce igwó o hile ā í bá ígwu kú ɛgɔ́ ukɔ́tin ɔhá ā.

¹¹Aá lɛ uwɔ ofɛpa ce igwó yá ŋmá ugóolu (oje udɔ) cɛ́ɛ́ a kwú ɔ̄ ú wu íkōtō ā kóō má kwɔhá mla īlī ō klá odée o hile ā.

¹²Kwú ohɛ́pa o hile kú īlī ā ú playi igbīhi kú Áklɔ̄kpīihɔ ā.

¹³A géē je ekabɔ̄ ofɛpa ce igwó o hile kú olīkpō kú ābɔ̄ éyééye kú īlī ā playi áklō kú Áklɔ̄kpīihɔ ā kóō má klá anú.

¹⁴A géē tá īlī ō klá odée ɛpa ɔhá kpɔ́, éyi kú nū kóō wɛ ɔkpá kú omlede ō kpó bá ɔlɛ́ɛnɔ o tɛ̄ɛ̄tū nɔ̄wá mla ɔkpɛ́bɛ́ olɔhi nɛ̄hi ɔhá, nōo géē klá iyɛ̄cɛ kú nū.

¹⁵Aá lɛ ogbló okpaakpa kú Áklɔ̄kpīihɔ ā gbā ŋmá ɔcí kú akésiya.

¹⁶Olīkpō kú ogbló éyééye ā, géē wɛ ekābɔ̄ ɛnɛ. Olɔwá kú nū kóō wɛ ekābɔ̄ ofɛtá ce ɛhīlī.

¹⁷A géē pi ogbló ā ɔkɔ́ okónu ɛpa o yá kóō wu ɔ́mpa nū gílá. Ɛ́gɔ́ɔmā nāa géē yá mla odúúdú aógbló o hile á.

¹⁸Lɛ ogbló ofu gbā, kú ābɔ̄ kú ɛháajɛ kú Áklɔ̄kpīihɔ ā.

¹⁹A géē bī oje nɛ̄hɛ́ lɛ yá ígbóoje-otáajɛ, kóō tá ɛháajɛ ogbló ā, kóō bī uwā kwɔhá.

²⁰A géē gbā ogbló ofu kóō kwu ābɔ̄ ɛhíícō kú Áklɔ̄kpīihɔ ā.

²¹A í bī oje nɛ̄hɛ́ le yá ígbóoje-otáajɛ[12] ofɛpa, ɛpɛɛpa géē yɔ̄ ɛháajɛ ogbló éyééye.

²²Lɛ ákanaba ɛhīlī yá kú igbīhi, ābɔ̄ ɛnɔ̄ɔ̄nɛ̄ kú Áklɔ̄kpīihɔ ā.

²³A klla í yá ogbló ɛpa kú ɔ́kíkā kú Áklɔ̄kpīihɔ ā.

²⁴A géē kpó ogbló kú ɔ́kīkā ā kwu ɔhá ŋmá ɛháajɛ jāā ga icō. A géē gbā ogbló ɛpa nēe í je pīya ɔ́kíkā ā, ɔwɛ ékpónú nyā dúú.

²⁵Cɛ́ɛ́ kú odúúdú ogbló ā géē wɛ ahātá mla ígbóoje-otáajɛ kú oje nɛ̄hɛ́ igwɛ́ɛhīlī kú uwā. Ígbóoje-otáajɛ ɛpɛɛpa bá ɛháajɛ éyééye.

²⁶Aá géē gbā ɔcí ogblógbló igwó ɛhɔ̄ ŋmá ɔcí kú akésiya, ɛhɔ̄ kú nū wɛ ogbló kú ābɔ̄ éyi kú Áklɔ̄kpīihɔ ā.

²⁷Ɛhɔ̄ ɔhá ā wɛ ákú ābɔ̄ ɔhá, ɛhɔ̄ ɔhá wɛ ákú ābɔ̄ kú ɛnɔ̄ɔ̄nɛ̄ kú Áklɔ̄kpīihɔ ā.

²⁸Ɔcí ogblógbló ɔhá kú ɔtāhɛ̄ ā, nōo tū gicō kwu ɔtāhɛ̄ kú ogbló ā cíkā ō yɛ ŋmá okónōgwu éyi ga okónōgwu ɔhá.

²⁹Lɛ ugóolu (oje ɔdɔ) ma plá ogbló ā. Kú ā lɛ eliká kú ugóolu (oje ɔdɔ) yá tū ɔ̄, nōo géē bī ogbló ā. A í ma ugóolu (oje ɔdɔ) plá ogbló ā dúú.

³⁰Lɛ Áklɔ̄kpīihɔ ā gwó ɛ́gɛ́nɛ̄ n mafú gā uwɔ ɛyí ɛfu nyā a.

³¹Lɛ ukɔ́tin yá mla owú odufā, owú ɔgalúlā mɛ́mla owú nɔwá. Kú ā lɛ ijā he tū ɔ̄ mla ifotó kú Ucérūbim o lɛ acá.

³²Kwú ɔ̄ ú playi ɔkpá kú akésiya nēé lɛ ugóolu (oje ɔdɔ) ma plá anú, nēé kpó uwɔ playi anú ā. É le uwá kpó kwu ígbóoje-otáajɛ kú oje nɛ̄hɛ́.

³³Kwú ukɔ́tin ā ú playi ɛháajɛ kú ɛga nɛ̄ uwɔ ā hɔ́gba ɛyí agbalú kú Áklɔ̄kpīihɔ ā. Kwú ikpati kú Okónu ō ce nɛ̄ isiléti kú ɛcɔ̄ nēé tá íne tū ɔ̄ ā ú háyi igbīhi ukɔ́tin ā. Ukɔ́tin ā géē kɔ̄ ɛga nōo tíihɔ fíyɛ́ dúú ā ŋmá ɛga o tīihɔ ɔlamu ā.

³⁴Kwú ɔ̄wū ā ú klá ikpati kú Okónu ō ce ā.

³⁵Kwú utéblu ā ú háyi eyɛ̄ɛ̄cɛ kú ɛga o tīīhɔ fíyɛ́ dúú ā, cɛ́ɛ́ kóō hayi ābɔ̄ ɛhíícō kú Áklɔ̄kpīihɔ ā. Cɛ́ɛ́ a kwú ɔdā ō lɛ agege ce ɔ́ ā ú hayi ābɔ̄ ɛháajɛ ā.

³⁶A géē yá ukɔ́tin kú okómpinu kú Áklɔ̄kpīihɔ ā ŋmá owú olɔɔlɔhi, owú odufā, owú ogalúlā mɛ́mla owú nɔwā. A géē hijā tū ɔ̄ lɔɔlɔhi.

³⁷A géē gbā ogbló ɛhɔ̄ kú ɔcí kú akésiya nēé lɛ ugóolu (oje ɔdɔ) ma plá anú, nēé klla lɛ uwɔ kú ugóolu (oje ɔdɔ) yá playi anú. A klla í yá ígbóoje-otáajɛ kú oje nɛ̄hɛ́ lɛ ogbló ā.