Read idoma OŌYƐBƐ̄CƐ 27 Bible Online

OŌYƐBƐ̄CƐ 27 - idoma bible

OŌYƐBƐ̄CƐ 27

¹Aá géē gwó ede gā um ŋmá ɔcí kú akésiya. Ó géē lɛ ɔkíkā ɛnɛ. Olīkpō kú nū géē wɛ ekābɔ̄ ɛhɔ̄. Olɔwá kú nu géē wɛ ekābɔ̄ ɛhɔ̄ dúú, olicō kú nū géē wɛ eko abɔ̄ ɛtá.

²A géē yá ajī kwu áklō kú ɔkíkā ɛnɛ kú nū ā. A géē yá ajī ā kwɔhá mla ede ā. Aá lɛ oje udɔ ma plá anú.

³A géē yá oflēnjē nē ewo kú ijē ɛbɛ́ géē pɛ́ tū ɔ̄ ā. A klla í yá ussɔ́bɛ̄lu, aócíbú, ojotíhī mɛ́mla aɔ́dōfɔ́lá. A géē bī oje udɔ lɛ yá aíyó nɛ̄ bá nyā a.

⁴Lɛ ɔdée nēé le oje udɔ wúlá-wúlá pla tū ipú nū ā yá, cɛ́ɛ́ a klla le eliká kú oje udɔ nē é géē lɛ bī ɔ̄ ā yá playi ɔ́kíkā ɛnɛ kú nū ā.

⁵Kwú ɔdā nēé le oje udɔ wúlá-wúlá pla tū ipú nū ā ú háyi ɛháajɛ kú ede ā, cɛ́ɛ́ kóō háyi ɔtāhɛ̄ o yɛ ga ɛhícō kú ede ā.

⁶Lɛ ɔcí ō le bī ɔdée kú akésiya yá, cɛ́ɛ́ a lɛ oje udɔ ma plá anú.

⁷Kwú uwā ú kpó wu aéliká neē yɔ̄ ābɔ̄ éyééye kú ede ā eko nēé ī je ɔ́ ŋmá ajɛ ā.

⁸A géē yá ede ŋmá ɔcí o pátákáá. Ó kē í lɛ ɔ̄gɔ̄, ɛ́gɛ́nɛ̄ nɛ̄ n mafú gā uwɔ ɛyí ɛfu ā.

⁹Lɛ igá kú Áklɔ̄kpīihɔ kú um ā yá mla ukɔ́tin kú īlī onɛkɛnɛkɛ olɔhi, īlī kú owú nɛkɛnɛkɛ ā. Olīkpō kú ukɔ́tin kú ābɔ̄ ɛháajɛ ā kóō wɛ ekābɔ̄ ofɛpa ce ɛnɛ.

¹⁰A géē yá ogbló ofu nēe í wu ígbóoje-otáajɛ ofu, nɛ̄ uwɔ mɛ́mla ɔ́kpa nēé yá mla oje nɛ̄hɛ́ ā géē bī ɔ̄ háyi.

¹¹Ɔdā ékpónú ɔ́ɔmā nāa géē yá ɛhíícō kú Áklɔ̄kpīihɔ ā dúú ā.

¹²Eyī ɛnɔ̄ɔ̄nɛ̄ kú Áklɔ̄kpīihɔ ā, olīkpō kú īlī ukɔ́tin ā kóō wɛ ekābɔ̄ ofu ce ɛpa, mɛ́mla ogbló igwó mɛ́mla ígbóoje-otáajɛ igwó.

¹³Eyī ɛnɔ̄ɔ̄cī kú nū, ɛga nɛ̄ okómpinu kú nū yɔ̄ ā, olɔwá kú īlī ukɔ́tin ā kóō wɛ ekābɔ̄ ofu ce ɛpa.

¹⁴Īlī ukɔ́tin kú áklō kú ɛga o bēé wā inu ā kóō wɛ ekābɔ̄ igwɛ́ɛhɔ̄ mɛ́mla ekābɔ̄ ɛtá mɛ́mla ogbló mla ígbóoje-otáajɛ kú uwā.

¹⁵Īlī ukɔ́tin kú ābɔ̄ ɔhá kú Áklɔ̄kpīihɔ ā wɛ ekābɔ̄ igwɛ́ɛhɔ̄ mɛ́mla ekābɔ̄ ɛtá, mɛ́mla ogbló ɛtá mɛ́mla ígbóoje-otáajɛ kú uwā.

¹⁶Īlī ukɔ́tin kú ókómpinu abɔ̄yī nū ā, olīkpō kú nū ā géē wɛ ekābɔ̄ ahāanɛ, nēé yá mla īlī odufā, īlī ɔgalúlā mɛ́mla īlī nɔ̄wá nēé le ijā he tū ɔ̄. Ó í lɛ ogbló ɛnɛ mɛ́mla ígbóoje-otáajɛ nēe í bī ɔ̄ háyi.

¹⁷A géē bī oje udɔ fíílí lɛ fúla odúúdú ogbló nōo yɛ igá ā jīla tá ā kwɔhá. É géē bī oje nɛ̄hɛ́ lɛ yá uwɔ ā, é kē í bī oje udɔ lɛ yá ígbóoje-otáajɛ o lɛ ogbló ā wu ipú nū ā.

¹⁸Olīkpō kú igá ā géē wɛ ekābɔ̄ ofɛpa ce ɛnɛ, olɔwá kú nū ā géē wɛ ekābɔ̄ ofu ce ɛpa, olicō kú nū ā géē wɛ ekābɔ̄ ɛpa ce āyā, é géē yá īlī ukɔ́tin ā mla īlī ulínin olɔhi nɛ̄hi. É géē bī uwɔ mɛ́mla ogbló kú oje nɛ̄hɛ́ ā lɛ flla ukɔ́tin ā playi icō.

¹⁹Odúúdú iyó nēé bī le gwó Áklɔ̄kpīihɔ ā, mɛ́mla ɔdā ō bī ɔ́ŋgbá kwaajɛ mɛ́mla igá kú nū ā, oje udɔ nē é géē bī lɛ yá ɔ̄ á.

²⁰Aá ka lɛ ayí kú Ísrɛ̄lu kéē bī anɔ̄ o lɔhi fíyɛ́ dúú kú ɔcí nēé hī ka ɔ́līfu ā wā, cɛ́ɛ́ kú agege ā kóō kwu yɔ̄ ī cɔ̄ɔ̄lá piyóó.

²¹Árɔ̄ni mɛ́mla ayí nū nɔ̄nyīlɔ ā géē lɛ ɔlá kwu agege ipú Áklɔ̄kpīihɔ kú um ā eyɛ̄ɛ̄cɛ kú īlī ukɔ́tin, n yɔ̄ iyɔ̄bū kú Ikpati kú Ɛka kú Óndú ā. Ɔlá ā géē yɔ̄ ī cɛ̄ abɔ́ɔ, ŋmá ɔ̄cɔ̄ɔ̄cī gbó ɔ̄nɔ̄ɔ̄nɛ̄. Ācɛ kú Ísrɛ̄lu géē lɛ íne nyā tū piyóó ŋmá ayááyí ga ayááyí.