Read idoma OŌYƐBƐ̄CƐ 33 Bible Online

OŌYƐBƐ̄CƐ 33 - idoma bible

OŌYƐBƐ̄CƐ 33

¹Óndú ā da Umósīsi kahíníī, “Awɔ mɛ́mla ācɛ nāa kpó bɛ̄cɛ ŋmá ajɛ kú Íjīpiti ā, kéē nyɛ̄ɛ̄ ŋmá amānyā, cɛ́ɛ́ ká aá nyɔ̄ ga ajɛ nɛ̄ n cokónu ō je lɛ Ébrahām, Áyísīki mɛ́mla Ujékɔ̄pu ā, mɛ́mla ayááyí uwā.

²N géē tū alelékwū otɛ̄hɔ̄ kú um ɛhɔ̄ kóō gbɔbū lɛ aá, ó géē nū ācɛ kú Ukénan, ācɛ Ámɔn, ācɛ Uhɛ́ti, Upɛ́risi, ācɛ Uhám, mɛ́mla ācɛ Ujébūsi bɛ̄cɛ ŋmá ajɛ ā.

³Aá yɔ̄ ī nyɔ̄ ga ipú ajɛ nōo ge gbiyē nɛɛɛ ā. Amáŋ ami ā, í gáā nyɔ̄ mla ŋ́, ohígbū nɛ̄ n géē kpó aá ŋmó. Ohígbū ka aá wɛ ācɛ o yíkpɛ̄yí olɔfú.

⁴Eko nɛ̄ ācɛ ā le ɛlā nɛ̄ Óndú ā ka pó ā, é gbɔɔ́ ō yɔ̄tū nōbí. É le abɔ̄ ci ifa ō yá mɛ́mla o kpó ɔdīfa tū iyē.

⁵Ohígbū ka Óndú ā da Umósīsi kahíníī, “lɛ ka lɛ ācɛ kú Ísrɛ̄lu, aá wɛ ācɛ olɔfú īkpɛ̄yí, ɔ́dāŋ́ ka n le yɛ mla aá lígíí, n géē kpó aá ŋmó. Abālɔbányā, aá lɛ aɔ́tángbédē kú aá plla, cɛ́ɛ́ ká n miya ɔdā nɛ̄ n géē yá mla aá.”

⁶Anɔ́ɔ é lɛ aɔ́tángbédē tū ɔkɔ eko nēé ŋmá ɛyí ɛfu kú Uhɔ́rébu ɛ́ɛ́ gɛ ŋ́.”

⁷Eko dúúmā nɛ̄ ācɛ kú Ísrɛ̄lu gaá lā ɛga dúú nɛɛ, Umósīsi gē je Áklɔ̄kpīihɔ kú Óndú ā nyɔ̄ gáā kwu ɛcɛɛcɛ ɛga oligbó ŋmá ɛga nɛ̄ ācɛ o hile lā ā. Ó gē hī ɔ̄ ka Áklɔ̄kpīihɔ kú ɛga nɛ̄ Óndú ā yɔ̄ ā. Anɔ́ɔ ɔ̄cɛ dóódu nōo dɔ̄ɔ̄ka Ɔwɔicō gē ga ɛgiyí Áklɔ̄kpīihɔ eyīyɛ̄cɛ ɛga nɛ̄ ó háyi ā.

⁸Eko dóódu nɛ̄ Umósīsi gē ga Áklɔ̄kpīihɔ ā nɛ̄, odúúdú ācɛ ā gē gaá háyi Okómpinu áklɔ̄kpɛ kú uwā gē má Umósīsi jāā gbéeko nɛ̄ó le tá ipú Áklɔ̄kpīihɔ ā.

⁹Eko dóódu nɛ̄ Umósīsi le bēé ga ipú Áklɔ̄kpīihɔ ā, ɔ́kpa kú Ojuja gē gáā klá ɔwɛ kú Áklɔ̄kpīihɔ ā, cɛ́ɛ́ Óndú ā gē kɛlā lɛ Umósīsi ŋmá ipú ojuja ā.

¹⁰Ɔkwɔɔkwu nɛ̄ ācɛ ā le ɔ́kpa kú ojuja ā má okómpinu kú Áklɔ̄kpīihɔ ā, odúúdú ācɛ ā gē túkpɛɛ́ ī gbā Óndú ā ɛ̄gbā.

¹¹Óndú ā gē leyīkwu Umósīsi eyī gē kɛlā mla anú bɛ̄ɛka ɔ̄cɛ mla oklóbīya nū ā. Cɛ́ɛ́ Umósīsi le pīyɛyí wā ɛga nɛ̄ ācɛ o hile bá ā. Amáŋ ɔyípōklóbīya éyi, Ujóssuwa, ɔyí kú Unɔ́n nōo gē tá Umósīsi abɔ̄ ā, gē klá igbīhi ɛgiyí Áklɔ̄kpīihɔ ā.

¹²Umósīsi da Óndú ā kahíníī, “Ó wɛ ɛlā ɔ̄kwɛ̄yi ka le da um ka n lɛ ācɛ nēe bá nyā bītá ga ajɛ ɔ́ɔmā, amáŋ á kē da um ɔ̄cɛ nōo í lɛ um bíyē ā ŋ́. A ka anúɔ jé um lɔɔlɔhi, ɛlā um kē he uwɔ ɔtū.

¹³Abālɔbányā, lɛ ɔdā nāa miya ipú ɔtū kú uwɔ ka anúɔ gaá yá ā ka gā um, cɛ́ɛ́ ká n̄ cɛ̄ uwɔ ɛhɔ̄, ká n̄ yɔ̄ ī yá ká ɔtū kóō he uwɔ. Bla ka a le éwo nyā fu kóō wɛ ákú abɔ̄yī uwɔ.”

¹⁴Anɔ́ɔ Óndú ā kahíníī, “Ami abɔ̄yī um géē nyɔ̄ mla awɔ, n kē í je omlɛ́nyɔ́ ga uwɔ.”

¹⁵Anɔ́ɔ Umósīsi tá ɔ̄ ohi kahíníī, “Ɔ́dāŋ́ ka á gáā nyɔ̄ mla alɔ ŋ́, ā cɛ̄ kú alɔ fu ajɛ ŋmá amānyā ŋ́.

¹⁶Ɔwɛ nyá nɛ̄ ɔ̄cɛ géē jé ka ɛlā kú ācɛ ɔlɛ́ uwɔ mɛ́mla ɛlā kú um, he uwɔ ɔtū ā, ɔ́dāŋ ka á nyɔ̄ mla alɔ ŋ́ mā ā? O yɔ̄ pī alɔ kú uwɔ ā, í mafú ka alɔ wɛ ācɛ ɛyɛ́ɛ́yí hī ācɛ o hile nēe bá ipú ɛcɛ nyā tá.”

¹⁷Óndú ā da Umósīsi kahíníī, “N géē yá ɛ́gɛ́nɛ̄ a dɔɔ̄ka lɛ ā, n jé uwɔ lɔɔlɔhi, ɛlā kú uwɔ klla he um ɔtū.”

¹⁸Anɔ́ɔ Umósīsi da ɔ́ kahíníī, “Kóocōō, cɛ̄ ká n̄ lɛ ɔlá ōceyī ŋmaáŋmaá nōo mafú ka a yɔ̄ ɛgée ā má.”

¹⁹Óndú ā tóohi da ɔ́ kahíníī, “N géē wā í yɛ iyɔ̄bū uwɔ cɛ́ɛ́ ká ā má ɛ́gɛ́nɛ̄ oōlɔhi mɛ́mla ohéyīfuú kú um lɛ āa. N kē í hī iyē ōtīihɔ kú um gā uwɔ. Ami wɛ Óndú ā á, n gē gbonɛnɛ klla ī ményinyi ācɛ nɛ̄ n fu ā.

²⁰Amáŋ, ń gáā cɛ̄ gā uwɔ má eyī kú um ŋ́, ohígbū ka ɔ̄cɛ nōo lɛ um má eyī géē kwú.”

²¹Óndú ā da ɔ́ kahíníī, “Ɛga éyi yɔ̄ ɛgiyí um, nāa géē mahayi ɛyí ɛcɔ̄ ā;

²²Eko nɛ̄ ɔlá ō mafú ka Óndú ā yɔ̄ ɛgée ā wā gaá le yɛ. N géē je uwɔ hayi ipú ɔ̄gɔ̄ kú ápátɛ́cɔ̄, cɛ́ɛ́ n lɛ abɔ̄ klá awɔ jāā gbéeko nɛ̄ n gaá lɛ yɛ.

²³Cɛ́ɛ́ n géē je abɔ̄ kú um ŋmá eyī kú uwɔ, cɛ́ɛ́ a géē má igbīhi kú um, amáŋ á gáā má eyī kú um ŋ́.”