Read idoma OŌYƐBƐ̄CƐ 35 Bible Online

OŌYƐBƐ̄CƐ 35 - idoma bible

OŌYƐBƐ̄CƐ 35

¹Umósīsi lɛ odúúdú ójila kú ācɛ kú Ísrɛ̄lu ā túbá, anɔ́ɔ ó da uwá kahíníī, “Ɛ̄nyā wɛ ɔdā nɛ̄ Óndú ā je ɔ́da lɛ aá ká aá yá.

²Ɛ̄cī ɛhīlī nɛ̄ aá géē yúklɔ́ á. Amáŋ ɛ̄cī ɔ́mahāapa ā kóō wɛ ɛ̄cī ō tīihɔ, ɛ̄cī ihɔ kú omlɛ́nyɔ́ nēé je táajɛ lɛ Óndú ā. Ɔ̄cɛ dóódu nōo le úklɔ́ yá ɛ̄cī ɔ́ɔmā, ē géē je ɔ́ ŋmó.

³Aá gáā yá ɔdōlé dúúmā ɔlɛ́ aá ɛ̄cī Usábāti ā ŋ́.”

⁴Umósīsi le ka lɛ odúúdú ójila kú ācɛ Ísrɛ̄lu kahíníī, “Ɛ̄nyā wɛ íne nɛ̄ Óndú ā je á.

⁵Aá je ɔdā ɛ̄gbā lɛ Óndú ā. Ɛjɛ̄ɛ̄jī ācɛ nēe dɔ̄ɔ̄ka kéē je ā, kéē bī ɔdā ɛ̄gbā kú ugóolu (oje ɔdɔ), oje nɛ̄hɛ́, ámāŋ ka oje udɔ.

⁶Īlī nɛ̄hɛ́, īlī odufā, īlī ɔgalúlā, īlī nɔwā, mɛ́mla īlī kú ɔnwū ɛwū.

⁷Mla ɔkpá omlede otɛ̄ɛ̄tū nɔwā, mɛ́mla ɔkpa ɛbɛ́ ɔhá, mɛ́mla ɔcí kú akésiya.

⁸Anɔ̄ ō le tū agege, anɔ̄ ōtīihɔ mɛ́mla anɔ̄ kú ɔtulalī umuumu ōkpóocu,

⁹Ɛcɔ̄ kú ukámlin, mɛ́mla ɛcɔ̄ aɔ́tangbédē ɔhá nēé géē je wu ipú awulú kú ɔ̄cogwɛ́ɛya, mɛ́mla ɛkpa o bɔ́tū nē é hī ka ɛ́fɔ̄du ā.”

¹⁰Odúúdú ācɛoyúklɔ́ abɔ̄ nēe bá ipú aá ā, géē wā í yá ɔdā dóódu nɛ̄ Óndú ā ka ā.

¹¹Iyó kú Áklɔ̄kpīihɔ ā bá yɔ̄ á, īlī ukɔ́tin kú nū, ɔdā ō klá anú eyɛ̄cɛ, uwɔ ō bī ɔcí kú nū, ɔcí ogblógbló kú nū, aɔ́kpá mɛ́mla ígbóoje-otáajɛ kú uwā.

¹²Ikpati kú Ɛka kú Óndú ā, ogbló kú nū, ɔdā ō klá anú ɛyí, mɛ́mla ɛga ocīce kú eyīnyinyi kú nū.

¹³Utébulu mɛ́mla ɔcí kú nū mɛ́mla odúúdú iyó kú nū ɔhá ā. Igbō nēé gē je kú ɛ̄gbā lɛ Ɔwɔicō ā wɛ dúú.

¹⁴Ɔdā ō lɛ agege ce ɔ́, mɛ́mla odúúdú iyó kú nū. Agege mɛ́mla anɔ̄ ō lɛ tū ɔ̄.

¹⁵Ede ō yi ɔtulalī umuumu ɔlá ɛyí nū mɛ́mla ogbló kú nū, anɔ̄ ōtīihɔ, ɔtulalī umuumu o kpóocu, ukɔ́tin o klá ɔwɛ kú Áklɔ̄kpīihɔ ā.

¹⁶Ede o gwɛ́ɛya ō yɔlá ɛyí nū, mɛ́mla oje udɔ o pla fíílífíílí nēé gē lɛ wu ɔ́ áklō, ogbló kú nū mɛ́mla odúúdú iyó kú nū, ɔgbanjɛ o le na abɔ̄ mɛ́mla ɛga ō háyi kú nū.

¹⁷Ukɔ́tin kú igá kú Áklɔ̄kpīihɔ ā, ɔ́kpa kú nú mɛ́mla ígbóoje-otáajɛ kú nū, ukɔ́tin kú okómpinu kú Áklɔ̄kpīihɔ ā.

¹⁸Ɔcí ō hɛ́tājɛ mɛ́mla ɔ́ŋgbá kú Áklɔ̄kpīihɔ ā.

¹⁹Mla odúúdú aɔ́dīifa lɔɔlɔhi nɛ̄ ɔ̄cogwɛ́ɛya gē lɛ wiiye eko nēé gē yúklɔ́ ɛga otīihɔ ā. Aɔ́dōwiyē ō tīihɔ kú Árɔ̄ni ɔ̄cogwɛ́ɛya ā mɛ́mla ákú ayīnɔ̄nyīlɔ kú nū.”

²⁰Anɔ́ɔ odúúdú ójila kú ācɛ Ísrɛ̄lu ā le pɛ́ nyɛ̄ɛ̄ ŋmá ɛgiyí Umósīsi á.

²¹Anɔ́ɔ ɛjɛ̄ɛ̄jī ācɛ nēe dɔɔ̄kā ō bī ɔdā ɛhi nēé géē lɛ gwó Áklɔ̄kpīihɔ ɛga nɛ̄ Óndú ā yɔ̄ ā, le kpó wā. É le odúúdú ɔdā dóódu nēe cɛgbá kéē lɛ gbā Óndú ā ɛ̄gbā mɛ́mla ɛ̄nɛ̄ é géē gɔ́ ɔdōwiyē kú ācogwɛ́ɛya ā kpó wā.

²²Odúúdú ācɛ nɛ̄e dɔɔ̄kā ō je, kwu ācɛnyīlɔ mɛ́mla ācɛnyā, bī aágá o bī yíifa, aɔ́dōplahɔ́, aéliká, aágbá ō tɔ̄ɔkɔ, mɛ́mla aɔ́dīifa kú ugóolu (oje ɔdɔ) ɛyɛ́ɛ́yɛ́yí, anɔ́ɔ é kwú uwā ú kpó lɛ Óndū á.

²³Ɛjɛ̄ɛ̄jī ācɛ nōo lɛ īlī odufā, īlī nɔwā, mɛ́mla īlī ɔgalúlā, īlī ɔnwū kú ɛwū, mɛ́mla ɔkpá omlede nēé le tɛ̄ɛ̄tū nɔ̄wá, ámāŋ ka ɔkpɛ́bɛ́ olɔhi ɔhá ā, anɔ́ɔ é le uwá kpó wā á.

²⁴Ɔ̄cɛ dóódu nōo je ɔdā ɛ̄gbā kú oje nɛ̄hɛ́ ámāŋ, ákú ugóolu (oje ɔdɔ) glá ā le bī gé lɛ Óndú ā. Ācɛ dóódu nēe lɛ ɔcí kú akésiya ā le uwá kpó wā.

²⁵Odúúdú ācɛnyā nēe jé ō tá īlī ā le owú kú ɔgalúlā, owú odufā, mɛ́mla owú nɔwā nēé tá ā kpó wā.

²⁶É klla bī ɔnwū ɛwū ā le tá owú.

²⁷Aótrɛ̄yí ā le ɛcɔ̄ ogbɔɔ́lá kú Onīsi, mla ɛcɔ̄ ɔtángbédē mɛ́mla ɛcɔ̄ ogbɔɔ́lá ɔhá nēé gē kpó kwu ɛ́fɔ̄du ō bɔ́tū mɛ́mla īlī ō klá acá kú ɛ́fɔ̄du ā,

²⁸mɛ́mla anɔ̄ ɛyɛ́ɛyɛ́yí, mɛ́mla anɔ̄ ō le tū agege, mɛ́mla anɔ̄ ō tīihɔ, mɛ́mla ɔtulali umuumu okpóocu kpó wā.

²⁹Odúúdú ācɛnyīlɔ mɛ́mla ācɛnyā kú Ísrɛ̄lu ā, nɛ̄ ɔtū he uwá kéē bī ɔdā dóódu wā, ohígbū úklɔ́ nɛ̄ Óndú ā je ɔ́da lɛ Umósīsi kóō yá ā, le ɔdā dóódu kú ɛ̄gbā kú uwā, kpó wā gé lɛ Óndú ā.

³⁰Anɔ́ɔ Umósīsi da ācɛ kú Ísrɛ̄lu ā kahíníī, “Áa má ɔ̄, Óndú ā le Ubɛ́sālelu, ɔyí kú Úri, ɔyí kú Uhɔ́ɔ nōo ŋmá ipɔ́ɔma kú Ujúda ā, hīīgwú ɛɛ́.

³¹Ɔwɔicō le ɔ́ tū mu mla ɔfú kú nū,[19] ó klla je ɔdā ímlɛ́ ō yá, íjééyī, mɛ́mla ɔdā o jé, kú úklábɔ̄ dóódu lɛ ɔ́.

³²Ká ō miya ɔdīifa, cɛ́ɛ́ kóō yá uwā ŋmá ugóolu (oje ɔdɔ), oje nɛ̄hɛ́ mɛ́mla oje udɔ.

³³Ó lɛ ɔfú kú ɛcɔ̄ ifa ō gbā kóō kpó kwu īlī, ákú ɔcí ōgbā mɛ́mla ɛdɔ úklábɔ̄ dóódu.

³⁴Ó klla je ɔfú lɛ anú mɛ́mla Oholíyābu, ɔyí kú Ahísamāki nōo ŋmá ipɔ́ɔma kú Udán ā.

³⁵Ó le uwá tū mu mla íjééyī, cɛ́ɛ́ kéē yá ɛdɔ úklábɔ̄ dóódu, mla ijā abɔ̄ ō he dóódu kú odufā, ɔgalúlā, mɛ́mla ɔnɔwā, īlī nɛhɛ̄ ō tá ígbíngbli, amáŋ īlī ō tá, mɛ́mla ɛdɔ úklɔ́ ímlɛ́ kú ācɛ ō hijā tū aɔ́dā dóódu.”