Read idoma OŌYƐBƐ̄CƐ 36 Bible Online

OŌYƐBƐ̄CƐ 36 - idoma bible

OŌYƐBƐ̄CƐ 36

¹Ubɛsálilu, Oholíyābu mɛ́mla odúúdú ācɛ nɛ̄ Óndú ā je ɔfú mɛ́mla ɔdōōjé lɛ uwá ā, ācɛ nōo jé ō yá ɛjɛ̄ɛ̄jī ɔdā dóódu nēe cɛgbá kéē le gwó Áklɔ̄kpīihɔ ā, géē yá uwā ɛ́gɛ́nɛ̄ Óndú ā cābɔ̄ lɛ uwā ā.

²Anɔ́ɔ Umósīsi lɛ Ubɛsálilu, Oholíyābu mɛ́mla odúúdú ācɛ dóódu nēé kpó ɔfú lɛ uwá, nēe tútū kéē tábɔ̄ ā kpó hīgwú. Anɔ́ɔ Umósīsi da uwá kéē gbo úklɔ́ ā.

³É mīyɛ odúúdú ɔdā ɛ̄gbā nɛ̄ ācɛ kú Ísrɛ̄lu kpó wā kéē lɛ gwó Áklɔ̄kpīihɔ ā ŋmá ɛgiyí Umósīsi. Amáŋ ācɛ kú Ísrɛ̄lu yɔ̄ gē kpó ɔdā ɛ̄gbā kú uwā wā ɔ̄cɔ̄ɔ̄cī dóódu kpɔ́.

⁴Anɔ́ɔ odúúdú ācɛ nēe bá yɔ̄ gē yúklɔ́ kú Áklɔ̄kpīihɔ nyā le pɛ́ tá ɛgiyí Umósīsi.

⁵Anɔ́ɔ é da Umósīsi kahíníī, “Ācɛ ā bá ī kpó iyó kú úklɔ́ ā wā fíyɛ́ ɛ̄nɛ̄ o cɛgbá ō bī yúklɔ́, nɛ̄ Óndú ā da alɔ ka ālɔ̄ yá ā ɛɛ́.”

⁶Anɔ́ɔ Umósīsi le ɔna tá ga ɛga dóódu nɛ̄ ācɛ ā bá ā kahíníī, “Ɔ̄cɛ dúúmā kóō bī ɔdā dúú wā ohígbū ō gwó kú Áklɔ̄kpīihɔ ā ɛ́ɛ́ gɛ ŋ́.” Anɔ́ɔ ācɛ ā í bī ɛ̄gbā ɔhá wā gɛ ŋ́ má.

⁷Ohígbū ka iyó kú úklɔ́ nēé kpó wā ā, le cabá ō bī le yá ɛjɛ̄ɛ̄jī úklɔ́ kú Áklɔ̄kpīihɔ ā.

⁸Ācɛ nēe jééyī kú úklɔ́ ímlɛ́ fíyɛ́ dúú ā, le Áklɔ̄kpīihɔ kú ɛga nɛ̄ Óndú ā yɔ̄ ā gwó. É yá ɔ̄ ŋmá ohí kú īlī nɛ̄hɛ́ igwó nēé wu tɔ̄há mla owú odufā, owú ɔgalúlā, klla lɛ ijā he tū ɔ̄ mla ifotó kú Ucérūbim.

⁹Ohí éyééye kú odúúdú īlī ā jōnjīlɛ, olīkpō kú nū wɛ ekābɔ̄ igwɛ́ɛpa, olɔwá kú nū wɛ ekābɔ̄ igwɛ́ɛpa dúú.

¹⁰É le ohí ɛhɔ̄ kú īlī ā gɔ́ kwɔhá kóō le pīya ígwu éékpó, ɔdā éékpó ɔ́ɔmā nēé yá mla ohí ɛhɔ̄ o hile ā dúú á.

¹¹É le ɔ́ŋgbá kú owú odufā otíkōtō gɔ́ tū okónōgwu ikpó kú nū eyɛ̄cɛ mla eyīpú.

¹²É le íkōtō ofɛpa ce igwó gɔ́ kwu ohí aflɛ́yí kú ígwu aflɛ́yí kú īlī ā, mɛ́mla íkōtō ofɛpa ce igwó nēe jɔ̄njīlɛ̄ mla ohí ámōōmɛ kú ígwu ɔ́mpa ā.

¹³É lɛ uwɔ kú ugóolu (oje ɔdɔ) ofɛpa ce igwó yá, nēé géē bī le kwú āyā kú īlī éyi bɔ́há.

¹⁴É bī ɔnwū kú ɛwū le ohí kú īlī igwóléyi ā tá, kóō lɛ pīya īlī ō lɛ klá Áklɔ̄kpīihɔ ā.

¹⁵É tá odúúdú īlī ā jōnjīlɛ̄, olīkpō kú nū wɛ ekābɔ̄ igwɛ́ɛtá, olɔwá kú nū wɛ ekābɔ̄ ɛpa.

¹⁶É le ohí ɛhɔ̄ kú īlī ā gɔ́ kwɔhá kóō kwú pīya ígwu éyi, é klla le ɛhīlī kú nū gɔ́ kwɔhá kóō kwú pīya ígwu ɔhá.

¹⁷É le íkōtō kú owú odufā ɔfɛpa ce igwó tá playi éyi, é kē le ofɛpa ce igwó ɔhá tá playi ɔhá.

¹⁸É lɛ uwɔ ofɛpa ce igwó kú ugóolu (oje ɔdɔ) yá kóō lɛ īlī ā kwú bɔ́há kéē wɛ ékpónú.

¹⁹É klla le ɔdā ō klá ede ɛpa ɔhá yá kpɔ́, é yá éyi ŋmá ɔkpá omlede otɛ̄ɛ̄tū nɔwá, ɔhá ŋmá ɔkpá kú ɛbɛ olɔhi nɛ̄hi ā nē é géē lɛ ɔ́ klá eyīyɛ̄cɛ kú Áklɔ̄kpīihɔ ā.

²⁰É le ɔ́kpa kú ɔcí kú akésiya gbā lɛ Áklɔ̄kpīihɔ ā.

²¹Olicō kú ɔ́kpa dóódu wɛ ekābɔ̄ ɛnɛ, olɔwá kú nū lɛbɛ̄ɛka ekābɔ̄ éyī ce āyá.

²²É le ɔ́kpa ā piyɔkɔ́ ɛga ɛpa nēé géē je uwá kwɔhá glá gbā. Odúúdú ɔ́kpa ā wɛ ō piyɔkɔ́ ɛga ɛpa nyā kpɛ́mm.

²³É gbā aɔ́kpá ofu kú ɛháajɛ kú Áklɔ̄kpīihɔ ā.

²⁴Ígbóoje kú oje nɛ̄hɛ́ o táajɛ nēe í bá ɛháajɛ aɔ́kpá ā, ígbóoje ɛpɛɛpa nōo í bī ɛgōpiyɔkɔ́ kú ɔ́kpa ā háyicō é le yá dúú.

²⁵É gbā aɔ́kpá ofu kú ɛhíícō kú Áklɔ̄kpīihɔ ā,

²⁶mɛ́mla ígbóje nɛ̄hɛ́ o táajɛ ofɛpa, ɛpɛɛpa wɛ ákú ɔ́kpa éyééye.

²⁷É gbā aɔ́kpá ɛhīlī kóō kwu igbīhi kú ābɔ̄ ɛnɔ̄ɔ̄nɛ̄ kú Áklɔ̄kpīihɔ ā,

²⁸mɛ́mla ɔ́kpa ɛpa kú ɔ́kíkā kú Áklɔ̄kpīihɔ ā.

²⁹Aɔ́kpa kú ɔ́kíkā ā kwɔhá ŋmá ɛháajɛ jāā ga ɛhíícō. Aɔ́kpa ɛpa nēe je pīya ɔ́kíkā kú inū ā ɛ́gɔ́ɔmā nēé gbā uwā lɛ á.

³⁰Odúúdú aɔ́kpá ā wɛ ahātá, mɛ́mla ígbóoje-otáajɛ kú oje nɛ̄hɛ́ igwɛ́ɛhīlī, ɔ́kpa éyééye wu ígbóoje-otáajɛ ɛpɛɛpa.

³¹É le ɔcí ō tū ɔlɛ́ ɔkɔ igwɛ́ɛhɔ̄ gbā ŋmá ɔcí kú akésiya, ɛhɔ̄ wɛ ákú aɔ́kpá kú ābɔ̄ éyi kú Áklɔ̄kpīihɔ ā,

³²ɛhɔ̄ ɔhá kē wɛ ákú aɔ́kpá kú ābɔ̄ ɔhá, ɛhɔ̄ wɛ ákú igbīhi ɛnɔ̄ɔ̄nɛ̄ kú Áklɔ̄kpīihɔ ā.

³³Ɔcí ō tū ɔlɛ́ ɔkɔ kú ɔtāhɛ̄ kúo tá gicō kú aɔ́kpá ā, ŋmá okónōgwu éyi kú Áklɔ̄kpīhɔ ga okónōgwu ɔhá.

³⁴É le ugóolu (oje ɔdɔ) ma plá aɔ́kpá ā le aéliká kú ugóolu (oje ɔdɔ) kpó playi uwá kéē bī ɔcí ō tū ɔkɔ kú ɔlɛ́ nēé ma ugóolu (oje ɔdɔ) plá anú dúú ā.

³⁵É le ukɔ́tin kú īlī nɛ̄hɛ́ tá, lɛ ɔ́ wu tɔ̄há mla owú odufā, owú ɔgalúlā mɛ́mla owú nɔ̄wá. É klla le ijā kú ifotó kú Ucérūbim wu tū ɔ̄.

³⁶É le ogbló ɛnɛ gbā ŋmá ɔcí kú akésiya nēe géē bī ukɔ́tin ā playicō, é le ugóolu (oje ɔdɔ) ma plá uwá iyē klla le uwɔ kú ugóolu (oje ɔdɔ) kpó kwu uwá. Anɔ́ɔ é le ígbóoje-otáajɛ kú oje nɛ̄hɛ́ ɛnɛ yá kéē bī aógbló ā bāajɛ.

³⁷É le ukɔ́tin ō klá okómpinu kú Áklɔ̄kpīihɔ ā yá mla īlī nɛ̄hɛ́ nēé wu tɔ̄há mla owú odufā, owú ɔgalúlā, mɛ́mla owú nɔ̄wá. É klla le ijā kú ifotó kú Ucérūbim he tū ɔ̄ dúú.

³⁸É le aɔ́kpá kú ɔcí ɛhɔ̄ nēé le uwɔ kpó kwu uwá, nēe géē bī ukɔ́tin ā playicō ā gbā. É le ugóolu (oje ɔdɔ) ma plá icō kú aɔ́kpá mɛ́mla ogbló kú uwā. É klla le ígbóje-otáajɛ kú oje udɔ ɛhɔ̄ nēe géē bī aógbló ā háyicō ā yá dúú.