Read idoma OŌYƐBƐ̄CƐ 37 Bible Online

OŌYƐBƐ̄CƐ 37 - idoma bible

OŌYƐBƐ̄CƐ 37

¹Ubɛsálilu le Ikpati kú okónu ōce ā gbā ŋmá ɔcí kú akésiya, olīkpō kú nū wɛ ikpó ɛtá ce āyā, olɔwá kú nū wɛ ikpó ɛpa ce āyá, olicō kú nū klla kē wɛ ikpó ɛpa ce āyá.

²Ó le ugóolu (oje ɔdɔ) ma plá anú eyīpú mla eyɛ̄ɛ̄cɛ. Ó klla le ugóolu (oje ɔdɔ) ma cíla ɔ́ okónu biílí.

³Ó lɛ eliká kú ugóolu (oje ɔdɔ) ɛnɛ ɔhá nēé gē bī le je ɔ́ ŋmá ajɛ ā yá kwu ikpó ɛnɛ kú nū ā. Eliká ɛpɛɛpa kwu áklō kú ābɔ̄ éyééye.

⁴Ó le ogbló kú ɔcí kú akésiya nēé géē le je ɔ́ ŋmá ajɛ ā gbā, le ugóolu (oje ɔdɔ) ma plá anú.

⁵Anɔ́ɔ ó kwú aógbló ā ú kpó wu aéliká kú ɔ́kíkā kú Ikpati kú okonū ōce ā ká ācɛ kéē je ɔ́ ŋmá ajɛ glá.

⁶Ó le ɔ̄wū kú ugóolu (oje ɔdɔ) yá klá anú. Olikpō kú nū wɛ ikpó ɛtá ce āyā, olɔwá kú nū wɛ ikpó ɛpa ce āyā. [20]

⁷Ó bī omútāgā le Ucérūbim ɛpa yá ŋmá ugóolu (oje ɔdɔ).

⁸Ucérūbim éyééye kwu okónōgwu éyééye kú ɔ̄wū ā ā. Ó le uwá yá kwɔhá kéē wɛ oje éékpó mla ɔ̄wū ā.

⁹Aúcɛ́rōbim ā le eyī pīya tá iyī ūwā. É le acá nāndaa klá ɛga o cīce kú eyīnyinyi ā.

¹⁰Ó le utébulu gbā ŋmá ɔcí kú akésiya. Olikpō kú nū wɛ ikpó ɛtá, olɔwá kú nū wɛ ikpó éyi ce āyā anɔ́ɔ olicō kú nū wɛ ikpó ɛpa ce āyā.

¹¹Ó lɛ ugóolu (oje ɔdɔ) ma plá anú ɛyí, klla le ugóolu (oje ɔdɔ) ma ce okónōgwu nū biílí.

¹²Ó le ɔcí gbā ce okónu nū biílí nɛ̄ olɔwá kú nū géē wɛ ayíkābɔ̄ éyi. Ó klla le ugóolu (oje ɔdɔ) ma plá ɔcí ā jīla tá.

¹³Ó le eliká kú ugóolu (oje ɔdɔ) ō le je utébulu ā ŋmá ajɛ ɛnɛ yá, anɔ́ɔ ó kwú uwá ú kpó kwu ɔ́kíkā ɛnɛ kú ikpó kú nū.

¹⁴Ó kwú aéliká nēe ī bī ogbló ā, nɛ̄ ācɛ géē bī le je utébulu ā ŋmá ajɛ ā kpó kwu okónōgwu kú nū.

¹⁵Ó le ogbló kú ɔcí ō le bī Utébulu ā gbā ŋmá ɔcí kú akésiya, anɔ́ɔ ó le ugóolu (oje ɔdɔ) ma plá anú.

¹⁶Ó le ikókwū, ukɔ̄, ɔgbanjɛ̄ mɛ́mla ɔjá nēé géē bī le yúklɔ́ eko nēé gáā gwɛ́ɛya kú ejé ā kpó yá.

¹⁷Ó le ɔdā ō lɛ agege ce éyi yá ŋmá ugóolu (oje ɔdɔ). Ó le ɔkwu nū mɛ́mla ɔcí ɔtāhɛ̄ nū yá ŋmá ugóolu (oje ɔdɔ) ō cabɔ́há mla omútāgā. Ó klla le ɔ́ yíifa mla ododó mɛ́mla ohéepu mɛ́mla oōnwūla kú ododó. Anɔ́ɔ ó le ɔ́ pīya ɔdā ékpónú.

¹⁸Ó lɛ ābɔ̄ ɛhīlī nēe nyīla ŋmá áklō kú nū, ɛtá ŋmá ābɔ̄ éyééye ā.

¹⁹Ó le ifa kú ohépu kú ododó kú ɔcí nēé hī álumɔ̄ndu mɛ́mla oōnwūla kú ododó kú nū yá kwu éyééye kú abɔ̄ ɛhīlī kú íkókwū ā.

²⁰É le oje ō kwu ɔtāhɛ̄ kú nū ā yíifa bɛ̄ɛka íkókwū nēé yá gbla oōnwūla kú ododó kú ɔcí nēé hī álumɔ̄ndu mɛ́mla ohépu kú nū.

²¹Ohépu kú ododó éyééye kwu ɔtāhɛ̄ kú abɔ̄ kú nū dóódu.

²²Ohépu ā mla abɔ̄ kú uwā, géē wɛ ugóolu (oje ɔdɔ) ékpónú, nēé bī omútāgā na tɔ̄há.

²³Ó lɛ agege ahāapa yá lɛ ɔdā o lɛ agege ce ɔ́ ā. Ugóolu (oje ɔdɔ) nɛ̄ó bī le yá oflēnjē ō kpó éwo bónū mɛ́mla álápā ā dúú á.

²⁴Ó bī ugóolu (oje ɔdɔ) nōo gbɛnú dēē nwuné ā, le yá ɔdā o lɛ agege ce ɔ́ ā mla ɛjɛ̄ɛ̄jī iyó kú nū.

²⁵Ó bī ɔcí kú akésiya le ede gbā. Ó lɛ ɔ́kíkā ɛnɛ. Olīkpō kú nū wɛ ikpó éyi ce āyā, olɔwá kú nū wɛ ikpó éyi ce āyā, olicō kú nū wɛ ikpó ɛtá. Ajī nōo kwu ɔ́kíkā ɛnɛ kú nū ā wɛ oō yá tɔ̄há ékpónú mla anú.

²⁶Ó le ugóolu (oje ɔdɔ) ma plá icō kú nū mɛ́mla odúúdú ókíkā ɛnɛ kú nū ā, mɛ́mla ajī ā. Anɔ́ɔ ó le ugóolu (oje ɔdɔ) yá tū okónōgwu nū biílí.

²⁷Ó le eliká kú ugóolu (oje ɔdɔ) nēé géē bī lɛ je ɔ́ ŋmá ajɛ ā yá kwu ɛháajɛ kú okónōgwu nū. Ɛpɛɛpa yɔ̄ ābɔ̄ éyi lɛ eyī pīya kwu iyī ūwā.

²⁸Ó le ogbló ā gba ŋmá ɔcí kú akésiya le ugóolu (oje ɔdɔ) ma plá anú.

²⁹Ó le anɔ̄ otīihɔ mɛ́mla ɔtulalī umuumu ōkpóocu nɛ̄hi yá. É le ɔ́ wīya tɔ̄há bɛ̄ɛka ɔtulalī ā.