Read idoma OŌYƐBƐ̄CƐ 38 Bible Online

OŌYƐBƐ̄CƐ 38 - idoma bible

OŌYƐBƐ̄CƐ 38

¹Ó le ede kú ɛya ō yɔlá dúúdú gbā ŋmá ɔcí akésiya. Olīkpō kú nū wɛ ikpó ahāapa ce āyā, olɔwá kú nū wɛ ahāapa ce āyā, olicō kú nū wɛ ikpó ɛnɛ ce āyā. Ó kē lɛ ɔ́kíkā ɛnɛ nēe jɔ̄njīlɛ̄.

²Ó le ajī yá kwu icō kú ɔ́kíka ɛnɛ kú nū ā. Ó yá uwā ā éékpó kwɔhá mla ede ā. Ó le ugóolu (oje ɔdɔ) ma plá anú.

³Ó le odúúdú iyó kú ede ā kpó yá. Aíyó ā wɛ, ocíbú plákátá, usɔ́bɛ̄lu, aágá, ɔgbanjɛ̄, ɛtɛ́, ukɔ̄, aóflēnjē ō fú ɔlá tū ɔ̄. É yá odúúdú aɔ́dā nēe bá nyā ŋmá oje udɔ.

⁴Ó le ɔdée nēé le oje udɔ wúlá wúlá pla tū ipú nū ā yá, kwú ɔ̄ ú wu ɛháajɛ kú okónōgwu kú ede ā cɛ́ɛ́ kóō háyi ɔtāhɛ̄ kú o yɛ ga ɛhícō kú ede ā.

⁵Ó le eliká kú ugóolu (oje ɔdɔ) ɛnɛ ō bī je ɔ́ ŋmá ajɛ, yá kwu ɔ́kíkā ɛnɛ kú ɔdā nēé le oje udɔ wúlá wúlá pla tū ipú nū ā.

⁶Ó le ogbló nēé bī le je ede ā ŋmá ajɛ yá ŋmá ɔcí kú akésiya. Ó le oje udɔ ma plá anú.

⁷Anɔ́ɔ ó kwú aógbló ā ú kpó bū eliká éyééye kú áklō kú ede ā. Ɔcí oplákátá nēé lɛ yá ede ā á. Ó kē lɛ ɔ́ kpípú cɛ́ɛ́ ɔ̄gɔ̄ tá ipú nū.

⁸Ó le ɔgbanjɛ̄ kú oje udɔ mɛ́mla ɛga oháyi kú nū yá ŋmá ogigo kú ācɛnyā, nēe géē yúklɔ́ okómpinu kú Áklɔ̄kpīihɔ ā.

⁹Ó le eyīpú kú Áklɔ̄kpīihɔ ɛga nɛ̄ Óndú ā yɔ̄ ā yá mla ukɔ́tin nɛ̄hɛ́. Ābɔ̄ kú ɛháajɛ ā, olīkpō kú ukɔ́tin ā wɛ uyádi ofɛpa cigwó.

¹⁰Ɔ́kpa kú oje udɔ ofu nēe wu ígbóoje-otáajɛ kú oje udɔ ofu nēe lɛ uwɔ mɛ́mla ogbló nēé yá mla oje nɛ̄hɛ́ ā bī ɔ̄ háyi a.

¹¹Eyīpú kú ābɔ̄ ɛhíícō kú nū ā lɛ ā dúú.

¹²Ābɔ̄ kú ɛnɔ̄ɔ̄nɛ̄ kú Áklɔ̄kpīihɔ ā, olīkpō kú ukɔ́tin ā wɛ uyádi ofucɛhɔ̄. Ó kē lɛ ɔ́kpa igwó mɛ́mla ígbóoje-otáajɛ o wu ɔ́ nēé í wu kwaajɛ, mɛ́mla uwɔ mɛ́mla ogbló kú oje nɛ̄hɛ́.

¹³Ābɔ̄ ɛnɔ̄ɔ̄cī kú Áklɔ̄kpīihɔ nɛ̄ okómpinu yɔ̄ ā, olɔwá kú ukɔ́tin kú nū wɛ uyádi ofucɛhɔ̄.

¹⁴Ābɔ̄ kú okómpinu ā, lɛ ukɔ́tin nɛ̄ olɔwá kú nū wɛ uyádi ahāapa ce āyā mɛ́mla ɔ́kpa ɛtá mla ígbóoje-otáajɛ o wu ɔ́ kú uwā.

¹⁵Ɛ́gɔ́ɔmā nɛ̄ó lɛ, ābɔ̄ ɔhá kú ukɔ́tin kú okómpinu ā lɛ dúú á.

¹⁶Īlī nɛ̄hɛ́ olɔhi nēé bī le yá odúúdú ukɔ́tin kú igá kú Áklɔ̄kpīihɔ ā á.

¹⁷Oje udɔ nēé bī le yá ígbóoje-otáajɛ o lɛ ɔ́kpa wu ɔ́ á. É kē bī oje nɛ̄hɛ́ le yá uwɔ, aógbló mɛ́mla ɔdōklá icō kú aógbló á. Ogbló kú oje nɛ̄hɛ́ nēé bī le flá aɔ́kpá ā kwɔhá á.

¹⁸Īlī nɛ̄hɛ́ olɔhi nēé wu tɔ̄há mla owú odufā, owú ɔgalúlā mla owú nɔwā ā nēé le yá ukɔ́tin kú okómpinu kú igá kú Áklɔ̄kpīihɔ ā á. É klla bī inyilá le ijā he tū ɔ̄. Olīkpō kú ukɔ́tīn ā wɛ uyádi igwó, olicō kú nū wɛ iyádi ɛpa ce āyā bɛ̄ɛka ákú aúkɔ́tin kú igá ā.

¹⁹Aɔ́kpa ɛnɛ nōo wu ígbóoje-otáajɛ kú oje udɔ ā, bī uwā háyicō á. Oje nɛ̄hɛ́ nēé le yá uwɔ, ɔdōklá icō kú uwā mɛ́mla aógbló ā á.

²⁰É ya ɛjɛ̄ɛ̄jī ɔdōpiɔ́ŋgbá kú Áklɔ̄kpīihɔ kwajɛ ā mla oje udɔ.

²¹Aɔ́dā nēe bā nyā nēé le yá Áklɔ̄kpīihɔ, ɛga nɛ̄ Óndú ā yɔ̄, nɛ̄ usiléti ɛpa nēé tá aíne igwó tū ā bá ipú nū ā. Umósīsi je ɔ́da lɛ uwá kéē bī áluka iyó ā wā á. Ayí kú Ulífāyi nēe yúklɔ́ ɛháajɛ kú Itáma, ɔyí kú Árɔ̄ni ɔ̄cogwɛ́ɛya ā nɛ̄ Umósīsi da uwá kéē bī áluka kú ɔdā nēé ŋmó tū úklɔ́ ā wā á.

²²Ubɛsálɛ́lu, ɔyí kú Úri mɛ́mla ɔyɔ́ɔ́yí kú Uhɔ́ɔ nōo ŋmá ipɔ́ɔma kú Ujúda ā, yá ɔdā dóódu nɛ̄ Óndú ā je ɔ́dā kéē yá ā á.

²³Ɔ̄cɛ nōo tá ɔ̄ abɔ̄ ā, wɛ Oholíyābu, ɔyí kú Ahísamāki, nōo ŋmá ipɔ́ɔma kú Udán ā. Ó wɛ ɔ̄coyúklábɔ̄, ó jé ō tá īlī, mɛ́mla ō bī owú nɛhɛ̄, owú odufā, owú ɔgalúlā mɛ́mla owú nɔ̄wá wu ɛdɔ kú īlī dóódu.

²⁴Ódúúdú ugóolu (oje ɔdɔ) nēé kpó lɛ Óndú kéē bī le yúklɔ́ kú Áklɔ̄kpīihɔ ā nwuné nɛ̄hi.

²⁵Aóje nɛ̄hɛ́ ā nwuné nɛ̄ó tōō miya ŋ́.

²⁶Ɛjɛ̄ɛ̄jī ācɛ nēé gbaáluka eko kú ɔlɛ́ ō ka ā, le áluka kú oje nēé ka ā gbā, anɔ́ɔ áluka kú ācɛ ā nēe ŋmá iháyí ofu gɔbū ā wɛ 603,550.

²⁷Oje nɛ̄hɛ́ nēé bī le yá aígbóoje-otáajɛ éyééye á kú Agblīhɔ mɛ́mla ákú ukɔ́tin ā nwuné nɛ̄hi nɛ̄ó tōō miya ŋ́.

²⁸Ubɛsálilu bī oje nɛ̄hɛ́ nēe hile ŋmá ɛ̄nɛ̄ é le yúklɔ́ ā le yá aógbló, aágá kú ogbló ā, mɛ́mla aɔ́dōklá icō kú uwā.

²⁹Oje udɔ nēé kpó lɛ Óndú ā klla nwuné nɛ̄hi nɛ̄ó tōō miya ŋ́.

³⁰Ó bī ɛ̄nyā le yá ígbóoje-otáajɛ kú okómpinu kú Áklɔ̄kpīihɔ ɛga nɛ̄ Óndú ā yɔ̄ ā. Ó yá ede kú oje udɔ ā, ɔdā nēé le oje udɔ wúlá wúlá pla tū ipú nū ā mɛ́mla odúúdú aíyó kú ede ā.

³¹Oje udɔ ā nɛ̄ó bī le yá ígbóoje-otáajɛ kú eyīpú mɛ́mla okómpinu kú eyīpú ā, mɛ́mla odúúdú ɔdōpiɔ́ŋgbá kwajɛ kú Áklɔ̄kpīihɔ ā mɛ́mla odúúdú aɔ́dā nē é le híígá tū Áklɔ̄kpīihɔ ā á.