Read idoma OŌYƐBƐ̄CƐ 39 Bible Online

OŌYƐBƐ̄CƐ 39 - idoma bible

OŌYƐBƐ̄CƐ 39

¹É bī owú odufā, owú ɔgalúlā mɛ́mla owú nɔwā le aɔ́dōwīyē ohéyīfuú nɛ̄hi gɔ́ lɛ ācogwɛ́ɛya, ɛ̄nɛ̄ é géē lɛ wiiyē eko nēé gē yúklɔ́ ɛga otīihɔ ā. É le aɔ́dōwīyē gɔ́ lɛ Árɔ̄ni mɛ́mla ayí nū ɛ́gɛ́nɛ̄ Óndú ā cābɔ̄ lɛ Umósīsi lɛ ā.

²É bī owú odufā, owú ɔgalúlā, owú nɔwā, īlī nɛ̄hɛ́ olɔɔlɔhi mɛ́mla owú ugóolu (oje ɔdɔ) le ɛ́fɔ̄du o wiiyē kla awulú ā gɔ́.

³É bī omútāgā le ugóolu (oje ɔdɔ) ca plɛ́kɛ́tɛ́ɛ́, anɔ́ɔ é le ɔ́ hɛ́ fíílí-fíílí kéē bī ɔ̄ le tá tū ipú owú odufā, owú ɔgalúlā mɛ́mla owú nɔ̄wá mɛ́mla ipú īlī olɔhi nɛ̄hi ā.

⁴É le ɔ́ŋgbá ácá ɛpa gɔ́ kwu ɛ́fɔ̄du ā, anɔ́ɔ é kwú uwā ú kpó kwu aáklō kú nū cɛ́ɛ́ kóō playi anú glá.

⁵É le ɔdōgbɛ̄ɛ́nyɔ́ nēé bī aɔ́dā ɛdɔ ékpó le yá uwā gɔ́ kwu ɛ́fɔ̄du, cɛ́ɛ́ kóō kwú pīya ɔdā ékpó mla anú, ɛ́gɛ́nɛ̄ Óndú ā da Umósīsi lɛ ā.

⁶É le ɛcɔ̄ nēé hī ukanéliyan gbā, anɔ́ɔ é le uwá kpó kwu ɔkwu kú ugóolu (oje ɔdɔ). É gbeyī cíí le iyē kú ayí kú Ísrɛ̄lu ɛ́gɛ́nɛ̄ ɔgba kú oōma kú uwā lɛ ā tá tū ɔ̄.

⁷É kwú uwā ú kpó kwu ɔ́ŋgbá ácábɔ̄ kú ɛ́fɔ̄du kéē bī lɛ blakwu áipɔ́ɔmā igwɛ́ɛpa kú Ísrɛ̄lu, ɛ́gɛ́nɛ̄ Óndú ā da Úmósīsi ā.

⁸É bī aɔ́dā éékpó ɔ́ɔmā le ɛkpa o bɔ́tū ā wu klla le ijā he tū ɔ̄ bɛ̄ɛka ákú ɛ́fɔ̄du ā.

⁹Ó lɛ ɔ́kíkā ɛnɛ, klla wɛ oōcēbá ɛpa. Olīkpō kú nū wɛ ayíkábɔ̄ ɛtá, olɔwá kú nū wɛ ayíkābɔ̄ ɛtá dúú.

¹⁰É le ɛcɔ̄ ōgbɔɔ́lá nɛ̄hi kpó kwu ɔ́ ɔgba ɛnɛ. Ɛcɔ̄ kú ɔgba kú aflɛ́yí ā wɛ Usádiyɔ̄si, Utɔ́pāsi mɛ́mla Ukábɔ̄nku.

¹¹Ɛcɔ̄ kú ɔgba ɔ́mpa ā wɛ ɛ́mɛ̄rādi, usáfāya mɛ́mla udáyímɔ̄ndi.

¹²Ɛcɔ̄ kú ɔgba ɔ́mɛɛtá ā wɛ, Ujásínti, ágēti éyi, mɛ́mla ametíyīsti.

¹³Ɛcɔ̄ kú ɔgba ɔ́mɛɛnɛ ā wɛ, Ubɛríli, ukáneliyan mɛ́mla ujáspa. É le uwá kpó kwu ɔkwu kú ugóolu (oje ɔdɔ).

¹⁴É le iyē kú ayínɔ̄nyīlɔ éyééye kú Ujékɔ̄pu ā tá tū ɛcɔ̄ éyééye igwɛ́ɛpa ā, ó yá ɛ́ɛ́ kóō kwɛyí aípɔ́ɔmā igwɛ́ɛpa kú Ísrɛ̄lu mɛ́mla iyē kú ayí kú Ísrɛ̄lu.

¹⁵É le agbá kú ugóolu (oje ɔdɔ) abɔ̄yí nū nēé jíla bɛ̄ɛka ɔ́ŋgbá kóō bī ɛkpa o bɔ́tū ā playi ɛ́fɔ̄du ā.

¹⁶É lɛ ɔkwu ɛpa kú ugóolu (oje ɔdɔ) yá, mɛ́mla eliká kú ugóolu (oje ɔdɔ) ɛpa, anɔ́ɔ é kwú uwā ú kpó playi ɔ́kíka ɛpa kú ɛhícō kú ɛkpa o bɔ́tū ā.

¹⁷É kwú ɔ́ŋgbá kú ugóolu (oje ɔdɔ) ɛpa ā ú flá tū eliká ɛpa ā,

¹⁸anɔ́ɔ é kwú ɛyí ɛpa ɔhá kú agbá ā í gbō tū ɔkwu ɛpa ā, anɔ́ɔ é bī ɔwɛ nyā kwú uwā ú kpó kwu iyɔ̄bū ɔ́ŋgbá ácá kú ɛ́fɔ̄du ā.

¹⁹É le eliká kú ugóolu (oje ɔdɔ) ɛpa yá, kwu uwā ú kpó kwu ɛháajɛ kú ɔ́kíka ɛkpa o bɔ́tū ā, okónōgwu eyīpú nōo gboce ɛ́fɔ̄du ā.

²⁰É le eliká kú ugóolu (oje ɔdɔ) ɛpa ɔhá yá, anɔ́ɔ é kwú uwā ú kwu ɛháajɛ kú iyɔ̄bū kú ɔ́ŋgbá acá ɛpa kú ɛ́fɔ̄du ā. Ó kwu ɛga nēé gɔ́ īlī ɛpa kwɔhá ā, nōo yɔ̄ icō kú ɔdōkwɛ́nyɔ́ nēé tá lɔɔlɔhi ā.

²¹Ɛ́gɛ́nɛ̄ Óndú ā da Umósīsi lɛ ā, é bī ɔ́ŋgbá owú odufā le eliká kú ɛkpa o bɔ́tū ā flá tū eliká kú ɛ́fɔ̄du ā, cɛ́ɛ́ kú ɛkpa o bɔ́tū ā kóō ce ɔdōkwɛ́nyɔ́ ā icō kóō híī je wī ŋ́.

²²Owú odufā nēé le tá odúúdú awulú nōo yɔ̄ ɛháajɛ ɛ́fɔ̄du ā á.

²³É le ɔkɔ kú nū ā wu lɔfúlɔfú mla owú, o yá ɛ́ɛ́ kóō híi je híla ŋ́.

²⁴É bī owú odufā, owú ɔgalúlā mɛ́mla owú nɔwā lɛ hijā kú īkpō ɔcí kú upomégránēeti tū okónōgwu kú nū.

²⁵É klla le áma kú ugóolu (oje ɔdɔ) abāābɔ̄yīnū yá playi ɛplá ijā kú ɔcí nēé hī ka upomégrānete nēé he tū ɔ̄ biílí jīla tá ā.

²⁶Áma éyééye playi ɛplá upomégrānete éyééye yɛ awulú ā jīlatá biílí kú eko o yúklɔ́. Ɛ́gɛ́nɛ̄ Óndú ā da Umósīsi lɛ ā.

²⁷É le ukafután ā gɔ́ lɛ Árɔ̄ni mɛ́mla ayínɔ̄nyīlɔ kú ɔlɛ́ nū.

²⁸É klla le ɔláwoni mɛ́mla ɔdokwɛyí, ikakí kú īlī nɛ̄hɛ́ gɔ́,

²⁹mɛ́mla īlī o gbɛ̄ɛ́nyɔ́ kú īlī nɛ̄hɛ́ o lɔɔlɔhi nēé bī owú odufā, ɔgalúlā, mɛ́mla owú nɔ̄wá wu ā. É klla bī inyilá le ijā he tū ɔ̄, ɛ́gɛ́nɛ̄ Óndú ā ka lɛ Umósīsi lɛ ā.

³⁰É lɛ oje otīihɔ o bá odée nēé tɔ́kpá tū ɔ̄ kahíníī, “É kwú ɔ̄ ú lɛ Óndú ā” yá ŋmá ugóolu (oje ɔdɔ) abɔ̄yīnū.

³¹É bī owú odufā lɛ ɔ́ gbō bá ɛhíícō kú ɔláwonī ā, ɛ́gɛ́nɛ̄ Óndú ā da Umósīsi lɛ ā.

³²Odúúdú úklɔ́ kú ō gwó kú Áklɔ̄kpīihɔ ā gaá kwú ŋmɛ́yí. Ācɛ Ísrɛ̄lu lɛ ɔdā dóódu ā yá ɛ́gɛ́nɛ̄ Óndú ā cābɔ̄ lɛ Umósīsi lɛ ā.

³³É le Áklɔ̄kpīihɔ ā mɛ́mla odúúdú aíyó kú nū, aágá kú nū, aɔ́kpá kú nū, aógbló ō tōkónu ɔlɛ́ kú nū, aɔ́kpa kú nū mɛ́mla aígbóoje-otáajɛ kú nū.

³⁴Ɔdōklá anú kú ɔkpá omlede nēé le ɔ́ tɛ̄ɛ̄tū nɔ̄wá, mɛ́mla ákú ɔkpɛ́bɛ́ ɔhá olɔɔlɔhi mɛ́mla ukɔ́tin,

³⁵Ikpati kú okónu ōce kú óndú nɛ̄ usiléti kú ɛcɔ̄ nēé tá íne tū ɔ̄ ā, aógbló mɛ́mla ɔ̄wū ikpati ā,

³⁶utébulu mɛ́mla odúúdú iyó kú nū, mɛ́mla igbō nēé je lɛ Ɔwɔicō ā,

³⁷Ɔdā ō le agege ce ɔ́ kú ugóolu (oje ɔdɔ) ā, agege kú nū, odúúdú iyo kú nū mɛ́mla anɔ̄ kú agege ā.

³⁸Ede kú ugóolu (oje ɔdɔ) ā, anɔ̄ ōtīihɔ, ɔtulalī umuumu ōkpóocu ā mɛ́mla ukɔ́tin o klá ɔwɛ kú Áklɔ̄kpīihɔ ā.

³⁹Ede kú ugóolu (oje ɔdɔ) ā mɛ́mla ɔdā nēé pla oje udɔ wúlá wúlá tū ipú nū ā, ogbló mɛ́mla aíyó kú nū, ɔgbanjɛ o bī lɛ na abɔ̄ mɛ́mla ɛga ō háyi kú nū.

⁴⁰Ukɔ́tin kú igá kú ede ā mɛ́mla aógbló kú nū mɛ́mla aígbóoje-otáajɛ kú uwā. Aúkɔ́tin kú okómpinu eyīpú ā mɛ́mla aɔ́ŋgbá kú uwā, aɔ́dōpiyɔ́ŋgbá kwajɛ kú Áklɔ̄kpīihɔ ā mɛ́mla odúúdú aíyó nēé géē bī le yúklɔ́ ipú Áklɔ̄kpīihɔ ā.

⁴¹Úwé olɔhi nɛ̄hi nɛ̄ āccogwɛ́ɛya géē le wiyē, kéē yúklɔ́ ɛga otīihɔ ā. Īlī otīihɔ kú ɔ̄cogwɛ́ɛya, Árɔ̄ni mɛ́mla ákú ayí nū nɔ̄nyīlɔ o yúklɔ́ kú ɔ̄cogwɛ́ɛya ā.

⁴²Ācɛ kú Ísrɛ̄lu ā le odúúdú úklɔ́ ā kpó yá ɛ́gɛ́nɛ̄ Óndú ā cābɔ̄ lɛ Umósīsi lɛ ā.

⁴³Umósīsi le úklɔ́ ā jila, anɔ́ɔ ó le má ka ɛ́ɛ le ɔ́ yá ɛ́gɛ́nɛ̄ Óndú cābɔ̄ lɛ ɔ́ lɛ ā. Anɔ́ɔ Umósīsi le ɔhá hɛ́ ce uwá á.