Read idoma OŌYƐBƐ̄CƐ 40 Bible Online

OŌYƐBƐ̄CƐ 40 - idoma bible

OŌYƐBƐ̄CƐ 40

¹Óndú ā da Umósīsi ka,

²“Ɛ̄cī aflɛ́yí kú ɔyā aflɛ́yí ā, a géē je Áklɔ̄kpīihɔ ā kwajɛ.

³A í je Ikpati kú okónu ōce kú Óndú ā háyi ipú nū, cɛ́ɛ́ aá kwú īlī ú klá iyɔ̄bū Ikpati kú okónu ōce kú Óndú ā.

⁴Kwú utébulu ā ú wā inū, cɛ́ɛ́ aá kwu iyó kú nū ú kpó ce ɛyí nū. A géē je ɔdā ō lɛ agege ce ɔ́ ā wā inū, cɛ́ɛ́ aá klla kwú agege ā ú kpó ce ɔ́.

⁵Kwú ede kú ugóolu (oje ɔdɔ) o yi ɔtulalī ɔlá ɛyí nū ā ú háyi iyɔ̄bū kú Ikpati kú okónu ōce kú Óndú ā, cɛ́ɛ́ a kwú ukɔ́tin kú okómpinu kú Áklɔ̄kpīihɔ ā ú playi anú.

⁶Kwú ede kú ɛya ō yɔlá dúúdú ɛyí nū ā ú haajɛ iyɔ̄bū kú Áklɔ̄kpīihɔ ā.

⁷Kwú ɔgbanjɛ̄ ō bī na abɔ̄ ā ú háyi ɔtāhɛ̄ kú Áklɔ̄kpīihɔ mɛ́mla ede ā, cɛ́ɛ́ a le éŋkpɔ̄ hɛ́ tū ɔ̄.

⁸A kwú igá nēe yɛ Áklɔ̄kpīihɔ jīla tá biílí ā kpó kwajɛ, cɛ́ɛ́ aá kwú ukɔ́tin kú okómpinu kú nū ā ú playi anú.

⁹Cɛ́ɛ́ a kwú Áklɔ̄kpīihɔ ā ú tū Óndú ā abɔ̄, o ŋmá lɛ o bī anɔ̄ ōtīihɔ lɛ mī klá anú mɛ́mla aɔ́dā dóódu nēe bá ipú nū ā. Cɛ́ɛ́ é kwú yá tīihɔ dúúdú.

¹⁰A géē kpó ede mɛ́mla aíyó kú nū dóódu ā tū Óndú ā abɔ̄, ó ŋmá lɛ o mī anɔ̄ ōtīihɔ klá anú mɛ́mla aíyó kú nū dóódu ā.

¹¹A klla í je ɔgbanjɛ̄ ā mɛ́mla ɛga ō háyi kú nū ā tū Óndú ā abɔ̄, ó ŋmá lɛ o mí anɔ̄ ō tīihɔ klá anú.

¹²Lɛ Árɔ̄ni mɛ́mla ayí nū nɔ̄nyilɔ ā bī wā okómpinu kú Áklɔ̄kpīihɔ ā. Cɛ́ɛ́ kéē lɛ iyē gwā.

¹³Kwú aɔ́dōwīyē kú ācogwɛ́ɛya ā ú kpó wu Árɔ̄ni iyē, cɛ́ɛ́ a lɛ anɔ̄ tū ɔ̄ ɛyí, cɛ́ɛ́ ɔwɛ̄ ékpónú ɔ́ɔmā a kwú abɔ̄ ú ce ɔ́ ɛyí, o yá ɛ́ɛ́ kóō yúklɔ́ ká ɔ̄cogwɛ́ɛya gā um glá.

¹⁴Lɛ ayínɔ̄nyīlɔ kú nū kpó wā dúú, cɛ́ɛ́ a kwú ukafután ā ú kpó wu uwá iyē.

¹⁵Lɛ anɔ̄ tū uwā ɛyí ɛ́gɛ́nɛ̄ a le tū ádā uwā ɛyí ā, cɛ́ɛ́ kéē yúklɔ́ kú ācogwɛ́ɛya gā um. Anɔ̄ nēé le tū uwā ɛyí nyā géē je uwá pīya ācogwɛ́ɛya piyóó.”

¹⁶Umósīsi lɛ ɔdā dóódu yá, ɛ́gɛ́nɛ̄ Óndú ā da ɔ́ ā.

¹⁷Anɔ́ɔ ipú ɔyā aflɛ́yí kú iháyí ɔ́mpa nēé nyɛ̄ɛ̄ ŋmá ajɛ kú Íjīpiti ā, é kwú Áklɔ̄kpīihɔ ɛga nɛ̄ Óndú ā yɔ̄ ā ú kwajɛ.

¹⁸Umósīsi kwú aígbóoje-otáajɛ ā ú kpó báajɛ, le aɔ́kpá ā kpó wu uwá kwajɛ, le aógbló ō tū okónu ɔlɛ́ ā ú kwu ɔ́, anɔ́ɔ ó kwú aɔ́kpa ú kpó kwajɛ á.

¹⁹Anɔ́ɔ ó kwú ɔdōklá Áklɔ̄kpīihɔ ā ú nā klá anú. É klla kwú ɔdōklóodēe kú iyɛ̄ɛcɛ ā ú nā klá Áklɔ̄kpīihɔ ā, ɛ́gɛ́nɛ̄ Óndú ā da Umósīsi lɛ ā.

²⁰Anɔ́ɔ ó kwú usiléti kú ɛcɔ̄ kú íne igwó ā ú kpó tū ipú Ikpati kú okónu ōce kú Óndú ā, anɔ́ɔ ó le ogbló kú Ikpati ā kpó wu ipú aéliká kú ikpati ā, anɔ́ɔ ó kwú ɔ̄wū ú klá anú á.

²¹Anɔ́ɔ é kwú Ikpati kú okónu ōce kú Óndú ā ú wā í háyi ipú Áklɔ̄kpīihɔ ā, anɔ́ɔ é kwú ukɔ́tin í playi icō á. Ɔwɛ nyā ukɔ́tin ā má gwū Ikpati kú Ɛka kú Óndú ā, ɛ́gɛ́nɛ̄ Óndú ā ka lɛ ā.

²²É kwú utébulu ā ú háyi ipú Áklɔ̄kpīihɔ, eyīyɛ̄cɛ kú ɛhícō ukɔ́tin ā.

²³Anɔ́ɔ é kwú igbō nēé kpó gé lɛ Óndú ā í kpó ce ɔ́ ɛ́gɛ́nɛ̄ Óndú ā da Umósīsi lɛ ā.

²⁴É kwú ɔdā ō lɛ agege ce ɔ́ ā ú háyi ābɔ̄ ɛháajɛ kú ipú Áklɔ̄kpīihɔ ā, lɛ eyī pīyakwu utébulu ā.

²⁵Anɔ́ɔ ipéyī Óndú ā, é le ɔlá kwu agege ā, ɛ́gɛ́nɛ̄ Óndú ā da Umósīsi lɛ ā.

²⁶É kwú ede kú ugóolu (oje ɔdɔ) ā ú háyi ipú Áklɔ̄kpīihɔ ā, iyɔ̄bū kú ukɔ́tin ā,

²⁷anɔ́ɔ é le ɔtulalī umuumu ā fú tū ɔlá, ɛ́gɛ́nɛ̄ nɛ̄ Óndú ā da Umósīsi lɛ ā.

²⁸É kwú ukɔ́tin ā ú playi okómpinu kú Áklɔ̄kpīihɔ ā.

²⁹É kwú ede nēé gē gwɛ́ɛya o yɔládúúdú ɛyí nū ā ú háyi iyɔ̄bū ukɔ́tin ā. É le ɛya o yɔlá dúúdú mɛ́mla ɛya kú īkpɔ̄dā gwó ɛyí nū, ɛ́gɛ́nɛ̄ Óndú ā da Umósīsi lɛ ā.

³⁰É kwú ɔgbanjɛ̄ ō bī na abɔ̄ ā ú háyi ɔtāhɛ̄ kú ede mɛ́mla Áklɔ̄kpīihɔ ā, anɔ́ɔ ó lɛ éŋkpɔ̄ kpó tū ɔ̄ omōōmu á.

³¹Umósīsi, Árɔ̄ni mɛ́mla ayínɔ̄nyīlɔ kú nū gē nabɔ̄ mɛ́mla ikpó kú uwā abɔ́ɔ,

³²eko nēé gē wā ipú Áklɔ̄kpīihɔ ā ámāŋ, ka eko nēé gē ga ɛgiyí ede ā, ɛ́gɛ́nɛ̄ Óndú ā da Úmósīsi lɛ ā.

³³Úmósīsi le igá cē tū Áklɔ̄kpīihɔ ā mɛ́mla ede tá biílí, anɔ́ɔ ó kwú ukɔ́tin ā ú playi icō kú okómpinu kú igá ā. Anɔ́ɔ ó kwú odúúdú úklɔ́ ā í yá mɛ á.

³⁴Anɔ́ɔ ojuja wā í klá Áklɔ̄kpīihɔ ā, anɔ́ɔ ɔlá ōceyī ŋmaá-ŋmaá ocābɔ̄ ka Óndú yɔ̄ ɛgée ā, wā í le Áklɔ̄kpīihɔ ā tū mu.

³⁵Umósīsi í ga ipú Áklɔ̄kpīihɔ glá ŋ́, ohígbū ojuja nōo klá anú ā.

³⁶Ipú odúúdú iyāwu kú uwā ā, eko dóódu nɛ̄ ojuja ā nyɛ̄ɛ̄ ŋmá Áklɔ̄kpīihɔ ā nɛɛ, é gbɔɔ́ ō yɛ gɔbū.

³⁷Ɔdā nōo yá ɛ́ɛ́ nɛ̄ ojuja ā yɔ̄ ipú Áklɔ̄kpīihɔ ā, é gáā nyɛ̄ɛ ŋmá ɛga nɛ̄ é bá ā ŋ́.

³⁸Ipú odúúdú iyāwu kú uwá ā, ojuja kú Óndú ā kla Áklɔ̄kpīihɔ ā ɔlɛ́ɛnɔ, ɔlá kē yɔ̄ ī cɛ̄ ɛyí kú Áklɔ̄kpīihɔ ā otū.