Read idoma OŌYƐBƐ̄CƐ 7 Bible Online

OŌYƐBƐ̄CƐ 7 - idoma bible

OŌYƐBƐ̄CƐ 7

¹Óndú ā da Umósīsi kahíníī, “N géē je uwɔ yá bɛ̄ɛka Ɔwɔicō ā ɛgiyí Uféro. Árɔ̄ni ɔyínɛ́ uwɔ géē wɛ ɔ̄comɛ́ɛbɛ kú uwɔ á.

²A géē ka ɔdā dóódu nɛ̄ n ka gā uwɔ ā lɛ Árɔ̄ni, anú ā géē da ɔcɛ́ kóō mā ācɛ kú Ísrɛ̄lu tá kéē nyɛ̄ɛ̄ ŋmá ajɛ nyā á.

³Amáŋ, N géē je ígbɔ́tū lɛ Uféro cɛ́ɛ́ ó gáā jāhɔ̄ lɛ aá ŋ́, nááná nɛ̄ n géē yá aɔ́dōtūfi ɛyɛ́ɛyɛ́yí ipú ajɛ kú Íjīpiti ā.

⁴Uféro í gáā jāhɔ̄ gā uwɔ ŋ́. Eko ɔ́ɔmā n géē yá ācɛ kú Íjīpiti italā nɛ̄ɛ̄nɛ̄hi, cɛ́ɛ́ n lɛ ācɛ kú Ísrɛ̄lu kpó bɛ̄cɛ ŋmá ajɛ ɔ́ɔmā.

⁵Ācɛ kú Íjīpiti ā géē jé ka ami ɔ́ɔ wɛ Óndú á, eko nɛ̄ n lɛ abɔ̄ kú um nāndaa klá uwá, lɛ ācɛ kú Ísrɛ̄lu ā kpó bɛ̄cɛ ŋmá ipú uwā.

⁶Anɔ́ɔ Umósīsi mɛ́mla Árɔ̄ni lɛ ɔdā nɛ̄ Óndú ā da uwá ā yá á.

⁷Umósīsi wɛ iháyí ofɛnɛ, Árɔ̄ni kē wɛ iháyí ofɛnɛ ce ɛtá, eko nēé kɛlā lɛ Uféro ā.

⁸Óndú ā da Umósīsi mɛ́mla Árɔ̄ni ka,

⁹“Eko nɛ̄ Uféro da aá ka, ‘Aá lɛ ɔdā idáagó yá ká n̄ jé ɔkwɛ̄yi kú ɛlā kú aá. ‘Da Árɔ̄ni kó ō lɛ okwutɛ kú nū tá fīyajɛ iyɔ̄bū Uféro, kóō lɛ pīya ɛgwā.”

¹⁰Anɔ́ɔ Umósīsi mɛ́mla Árɔ̄ni le yɛ tá iyɔ̄bū Uféro klla le ka ɛ́gɛ́nɛ̄ Óndú ā da uwá ā. Árɔ̄ni le okwutɛ kú nū tá fīyajɛ iyɔ̄bū Uféro mɛ́mla aígabɔ̄ kú ɔlɛ́ nū, anɔ́ɔ okwutɛ ā kwú pīya ɛgwā á.

¹¹Uféro lɛ odúúdú ācɛ o jéeyī, ācogwɛ́bā mɛ́mla ācɛ ō yíimabɔ̄ kú ɔlɛ́ nū ā kpó hīīgwú. O ŋmá lɛ ɔdā kú imabɔ̄ kú uwā ā, é lɛ ɔdā ékpónú nɛ̄ Árɔ̄ni yá ā yá dúú.

¹²É le okwutɛ kú uwā tá fíyajɛ, anɔ́ɔ ó kwú pīya ɛgwā. Amáŋ, ɛgwā kú okwutɛ kú Árɔ̄ni ā, kwú ɛgwā kú okwutɛ kú uwā ú kpó mulɛ.

¹³Náána ā, ɔtū kú Uféro wɛ ōlɔfú kpɔ́. Ó jāhɔ̄ lɛ ɛlā kú uwá ŋ́, ɛ́gɛ́nɛ̄ Óndú ā ka ā.

¹⁴Anɔ́ɔ Óndú ā da Umósīsi kahíníī, “Ɔtū kú Uféro le lɔfú, ó cɛ̄ lɛ ācɛ kú Ísrɛ̄lu ā nyɔ̄ ŋ́.”

¹⁵Nyɔ̄ ɛgiyí Uféro ɔ̄cɔ̄ɔ̄cī eko nɛ̄ ó yɔ̄ ī bɛ̄cɛ ga ísu kú Unáyilu ā, kwú okwutɛ kú uwɔ nōo je pīya ɛgwā ā ú bī abɔ̄, cɛ́ɛ́ kú ā gáā gbēyī nu okónu ísu ā.

¹⁶Cɛ́ɛ́ a géē da ɔcɛ́ kahíníī, “Óndú ā, Ɔwɔicō kú ācɛ Uhíbru ā, tū um ɛhɔ̄ ká n̄ da uwɔ kaā mā ācɛ ɔlɛ́ nū tá kéē nyɔ̄, kéē gaá lɛ ɛ̄gbā gbā ɔ̄ ipú ígbíli. Á jāhɔ̄ lɛ ɛlā ā ŋ́ jāā kwu abālɔbányā.

¹⁷ Ohígbū ɔ́ɔmā ā, Ágábáidu, Óndú ā ka a géē jé ɛdɔ kú ɔ̄cɛ nɛ̄ ó wɛ ā o ŋmá lɛ ɔdā nɛ̄ ó gáā yá ā. Mā ɔ̄, n géē lɛ okwutɛ nɛ̄ n bī abɔ̄ nyā fīyɛ̄ eyī kú ísu kú Unáyilu ā, ó kē í je pīya oyī.

¹⁸Anɔ́ɔ odúúdú ɛbéenyi kú ipú ísu ā géē pɛ kwú. Ísu ā í níípī nɛ̄hi, nɛ̄ ācɛ kú Íjīpiti í gáā lɔfú hɛ́ éŋkpɔ̄ ŋmá anú gwá glá ŋ́.”

¹⁹Óndú á da Umósīsi kahíníī, “Da Árɔ̄ni kóō kwú okwutɛ kú nū ā ú kóō lɛ abɔ̄ kú nū nāńdaa klá eyī éŋkpɔ̄ kú Íjīpiti ā. Kwu ísu, áyɔ́kpá nɛ̄ŋcɛ́, kwu obugā ká uwā kéē kwú pīya oyī. Oyī ā í yɔ̄ ɛga dóódu kú ajɛ kú Íjīpiti ā, kwu éŋkpɔ̄ kú ipú ɛtɛ́ mɛ́mla ɛ̄hī mɛ́mla ɔjá kú uwā a.”

²⁰Anɔ́ɔ Umósīsi mɛ́mla Árɔ̄ni le yá ɛ́gɛ́nɛ̄ Óndú ā da uwá ā. Ipéyī Uféro mɛ́mla odúúdú aígabɔ̄ kú nū, Árɔ̄ni je okwutɛ ā gicō, anɔ́ɔ ó le ɔɔ́ fīyɛ̄ eyī éŋkpɔ̄ kú Unáyilu ā, anɔ́ɔ ísu ā kwú pīya oyī á.

²¹Odúúdú ɛbéenyi kú ísu ā le pɛ́ gekwú. Ísu ā gbɔɔ́ ō níípú nɛ̄hi, nɛ̄ ācɛ kú Íjīpiti ā í hɛ́ éŋkpɔ̄ kú nū gwá glá ɛ́ɛ́ gɛ ŋ́. Oyī ā yɔ̄ ɛga dóódu kú ajɛ kú Íjīpiti ā.

²²Amáŋ, ācɛ ō yíimabɔ̄ kú Íjīpiti ā lɛ ɔdā ékpónú ɔ́ɔmā yá, ŋmá lɛ úklɔ́ imabɔ̄ kú uwā. Ohígbū ɔ́ɔmā ā, ɔtū kú Uféro wɛ ōlɔfú kpɔ́ ɛ́gɛ́nɛ̄ ó tɛtɛ lɛ ā. Ɛ́gɛ́nɛ̄ Óndú ā tɛtɛ ka lɛ ā, ɔcɛ́ ā í jāhɔ̄ lɛ Umósīsi mɛ́mla Árɔ̄ni ŋ́.

²³Anɔ́ɔ Uféro nyɛ̄ɛ̄ le tá ɔlɛ́ nū á. Ó lɛ ɛlá wu ɔdā nēe yá nyā ŋ́.

²⁴Odúúdú ācɛ kú Íjīpiti ā, lɛ ɔ̄gɔ̄ bū okónu ísu ā, bá ī tíne éŋkpɔ̄ ō gwá. Ohígbū keé lɔfú gwá éŋkpɔ̄ kú ísu kú Unáyilu ā glá ɛ́ɛ́ gɛ ŋ́.

²⁵Ɛ̄cī ahāapa kú eko nɛ̄ Óndú ā je ísu pīya oyī ā le yɛ.